1 Ut kik’ulman naq kiwan jun ^axyaab’ kuxej ki’ab’iman sa’ xyanqeb’ chixjunil li wankeb’ sa’ li ch’och’, chiru chixjunil lix b’een li ch’och’ a’in, ut kixyaab’asi:

2 Rahilal, rahilal, rahilal sa’ xb’een li tenamit a’in; ^arahilal sa’ xb’een li ani wankeb’ sa’ chixjunil li ch’och’ wi ink’a’ neke’xjal xk’a’uxl; xb’aan naq ^bnase’ek laj tza, ut eb’ lix anjel neke’saho’ sa’ xch’ool xb’aaneb’ li ani kamsinb’il reheb’ lix chaq’al ru alal ut rab’in lin tenamit; ut a’an xb’aan xmaa’usilaleb’ ut xtz’eqb’eetalileb’ naq t’anenaqeb’!

3 K’ehomaq reetal, li nimla tenamit Tzarahemla kink’at rik’in xam, ut li ani wankeb’ chi sa’.

4 Ut k’ehomaq reetal, li nimla tenamit Moroni kink’e chi sub’e’k sa’ xchamal li palaw, ut li ani wankeb’ chi sa’, chi ok chi ha’.

5 Ut k’ehomaq reetal, li nimla tenamit Moronihah kinmuq rub’el ch’och’, ut li ani wankeb’ chi sa’, re xmuqb’al chaq lix maa’usilaleb’ ut lix tz’eqb’eetalileb’ chiru wilob’aal, re naq lix kik’eleb’ li profeet ut eb’ laj santil paab’anel ink’a’ chik taachalq wik’in re xjitb’aleb’.

6 Ut k’ehomaq reetal, li tenamit Gilgal kink’e chi sub’e’k, ut li ani wankeb’ chi sa’ chi muqe’k sa’ xchamal li ch’och’;

7 Relik chi yaal, ut li tenamit Onihah ut li ani wankeb’ chi sa’, ut li tenamit Mokum ut li ani wankeb’ chi sa’, ut li tenamit Jerusalen ut li ani wankeb’ chi sa’; ut kink’e li ^aha’ chi taqe’k sa’ xna’ajeb’ a’an, re xmuqb’al chaq lix maa’usilaleb’ ut lix tz’eqb’eetalileb’ chiru wilob’aal, re naq lix kik’eleb’ li profeet ut eb’ laj santil paab’anel ink’a’ chik taataqe’q wik’in re xjitb’aleb’.

8 Ut k’ehomaq reetal, li tenamit Gadiandi, ut li tenamit Gadiomnah, ut li tenamit Jakob, ut li tenamit Gimgimno, chixjunileb’ a’in kink’e chi sub’e’k, ut kink’e ^atzuul ut taq’a sa’ xna’ajeb’ a’an, ut eb’ li wankeb’ chi sa’ kinmuq chaq sa’ xchamal li ch’och’, re xmuqb’al chaq lix maa’usilaleb’ ut lix tz’eqb’eetalileb’ chiru wilob’aal, re naq lix kik’eleb’ li profeet ut eb’ laj santil paab’anel ink’a’ chik taataqe’q wik’in re xjitb’aleb’.

9 Ut k’ehomaq reetal, li nimla tenamit Jakobugat, wankeb’ wi’ lix tenamit li rey aj Jakob, kink’e chi k’ate’k rik’in xam xb’aan lix maakeb’ ut lix maa’usilaleb’, li naq’axok re anchal lix maa’usilal chixjunil li ch’och’, xb’aan lix ^amuqmuukil kamsihomeb’ ut molameb’; xb’aan naq a’aneb’ a’an li ke’sachok chaq re lix tuqtuukilal intenamit ut lix jolomil tenamit re li ch’och’; jo’kan naq kink’eheb’ chi k’ate’k, re ^bxsachb’aleb’ chaq chiru li wilob’aal, re naq lix kik’eleb’ li profeet ut eb’ laj santil paab’anel ink’a’ chik taataqe’q wik’in re xjitb’aleb’.

10 Ut k’ehomaq reetal, li tenamit Laman, ut li tenamit Jox, ut li tenamit Gad, ut li tenamit Kixkumen, kink’e chi k’ate’k rik’in xam, ut li ani wankeb’ chi sa’, xb’aan xmaa’usilaleb’ sa’ risinkileb’ chaq li profeet, ut xkutinkil chi pek li ani keb’intaqla chixch’olob’ankil chiruheb’ chirix lix maa’usilaleb’ ut xtz’eqb’eetalileb’.

11 Ut rik’in naq ke’risiheb’ chaq chixjunil, jo’kan naq maajun tiik xch’ool kiwan sa’ xyanqeb’, kintaqla chi kub’eek ^axam re xsachb’aleb’, re naq lix maa’usilaleb’ ut lix tz’eqb’eetalileb’ taamuqe’q chaq chiru wilob’aal, re naq lix kik’eleb’ li profeet ut eb’ laj santil paab’anel li kintaqla sa’ xyanqeb’ ink’a’ taayaab’aq chaq we ^bchi ch’och’ re xjitb’aleb’.

12 Ut ^ak’iila ninqi sachok kink’e chi chalk sa’ xb’een li ch’och’ a’in, ut sa’ xb’een li tenamit a’in, xb’aan xmaa’usilaleb’ ut xtz’eqb’eetalileb’.

13 Aay, chejunilex laa’ex li li ^akolb’il eeyu’am xb’aan naq tiik wi’chik eech’ool chiruheb’ a’an, ma ink’a’ anajwan texsutq’iiq wik’in, ut teejal eek’a’uxl chirix lee maak, ut taajale’q eech’ool re taaruuq ^btexink’irtesi?

14 Relik chi yaal, ninye chi yaal eere, wi ^atexchalq wik’in taawanq ^beeyu’am chi junelik. K’ehomaq reetal, ye’b’il li ^cwuq’ aj uxtaan eere, ut ani taa’ajoq re chalk, a’an tink’ul, ut osob’tesinb’ileb’ li neke’chal wik’in.

15 K’ehomaq reetal, laa’in li Jesukristo, li Ralal li Dios. Laa’in ^akinyo’ob’tesi li choxa ut li ch’och’, ut chixjunil li k’a’aq re ru wan chi sa’. Laa’in kinwan rik’in li Yuwa’b’ej chalen chaq sa’ xtiklajik. ^bLaa’in wankin rik’in li Yuwa’b’ej, ut li Yuwa’b’ej wik’in laa’in, ut wik’in laa’in li Yuwa’b’ej kixnima xloq’al lix k’ab’a’.

16 Kinchal rik’ineb’ li we, ut eb’ li we ^amoko kine’xk’ul ta. Ut eb’ li loq’laj hu chirix lin k’ulunik ak tz’aqlojenaqeb’ ru.

17 Ut jo’ k’ihal li ke’k’uluk we, ^akink’e reheb’ a’an naq te’ok chaq choq’ ralal li Dios; ut jo’kan ajwi’ tink’e re jo’ k’ihal li te’paab’anq re lin k’ab’a’, xb’aan naq k’ehomaq reetal, inb’aan laa’in nachal li ^btojb’al-ix, ut wik’in laa’in tz’aqlojenaq ru lix ^cchaq’rab’ laj Moises.

18 Laa’in lix ^asaqen ut lix yu’am li ruchich’och’. Laa’in ^bli Alfa ut li Omega, lix tiklajik ut li roso’jik.

19 Ut ^amoko teeq’axtesi ta chik chiwu li hoyb’il kik’; relik chi yaal, taak’ehe’q xraqik lee mayej ut lee k’atb’il mayej, xb’aan naq maajun reheb’ lee mayej ut lee k’atb’il mayej tink’ulub’a.

20 Ut teeq’axtesi choq’ ^amayej we jun yot’b’il ch’oolej ut jun tuulanil musiq’ej. Ut ani nachal wik’in chi yot’b’il xch’ool ut tuulan xmusiq’, a’an ^btinkub’si xha’ rik’in xam ut rik’in li Santil Musiq’ej, jo’ chanru ajwi’ naq eb’ laj Lamanita, xb’aan xpaab’aaleb’ chiwix sa’ xkutankil lix jalajikeb’ xch’ool, ke’kub’e xha’ rik’in xam ut rik’in li Santil Musiq’ej, ut moko ke’xnaw ta.

21 K’ehomaq reetal, kinchal sa’ li ruchich’och’ re xk’amb’al chaq li tojb’al-ix sa’ li ruchich’och’, re xkolb’al li ruchich’och’ chiru li maak.

22 Jo’kan ut, ani ^anaxjal xk’a’uxl ut nachal wik’in chanchan jun ch’ina ^bal, a’an tink’ul, xb’aan naq re xkomon a’an li rawa’b’ejihom li Dios. K’ehomaq reetal, choq’ re xkomon a’an ^ckinq’axtesi inyu’am, ut kink’ul wi’chik; jo’kan ut, jalomaq eek’a’uxl, ut chalqex wik’in ex xmaril li ruchich’och’, ut chexkole’q.