1 Ao e a koro bukina bwa iai te ^abwanaa ae a ongo i buakoia kaain te aonaba ni kabane iaon te aba, ae takaruaea:

2 Te maraia, te maraia, te maraia nakoia te botanaomata aio; te ^amaraia nakoia kaain te aonaba aio ni kabane ngkana aki rairinanoia; bwa e ^bngarengare te riaboro, ao a kimwareirei ana anera, ibukin tiringakia natiia mwaane ma aine au botanaomata aika a tamaroa; ao e riki aio ibukin aia bure ma aia mwakuri aika a bati n ribaki mangaia are a bwaka.

3 Nooria, I a tia ni kabueka te kaawa are Taraemera ma kaaina n te ai.

4 Ao nooria, I a tia ni karekea te anga are te kaawa are Moronaai e na iinako i kabin marawa, ao a na bwabwa kaaina.

5 Ao nooria, te kaawa ae korakora are Moronaaia I a tia n rabunna n te tano, ma kaaina, ni karaba aia bure ma aia mwakuri aika bati n ribaki mai i matau, bwa e aonga n ae raraaia burabeti ma aomata aika itiaki a na aki manga roroko irou ni kaitaraia.

6 Ao nooria, I a tia ni karekea te anga are e na iinako iai te kaawa are Kirekara, ao kaaina a taunaki i kabin te tano.

7 Eng, te kaawa are bubura are Oniia ao kaaina, ao te kaawa are Mokam ao kaaina, ao te kaawa are Ierutarem ao kaaina; ao I karekea te anga are a na oneaki mwiia n te ^aran, bwa e na karaba buakakaia ma aia mwakuri aika bati n ribaki mai i matau, bwa e aonga n ae raraaia burabeti ma aomata aika itiaki a na aki manga roroko irou ni kaitaraia.

8 Ao nooria, te kaawa are Kateantei, ao te kaawa are Kateomna, ao te kaawa are Iakobwa, ao te kaawa are Kimkimono, ni kabane aikai I karekea angan ae a na iinako, ao I karaoi ^atabuki ma mwarua bwa onean mwiia; ao kaaia I a tia n tauniia i kabin te tano, bwa e aonga n raba buakakaia ma aia mwakuri aika bati n ribaki mai i matau, bwa e aonga n ae raraaia burabeti ma aomata aika itiaki a na aki manga roroko irou ni kaitaraia.

9 Ao nooria, te kaawa are Iakobuka, are e kaainaki irouia ana botanaomata te uea are Iakobwa, I a tia n tua bwa e na kabuekaki n te ai ibukin aia bure ma buakakaia, are e a bon riaoni buakakan te aonaba ni kabane, ibukin aia tiritiri ni ^akaraba ao aia mwakuri ni kamwamwane aika a raba; bwa bon ngaia aika a urua rauiia au botanaomata ao te tautaeka n te aba; mangaia are I karekea te anga ae a na kabuekaki iai, bwa N na ^bkamaunaia mai matau, bwa e aonga n ae raraaia burabeti ma aomata aika itiaki a na aki manga roroko irou ni kaitaraia.

10 Ao nooria, te kaawa are Reimwan, ao te kaawa are Ioti, ao te kaawa are Kata, ao te kaawa are Kitekuman, I a tia ni karekea te anga bwa a na kabuekaki n te ai, ma kaaia, ibukin buakakaia ngke a teweia nako burabeti, ma ni karebanaia n te atibu ake I a tia ni kanakomaia bwa a na tataekina nakoia buakakaia ma aia mwakuri aika bati n ribaki.

11 Ao ibukina bwa a bon teweia nako, ao bon akea ae raoiroi i buakoia, I karaoa te ^aai bwa a na kamaunaki, n te aro are e na raba buakakaia ma aia mwakuri aika bati n ribaki mai i matau, bwa e aonga n ae raraaia burabeti ma aomata aika itiaki ake I a tia ni kanakomaia nako buakoia a na aki tang ^bmai aontano ni kabuakakaia.

12 Ao a ^amwaiti urubwai ake I karekea angaia bwa a na roko nakon aon te aba aio, ao i aoia te botanaomata aio ibukin buakakaia ma aia mwakuri aika bati n ribaki.

13 O ngkami aika kam ^akamaiuaki ibukina bwa kam raoiroi riki nakoia, kam aki okirai ngkai, ma n rairinanomi man ami bure, ma n rairaki, bwa I aonga ni ^bkamarurungngkami.

14 Eng, e koaua ae N na taekinna nakoimi, ngkana kam ^akawarai ao e na reke iroumi te ^bmaiu ae akea tokina. Nooria, e aroraki ^cbaiu ae nanoanga nakoimi, ao ane e roko nakoiu ao N na butimwaia; ao a na kakabwaiaki akana a na roko nakoiu.

15 Nooria, bon Ngai Iesu Kristo Natin te Atua. I ^akarika karawa ma aonaba, ao bwaai ni kabane ake a mena iai. Bon raou te Tama mai i moana. ^bI mena iroun te Tama, ao te Tama e mena irou; ao e mimitong aran te Tama irou.

16 I roko nakoia ake au bwai, ao ake au bwai ^aaki butimwaeai. Ao koroboki aika tabu ake a kaineti ma rokou a kakoroaki nanoia.

17 Ao te mwaiti ake a butimwaeai, I a bon tia ni ^akaraoia bwa a na riki bwa natin te Atua mwaane; ao e na riki aio naba nakoia ake a na kakoaua arau, bwa nooria, e na reke te ^bkaboaki mai irou, ao e na kakoroaki nanon ana ^ctua Mote irou.

18 Ngai te ^aoota ao maiun te aonaba. Ngai te ^bArebwa ao te Omeka, te moan ao te kabane.

19 Ao kam na ^aaki manga oki n uota kawawaean te raraa nakoiu; eng, ami karea ao ami bwaintangira aika a kabuokaki a riai n toki, bwa N na bon aki butimwaea ami anga karea ao ami bwaintangira aika a kabuokaki.

20 Ao kam na anganai bwa ami ^akarea te nano ae uruaki ao te tamnei ae raraoma. Ao ane e kawarai ma te nano ae uruaki ao te tamnei ae raraoma, ao N na ^bbwabetitoia n te ai ao te Tamnei ae Raoiroi, n ai aroia Reimwanaite, ibukin aia onimaki irou n te tai are a rairaki iai, ao a bwabetitoaki n te ai ao te Tamnei ae Raoiroi, ao a bon aki ataia.

21 Nooria, I roko nakon te aonaba n uota te kabomwi nako te aonaba, bwa N na kamaiua te aonaba man te bure.

22 Mangaia are, ane e ^arairananona ao ma ni kawarai n aron te ^bteei ae uarereke, ao N na butimwaia bwa ana bwai Uean te Atua. Nooria, bwa I bukiia naakai ao I a tia ni ^ckawenea maiu, ao ma ni manga anaia riki, mangaia are rairinanomi, ao roko nakoiu man tokin aonaba, ao kam na kamaiuaki.