Pukfel
3 Nifai 18


Sopun 18

Jises a poputani ewe sakrament me nein ekkewe chon Nifai—Ra annuk pwe repwe iotek iteiten fansoun non Itan we—Ekkewe ir mi ani Futukan me unumi Chan nupwen ir mi nimenimengaw repwe poutmwanino—Ekkewe chon kuno ra angei pochokun ar repwe ngeni emon ewe Ngun mi Fel. Arap ngeni Ierin ewe Samon 34.

1 Iwe non ewe fansoun pwe Jises a annuku noun kewe chon kuno pwe repwe wato ekkoch pinewa me wain ngeni.

2 Iwe nupwen ra feino kut pinewa me wain, a annuku ngeni ewe mwicheich pwe repwe mwotiw won ewe puun.

3 Iwe nupwen ekkewe chon kuno ra wareto fan pinewa me wain, a angei ekkoch pinewa me kinikisiretiw me a efeiochu; iwe a ngeni ekkewe chon kuno me annuku ngeni ir pwe repwe ani.

4 Iwe nupwen ra wes ne mwongo me ra mot, a annuku pwe repwe ngeni ewe mwicheich.

5 Iwe nupwen ewe mwicheich ra wes ne mwongo me ra mot, a apasa ngeni ekkewe chon kuno: Nengeni epwe wor emon epwe seikita me neimi, iwe upwe ngeni i pochokun pwe i epwe kinikisietiw pinewa me efeiochu me ngeni ekkewe aramasen ai we mwichefen, ngeni ir meinisin ekkewe repwe nuku me papatais non itei.

6 Iwe ei oupwe achocho ne fori fansoun meinisin, pwan mwo usun ua fen fori, usun mwo ai ua fen kinikisietiw pinewa me efeiochu me ngeni kemi.

7 Iwe ei oupwe fori ren achechemenien inisi, minne ua fen pwari ngenikemi. Iwe epwe ew pisekin pwarata ngeni ewe Sam pwe ami mi chechemeniei fansoun meinisin. Iwe ika oupwe chechemeniei fansoun meinisin oupwe annomu Nguni remi.

8 Iwe non ewe fansoun pwe nupwen an apasa ekkei kapas, a annuku ngeni noun kewe chon kuno pwe repwe angei och ewe wain seni ewe kap me unumi, me repwe pwan ngeni ewe mwicheich pwe repwe tongeni unumi.

9 Iwe non ewe fansoun pwe ra fori, me unumi seni me ra mot; iwe ra ngeni ewe mwicheich, iwe ra unumi, iwe ra mot.

10 Iwe nupwen ekkewe chon kuno ra wes ne fori ei, Jises a apasa ngeni ir: Oua feioch ren ei mettoch minne oua fen fori, pun ei a apwonueta ai kewe annuk, iwe ei a pwari ngeni ewe Sam pwe oua mochen pwe oupwe fori met minne ua fen annuku ngenikemi.

11 Iwe ei oupwe fori fansoun meinisin ngeni ekkewe ir ra aier me papataisino non itei; iwe oupwe fori non achechemenien chai, minne ua fen asuratiw fan itemi, pwe oupwe tongeni pwari ngeni ewe Sam pwe oua chechemeniei fansoun meinisin. Iwe ika oua chechemeniei fansoun meinisin oupwe annomu Nguni remi.

12 Iwe ua ngenikemi ew annuk pwe oupwe fori ekkei mettoch. Iwe ika oupwe fori ekkei mettoch fansoun meinisin oupwe feioch, pun oua kauuta won ai we nongonong.

13 Nge ion neimi epwe anapano are ekisano seni ekkei rese kauuta won ai we nongonong, nge ra kauuta won ew nongonongen pi; iwe nupwen ewe pungun ran a pungutiw, me ekkewe konik ra puu, me ekkewe asepwan ra enien, me wichir, repwe turutiw, iwe ekkewe tittin hell ra monneta ne suk pwe repwe etiwer.

14 Iei minne feioch ami ika oupwe aneasochisi ai kewe annuk, minne ewe Sam a fen annuku ngeniei pwe upwe ngenikemi.

15 Ennet, ennet, ua apasa ngenikemi, pwe mi auchea oupwe mammasa me iotek fansoun meinisin, pwe ousap weri sossot me ren ewe tefin, me ina oupwe emmwenino pwe chon fotek me ren.

16 Iwe usun ua fen iotek neimi pwan ina usun oupwe iotek me non ai we mwichefen, nein nei kewe aramas ekkewe ra aier me ra papataisino non itei. Nengeni ngang ewe saram; ua fen awora ew nenien appiru fan itemi.

17 Iwe non ewe fansoun pwe nupwen an Jises wes ne apasa ekkei kapas ngeni noun kewe chon kuno, a kunnuno sefan ngeni ewe mwicheich me apasa ngeni ir:

18 Nengeni, ennet, ennet, ua apasa ngenikemi, mi auchea oupwe mammasa me iotek fansoun meinisin pwe ousap tonong non sossot; pun Setan a mochen pwe epwe nemenikemi, pwe epwe mworekemi usun wheat.

19 Iei minne oupwe fokkun iotek fansoun meinisin ngeni ewe Sam non itei;

20 Iwe met chok oupwe tingorei ewe Sam non itei, minne mi pung, me nuku pwe oupwe angei, nengeni epwe kawor ngenikemi.

21 Iotek non ami kewe famini ngeni ewe Sam, fansoun meinisin non itei, pwe punuwemi kewe me noumi kewe repwe feioch.

22 Iwe nengeni, oupwe mwichfengen iteiten fansoun; me ousap annuku seni an emon epwe feito ngenikemi nupwen oupwe mwichfengen, nge mutireta pwe repwe tongeni feito remi me ousap annuku seni ir.

23 Nge oupwe iotek fan iter, me ousap aturareu; iwe ika pwe repwe feito remi iteiten fansoun oupwe iotek fan iter ngeni ewe Sam, non itei.

24 Iei minne, chunata ami saram pwe epwe tongeni asarama ewe fonufan. Nengeni ngang ewe saram minne oupwe chunata—ewe minne oua fen kuna pwe ua fori. Nengeni oua kuna pwe ua fen iotek ngeni ewe Sam, me ami meinisin oua fen kuna.

25 Iwe oua kuna pwe ua fen annuku pwe esap wor neimi epwe suno; nge ua fen annuku pwe oupwe feito rei, pwe oupwe tongeni mefi me kuna; iei usun oupwe pwan fori ngeni ewe fonufan; iwe ion epwe atai ei annuk a mutata inisin an epwe emmwenino non sossot.

26 Iwe iei non ewe fansoun pwe nupwen an Jises wes ne apasa ekkei kapas, a akunnu mesan sefan ngeni won ekkewe chon kuno ekkewe i a fen finireta, iwe a apasa ngeni ir:

27 Nengeni ennet, ennet, ua apasa ngenikemi, ua ngenikemi pwan ew annuk, pwe mwirin mi auchea upwe feino ngeni Semei pwe upwe tongeni apwonueta ekkewe ekkoch annuk minne a fen ngeniei.

28 Iwe iei nengeni, iei ewe annuk minne ua ngenikemi, pwe ousap mutata emon an epwe angei seni futukei me chai nge ami mi sinei pwe mi nimenimengaw, nupwen oupwe fori angangan.

29 Pun ion epwe ani me unumi futukei me chai nge mi nimenimengaw a ani me unumi poutmwanino ngeni ngunun; iei minne ika ami mi sinei pwe emon aramas mi nimenimengaw an epwe ani me unumi seni futukei me chai oupwe annuku seni.

30 Nge inamo, ousap asueu i seni neimi, nge oupwe angang ngeni i me oupwe iotek fan itan ngeni ewe Sam, non itei; iwe ika pwe i epwe aier me a papataisino non itei, iwe oupwe etiwa i, iwe oupwe ngeni i seni futukei me chai.

31 Nge ika esap aier esap anneanong nein nei kewe aramas, pwe i esap tongeni amworano nei kewe aramas, pun nengeni ngang mi sinei nei siip, iwe ir mi anneanong non nei kewe aramas.

32 Nge inamo, ousap asueu i seni ami kewe sinakok, are ami kewe nenien fen, pun ngeni ena sokkun oupwe soposopono ne angang ngeni; pun ouse sinei ika non ew ran repwe niwin me aier, me feito rei ren unusen netip, iwe upwe echikarar; iwe ami oupwe wisen popun chon awora amanau ngeni ir.

33 Iei minne, aneasochisi ekkei kapas minne ua fen annuku ngenikemi pwe ousap angei kapung; pun riaffou ngeni i ewe Sam epwe apungu.

34 Iwe ua ngenikemi ekkei annuk pokiten ekkewe anini fengen minne a fen fis neimi. Iwe feioch ami ika esap wor anini fengen neimi.

35 Iwe iei ua no ngeni ewe Sam, pokiten mi auchea pwe upwe feino ngeni ewe Sam fan asengesimi.

36 Iwe non ewe fansoun pwe nupwen an Jises awesano ekkei kapas, a attapa ren poun ekkewe chon kuno ekkewe i a fen finireta, emon me emon, pwan tori an a attaper meinisin, me kapas ngeni ir nupwen a attaper.

37 Iwe ewe mwicheich rese rongorong ekkewe kapas minne a apasa, iei minne rese pwarata usun; nge ekkewe chon kuno ra pwarata pwe a ngeni ir pochokun pwe repwe ngeni emon ewe Ngun mi Fel. Iwe upwe pwari ngenikemi mwirin pwe ei uruo mi ennet.

38 Iwe non ewe fansoun pwe nupwen an Jises wes ne attaper meinisin, a feito ew kuchu me pwonueno ewe mwicheich pwe resap tongeni kuna Jises.

39 Iwe nupwen ir mi pwonuno a feino seni ir, me feita ngeni nang. Iwe ekkewe chon kuno ra kuna me pwarata pwe a feita sefan ngeni nang.