1 Ao ngkai nooria, bon akea te aomata ae maiu i buakoia aomata ni kabane ake Nibwaite ae kakewea naba teutana aia taeka burabeti aika a tabu ake a tia n taetae; bwa a bon ataia bwa a riai ni kakoroaki bukiia.

2 Ao a ataia bwa e riai bwa e na tia n roko Kristo, ibukin taian kanikina aika a mwaiti ake a tia n anganaki, n aron aia taeka burabeti; ao ibukin bwaai ake a tia ni kakoroaki bukiia a bon ataia bwa a riai ni kakoroaki bukin bwaai ni kabane n aron are e a tia n taekinaki.

3 Mangaia are a bon mwanuokin aia bure nako, ma aia mwakuri aika bati n ribaki, ma aroia ni kabekaau, ao a toro iroun te Atua ma te botumwaaka n te ngaina ao te bong.

4 Ao e koro bukina bwa ngke e a tia n uotiia nako kamwarua ni kabane bwa bure, n te aro are bon akea temanna ae birinako mai i buakoia ake aki tiringaki, ao a teweia nako aia bure nako nanon te nne ni kaikain, ao a tua bwa e na kabwarabwaraki ana taeka te Atua nakoia; ao te mwaitiia aomata ake a rairinanoia ma ni karaoa te berita ae tabu a bon aki tiringaki ma a bon ^akainaomataki.

5 Ma ni kabane ake aki karaoa te berita ae tabu, a bon reiti nako naba n iai nanoia ae raba ni kan tiritiri, eng, ni kabane ake a kuneaki n taekin taeka ni kakamaku ni kaaitaraia tariia a boni kabuakakaki ma ni katuaeaki n aron te tua.

6 Mangaia are a katoki mwakuri ni kamwamwane ake a buakaka, a karaba ao a kammaira, ake a bon karika te buakaka ae korakora ao are a karaoaki tiritiri aika a mwaiti ma iai.

7 Mangaia are e a toki te ^akauabwi ma uoua n ririki, ao te kauabwi ma teniua n ririki naba ao te kauabwi ma aua n ririki naba ao te kauabwi ma nimaua; mangaia are bon uabwi ma nimaua te ririki ae a tia ni bane.

8 Ao a mwaiti bwaai aika a tia n riki, are n aia taratara tabemwaang, a na korakora ma ni kamiimi; ma e ngae n anne, a bon aki kona ni bane ni koreaki i nanon te boki aei; eng, te boki aei e bon aki kona n taua ^akatebubuan mwakoron are e karaoaki i buakoia aomata aika a mwaiti i nanon te maan ae uabwi ma nimaua te ririki.

9 Ma nooria bon iai mwiin ^arongorongo ake a kaota aia waaki te botanaomata aio; ao ana rongorongo Nibwaai are e anga ae e kimototo riki ma e koaua.

10 Mangaia are I a korea au rongorongo ibukin bwaai aikai n aron ana rongorongo Nibwaai, are e koreaki iaon bwaatua ake aranaki bwa ana bwaatua Nibwaai.

11 Ao nooria, I koroi au rongorongo iaon bwaatua ake I karaoi n oini baiu.

12 Ao nooria, I aranaki bwa ^aMoomon, bwa I aranaki i mwin te ^baba are Moomon, te aba are e katea iai te ekaretia Aramwa i buakoia aomata, eng, te moan ekaretia are e kateaki i buakoia i mwin riaoan te tua irouia.

13 Nooria, bon Ngai ana reirei Iesu Kristo, are Natin te Atua. I a tia ni weteaki irouna bwa N na taekina ana taeka i buakoia ana botanaomata, bwa e aonga n reke irouia te maiu are aki totoki.

14 Ao e bon riai bwa N na koroi ^arongorongon bwaai aika a tia ni karaoaki, n aron ana kantaninga te Atua, ao aia tataro naake a tia ni kiitana te maiu aei, aika a tabu, a na riai ni kakoroaki nanoia n aron aia onimaki—

15 Eng, te rongorongo ae uarereke ibukin are e a tia n riki man te tai are e kiitana iai Ierutarem Riaai, nakon te tai ae ngkai.

16 Mangaia are I a korea au rongorongo man rongorongo ake a anga naake imwaiu, ni karokoa moanakin au bong ni maiu.

17 Ao ngkanne I a bon koroi ^arongorongon bwaai ake I a tia n noori n oin matau.

18 Ao I ataia bwa te rongorongo ae I koreia e bon motiraoi ao e koaua; ma e ngae n anne a mwaiti bwaai ake, n oin ara taetae, ti aki kona ni ^akoroi taekaia.

19 Ao ngkai I a boni katoka au taetae, are bon ibukiu, ma ni waaki n anga au rongorongo iaoni bwaai ake a riki i i mwaain au tai.

20 Bon Moomon ngai, ao bon kanoan Riaai ni koaua ngai. Bon iai bukin ae N na kakabwaia iai Atuau ao au Tia Kamaiu ae Iesu Kristo, bwa e kaotinakoia ara bakatibu man te aba are Ierutarem, (ao bon ^aakea a e ataia ma bon ti ngaia ao naake e kairiia man te aba anne) ao e a tia n anganai ma au botanaomata te atatai ae bati ibukin kamaiuan tamneira.

21 E bon koaua bwa e a tia ni kakabwaiaa te ^abata are ^bIakobwa, ao e a tia ni karaoa te ^cnanoanganakoia kanoan Iotebwa.

22 Ao ^angkana arona bwa natin Riaai a bon tia ni kaawakin ana tua ao e a bon tia ni kakabwaiaia man anganiia te kaubwai n aron ana taeka.

23 Eng, ao e boni koaua bwa e na manga kairiia ^anikiraia kanoan Iotebwa nakon ^bataakin te Uea ae Atuaia.

24 Ao ngkai e bon maiu te Uea, e na bon ^aikotiia man maninginingin te aonaba ake aua ni kabane nikiran kanoan Iakobwa, ake a kamaenakoaki ni kabuta aon te aonaba.

25 Ao ngkai e a tia ni karaoa te berita ae tabu ma kaain te bata are Iakobwa, ao ai uana naba bwa berita ni kabane aika a tabu ake e a tia ni karaoi ma te bata are Iakobwa a na boni bane ni kakoroaki bukiia n oin ana tai, ibukin ^akaokakiia kaain te bata are Iakobwa ni kabane nakon ataakin te berita ae tabu are e a tia ni karaoia ma ngaia.

26 Ao ngkanne a na ^aataa aia Tia Kabomwi, are Iesu Kristo, are Natin te Atua; ao ngkanne a na bane n ikotaki man maninginingin te aonaba ake aua nakon oin abaia, are a tia ni kamaenakoaki mai iai; eng, ngkai e maiu te Uea ao e na bon riki aei. Amen.