1 Ao ngkai e a koro bukina bwa ngke e a tia n rierake Iesu nako karawa, ao a maenako aomata ake a uanao, ao mwaane n tatabemania nako a bon anai buuia ao natia man okiri oin mwengaia.

2 Ao e a bon tataekinaki n taabo ake a raroa i buakoia aomata n te tai naba arei, i mwaain ae roo, bwa aomata ake uanao a tia n noora Iesu, ao e a tia ni karaoa te mwakuri n ibuobuoki nakoia, ao e na manga kaoti riki nakoia aomata ake a uanao n te bong are i mwina.

3 Eng, e a bon tataekinaki n te bong naba n taabo ake a raroa taekan Iesu; n te aro are a mwaiti aomata, eng, e korakora te mwaiti, are a beku korakora n te tairiki arei bwa aonga ni mena n te tabo are e na kaoti iai Iesu n te bong are i mwina nakoia aomata aika a uanao.

4 Ao e a koro bukina bwa n te bong are i mwina, ngke a ikotaki aomata ake a uanao, nooria, Nibwaai ma tarina are e kautia man te mate, are arana Timoteo, ao natina naba te mwaane, are arana Ionati, ao Matoni, ao Matonia, are tarina ao Kumen, ao Kumenaonaai, ao Ieremia, ao Temnaon, ao Ionati, ma Tetekia, ao Itaia—ngkanne aikai araia ana reirei Iesu ake e a tia n rineia—ao e a koro bukina bwa a mwananga ma n tei i buakoia aomata ake a uanao.

5 Ao nooria, e korakora mwaitia aomata aika a uanao n te aro are e tua bwa a na kamaenakoaki i nanon mwakoro aika tebwi ma uoua.

6 Ao a reirei uaake tengaun ma uoman nakoia aomata ake a uanao; ao nooria, a bon tua bwa a na katorobubua aomata ake a uanao iaon tano, ao a na riai n tataro nakon te Tama n aran Iesu.

7 Ao ana reirei a bon tataro naba nakon te Tama n aran naba Iesu. Ao e a koro bukina bwa a bon teirake ma ni karaoi mwakuri n ibuobuoki nakoia aomata.

8 Ao ngke a tia n taekin taeka ake e bon atongi naba Iesu—n akea tibanakoia man ana taeka Iesu ake e taekin—nooria, a bon katorobubua riki man tataro nakon te Tama n aran Iesu.

9 Ao a bon tataro ibukin te bwai are a bon kainnanoia raoi; ao a bon kainnanoa te ^aTamnei are e Raoiroi bwa a na anganaki.

10 Ao ngke a tia n tataro a ruo rikaaki nako rarikin te ran, ao a bon iraki irouia aomata ake a uanao.

11 Ao e a koro bukina bwa Nibwaai e ruo ^anakon te ran ao e bwabetitoaki.

12 Ao e otirake man te ran ao e waaki ni bwabetito. Ao e bwabetitoia ni kabane ake a rineaki iroun Iesu.

13 Ao e a koro bukina bwa ngke a bane ni ^abwabetitoaki ao a tia n otirake man te ran, e mena i aoia te Tamnei ae Raoiroi, ao a kaonaki n te ^bTamnei ae Raoiroi ma te ai.

14 Ao nooria, a bon ^aotabwaniniaki n aiaron te ai; ao e ruo ma i karawa, ao aomata ake a uanao a bon kakoaua ma ni kakoaua ibukina; ao a ruo anera ma i karawa ao a ibuobuoki nakoia.

15 Ao e a koro bukina bwa ngke a ibuobuoki anera nakoia reirei, nooria, e roko Iesu man tei i buakoia ao e ibuobuoki nakoia.

16 Ao e a koro bukina bwa e taetae nakoia aomata ake a uanao, ao e tuangiia bwa a na katorobubua riki iaon tano, ao ana reirei a na katorobubua naba iaon tano.

17 Ao e a koro bukina bwa ngke a bane n tia ni katorobubua i aon tano, ao e tuangiia a na reirei bwa a na riai n tataro.

18 Ao nooria, a waaki n tataro; ao a bon tataro nakon Iesu, ma ni weteia bwa aia Uea ao Atuaia.

19 Ao e a koro bukina bwa e kitania Iesu, ma ni mwananga ni kararoaia teutana ao e bobaraaki nako aontano, ao e taku:

20 Tamau, I karabwako bwa ko a tia n anga te Tamnei ae Raoiroi nakoia naakai ake I a tia n rineia; ao e riki aei ibukin kakoauakiu irouia ngaia are I a rineia man te aonaba.

21 Tamau, I tataro nakoim bwa ko na anganiia naake a bane ni kakoauai aia taeka te Tamnei ae Raoiroi.

22 Tamau, ko a tia n anganiia te Tamnei ae Raoiroi ibukina bwa a kakoauai; ao ko nooria bwa a kakoauai kioina bwa ko ongo aia taeka, ao a tataro nakoiu; ao a tataro nakoiu ibukina bwa I mena irarikiia.

23 Ao ngkai Tamau, I tataro nakoim ibukiia, ao ibukiia naba ake a bane ni kakoauai aia taeka, bwa a na kakoauai naba, bwa I aonga ni mena irouia ^an arom, Tamau are ko mena irou, bwa ti aonga ni ^bkatiteuanaki.

24 Ao e a koro bukina bwa ngke e a tia Iesu n tataro nakon te Tama, e roko nakoia ana reirei, ao nooria, a bon waaki, n aki toki, n tataro nakoina; ao a bon aki ^akarakai aia taeka, bwa a bon anganaki are a riai n ^btataro iai, ao a bon onrake n te nano ae korakora.

25 Ao e a koro bukina bwa e kakabwaiaia Iesu ngke a tataro nakoina; ao moamoana e moangare nakoia, ao ootan ^amoamoana e bon oota i aoia, ao nooria a bon ^bmainaina n aron moamoan ao ana kunnikai naba Iesu; ao nooria e rianako mainainana nakon te mainaina ni kabane, eng, ao bon akea te bwai iaon te aba ae mainaina n arona.

26 Ao e taku Iesu nakoia: Waaki tataro; ma e ngae n anne a bon aki katoka aia tataro.

27 Ao e rairaki mai irouia riki, ao e mwananga ni kararoa, ao e bobaraaki nako aontano; ao e tataro riki nakon te Tama, ni kangai:

28 Tamau, I karabwako bwa ko a tia ni ^akaitiakiia ake I a tia n rineia, ibukin aia onimaki, ao I tataro ibukiia, ao ibukiia naba ake a na kakoauai aia taeka, bwa a na kaitiakaki irou, rinanon onimakinan aia taeka, n aron ae a kaitiakaki irou.

29 Tamau, I aki tataro ibukin te aonaba, ma ibukiia ake ko a tia n anganai ^aman te aonaba, ibukin aia onimaki, bwa a na kaitiakaki irou, bwa I aonga ni mena irouia n arom, Tamau, ngkai ko mena irou, bwa ti aonga ni katiteuanaki, bwa N na neboaki irouia.

30 Ao ngke e a tia Iesu n taekin taeka aikai e roko riki nakoia ana reirei; ao nooria a bon teimatoa n tataro, n aki toki, nakoina; ao e bon moangare nakoia riki; ao nooria a bon ^amainaina n aron Iesu.

31 Ao e a koro bukina bwa e mwananga nako ni kararoa man tataro nakon te Tama;

32 Ao e aki kona te newe n taekin taeka ake e taekin n ana tataro, ao aki kona ni ^akoreaki iroun te aomata taeka ake e taekin ngke e tataro.

33 Ao aomata ake a uanao a bon ongo ma ni kakoaua; ao a kaukaki nanoia ao a bon oota inanoia n taeka ake e taekin ngke e tataro.

34 Ma e ngae n anne, a bon korakora ao ma ni kamiimi taeka ake e taekin ngke e tataro n te aro are a bon aki kona ni koreaki, ao aki kona naba n ^ataekinaki iroun te aomata.

35 Ao e a koro bukina bwa ngke e a tia n toki ana tataro Iesu ao e manga okiria ana reirei, ao e taku nakoia: Te ^aonimaki ae korakora I bon tuai man nonoria i buakoia Iutaia; ngaia are I bon aki kona ni kaoti kakai aika a kamimi nakoia, ibukin aia ^bkakewekewe.

36 E koaua ae I tuangkami, bon akea mai i buakoia ae e a tia n noori bwaai aika a kamiimi mimitongia n aron ae kam a tia n noori; ao akea naba mai irouia ae e a tia n ongo taekan bwaai aika a tangiraoi ma ni karau nano n aron ae kam a tia n ongo.