1 Ao e a koro bukina bwa Iesu e tuangiia ana reirei bwa a na uota te ^akariki ao te wain nakoina.

2 Ao ngke a nako n anaa te kariki ao te wain, e tuangiia aomata ake a uanao bwa a na tekateka iaon tano.

3 Ao ngke a oki ana reirei ma te ^akariki ao te wain, e anaa te kariki ao e bwenauaia ao e kakabwaia; ao e anganiia ana reirei; man tuangiia bwa a na riai ni kanna.

4 Ao ngke a tia ni kanna ao a ngae, e tuangiia bwa a na anganiia aomata ake a uanao.

5 Ao ngke a tia ni kanna aomata ake a uanao ao a ngae, e taku nakoia ana reirei: Nooria e na iai temanna ae e na katabuaki i buakomi, ao N na anganna te mwaaka bwa e na ^abwenaua te kariki ma ni kakabwaia ao e na anganiia kaain au ekaretia, nakoia aomata ni kabane ake a kakoaua ma ni bwabetitoaki n arau.

6 Ao kam na aki toki ni kakaraoa aio, n aron are I a tia ni karaoia, n aron are I bwenaua te kariki man kakabwaia man anganingkami.

7 Ao kam na karaoa aio ni ^akauringa rabwatau, are I a tia ni kaotia nakoimi. Ao e na riki bwa te bwai ni kakoaua nakon te Tama bwa kam aki toki n uringai. Ao ngkana kam aki toki n uringai ao e na memena Tamneiu iroumi.

8 Ao e a koro bukina bwa ngke e a tia n taekin taeka aikai, e tuangiia ana reirei bwa a na riai n anaa te wain n te mwangko ma ni mooi iai, ao a na anganiia naba aomata ake a uanao bwa a na mooi iai.

9 Ao e a koro bukina bwa a karaoa aio, ma n mooi iai ao a nuai; ao a manga anganiia aomata ake a uanao, ao a bon mooi iai ao a nuai.

10 Ao ngke a tia ana reirei ni karaoa aio, e taku Iesu nakoia: Kam na kakabwaiaki ibukin te bwai ae kam karaoia aio, bwa aio are e a kakoroaki iai bukin au tua, ao e riki bwa te kakoaua nakon te Tama bwa kam bon kukurei ni karaoi bwaai ake I tuangkami.

11 Ao kam na aki toki ni karaoa aio nakoia ake a rairinanoia ma ni bwabetitoaki n arau; ao kam na karaoi ni kauringa raraau, are I a tia ni kawawaea i bukimi, bwa kam aonga ni kakoaua nakon te Tama bwa kam aki toki n uringai. Ao ngkana kam aki toki n uringai ao e na memena Tamneiu iroumi.

12 Ao I anganingkami te tua bwa kam na karaoi bwaai aikai. Ao ngkana kam aki toki ni karaoi bwaai aikai ao kam na kakabwaiaki, bwa kam kateaki iaon au ^abwa.

13 Ao ane e karaoi bwaai aika a raka ke a kee riki nakon aikai ao a bon aki kateaki iaon au bwa, ma a bon kateaki iaon te tano are aaia; ao ngkana e bwaka te karau, ao e roko te ieka, ao e kare te ang, man oroia, a na bon ^abwaka, ao e na tauraoi n uki ^bmataroan moone ni butimwaia.

14 Ngaia are kam na kakabwaiaki ngkana kam kawakin au tua, are e a tia n tuangai te Tama bwa N na riai n anganingkami.

15 E koaua, e koaua, I taku nakoimi, kam na riai n taratara man ^atataro n taai nako, bwa mwiina ao kam kaririaki iroun te riaboro, ao kam kairaki nako ni kabureaki irouna.

16 Ao n aron are I a tia n tataro i buakomi ao kam na manga tataro n au ekaretia, i buakoia au aomata ake a rairinanoia ma ni bwabetitoaki n arau. Nooria Ngai te ^aoota; I a tia ni katea te banna ni ^bkatoto ibukimi.

17 Ao e a koro bukina bwa ngke e a tia Iesu n taekin taeka aikai nakoia ana reirei, e rairaki nakoia aomata ake a uanao man taku nakoia:

18 Nooria, e koaua, e koaua, ae I tuangkami, kam riai n taratara man tataro n taai nako bwa mwiina ao kam rin n te kaririaki; bwa e tangiria ni karekeingkami ^aTatan, bwa e na ioingkami n aron te wiita.

19 Ngaia are kam na aki toki n tataro nakon te Tama n arau;

20 Ao te ^abwai are kam na butiia te Tama n arau, are e bon eti, ao kam kakoaua bwa e na bon reke, nooria kam na bon anganaki.

21 ^aTataro n ami utu nakon te Tama, n taai nako n arau, bwa a na kakabwaiaki buumi ma natimi.

22 Ao nooria, kam na kakaitibo n taai nako; ao kam na aki tuka temanna are e kan kawaringkami ngkana kam aki toki ni kakaitibo, ma kariaia bwa a na kawaringkami ao tai tukia.

23 Ma kam na ^atataro ibukiia, ao tai teweia nako; ao ngkana arona bwa a aki toki ni kawaringkami ao kam na tataro ibukiia nakon te Tama n arau.

24 Ngaia are, tauii i eta ami ^ataura bwa e na oota nakon te aonaba. Nooria Ngai te ^boota are kam na taua i eta—are te bwai are kam a tia n noorai bwa I karaoia. Nooria kam noorai bwa I a tia n tataro nakon te Tama, ao kam bane ni kakoaua.

25 Ao kam noorai bwa ^aakea temanna ae I kanakoa, ma I bon tuangingkami bwa kam na nakoiu, bwa kam na ^bnamakinna man nooria; n te aro are kam na manga karaoia nakon te aonaba; ao ane e urua te tua aei e bon kariaia bwa e na kairaki nakon te kaririaki.

26 Ao ngkai e a koro bukina bwa ngke e a tia Iesu n taekin taeka aikai, e rairaki n taraia riki reirei ake tengaun ma uoman ake e a tia n rineia, ao e taku nakoia:

27 Noria e koaua, e koaua, ae I tuangkami, I anganingkami te tua teuana, ao ngkanne N na riai n nakon ^aTamau bwa N na kakoroi bukin tua riki ake ^btabeua ake e a tia n anganai.

28 Ao ngkai nooria, aio te tua are N na anganingkami, bwa kam na aki kariaia bwa e na iai ae e na ^aanaa rabwatau ao raraau ma te atatai bwa e ^baki itiaki, ngkana kam kabutia;

29 Bwa ane e kanna ma ni mooi n rabwatau ao ^araraau ao e ^baki itiaki e bon amwarake ma ni mooi nakon kabuakakan tamneina; ngaia are ngkana kam ataia bwa iai te aomata ae aki itiaki n amwarake ma ni mooi n rabwatau ao raraau ao kam na tukia.

30 Ma e ngae n anne, kam na aki ^atewea nako mai i buakomi, ma kam na buokiia ao kam na tataro ibukina nakon te Tama n arau; ao ngkana arona bwa e rairananona ma ni bwabetitoaki n arau, ao kam na butimwaia, ma n na anganna rabwatau ao raraau.

31 Ma ngkana e aki rairananona ao e na aki warekaki i buakoia au botanaomata, bwa e na aki tiringia au botanaomata, bwa nooria I ataia ^aau tiibu, ao a tauaki mwaitia.

32 Ma e ngae n anne, kam na aki teweia nako mai i nanon ami tinakaoke, ke ami tabo n tataromauri, ma kam na aki toki n ibuobuoki nakon ae aekan aei; bwa kam aki ataa te tai are ana rairaki iai man rairananoia, ma ni kawarai ma nanoia ni kabane, ao N na ^akatoka aorakiia; ao kam na riki bwa taan uota te kamaiu nakoia.

33 Ngaia are, kawakin taeka aikai are I a tia n tuangingkami ao kam na aki reke i an te ^akabuakakaki; bwa e na maraia are e kabuakakaki iroun te Tama.

34 Ao I anganingkami tua aikai ibukin te ikakaiwi are iai i buakomi. Ao kam na kakabwaiaki ngkana ^aakea te ikakaiwi i buakomi.

35 Ao ngkai N na nakon te Tama, bwa e bon riai bwa N na nako nakon te Tama ^aibukimi.

36 Ao e a koro bukina bwa ngke e a tia Iesu n taekin taeka akekei, e ringia ni ^abaina ^breirei ake e a tia n rineia, temanna i mwin temanna, ni karokoa ae e a tia n ringia ni kabane, ao e taetae nakoia ngke e riingia.

37 Ao aomata ake a uanao a bon aki ongo taeka ake e taekin, ngaia are a bon aki kakoaua ibukiia; ma reirei akekei a bon kakoaua bwa e anganiia te ^amwaaka n anga te ^bTamnei ae Raoiroi. Ao N na kaotia nakoimi i mwin aei bwa te rongorongo aei e bon koaua.

38 Ao e a koro bukina bwa ngke e a tia Iesu n ringia ni kabane, ao e kaoti te ^anang ae rabuniia aomata ake a uanao akekei n te aro are a bon aki noora Iesu.

39 Ao ngke a rabunaki n te nang ao e kitania, ao e rierake nako karawa. Ao ana reirei a noora ma ni kakoaua bwa e a manga rierake nako karawa.