1 Thiab tau muaj tias thaum Yexus cov thwj tim tab tom mus ncig thiab tab tom tshaj tawm tej uas lawv tau hnov thiab tau pom, thiab tab tom muab neeg ua kev cai raus dej los ntawm Yexus lub npe, tau muaj tias cov thwj tim tau sib sau ua ke thiab koom sib sib zog thov Vajtswv thiab yoo mov.

2 Thiab Yexus rov ua nws tus kheej rau lawv pom dua, vim lawv thov Leej Txiv los ntawm nws lub npe; thiab Yexus los thiab sawv ntsug hauv lawv nruab nrab, thiab hais rau lawv tias: Nej xav kom kuv muab dab tsi rau nej?

3 Thiab lawv hais rau nws tias: Tus Tswv, peb xav kom koj qhia rau peb saib peb yuav muab lub koom txoos no hu li cas; vim muaj kev sib cav sib ceg nyob hauv cov neeg ntsig txog qhov no.

4 Thiab tus Tswv hais rau lawv tias: Kuv hais tseeb tseeb rau nej tias, vim li cas cov neeg thiaj li yws yws thiab sib cav sib ceg txog qhov no?

5 Puas yog lawv tsis tau nyeem tej vaj lug kub, uas hais tias nej yuav tsum ris Khetos lub npe, uas yog kuv lub npe? Vim thaum txog hnub kawg yuav muab nej hu ua lub npe no;

6 Thiab tus uas ris kuv lub npe, thiab nyiaj mus kom txog thaum kawg, tus ntawd yuav txais kev cawm dim thaum txog hnub kawg.

7 Yog li ntawd, txhua yam uas nej yuav ua, nej yuav tsum ua los ntawm kuv lub npe; yog li ntawd nej yuav tsum hu lub koom txoos li kuv lub npe; thiab nej yuav tsum thov Leej Txiv los ntawm kuv lub npe xwv kom nws yuav foom koob hmoov rau lub koom txoos vim yog kuv.

8 Thiab lub koom txoos yog kuv lub li cas, yog tsis muab hu li kuv lub npe? Vim tias yog muab ib lub koom txoos hu li Mauxes lub npe ces kuj yog Mauxes lub koom txoos; los sis yog tias muab hu li ib tug neeg lub npe ces kuj yog tus neeg ntawd lub koom txoos; tiam sis yog tias muab hu li kuv lub npe ces yog kuv lub koom txoos, yog tias lawv muab kuv txoj moo zoo ua lawv lub hauv paus.

9 Kuv hais tseeb rau nej tias, nej twb muab kuv txoj moo zoo ua nej lub hauv paus; yog li ntawd txhua yam uas nej hu, nej yuav tsum muab hu li kuv lub npe; yog li ntawd yog nej thov Leej Txiv, rau lub koom txoos, yog tias ua li ntawd los ntawm kuv lub npe Leej Txiv yuav hnov nej;

10 Thiab yog tias muab kuv txoj moo zoo los ua lub koom txoos lub hauv paus ces Leej Txiv yuav ua nws tej hauj lwm nyob rau hauv lub koom txoos.

11 Tiam sis yog tias tsis muab kuv txoj moo zoo los ua lub koom txoos lub hauv paus, thiab yog muab tej uas tib neeg ua los ua lub hauv paus, los sis tus dab phem tej hauj lwm, kuv hais tseeb rau nej tias lawv muaj kev xyiv fab los ntawm tej yam uas lawv ua tau ib nyuag ntu xwb, thiab tsis ntev qhov kawg los, thiab lawv raug ntov vau thiab muab pov rau hauv hluav taws, qhov uas tsis muaj kev rov qab.

12 Vim tej yam lawv ua yeej nrog lawv mus, vim twb yog tej yam lawv ua es lawv thiaj raug ntov vau; yog li ntawd cia li nco ntsoov tej uas kuv tau hais rau nej.

13 Saib seb kuv twb muab kuv txoj moo zoo rau nej, thiab nov yog txoj moo zoo uas kuv tau muab rau nej—hais tias kuv los rau hauv lub ntiaj teb los ua li kuv Txiv lub siab nyiam, vim kuv Txiv txib kuv los.

14 Thiab kuv Txiv txib kuv los xwv kom kuv yuav raug coj mus ntsia saum tus ntoo khaub lig; thiab tom qab uas kuv raug ntsia saum tus ntoo khaub lig lawm, kuv thiaj coj tau txhua leej txhua tus los cuag kuv, ib yam li tib neeg tau coj kuv mus ib yam li ntawd Leej Txiv yuav coj tib neeg los sawv ntawm kuv xub ntiag, raug txiav txim rau tej yam lawv tau ua, seb lawv ua zoo los sis lawv ua phem—

15 Thiab twb yog rau lub hom phiaj no kuv thiaj raug coj mus ntsia saum tus ntoo khaub lig; yog li ntawd, raws li Leej Txiv lub hwj chim kuv yuav coj txhua leej txhua tus los cuag kuv, xwv kom lawv yuav raug txiav txim raws li tej yam lawv ua.

16 Thiab yuav muaj tias, tus uas hloov siab lees txim thiab ua kev cai raus dej los ntawm kuv lub npe yuav muaj tus Vaj Ntsuj Plig Dawb Huv puv npo; thiab yog tias nws nyiaj mus kom txog thaum kawg, saib seb, kuv yuav tsis suav tias tus ntawd muaj txim nyob ntawm kuv txiv xub ntiag nyob rau hnub uas kuv yuav sawv los txiav txim rau neeg ntiaj teb.

17 Thiab tus uas tsis nyiaj mus kom txog thaum kawg, tus ntawd kuj yog tus uas raug ntov vau thiab muab pov rau hauv hluav taws, qhov uas tsis muaj kev rov qab tau, vim yog Leej Txiv txoj kev txim lij.

18 Thiab nov yog txoj lus uas nws tau muab rau noob neej. Thiab vim lub ntsiab no nws thiaj ua raws li tej lus uas nws tau muab, thiab nws tsis dag, tiam sis ua raws li tag nrho nws tej lus.

19 Thiab tsis muaj ib yam uas tsis huv yuav muaj peev xwm nkag tau mus rau hauv nws lub nceeg vaj; yog li ntawd tsis muaj ib yam dab tsi nkag tau mus rau hauv nws qhov chaw so tsuas yog cov uas tau ntxuav lawv tej tsoos tsho nyob hauv kuv cov ntshav, vim yog lawv txoj kev ntseeg, thiab txoj kev hloov siab lees txim rau tag nrho lawv tej kev txhaum, thiab lawv txoj kev rau siab ntseeg kom mus txog thaum kawg.

20 Nim no nov yog txoj lus txib: Cia li hloov siab lees txim, nej txhua tus uas nyob thoob plaws lub ntiaj teb, thiab los cuag kuv thiab ua kev cai raus dej los ntawm kuv lub npe, xwv kom qhov uas nej tau txais tus Vaj Ntsuj Plig Dawb Huv yuav muab nej hloov ua neeg dawb huv, xwv kom nej yuav sawv tsis muaj qhov phem rau ntawm kuv xub ntiag thaum txog hnub kawg.

21 Kuv hais tseeb tseeb rau nej tias, nov yog kuv txoj moo zoo; thiab nej yeej paub tej uas nej yuav tsum ua nyob hauv kuv lub koom txoos; tej hauj lwm uas nej tau pom kuv ua tej ntawd nej kuj yuav tsum ua thiab; tej uas nej tau pom kuv ua tej ntawd ntag nej yuav tsum ua;

22 Yog li ntawd, yog nej ua tej no nej yuav tau koob hmoov, vim kuv yuav muab nej tsa sawv thaum txog hnub kawg.

23 Sau cia tej uas nej tau pom thiab tau hnov, tsuas yog tseg tej uas txwv tsis pub sau xwb.

24 Sau tej yam uas cov neeg no ua, uas tseem yuav muaj los, ib yam li tej uas tau sau cia, txog tej uas tau muaj los lawm.

25 Vim saib seb, cov neeg no yuav raug txiav txim los ntawm tej phau ntawv uas tau muab sau cia lawm, thiab tseem yuav muab sau cia, vim los ntawm tej phau ntawv no tib neeg yuav paub txog tej yam lawv tau ua.

26 Thiab saib seb, Leej Txiv yeej sau cia txhua yam; yog li ntawd neeg ntiaj teb yuav raug txiav txim los ntawm tej phau ntawv uas yuav muab sau cia.

27 Thiab xav kom nej paub tias nej yuav txiav txim rau cov neeg no, raws li txoj kev txiav txim uas kuv muab rau nej, uas yuav ncaj ncees. Yog li ntawd, nej yuav tsum ua neeg zoo li cas? Kuv hais tseeb rau nej tias, zoo tib yam li kuv.

28 Thiab nim no kuv yuav mus cuag Leej Txiv. Thiab kuv hais tseeb rau nej tias, qhov uas nej yuav thov Leej Txiv los ntawm kuv lub npe ces yuav muab qhov ntawd rau nej.

29 Yog li ntawd, cia li thov, thiab nej yuav tau txais; cia li khob, ces yuav qhib rau nej; vim tus uas thov, yuav tau txais; thiab rau tus uas khob, yuav qhib rau tus ntawd.

30 Thiab nim no, saib seb, kuv txoj kev xyiv fab ntau heev, twb muaj puv npo, vim yog nej, thiab vim yog tiam neeg no; muaj tseeb tiag, thiab txawm yog Leej Txiv los twb zoo siab heev, thiab tag nrho cov tim tswv dawb huv saum ntuj, vim yog nej thiab tiam neeg no; vim twb tsis muaj ib tug uas ploj mus.

31 Saib seb, kuv xav kom nej to taub; vim kuv hais txog lawv cov uas nim no tseem muaj txoj sia nyob ntawm tiam neeg no; thiab twb tsis muaj ib tug uas ploj mus; thiab kuv muaj kev xyiv fab puv npo vim yog lawv.

32 Tiam sis saib seb ua rau kuv tu siab vim yog tiam neeg thib plaub tom qab tiam neeg no mus, vim lawv yuav raug coj mus txhom khi ib yam li tus tub ntawm kev puas tsuaj raug coj; vim lawv yuav muab kuv muag yuav nyiaj dawb thiab kub, thiab rau tej uas muaj npauj noj thiab tej uas tub sab tsoo tau los thiab muab nyiag. Thiab nyob rau hnub ntawd kuv yuav los xyuas lawv, twb yog muab tej yam lawv ua rov qab los rau saum lawv lub taub hau.

33 Thiab tau muaj tias thaum Yexus tau xaus tej lus hais no lawm nws hais rau nws cov thwj tim tias: Nej cia li nkag mus hauv lub rooj vag nqaim; vim lub rooj vag yeej nqaim, thiab txoj kev yeej ti uas coj mus rau txoj sia, thiab tsawg leej thiaj nrhiav tau; tiam sis lub rooj vag yeej dav, thiab txoj kev yeej loj uas coj mus rau kev tuag, thiab muaj coob leej uas mus rau hauv, txog rau thaum hmo tsaus ntuj los, thaum ntawd yuav tsis muaj neeg ua tau hauj lwm.