1 Ao ngkai e a koro bukina bwa ngke e a tia Iesu n taekin bwaai aikai e kabwaranakoi nakoia aomata ake a uanao; ao e kabwaranakoi bwaai ni kabane nakoia, ake a bubura ao a uarereke.

2 Ao e taku: ^aKoroboki aika tabu aikai ake akea iroumi, e tua te Tama bwa N na anganingkami; bwa e bon wanawana irouna are a na anganaki rooro n taai aika a na roko.

3 Ao e kabwaranakoi bwaai ni kabane, man te moan tai ni karokoa te tai are e na roko ni ^amimitongina—eng, bwaai ni kabane ake a na roko iaon te aba, ni karokoa are a na ^bran bwain karawa n te kabuebuea ae korakora, ao te aonaba e na ikotaki n ^cniniraki n aron te ninira ni boki, ao a na mauna karawa ma te aonaba;

4 Ao ni karokoa naba te kabanea ni bong are e ^akorakora, ngkana ni kabane aomata ma reeti nako ao neewe a na ^btei imatan te Atua, bwa a na motikaki taekaia man aia mwakuri, bwa a raraoi ke a bubuaka—

5 Ngkana a raraoi, a na nakon te ^amangauti n te maiu are aki totoki; ao ngkana a buakaka, nakon te mangauti ni kabuakakaki; ngkai a kakaitara, teuana n te itera are teuana ao are teuana n te itera are teuana, n aron te nanoanga, ao te ^bmomotiraoi, ao tabun Kristo, are bon iai i ^cmwaain rikin te aonaba.

6 Ao ngkai e bon aki kona ni koreaki n te boki aei, ^akatebubuan mwakoron bwaai ae e bon taekin ni koaua Iesu nakoia aomata;

7 Ma nooria, ana ^abwaatua Nibwaai a bon mwaiti riki kanoaia ae mwakoron bwaai ake e taekin nakoia aomata.

8 Ao I a tia ni koroi bwaai aikai, ake bwaai ake aki bongana riki ma ni bwaai ake e reireinia aomata; ao I a tia ni koroi nakoia ma te kantaninga bwa a na kona ni kairaki nakoia aomata aikai, ^amai irouia Tientaire, n aron taeka ake e a tia n taekin Iesu.

9 Ao ngkana a tia ni karekea aio, are e bon riai bwa a na karekea moa, bwa kaotan aia onimaki, ao ngkana arona bwa a kakoauai bwaai aikai ao ngkanne a na kaotaki riki nakoia ^abwaai riki aika a korakora.

10 Ao ngkana arona bwa aki kakoauai bwaai aikai, ao ana ^atauaki bwaai ake a korakora ma irouia, ibukin kabuakakakia.

11 Nooria, N nang bon koroi, bwaai ni kabane ake a koreaki iaon ana bwaatua Nibwaai, ma e tabuia te Uea, ni kangai: N na ^akata aia onimaki au botanaomata.

12 Ngaia are Ngai, Moomon, I bon koroi bwaai ake e tua te Uea nakoiu. Ao ngkai Ngai, Moomon, I a katoka au taetae, ma ni waaki ni koroi bwaai ake I a tia n tuangaki.

13 Ngaia are, I tangiria bwa kam na nooria bwa te Uea e bon reireinia ni koaua aomata, i nanon te maan ae teniua te bong; ao i mwin anne ao e ^akakaoti nakoia mwaitin te tai, ao e tabeuta te ^bkariki ni mwaitin te tai, ao e kakabwaia, ao e anganiia.

14 Ao e a koro bukina bwa e reirei ma ni karaoa te mwakuri n ibuobuoki nakoia ^anatia aomata ake a uanao ake e a tia n taekinia, ao e ^bkabwarai neweia, ao a bon taekin nakoia aia bakatibu taekan bwaai aika a korakora ma ni kamimi, aika a korakora riki nakon are e kaotia nakoia te botanaomata; ao e kabwarai neweia bwa aonga ni kona n taetae.

15 Ao e a koro bukina bwa i mwin are e rierake nako karawa—te kauatai are e kaota rabwatana nakoia, ao e a tia n nakon te Tama, i mwin tiana ni ^akatoka aorakiia aia aoraki, ao aia mwauku, man tia ni kauki mataia aia mataki ma ni kauka taningaia ake a bonotaninga, man tia naba ni karaoi aekan mwakuri ni kamaiu nako i buakoia, ma ni kauta te aomata man te mate, man tia ni kaota mwaakana nakoia, ao e a tia n rierake nakon te Tama—

16 Nooria, e a koro bukina bwa n te ingabong ao a ikotaki aomata ake a uanao imarenaia, ao a nooria ataei aikai; eng, ao ^amerimeri naba a bon kaurei wiia man taekin bwaai aika a kamimi; ao bwaai ni kabane ake a taekin a bon tabuaki aomata bwa a na koroi.

17 Ao e a koro bukina bwa ana ^areirei Iesu ake e a tia n rineia a waaki n te tai anne ni ^bbwabetito man reireinia ake a mwaiti ake a roko nakoia; ao te mwaiti ake a roko ni bwabetitoaki n aran Iesu a bon kaonaki n te Tamnei ae Raoiroi.

18 Ao a mwaiti mai irouia ake a noori man ongo bwaai aika aki kona n taekinaki, ake a bon ^aki katauaki i aan te tua bwa a na koreaki.

19 Ao a bon reirei, man ibuobuoki imarenaia; ao a bon ^akatiteboaki ni bwaai ^bnako imarenaia, ao ni kabane aomata a bon momotiraoi n aia waaki imarenaia.

20 Ao e a koro bukina bwa a bon karaoi bwaai ni kabane ake e tuangiia Iesu bwa a na karaoi.

21 Ao naake a bwabetitoaki n aran Iesu a bon aranaki bwa ana ^aekaretia Kristo.