1 Iwe iei non ewe fansoun pwe nupwen an Jises feita ngeni nang, ewe mwicheich ra toropas fetan, iwe emon me emon mwan a angei punuwan me noun semirit me niwin ngeni pwisin imwan.

2 Iwe porous a mwitir choufetan me nein ekkewe aramas, me mwen epwe rochono, pwe ewe mwicheich ra fen kuna Jises, me pwe i a fen angang ngeni ir, me i epwe pwan pwari inisin nesorotan ngeni ewe mwicheich.

3 Ewer, iwe pwan unusen ewe pwinin porous a choufetan usun Jises; iwe ina popun pwe ra titino ngeni ekkewe aramas pwe mi chommong, ewer, ew fokkun watten chochon aramas, ra fokkun angang unusen ena pwinin, pwe repwe tongeni nom non ewe neni non ewe soran ikewe Jises epwe pwari inisin ngeni ewe mwicheich.

4 Iwe non ewe fansoun pwe non ewe soran, nupwen ewe mwicheich ra ionfengen, nengeni, Nifai me pwin we ewe a fen amanauata seni mano, ewe itan Timothy, me pwan noun we, ewe itan Jonas, me pwan Matonai, Matonaia, pwin we, me Kumen, Kumenonai, me Jeremiah, me Semnon, me Jonas, me Zedekiah, me Isaiah—iei ekkewe iten ekkewe chon kuno ekkewe Jises a finireta—iwe non ewe fansoun pwe ra feino me uta nein ewe mwicheich.

5 Iwe nengeni, ewe mwicheich a fokkun watte ina popun ra annuku pwe repwe keimufesen non engon me ru mwich.

6 Iwe ekkewe engon me ruomon ra asukuna ewe mwicheich; iwe nengeni, ra annuku pwe ewe mwicheich repwe fotopukutiw won unungen ewe puun, me repwe iotek ngeni ewe Sam non iten Jises.

7 Iwe ekkewe chon kuno ra iotek ngeni ewe Sam pwan non iten Jises. Iwe non ewe fansoun pwe ra uta me angang ngeni ekkewe aramas.

8 Iwe nupwen ar asukuna ekkena pwan chok kapas minne Jises a fen apasa—ese wor a sokkono seni ekkewe kapas minne Jises a fen apasa—nengeni, ra fotopukutiw sefan me iotek ngeni ewe Sam non iten Jises.

9 Iwe ra iotek fan iten met minne ra wesewesen mochen; iwe ra mochen pwe ewe Ngun mi Fel epwe kawor ngeni ir.

10 Iwe nupwen ra wes ne iotek ra feitiw ngeni nesopun ewe konik, iwe ewe mwicheich ra tapweno mwirir.

11 Iwe non ewe fansoun pwe Nifai a feitiw non ewe konik me a papatais.

12 Iwe a feita tou seni ewe konik me poputa ne papatais. Iwe a papataisei meinisin ekkewe Jises a fen finireta.

13 Iwe non ewe fansoun nupwen ra papataisino meinisin me ra tou seni ewe konik, ewe Ngun mi Fel a feitiw wor, iwe ra ureno me ren ewe Ngun mi Fel me pwan ren ekkei.

14 Iwe nengeni, ra rokopwanino usun ita ren ekkei; me a feitiw seni nang, iwe ewe mwicheich ra kuna, me ra pwarata; iwe chon nang ra feitiw seni nang me ra angang ngeni ir.

15 Iwe non ewe fansoun pwe nupwen an ekkewe chon nang ra angang ngeni ekkewe chon kuno, nengeni, Jises a feito me uta nukanaper me angang ngeni ir.

16 Iwe non ewe fansoun pwe a kapas ngeni ewe mwicheich, me annuku ngeni ir pwe repwe fotopukutiw sefan won ewe puun, me pwan noun kewe chon kuno pwe repwe fotopukutiw won ewe puun.

17 Iwe non ewe fansoun pwe nupwen ra fotopukutiw meinisin won ewe puun, a annuku ngeni noun kewe chon kuno pwe repwe iotek.

18 Iwe nengeni, ra poputa ne iotek; iwe ra iotek ngeni Jises, ra kokkori i pwe ar Samon me ar Kot.

19 Iwe non ewe fansoun pwe Jises a feino seni me neir, me feino ekis towaw seni ir me chappetiw won ewe puun, me a apasa:

20 Semei, ua kinisou ngonuk pwe ka fang ewe Ngun mi Fel ngeni ekkei ua fen finireta; iwe pokiten ar nuku non ngang ina popun ua fen finireta seni ewe fonufan.

21 Semei, ua iotek ngonuk pwe kopwe fang ewe Ngun mi Fel ngeni ir meinisin ekkewe repwe nuku non ar kewe kapas.

22 Semei, ka fen fang ngeni ir ewe Ngun mi Fel pokiten ar nuku non ngang; me ka kuna pwe ra nuku non ngang pokiten ka rongorong ngeni ir, iwe ra iotek ngeniei; me ra iotek ngeniei pokiten ngang mi nom rer.

23 Iwe iei Semei, ua iotek ngonuk fan iter, me pwan fan iten ir meinisin ekkewe repwe nuku non ar kewe kapas, pwe repwe nuku non ngang, pwe upwe nom non ir usun en, Semei, ka nom non ngang, pwe am aupwe chok ew.

24 Iwe non ewe fansoun pwe nupwen Jises a fen iotek ngeni ewe Sam, a feito ngeni noun kewe chon kuno, iwe nengeni, ir mi chiwen soposopono, rese kouno, ne iotek ngeni i; iwe rese achommongano chommong kapas, pun a fen kawor ngeni ir met repwe iotekini, iwe ra ureno ren mochen.

25 Iwe non ewe fansoun pwe Jises a efeiochur nupwen ar iotek ngeni i; iwe won mesemesan a emenimenita wor, iwe saramen mesemesan a sarameta wor, iwe nengeni ra usun chok pwechepwechan mesemesan me pwan ufan Jises kewe; iwe nengeni pwechepwecher we a nap seni unusen pwechepwech meinisin, ewer, ese pwan mwo wor och mettoch won fonufan mi fokkun pwechepwech usun pwechepwecher we.

26 Iwe Jises a apasa ngeni ir: Soposopono ne iotek; nge inamo rese kouno ne iotek.

27 Iwe a kunnuno sefan seni ir, me feino ekis towaweno me chappetiw ngeni ewe puun; iwe a iotek sefan ngeni ewe Sam, a apasa:

28 Semei, ua kinisou ngonuk pwe ka fen enimenimochueno ekkewe ua fen finireta, pokiten ar nuku, iwe ua iotek fan iter, me pwan fan iter ekkewe repwe nuku non ar kewe kapas, pwe repwe nimenimochuno non ngang, seni ar nuku non ar kewe kapas, pwan mwo usun ir mi nimenimochuno non ngang.

29 Semei, use iotek fan iten ewe fonufan, nge fan iten ekkewe ka fen fang ngeniei seni ewe fonufan, pokiten ar nuku, pwe repwe nimenimochuno non ngang, pwe upwe nom non ir usun en, Semei, ka nom non ngang, pwe am aupwe chok ew, pwe upwe tongeni ningeno me non ir.

30 Iwe nupwen an Jises wes ne apasa ekkei kapas a feito sefan ngeni ekkewe chon kuno; iwe nengeni ir mi chok tipepos ne iotek, rese kouno, ngeni i; iwe a emenimenita sefan wor; iwe nengeni ir mi pwechepwech, pwan mwo usun Jises.

31 Iwe non ewe fansoun pwe a feino sefan ekis towaweno me iotek ngeni ewe Sam;

32 Iwe channaw rese tongeni apasa ekkewe kapas minne a iotekini, rese pwan tongeni makketiw me ren aramas ekkewe kapas minne a iotekini.

33 Iwe ewe mwicheich ra rongorong me ra pwarata; iwe netiper a suk iwe ra weweiti non netiper ekkewe kapas minne a iotekini.

34 Nge inamo, fokkun auchea me amwarar ekkewe kapas minne a iotekini ina popun rese tongeni makketiw, aramas rese pwan tongeni apaser.

35 Iwe non ewe fansoun pwe nupwen an Jises awesano an iotek a feito sefan ngeni ekkewe chon kuno, me apasa ngeni ir: Fokkun pochokun nuku use mwo kukuna akkom ne nein ekkewe chon Jew meinisin; ina minne use tongeni pwari ngeni ir manaman mi napanap, pokiten ar nukunukumang.

36 Ennet ua apasa ngenikemi, ese wor neir a fen kuna mettoch mi auchea usun oua fen kuna; rese pwan rongorong mettoch mi auchea usun oua fen rongorong.