1 Iwe non ewe fansoun pwe inik me ruanu ier a wesino, me pwan ewe inik me nimu, iwe nengeni ekkewe chon kunon Jises ra forata ew mwichefenin Kraist non unusen ekkewe fonu unukun. Iwe meinisin ekkewe ra feito rer, me ra ennetin aier seni ar kewe tipis, ra papatais non iten Jises; iwe ra pwan angei ewe Ngun mi Fel.

2 Iwe non ewe fansoun non ewe inik me wonuen ier, ekkewe aramas meinisin ra siwin ngeni ewe Samon, won unungen ewe fonu, ekkewe chon Nifai me pwan ekkewe chon Leiman, iwe ese wor anini fengen me fitikoko me neir, iwe ir meinisin ra angang non pungoch emon ngeni pwan emon.

3 Iwe a wor rer mettoch meinisin mi nonnofengen me neir; iei minne ese wor mi pisekisek me woungaw, mi fotek me ngaseno, nge ir meinisin mi fis pwe repwe ngaseno, me chon angei niffangen nang.

4 Iwe non ewe fansoun pwe ewe inik me fisuen ier a pwan wesino, iwe mi chok soposopono ne wor kinamwe non ewe fonu.

5 Iwe mi wor auchean me amwararen angang a fis me ren ekkewe chon kunon Jises, ina popun pwe ra echikera ekkewe mi semwen, me amanaua ekkewe mi mano, me fori ekkewe mi pechema repwe fetan, me ekkewe mi chun repwe angei ar tufichin kuna, me ekkewe mi pung seninger repwe rongorong; me sokopaten manaman meinisin ra anganga nein ekkewe noun aramas; iwe esap non och mettoch ra anganga ekkewe manaman tiwenon chok non iten Jises.

6 Iwe iei ewe inik me wanuen ier a wesino, me pwan ewe inik me tiu, me faik me ew, me ewe faik me ru, ewer, pwan mwo tori faik me tiu ier ra wesino, me pwan ewe nime me ewin, me ewe nime me ru; ewer, iwe pwan tori nime me tiu ier ra wesino.

7 Iwe ewe Samon a fokkun efeiochureno me non ewe fonu; ewer, ina popun pwe ra kauuta teninimw sefan ikewe mi wor akkom teninimw ra kareno.

8 Ewer, pwan mwo ewe teninimw Saraemla mi napanap ra pwan fori pwe epwe kauuta sefan.

9 Nge mi wor akkom chommong teninimw minne ra fen kokotiw, iwe ekkewe konik ra feita nemor kewe; iei minne ekkei teninimw rese tongeni kauusefan.

10 Iwe iei, nengeni, non ewe fansoun pwe ekkewe aramasen Nifai ra pochokununo, me ra fokkun mwitir chommongono, me winiti ew fokkun aramas ningoch me murino.

11 Iwe ra apupunu, me semer me iner ra mutireno non apupunu, me ra feioch anongonong won chommongun ekkewe pwon minne ewe Samon a fen fori ngeni ir.

12 Iwe rese chiwen fetan me mwirin ekkewe mwokutukut me angangepin an ewe annukun Moses; nge ra fetan me mwirin ekkewe annuk minne ra fen angei seni ewe Samon me ar Kot, soposopono non achikipin me iotek, me non mwich fengen fan chommong ne iotek me rongorong ewe kapasen ewe Samon.

13 Iwe non ewe fansoun pwe ese wor anini fengen me nein ekkewe aramas meinisin, non unusen ewe fonu; nge mi wor manaman mi napanap a fis me nein ekkewe chon kunon Jises.

14 Iwe non ewe fansoun pwe ewe fik me ewin ier a wesino, me pwan ewe fik me ruen ier, ewer, iwe amuchunon, tori ewe fik me tiuen ier a wesino; ewer, pwan mwo ipuku ier a wesino, iwe ekkewe chon kunon Jises, ekkewe i a finireta, ra fen feino ngeni ewe parataisen Kot, tiwenon chok ekkewe unumon repwe nonnom; iwe mi pwan wor ekkoch chon kuno ra seikita non nenier kewe; me pwan chommong seni ena tappin aramas ra mano.

15 Iwe non ewe fansoun pwe ese wor anini fengen me non ewe fonu, pokiten ewe tongen Kot minne a nonnom non netipen ekkewe aramas.

16 Iwe ese wor nonowo, are anini, are fitikoko, are nisou, are chofona, are nii manau, are och sokkun mocheisou; iwe ennetin ese tongeni wor ew aramas mi kon pwapwa seni ir me nein ekkewe aramas meinisin ekkewe ra fen for me ren poun Kot.

17 Iwe ese wor chon sona, are chon nii manau, ese pwan wor chon Leiman, are och sokofesenin kinikinin aramas; nge ra chok ew, ekkewe noun Kraist, me chon muuni ewe muun Kot.

18 Iwe ifa watten feiochur! Pun ewe Samon a efeiochur non ar foffor meinisin; ewer, ra pwan mwo feioch me pisekisekino tori ipuku engon ier a wesino; iwe ewe aewin tappin aramas seni Kraist ra mano, iwe ese wor anini fengen non unusen ewe fonu.

19 Iwe non ewe fansoun pwe Nifai, i ewe a sopweno ne makkei ei amuchunon uruo, (iwe a sopweno ne makkei me won ekkewe seleichen Nifai) a mano, iwe noun we Amos a sopweno ne makkei non nenian we; iwe a pwan sopweno ne makkei won ekkewe seleichen Nifai.

20 Iwe a sopweno ne makkei non wanik me ruanu ier, iwe mi chok wor kinamwe non ewe fonu, tiwenon chok ew kukkun kinikinin ekkewe aramas ekkewe ra ungeni ewe mwichefen me wata wor ewe iten chon Leiman; iei minne a poputa ne wor chon Leiman sefan non ewe fonu.

21 Iwe non ewe fansoun pwe Amos a pwan mano, (iwe a ipuku tiwe me ruanu ier seni ewe fansoun wareton Kraist) iwe noun we Amos a sopweno ne makkei ewe uruo non nenian we; iwe a pwan sopweno ne makkei won ekkewe seleichen Nifai; iwe a pwan makketiw non ewe puken Nifai, minne iei ei puk.

22 Iwe non ewe fansoun pwe ruepuku ier a wesino; iwe ewe aruwen tappin aramas ra mano tiwenon chok fitemon.

23 Iwe iei ngang, Mormon, ua mochen pwe oupwe sinei pwe ekkewe aramas ra chommongono, ina popun pwe ra toropas fetan won unusen unungen ewe fonu, iwe ra pwan fokkun pisekisekino, pokiten ar fetanoch non Kraist.

24 Iwe iei, non ei ruepuku me ew ier a poputa ne wor me neir ekkewe ir mi nuapas non namanam tekia, awewe usun ufoufen uf mi watte niwinir, me sokopaten foun pwei mi murino meinisin, me seni ekkewe mettochun fonufan mi murino.

25 Iwe seni ena fansoun feino ar kewe pisek me feiochur kewe rese chiwen nonnofengen me neir.

26 Iwe ra poputa ne keimufesen non tettenir; iwe ra poputa ne kauuta mwichefen ngeni ir pwisin pwe repwe angei tufich, me poputa ne amam ewe ennetin mwichefenin Kraist.

27 Iwe non ewe fansoun pwe nupwen ruepuku engon ier a wesino a wor chommong mwichefen non ewe fonu; ewer, mi wor chommong mwichefen minne ra era pwe ir mi sinei Kraist, iwe nge ra amam ekkewe unusen kinikinin ewe kapas allim, ina popun pwe ra etiwa sokopaten fofforungaw meinisin, me ra awora met minne mi monomon ngeni i ewe mi fen annuk seni pokiten nimenimengaw.

28 Iwe ei mwichefen a fokkun chommongono chochon pokiten angangangaw, me pokiten ewe manamanen Setan ewe a kamwochuno netiper.

29 Iwe pwan, mi pwan wor ew mwichefen minne a amam ewe Kraist; iwe ra eriaffouni chon ewe ennetin mwichefenin Kraist, pokiten ar tipetekison me ar nuku non Kraist; iwe ra oputer pokiten ekkewe chommong manaman minne ra fis me neir.

30 Iei minne ra aea manaman me pochokunen mumuta won ekkewe chon kunon Jises ekkewe ir mi nonnom rer, iwe ra aturarenong non kanapus; nge me ren ewe manamanen ewe kapasen Kot, minne mi nom rer, ekkewe imwen kanapus ra keimufesen non ruepek, iwe ra feino fori manaman mi amwarar me neir.

31 Nge inamo, me nukun ekkei manaman meinisin, ekkewe aramas ra apochokunano netiper, me achocho ar repwe nireno, pwan mwo usun ekkewe chon Jew non Jerusalem ra achocho ar repwe nieno Jises, anongonong won an kapas.

32 Iwe ra aturarenong non nenien ekkei, iwe ra tou rese feiengaw.

33 Iwe ra pwan aturarenong non pwangen man mwacho, iwe ra kukkunou ngeni ekkewe man mwacho pwan mwo usun emon semirit ngeni emon appanen siip; iwe ra tou seni me neir, rese feiengaw.

34 Nge inamo, ekkewe aramas ra apochokunano netiper, pun ra emmwen me ren chommong pris me soufos mi chofona pwe repwe aueta chommong mwichefen, me fori sokopaten angangangaw meinisin. Iwe ra wichi ekkewe aramas noun Jises; nge ekkewe aramas noun Jises rese wichi sefanir. Iwe iei ra kukkununo non ar nuku me fofforungaw, seni ier ngeni ier, pwan mwo tori ruepuku inik ier a wesino.

35 Iwe iei non ewe fansoun non ei ier, ewer, non ewe ruepuku inik me ewin ier, a wor ew ennetin keimufesen me nein ekkewe aramas.

36 Iwe non ewe fansoun pwe non ei ier a fisita ew aramas ekkewe ra iteni ekkewe chon Nifai, iwe ir ekkewe ennetin chon nuku non Kraist; iwe me neir mi wor ekkewe ra eiteit me ren ekkewe chon Leiman—chon Jacob, me chon Joseph, me chon Soram;

37 Iei minne ekkewe ennetin chon nuku non Kraist, ir ekkewe ennetin chon fen ngeni Kraist, (me neir mi nom ekkewe unumon chon kunon Jises ekkewe repwe nonnom) ra iteni chon Nifai, me chon Jacob, me chon Joseph, me Soram.

38 Iwe non ewe fansoun pwe ir ekkewe rese etiwa ewe kapas allim ra iteni chon Leiman, me chon Lemuel, me chon Ishmael; iwe rese kukkununo non ar nuku, nge ra pwisin finata repwe ungeni ewe kapas allimen Kraist; iwe ra aiti nour kewe semirit pwe resap nuku, pwan mwo usun semer kewe, seni nepoputan, ra kukkununo.

39 Iwe pokiten fofforungaw me angang anieput an semer kewe, pwan mwo usun me nepoputan. Iwe ra kaeo ar repwe oput ekkewe noun Kot, pwan mwo usun ekkewe chon Leiman ra kaeo ar repwe oput ekkewe semiriten Nifai seni nepoputan.

40 Iwe non ewe fansoun pwe ruepuku faik me ruanu ier a wesino, iwe pwan mwokutukutun ekkewe aramas. Iwe ewe kon unusen kinikinin ekkewe aramas mi ngaw ra pochokuneno, me fokkun chommongono nap seni ekkewe aramasen Kot.

41 Iwe ir mi chok soposopono ne kauuta mwichefen ngeni ir pwisin, me enningareno ren sokopaten auchean mettoch meinisin. Iwe iei ruepuku nime ier a wesino, me pwan ruepuku wone ier.

42 Iwe non ewe fansoun pwe ewe kinikinin ekkewe aramas mi kon ngaw ra poputa ne forata ekkewe pwon ra akkaponu mi monomon me mwicheichen Katianton mi monomon.

43 Me pwan ekkewe aramas ir ra iteni ekkewe aramasen Nifai ra poputa ne namanam tekia non netiper, pokiten ar fokkun pisekisek, me ra winiti mi namanam tekia usun chok pwir kewe, ekkewe chon Leiman.

44 Iwe seni ei fansoun ekkewe chon kuno ra poputa ne netipechou pokiten tipisin ewe fonufan.

45 Iwe non ewe fansoun pwe nupwen wunupuku ier a wesino, ekkewe aramasen Nifai me pwan ekkewe aramasen Leiman ra fokkun ngaw ew usun chok pwan ewe ew.

46 Iwe non ewe fansoun pwe ekkewe chon sonan Katianton ra toropas fetan won unusen unungen ewe fonu; iwe ese chiwen wor mi tupwon tiwenon chok ekkewe chon kunon Jises. Iwe mi chommong gold me silver ra isonareno non nenien isois, me ra fori angangen amomo non sokopaten angangen amomo.

47 Iwe non ewe fansoun pwe mwirin wunupuku nimu ier a wesino, (me ekkewe aramas mi chok nonnom non fofforungaw) Amos a mano; me pwin we, Ammaron, a sopweno ne makkei ewe uruo non nenian we.

48 Iwe non ewe fansoun pwe nupwen wunupuku rue ier a wesino, Ammaron, pokiten a pesepes me ren ewe Ngun mi Fel, a opano ekkewe uruo minne mi monomon—ewer, pwan mwo ekkewe uruo mi monomon meinisin minne ra fen keititiw seni tappin mwirimwirin ngeni tappin mwirimwirin, minne ir mi monomon—pwan mwo tori ewe wunupuku rue ier seni wareton Kraist we.

49 Iwe a opareno ngeni ewe Samon, pwe repwe tongeni feito sefan ngeni nussun mwirimwirin ewe imwen Jacob, anongonong won ekkewe osini me ekkewe pwon an ewe Samon. Iwe iei nesoponon uruon Ammaron we.