1 Ao e a koro bukina bwa ngke e a tia Iesu n taekin taeka aikai, e taetae nakoia ana reirei, temanna i mwin temanna, ni kangai nakoia: Teraa te bwai ae kam tangiria mai irou, i mwin nakou nakon te Tama?

2 Ao a bane n taetae, ma ti teniman ae aki, ni kangai: Ti tangiria bwa ngkana e a toki maiura n aomata, ao ngkana e a toki ara mwakuri are ko weteira nako iai, bwa ti na waekoa n roko nakoim n ueam.

3 Ao e taku nakoia: Kam na kakabwaiaki ibukin te bwai aei are kam tangiria mairoou; ngaia ae ngkana e a tia ni koro itibwi ma uoua ami ririki ao kam na roko n ueau; ao kam na kunea te ^arau irou.

4 Ao ngke e a tia n taetae nakoia, e rairaki nakoia ake teniman, man taku nakoia: Teraa ae kam tangiria bwa a na karaoaki nakoimi, ngkana I a nakon te Tama?

5 Ao a rawawata i nanoia, bwa a rawa n taekina te bwai are a tangiria mai irouna.

6 Ao e taku nakoia: Nooria, I ^aatai ami iango, ao kam tangira te bwai are e tangiria mai irou ^bIoane, are e tangiraki irou, are bon raou n au tai ni mwakuri, i mwaain are I tabekaki rake irouia Iutaia.

7 Ngaia are kam na kakabwaiaki bwa kam na bon aki ^akatoonga te ^bmate; ma kam na maiu man noori ni kabane ana mwakuri te Tama nakoia natia aomata, ni karokoa ae a kakoroaki bukin bwaai nako n aron nanon te Tama, ngkana I roko ni mimitongiu ma ^cmwaakan karawa.

8 Ao kam na bon aki rinanon marakin te mate ma ngkana I roko ni mimitongiu ao kam na bitaki n te rube ni mata man te ^arabwata ae maamate nakon te ^brabwata ae aki maamate; ao ngkanne kam na kakabwaiaki n uean Tamau.

9 Ao riki, kam na bon aki namakina te maraki ngkai kam maiu n rabwata, ao akea naba te nanokawaki ma ti ibukin buren te aonaba; ao N na karaoa aio ibukin te bwai are kam tangiria ma iroou, bwa kam bon tangiria bwa kam na ^akairia tamneia aomata nakoiu, n ana tai te aonaba ni iai.

10 Ao ibukin aio e na reke iroumi ^abwaninin te kimwareirei; ao kam na tekateka n uean Tamau; eng, e na onrake kimwareireimi, n aron te Tama ngke e anganai bwaninin te kimwareirei; ao kam na riki n arou, ao Ngai bon aiaron te Tama; ao ti ^bteuana Ngai ma te Tama.

11 Ao te ^aTamnei are e Raoiroi e taekina koauan te Tama ao Ngai; ao te Tama e anga te Tamnei are e Raoiroi nakoia natia aomata, ibukiu.

12 Ao e a koro bukina bwa ngke e a tia Iesu n taekin taeka aikai, e riingia ni kabane n tabonibaina, ma ti ake teniman ake a na tiku, ao ngkanne e a kitania.

13 Ao nooria, a uki karawa, ao a ^atabekaki rake nako karawa, ao a noori man ongo bwaai aika aikoa kona n taekinaki.

14 Ao a bon ^atabuaki bwa a na taekin; ao a bon aki naba anganaki te mwaaka bwa a na taekin bwaai ake a noori man ongo;

15 Ao a bon aki ataia bwa a mena i nanon rabwataia ke i tinanikun rabwataia, bwa titebo irouia ma a ^aoneaki rabwataia, n te aro are a bitaki man te rabwata n iriko nakon te aro n aki maamate, n te aro are a kona n noori iai ana bwai te Atua.

16 Ao e a koro bukina bwa a bon mwakuri riki iaon te aba; ma e ngae n anne a bon aki mwakuri ni bwaai ake a tia n ongo man noori, ibukin te tua are a anganaki i karawa.

17 Ao ngkai, I aki ataia bwa a rabwata n aomata ke a rabwata n aki maamate man te bong are e bitaki iai rabwataia ke aki.

18 Ma ti aei ae I ataia, n aron te rongorongo are tia n anganaki—a bon mwananga n te aonaba, ma ni mwakuri n ibuobuoki nakoia aomata ni kabane, n ikotiia aika a mwaiti nakon te ekaretia ake a kakoaua aia kabwarabwara; ao a bwabetitoia, ao mwaitia ake a bwabetitoaki a bon karekea te Tamnei are e Raoiroi.

19 Ao a teweaki nako nanon te nne ni kaikain irouia ake tiaki kaain te ekaretia. Ao aikoa kona n tauia ^anne ni kaikain bwa a raeuaki nakon uoua.

20 Ao a teweaki nako aantano; ma a bon orea te aonaba n ana taeka te Atua, n te aro are a kainaomataaki ma i kabin te aonaba ni ^amwaakana; ngaia are aki kona ni keken taian mwanono aika a tau ibukiia.

21 Ao a teweaki nako nanon te ^atabo ni kanai ai teniua te tai ao a bon aki ikoaki.

22 Ao a bon teweaki nako nanon ^anneia maan aika a kakang uoua te tai; ao nooria, a bon takakaro ma taian man n aiaron te teei ma te tiibu te teei ae mamma, ao a bon aki ikoaki.

23 Ao e a koro bukina bwa a bon mwananga i buakoia ana botanaomata Nibwaai, ma ni kabwarabwara ana ^aeuangkerio Kristo nakoia aomata ni kabane iaon te aba; ao a bon rairaki nakon te Uea, ao a bane n ikotaki nakon ana ekaretia Kristo, ao ngaia are a kakabwaiaki aomatan te ^broro anne, n aron ana taeka Iesu.

24 Ao ngkai, Ngai, Moomon, I a katoka au taetae ae kaineti ma bwai aikai moa n te tai aei.

25 Nooria, N nang koroi ^aaraia ake aki katoonga te mate, ma e katabuai te Uea; ngaia are I a aki koroi, bwa a raba man te aonaba.

26 Ma nooria, I a tia n nooria, ao a bon tia ni karaoi aia mwakuri n ibuobuoki nakoiu.

27 Ao nooria, a na mena i buakoia Tientaire, ao a na aki ataaki irouia Tientaire.

28 A na mena naba i buakoia Iutaia, ao a na bon aki ataaki irouia Iutaia.

29 Ao e na koro bukina bwa a na karaoa te mwakuri n ibuobuoki n te tai ae boraoi ma wanawanan te Uea nakoia a na baronga Iteraera ake a ^amaenako, ao nakoia aaba nako, reeti, neewe ao aomata ni kabane, ao a na kairia mai iai nakon Iesu aomata aika a mwaiti, bwa e aonga ni koro bukin te bwai are a tangiria, ao ibukin naba mwaakan te Atua ni kamatoa te koaua are e mena irouia.

30 Ao a bon riki n aroia ana ^aanera te Atua, ao ngkana a tataro nakon te Tama n aran Iesu a kona ni kaotiia nakon te aomata ngkana a taku bwa e raoiroi ibukiia.

31 Ngaia are, a na mwaiti mwakuri aika a korakora ma ni kamimi aika a na karaoaki irouia, i mwaain te bong are e ^akorakora are e na roko ngkana ni kabane aomata a na bon tei imatan ana kaintekateka ni motikitaeka Kristo.

32 Eng, e na bon iai naba te mwakuri ae ^akorakora ma ni kamimi ae e na riki i buakoia Tientaire, i mwaain te bong ni motikitaeka anne.

33 Ao ngkana iai iroumi ana taeka te Atua are a kaota rongorongon ana mwakuri ni kabane ake a kamimi Kristo, ao n aron ana taeka Kristo, kam na bon ataia bwa e bon koaua bwa a na roko bwaai aikai.

34 Ao te maraia nakon are e ^arawa n ongo n ana taeka Iesu, ao ^bnakoia naba ake e a tia n rineia ma ni kanakoia i buakoia; bwa ane e rawa ni butimwaea ana taeka Iesu ao aia taeka ake e a tia ni kanakoia; ao ngaia are e na bon aki butimwaia n te kabanea ni bong.

35 Ao e raoiroi riki ngke arona bwa a bon tuai ma ni bungiaki. Bwa n ami kantaninga kam kona ni kaakea ana momotiraoi te Atua, ae kam kamatauninga, are e a tia n ^atoubekaki i aan waeia aomata, are e na otinako mai irouna te kamaiuaki.

36 Ao ngkai nooria, ngke I taetae ni kaineti ma aomata ake e a tia n rineia te Uea, eng, naake teniman naba ake a tabekaki rake nako karawa, ao I aki ataia bwa a kaitiakaki man te maamate nakon te aki maamate.

37 Ma nooria, man te tai are I a tia ni koroi, I a tia n ukoria mai iroun te Uea, ao e a tia ni kaotia nakoiu bwa e bon riai bwa e na iai te bitaki nakon rabwataia, bwa mwiina ao a na riai ni katoonga te mate.

38 Ngaia are, e aonga n ae aki katoonga te mate ao bon iai te ^abitaki ae korakora ae karaoaki nakon rabwataia, bwa aonga n aki namakina te maraki ke te nanokawaaki ma ti ibukin buren te aonaba.

39 Ngkai te bitaki aio bon titebo ma are e na riki n te kabanea ni bong; bwa bon iai te bitaki ae korakora i aoia, n te aro are akea mwaakan Tatan i aoia, ao e a aki kona ni ^akariria; ao a ^bkaitiakaki rabwataia, ao a ^ctabu, ao akea mwaakan te aonaba ae kona n tauiia.

40 Ao a tiku n te aro aei ni karokoa ana bong ni motikitaeka Kristo; ao n te bong arei a na manga karekea te bitaki riki ae korakora, ao a na butimwaeaki nakon Uean te Tama ao a na manga aki kitanna, ma a na maeka ma te Atua i karawa n aki toki.