1 Ma o lenei sa oo ina ua mavae ona afio ae o Iesu i le lagi, sa taapeape atu le motu o tagata, ma sa taitasi le tane ma ave lana ava ma lana fanau ma foi atu i lona lava fale.

2 Ma sa salalau vave atu le tala i totonu o le nuu atoa, ao lei po, e faapea sa vaai le motu o tagata ia Iesu, ma e faapea sa ia auauna mai ia te i latou; ma o le a ia toe faaali mai foi o ia lava i le aso e sosoo ai i le motu o tagata.

3 Ioe, sa salalau atu lava le tala e uiga ia Iesu i le po atoa; ma o le tele o lo latou ta’u atu i tagata sa oo ina toatele ai, ioe, matua toatele lava le aofai o tagata, sa galulue malosi i lena po atoa, ina ia mafai ona latou i ai i le aso e sosoo ai i le nofoaga lea o le a faaali mai ai e Iesu o ia lava i le motu o tagata.

4 Ma sa oo i le aso na sosoo ai, ina ua faapotopoto faatasi le motu o tagata, faauta, o Nifae ma lona uso na ia faatu mai le oti, o Timoteo lona igoa, ma lona atalii foi, o Iona lona igoa, ma Matonae foi, ma Matonaea lona uso, ma Kumeni, ma Kumenonae, ma Ieremia, ma Semoni, ma Iona, ma Setekaia, ma Isaia—o lenei o igoa ia o le au soo na filifilia e Iesu—ma sa oo ina latou o atu ma tutulai i le totonugalemu o le motu o tagata.

5 Faauta foi, sa matua toatele naua le motu o tagata sa latou faatonu ia vaevaeina i latou i ni vaega e sefululua.

6 Ma sa a’oa’o e le toasefululua le motu o tagata; ma faauta, sa latou faatonu atu ia tootutuli i lalo le motu o tagata i luga o le eleele, ma ia latou tatalo atu i le Tamā i le suafa o Iesu.

7 Ma sa tatalo atu foi le au soo i le Tamā i le suafa o Iesu. Ma sa oo ina latou tutulai ma auauna atu i tagata.

8 Ma ina ua uma ona latou fai atu o ia lava upu na fetalai iai Iesu—sa leai se mea na ese mai upu na fetalai iai Iesu—faauta, sa latou toe tootutuli ma tatalo atu i le Tamā i le suafa o Iesu.

9 Ma sa latou tatalo atu mo lena mea na sili ona latou mananao i ai; ma sa latou mananao ia tuuina mai le ^aAgaga Paia ia te i latou.

10 Ma ina ua uma ona latou tatalo faapea sa latou o ifo i le autafa o le vai, ma sa mulimuli atu le motu o tagata ia te i latou.

11 Ma sa oo ai ina alu ifo Nifae i ^atotonu o le vai ma ua papatisoina ai.

12 Ma sa tulai ae o ia mai le vai ma amata ona papatiso atu. Ma sa ia papatisoina i latou uma o e na filifilia e Iesu.

13 Ma sa oo ina ua uma ona ^apapatisoina i latou uma ma o ae mai le vai, sa afio ifo le Agaga Paia i luga o i latou, ma sa faatumuina i latou i le ^eAgaga Paia ma le afi.

14 Faauta foi, sa siomia i latou e peiseai ua ^asiomia i se afi; ma sa alu ifo mai le lagi, ma sa vaai i ai le motu o tagata, ma latou molimau ai; ma sa afifio ifo agelu mai le lagi ma auauna atu ia te i latou.

15 Ma sa oo ina a o auauna atu agelu i le au soo, faauta, sa afio mai Iesu ma ua tulai i le totonugalemu ma auauna atu ia te i latou.

16 Ma sa oo ina fetalai atu o ia i le motu o tagata, ma poloaiina i latou ia latou toe tootutuli i lalo i luga o le eleele, ma ia tootutuli foi ona soo i lalo i luga o le eleele.

17 Ma sa oo ina ua uma ona latou tootutuli uma i lalo i luga o le eleele, sa ia poloai atu i ona soo ia latou tatalo.

18 Faauta foi, sa amata ona latou tatalo; ma sa latou tatalo atu ia Iesu, ua ta’ua o ia o lo latou Alii ma lo latou Atua.

19 Ma sa oo ina maliu ese atu Iesu mai i le totonugalemu o i latou, ma maliu ese teisi mai ia te i latou ma punou o ia lava i le eleele, ma ia fetalai atu:

20 Le Tamā e, ou te faafetai atu ia te oe ona ua e tuuina mai le Agaga Paia ia te i latou nei o e ua ou filifilia; ma ona o lo latou talitonu ia te au ua ou filifilia ai i latou mai le lalolagi.

21 Le Tamā e, ou te tatalo atu ia te oe ia e tuuina atu le Agaga Paia ia te i latou uma o e o le a talitonu i a latou upu.

22 Le Tamā e, ua e tuuina mai ia te i latou le Agaga Paia ona ua latou talitonu mai ia te au; ma ua e silasila ua latou talitonu mai ia te au ona ua e faafofogaina i latou, ma ua latou tatalo mai ia te au; ma ua latou tatalo mai ia te au ona o loo ou faatasi ma i latou.

23 Ma o lenei le Tamā e, ou te tatalo atu ia te oe mo i latou, ma i latou uma foi o e o le a talitonu i a latou upu, ina ia latou talitonu ia te au, ina ia mafai ona ou i ai i totonu o i latou e ^apei ona i ai oe, le Tamā, i totonu ia te au, ina ia ^etasi i tatou.

24 Ma sa oo ina ua uma ona tatalo atu faapea o Iesu i le Tamā, sa maliu mai o ia i ona soo, ma faauta, sa latou faaauau pea, e aunoa ma le taofia, le tatalo atu ia te ia; ma sa latou le ^afaateleina ni mau upu, ona sa tuuina atu ia te i latou mea e tatau ona latou ^etatalo atu ai, ma sa tumu i latou i manaoga.

25 Ma sa oo ina faamanuiaina i latou e Iesu a o latou tatalo atu ia te ia; ma sa soisoi ifo ona fofoga ia i latou, ma sa susulu ifo le malamalama o ona ^afofoga i o latou luga, ma faauta sa ^esinasina i latou e faapei o fofoga ma laei foi o Iesu; ma faauta o lo latou sinasina sa silisili atu i le sinasina o mea uma, ioe, e moni e leai se mea i luga o le lalolagi e mafai ona sinasina e pei o lenei.

26 Ma sa fetalai atu Iesu ia te i latou: Ia outou tatalo pea; ae ui i lea sa le tuua lava le tatalo atu.

27 Ma sa ia toe liliu ese mai ia te i latou, ma ua maliu teisi ese atu ma ua punou o ia lava i le eleele; ma sa ia toe tatalo atu i le Tamā, ua fetalai atu:

28 Le Tamā e, ou te faafetai atu ia te oe ona ua e ^afaamamaina i latou ia o e ua ou filifilia, ona o lo latou faatuatua, ma ou te tatalo atu mo i latou, ma i latou foi o e o le a talitonu ia latou upu, ina ia faamamaina i latou ia te au, e ala i le faatuatua ia latou upu, e pei ona faamamaina i latou ia te au.

29 Le Tamā e, ou te le tatalo mo le lalolagi, ae mo i latou ua e tuuina mai ia te au ^amai le lalolagi, ona o lo latou faatuatua, ina ia faamamaina i latou ia te au, ina ia mafai ona ou i ai i totonu o i latou e pei ona i ai oe, le Tamā, i totonu ia te au, ina ia tasi i tatou, ina ia faamamaluina ai a’u ia i latou.

30 Ma ina ua uma ona fetalai atu Iesu i nei upu sa toe maliu mai o ia i ona soo; ma faauta sa latou tatalo pea e le aunoa, ia te ia; ma sa ia soisoi alofa ifo foi ia i latou; ma faauta ua ^asinasina i latou, e faapei lava o Iesu.

31 Ma sa oo ina toe afio ese teisi o ia ma ua tatalo atu i le Tamā;

32 Ma e le mafai ona tautala le laulaufaiva i upu na ia tatalo atu ai, pe mafai foi e se tagata ona ^atusia upu na ia tatalo atu ai.

33 Ma sa faalogo i ai le motu o tagata ma latou molimauina; ma sa matala o latou loto ma sa malamalama i o latou loto upu ia na ia tatalo ai.

34 Ae ui i lea, sa matua silisili ma ofoofogia naua upu na ia tatalo atu ai e le mafai ona tusia i latou, pe le mafai foi ona ^atautalaina e le tagata.

35 Ma sa oo ina ua uma ona faaiu e Iesu le tatalo atu, sa toe maliu mai o ia i ona soo, ma fetalai mai ia te i latou: Ou te lei vaai lava i se ^afaatuatua tele faapea i totonu o tagata Iutaia uma; o lea sa le mafai ai ona ou faaali atu ia te i latou o ni vavega tetele faapea, ona o lo latou ^ele talitonu.

36 E moni ou te fai atu ia te outou, e leai se tasi o i latou ua vaai i ni mea silisili faapea e pei ona outou vaai i ai; pe ua latou faalogo foi i ni mea silisili faapea e pei ona outou faalogo i ai.