1 Pea naʻe hoko ʻo pehē naʻe ʻi ai ha ^aleʻo naʻe ongona ʻe he kakai kotoa ʻo e māmaní, ʻi he funga ʻo e fonuá ni hono kotoa, ʻoku kalanga:

2 Malaʻia, malaʻia, malaʻia ki he kakaí ni; ^amalaʻia ki he kakai ʻo e māmaní hono kotoa kae ʻoua kuo nau fakatomala; he ʻoku ^bkata ʻa e tēvoló, pea ʻoku fiefia ʻa ʻene kau ʻāngeló, koeʻuhi ko e mate ʻa e ngaahi foha mo e ngaahi ʻofefine hoihoifua ʻo hoku kakaí; pea kuo tupu ʻi heʻenau angahalá mo e ngaahi anga-fakalieliá ʻa ʻenau maté!

3 Vakai, ko e fuʻu kolo lahi ko Seilahemalá kuó u tutu ʻaki ʻa e afi, pea mo hono kakai ʻo iá.

4 Pea vakai, ko e fuʻu kolo lahi ko Molonaí kuó u fakangalo hifo ʻi he ngaahi loloto ʻo e tahí, pea fakamelemo mo hono kakaí.

5 Pea vakai, ko e fuʻu kolo lahi ko Molonaihaá kuó u ʻufiʻufi ʻaki ʻa e kelekelé, pea mo hono kakai ʻo iá, ke fufuuʻi ʻenau ngaahi angahalá mo ʻenau ngaahi anga-fakalieliá mei hoku matá, koeʻuhi ke ʻoua naʻá ku tauteaʻi ʻa kinautolu koeʻuhi ko e kau palōfita mo e kau māʻoniʻoni ʻa ia kuo nau tāmateʻí.

6 Pea vakai, ko e kolo ko Kilikalí kuó u ngaohi ke ngalo hifo, pea mo hono kakai ʻo iá ke tanu hifo ʻi he ngaahi loloto ʻo e kelekelé;

7 ʻIo, pea mo e kolo ko ʻOnaihaá mo hono kakai ʻo iá, mo e kolo ko Moikumí mo hono kakai ʻo iá, mo e kolo ko Selūsalemá mo hono kakai ʻo iá; pea kuó u pule ke ʻoho mai ʻa e ngaahi ^avaí ki he ngaahi potu ne nau ʻi aí, ke fufuuʻi ʻenau ngaahi fai angahalá mo e ngaahi anga-fakalieliá mei hoku matá, koeʻuhi ke ʻoua naʻá ku tauteaʻi ʻa kinautolu koeʻuhi ko e kau palōfita mo e kau māʻoniʻoni ʻa ia kuo nau tāmateʻí.

8 Pea vakai, ko e kolo ko Katianetaí, mo e kolo ko Katiomaná mo e kolo ko Sēkopé, mo e kolo ko Kimikimó, kuó u fakangalo hifo ʻa e ngaahi koló ni kotoa, peá u ngaohi ʻa e ngaahi ^amoʻunga mo e ngaahi teleʻa ʻi he potu naʻa nau ʻi aí; pea kuó u tanu honau kakaí ʻi he ngaahi loloto ʻo e kelekelé, ke fufuuʻi ʻenau fai angahalá mo e ngaahi anga-fakalieliá mei hoku matá, koeʻuhi ke ʻoua naʻá ku tauteaʻi ʻa kinautolu koeʻuhi ko e kau palōfita mo e kau māʻoniʻoni ʻa ia kuo nau tāmateʻí.

9 Pea vakai, ko e fuʻu kolo lahi ko ia ko Sēkopekatí, ʻa ia naʻe nofoʻi ʻe he kakai ʻo e tuʻi ko Sēkopé, kuó u pule ke tutu ia ʻaki ʻa e afi koeʻuhi ko ʻenau ngaahi fai angahalá mo ʻenau fai halá, ʻa ia naʻe lahi hake ʻi he fai angahala ʻa e māmaní kotoa, koeʻuhi ko ʻenau ngaahi fakapō ^afufuú mo e ngaahi kautahá; he ko kinautolu naʻa nau maumauʻi ʻa e melino ʻa hoku kakaí mo e puleʻanga ʻo e fonuá; ko ia naʻá ku pule ai ke tutu ʻa kinautolu, ke ^bfakaʻauha ʻa kinautolu mei hoku matá, koeʻuhi ke ʻoua naʻá ku tauteaʻi ʻa kinautolu koeʻuhi ko e kau palōfita mo e kau māʻoniʻoni ʻa ia kuo nau tāmateʻí.

10 Pea vakai, ko e kolo ko Leimaná, mo e kolo ko Sesé, mo e kolo ko Katí, mo e kolo ko Kisikumení, kuó u pule ke tutu ʻaki ʻa e afi, mo honau kakaí, koeʻuhi ko ʻenau fai angahala ʻi hono kapusi ki tuʻa ʻa e kau palōfitá, mo tolomakaʻi ʻa kinautolu ʻa ia naʻá ku fekau atu ke nau malanga kiate kinautolu ʻi heʻenau angahalá mo ʻenau ngaahi anga-fakalieliá.

11 Pea koeʻuhi ko ʻenau kapusi ʻa kinautolu kotoa ki tuʻá, ʻo aʻu ki he ʻikai toe ʻiate kinautolu ha taha ʻoku māʻoniʻoni, ko ia naʻá ku fekau hifo ʻa e ^aafi ʻo fakaʻauha ʻa kinautolu, koeʻuhi ke fufuuʻi ʻenau fai angahalá mo e ngaahi anga-fakalieliá mei hoku matá, koeʻuhi ke ʻoua naʻa tangi kiate au ʻa e toto ʻo e kau palōfitá mo e kau māʻoniʻoni kuó u fekauʻi atu kiate kinautolú ^bmei he kelekelé ʻo talatalaakiʻi ʻa kinautolu.

12 Pea kuo ^alahi ha ngaahi fakaʻauha lalahi kuó u pule ke hoko ki he fonuá ni, pea ki he kakaí ni, koeʻuhi ko ʻenau fai angahalá mo ʻenau ngaahi anga-fakalieliá.

13 ʻA kimoutolu kotoa pē kuo ^afakahaofi koeʻuhi kuo mou māʻoniʻoni lahi hake ʻiate kinautolú, he ʻikai koā te mou tafoki mai ʻeni kiate au, pea fakatomala mei hoʻomou ngaahi angahalá, ʻo liliu, koeʻuhi ke u ^bfakamoʻui ʻa kimoutolu?

14 ʻIo, ko e moʻoni ʻoku ou pehē kiate kimoutolu, kapau te mou ^ahaʻu kiate au te mou maʻu ʻa e moʻui ^btaʻengatá. Vakai, ʻoku mafao atu hoku ^cnima ʻo e ʻaloʻofá kiate kimoutolu, pea ko ia ia ʻe haʻú, te u maʻu ia; pea ʻoku monūʻia ʻa kinautolu ʻa ia ʻoku haʻu kiate aú.

15 Vakai, ko au ko Sīsū Kalaisi ko e ʻAlo ʻo e ʻOtuá. Naʻá ku ^afakatupu ʻa e ngaahi langí mo e māmaní, pea mo e ngaahi meʻa kotoa pē ʻoku ʻi aí. Naʻá ku nofo mo e Tamaí talu mei he kamataʻangá. ʻOku ^bou ʻi he Tamaí, pea ʻoku ʻiate au ʻa e Tamaí; pea kuo fakaongoongoleleiʻi ʻiate au ʻe he Tamaí ʻa hono huafá.

16 Naʻá ku haʻu ki hoku kakaí, ka naʻe ʻikai ^atali au ʻe hoku kakaí. Pea ko e ngaahi folofola ʻoku kau ki heʻeku haʻú kuo fakahoko ia.

17 Pea ko kinautolu kotoa pē naʻa nau tali aú, kuó u ^atuku kiate kinautolu ke nau hoko ko e ngaahi foha ʻo e ʻOtuá; pea ʻe pehē foki ʻeku foaki ʻa e totonu kiate kinautolu kotoa pē ʻa ia ʻe tui ki hoku hingoá, he vakai, ʻoku fou ʻiate au ʻa e ^bhuhuʻí, pea ʻoku ʻiate au hono fakahoko ʻo e ^cfono ʻa Mōsesé.

18 Ko au ko e ^amaama pea mo e moʻui ʻo e māmaní. Ko au ko e ^bʻĀlifá mo e ʻŌmeká, ko e kamataʻangá mo e ngataʻangá.

19 Pea ʻe ^aʻikai te mou toe feilaulau ʻaki kiate au ha toto kuo lilingi; ʻio, ʻe fakangata hoʻomou ngaahi feilaulaú mo hoʻomou ngaahi feilaulau tutú, koeʻuhi ʻe ʻikai te u tali haʻamou ngaahi feilaulau pe ngaahi feilaulau tutu ʻe taha.

20 Pea te mou ʻoatu kiate au ʻa e ^afeilaulau ko e loto-mafesifesi mo e laumālie fakatomala. Pea ko ia ia ʻe haʻu kiate au mo e loto-mafesifesi mo e laumālie fakatomalá, te u ^bpapitaiso ia ʻaki ʻa e afi mo e Laumālie Māʻoniʻoni, ʻo hangē ko e kau Leimaná, koeʻuhi ko ʻenau tui kiate au ʻi he taimi naʻe fakaului ai ʻa kinautolú, naʻe papitaiso ʻaki ʻa e afi mo e Laumālie Māʻoniʻoni, ka naʻe ʻikai te nau ʻiloʻi ia.

21 Vakai, kuó u haʻu ki he māmaní ke ʻomi ʻa e huhuʻí ki he māmaní ke fakamoʻui ʻa e māmaní mei he angahalá.

22 Ko ia, ko ia ia ʻe ^afakatomala pea haʻu kiate au ʻo hangē ko ha ^btamasiʻi siʻí, te u tali ia, he ʻoku ʻo e faʻahinga peheé ʻa e puleʻanga ʻo e ʻOtuá. Vakai, koeʻuhi ko e faʻahinga peheé kuó u ^ctuku hifo ʻa ʻeku moʻuí; pea kuó u toe toʻo hake ia; ko ia mou fakatomala, pea haʻu kiate au ʻa kimoutolu ʻa e ngaahi ngataʻanga ʻo e māmaní, pea moʻui.