Pukfel
3 Nifai 27


Sopun 27

Jises a annuku ngeni ir pwe repwe eita ewe Mwichefen non Itan—An misin me asoren achasefan a forata An ewe kapas allim—Aramas ra annuk pwe repwe aier me papatais pwe repwe tongeni enimenimochuno me ren ewe Ngun mi Fel—Ir repwe usun chok Jises. Arap ngeni Ierin ewe Samon 34–35.

1 Iwe non ewe fansoun pwe nupwen ekkewe chon kunon Jises ra sai me ra afanafana ekkewe mettoch minne ra rongorong me pwan kuna, me ra fori angangen papatais non iten Jises, non ewe fansoun pwe ekkewe chon kuno ra ionfengen me ra chufengen non ennetin iotek me echikipin.

2 Iwe Jises a pwan pwarano inisin ngeni ir, pun ra iotek ngeni ewe Sam non itan; iwe Jises a feito me uta nukanaper, me apasa ngeni ir: Met oua mochen pwe upwe ngenikemi?

3 Iwe ra apasa ngeni i: Samon, am aua mochen pwe kopwe urenikem ewe it ren minne am aupwe eita ngeni ei mwichefen; pokiten mi wor anini fengen nein ekkewe aramas usun ei mettoch.

4 Iwe ewe Samon a apasa ngeni ir: Ennet, ennet, ua apasa ngenikemi, pwata ekkewe aramas repwe ngunungun me anini pokiten ei mettoch?

5 Rese mwo anneani ekkewe pukefel, minne a apasa oupwe wata womi ewe iten Kraist, minne ina itei? Pun ren ei it oupwe eiteit seni atun ewe ranin soponon;

6 Iwe ion chok epwe wata won itei, me engino ngeni nesoponon, i ewe pwan chok epwe manau non ewe ranin soponon.

7 Iei minne, met chok oupwe fori, oupwe fori non itei; iei minne oupwe eita ewe mwichefen non itei; iwe oupwe kokkori ewe Sam non itei pwe i epwe efeiochu ewe mwichefen fan asengesi.

8 Iwe ifa usun epwe ai mwichefen tiwenon chok ika epwe eiteit me non itei? Pun ika ew mwichefen epwe eiteit non iten Moses iwe epwe an Moses mwichefen; are ika epwe eiteit non iten emon mwan iwe epwe mwichefenin emon mwan; nge ika pwe epwe eiteit non itei iwe epwe ai mwichefen, ika pwe repwe forata non ai we kapas allim.

9 Ennet ua apasa ngenikemi, pwe oua foruta won ai we kapas allim; iei minne oupwe eita met chok mettoch oua eita, non itei; iei minne ika oupwe kokkori ewe Sam, fan iten ewe mwichefen, ika pwe epwe non itei ewe Sam epwe rongorong ngenikemi;

10 Iwe ika pwe ewe mwichefen epwe foruta won ai we kapas allim iwe ewe Sam epwe pwarano an pwisin angang non.

11 Nge ika ese foruta won ai we kapas allim, me a foruta won angangen aramas, are won angangen ewe tefin, ennet ua apasa ngenikemi a wor ar pwapwa non ar kewe angang ren chok och fansoun, iwe non och mwochomwochen fansoun mwirin nesoponon epwe feito, iwe ra pokupokutiw me katurunong non ewe ekkei, seni minne neni ese wor niwin sefan.

12 Pun ar kewe angang repwe tapweno mwirir, pun pokiten ar kewe angang ina ra pokupokutiw; iei minne chechemeni ekkewe mettoch minne ua fen urenikemi.

13 Nengeni ua fen ngenikemi ai we kapas allim, iwe iei ewe kapas allim minne ua fen ngenikemi—pwe ua wareto ngeni ewe fonufan pwe upwe fori mochenin Semei, pokiten Semei we a tinieito.

14 Iwe Semei a tinieito pwe upwe irapengesino won ewe irapenges; iwe mwirin ai ua fen irapengesino won ewe irapenges, pwe upwe tongeni amerato aramas meinisin ngeniei, pwe usun chok ua fen irapengesino me ren aramas epwe pwan ina usun aramas repwe kekita me ren ewe Sam, pwe repwe uta me mwei, pwe repwe kapung ren ar kewe angang, ika repwe öch are ika repwe ngaw—

15 Iwe ren ei popun ua fen irapengesino; iei minne, anongonong won manamanen ewe Sam upwe amerato aramas meinisin ngeniei, pwe repwe tongeni kapung anongonong won ar kewe angang.

16 Iwe ewe fansoun epwe feito, pwe ion epwe aier me a papatais non itei epwe ureno; iwe ika a engino ngeni nesoponon, nengeni, i upwe apungu pwe mi nimenimoch me mwen Semei we atun ena ran nupwen upwe uta pwe upwe apungu ewe fonufan.

17 Iwe i ewe esap engino ngeni nesoponon, i ewe chok epwe pwan pokupokutiw me katurunong non ewe ekkei, seni minne neni ese wor niwin sefan, pokiten ewe pungoch an ewe Sam.

18 Iwe iei ewe kapas minne a fen ngeni ekkewe noun aramas. Iwe ren ei popun a apwonueta ekkewe kapas minne a fen ngeni ir, iwe i ese chofona, nge a apwonueta an kewe kapas meinisin.

19 Iwe ese wor mettoch mi nimengaw a tongeni tonong non muun we; iei minne ese wor mettoch a tonong non an nenien asoso tiwenon chok ekkewe ra fen nimeti ufer kewe non chai, pokiten ar nuku, me aierin ar kewe tipis, me ar nikitu ngeni nesoponon.

20 Iwe iei ewe annuk: Aier, ami meinisin ekis meinisin non ewe fonufan, me feito rei me papatais non itei, pwe oupwe tongeni enimenimochuno me ren ketiwen ewe Ngun mi Fel, pwe oupwe tongeni uta non nimenimoch me mwei atun ewe ranin soponon.

21 Ennet, ennet, ua apasa ngenikemi, iei ai we kapas allim; me oua sinei ekkewe mettoch oupwe fokkun fori non ai we mwichefen; pun ekkewe angang minne oua fen kunaei pwe ua fori ina oupwe pwan fori; pun met minne oua fen kunaei pwe ua fori pwan ina oupwe fori;

22 Iei minne, ika oupwe fori ekkei mettoch oua feioch, pun oupwe seikita atun ewe ranin soponon.

23 Makketiw ekkewe mettoch minne oua fen kuna me rongorong, tiwenon chok ekkewe oua annuk pwe ousap makketiw.

24 Makketiw ekkewe angang an ekkei aramas, minne repwe fori, usun chok ra fen makketiw, usun met minne ra fen fis.

25 Pun nengeni, seni ekkewe puk minne ra fen makketiw, me minne repwe makketiw, ekkei aramas repwe kapung, pun seni ir ar kewe angang repwe pwano ngeni aramas.

26 Iwe nengeni, mettoch meinisin ra makketiw me ren ewe Sam; iei minne seni ekkewe puk minne repwe makketiw ewe fonufan epwe kapung rer.

27 Iwe oupwe sinei pwe oupwe sou apungu ekkei aramas, anongonong won ewe kapung minne upwe ngenikemi, minne epwe pung. Iei minne, met sokkun aramas oupwe usun? Ennet ua apasa ngenikemi, usun chok ngang.

28 Iwe iei ua feino ngeni ewe Sam. Iwe ennet ua apasa ngenikemi, met chok mettoch oupwe tingorei ewe Sam non itei epwe kawor ngenikemi.

29 Iei minne, tingor, iwe oupwe angei; fichifich, iwe epwe suk ngenikemi; pun i ewe a tingor, a angei; iwe ngeni i ewe a fichifich, epwe suk.

30 Iwe iei, nengeni, ai pwapwa mi pochokun, pwan mwo unusoch, pokitemi, me pwan ei tappin aramas; ewer, iwe pwan mwo ewe Sam a pwapwa, me pwan ekkewe chon nang mi fel meinisin, pokitemi me ei tappin aramas; pun ese wor neir a monucheno.

31 Nengeni, ua mochen pwe oupwe weweiti; pokiten ua ekieki usun ir ekkewe mi manau iei chon ei tappin aramas; iwe ese wor neir a monucheno; iwe pokiter a wor ai unusochun pwapwa.

32 Nge nengeni, ua netipechou pokiten ewe aruwanun tappin aramas mwirin ei tappin aramas, pun ra emmwenino non fotek me ren i pwan mwo ewe noun poutmwanino; pun repwe amomono ngang ren silver me ren gold, me ren met minne manchonap epwe atano me minne chon sona repwe atanong me sonani. Iwe non na ran upwe churi ir, pwan mwo ren ai upwe akunnu ar kewe angang ngeni won pwisin mokurer.

33 Iwe non ewe fansoun pwe nupwen an Jises awesano ekkei kapas a apasa ngeni noun kewe chon kuno: Oupwe tonong non ewe asamen ewe tit mi aukukkun; pokiten mi aukukkun ewe tit, me mi chokisikis ewe aan minne a aaneno ngeni manau, iwe chokukkun ekkewe repwe kuna; nge mi auwatte ewe tit, me ewe aan mi chonap minne a aaneno ngeni mano, iwe chommong ekkewe repwe sai non, tori ewe pwinin epwe wareto, fansoun minne esap chiwen wor emon a tongeni angang.