1 Inaha, i teienei, i muri a’era, ’ia fa’aoti a’era Iesu i te parau atu i teie mau parau, ’ua hi’o fa’ahou a’era ’oia i te mau ta’ata, ’e ’ua nā ’ō atu ra ’oia ia rātou : Inaha, ’ua fātata roa tō’u taime.

2 Tē ’ite nei au ē, ’ua paruparu ’outou, ’e ’aita e ti’a ia ’outou ’ia māramarama i tā’u mau parau tā’āto’a, ’o tei fa’auehia mai iā’u e te Metua ’ia parau atu ia ’outou i teie taime.

3 Nō reira, ’a haere atu ’outou i tō ’outou mau ’utuāfare, ’e ’a feruri hōhonu i te mau mea ’o tā’u i parau atu, ’e ’a ani atu i te Metua, i tō’u ra i’oa, ’ia māramarama ’outou, ’e ’a fa’aineine i tō ’outou mau mana’o nō ananahi, ’e e ho’i fa’ahou mai au ia ’outou na.

4 I teienei rā, e haere atu vau i te Metua ra, ’e e fa’a’ite ato’a ho’i iā’u iho i te mau ’ōpū mo’e nō ’Īserā’ela ra, ’aita ho’i rātou i mo’e i te Metua, ’e ’ua ’ite ho’i ’oia i te vāhi ’o tāna i ’āfa’i atu ia rātou.

5 ’E i muri a’era, ’ia oti a’era tā Iesu paraura’a atu, ’ua hi’o fa’ahou a’era tōna mata i te mau ta’ata, ’e inaha, tē tahe ra tō rātou roimata, ’e tē hi’o māite mai ra rātou iāna mai te mea ra ē, ’ua hina’aro rātou ’ia ani mai iāna ’ia pārahi ri’i mai ā i pīha’i iho ia rātou.

6 ’E ’ua nā ’ō atu ra ’oia ia rātou : Inaha, ’ua ’ī tō’u ’ā’au i te aroha ia ’outou.

7 Tē vai ra ānei te feiā ma’i i rotopū ia ’outou ? ’A hōpoi mai ia rātou i’ō nei. E piri’o’i ānei tō rotopū ia ’outou, e matapō ānei, e feiā paruparu ānei, e lēpera ānei, e feiā hāpepa ānei, e tari’a turi ānei, e feiā ro’ohia ānei i te tahi atu mau huru ’ati ? ’A hōpoi mai ia rātou i’ō nei, ’e e fa’aora vau ia rātou, e aroha ho’i tō’u ia ’outou na ; ’ua ’ī ho’i tō’u ’ā’au i te aroha.

8 ’E tē ’ite nei ho’i au ē, ’ua hina’aro ’outou ’ia fa’a’ite atu vau ia ’outou i tā’u i rave i tō ’outou mau taea’e i Ierusalema ra, ’e tē ’ite nei ho’i au ē, ’ua nava’i tō ’outou fa’aro’o ’ia fa’aora vau ia ’outou.

9 ’E i muri a’era, ’ia oti a’era tāna paraura’a atu, ’ua haere mai ra te mau ta’ata ato’a, ma te ’ā’au hō’ē, i te hōpoira’a mai i tō rātou feiā ma’i ’e tei ro’ohia i te ’ati ra, ’e tō rātou feiā piri’o’i, ’e tō rātou feiā matapō, ’e tō rātou feiā vāvā, ’e te mau ta’ata ato’a i ro’ohia i te mau huru ’ati ato’a ; ’e ’ua fa’aora ’oia ia rātou tāta’itahi ’a hōpoihia mai ai rātou iāna ra.

10 ’E ’ua nā reira rātou pā’āto’a, te feiā i fa’aorahia ’e te feiā tino maita’i, i te pi’ora’a ia rātou iho i raro i tōna pae ’āvae, ’e ’ua ha’amori atu ra iāna ; ’e te mau ta’ata e rave rahi ’o tē ti’a ’ia ha’afātata mai iāna ’ua ’āpā ihora ïa rātou i tōna ’āvae, ’e nō reira ho’i ’ua fa’arari a’era rātou i tōna ’āvae i tō rātou roimata.

11 ’E i muri a’era, ’ua fa’aue atu ra ’oia ’ia hōpoihia mai tā rātou mau tamari’i ri’i.

12 ’E ’ua hōpoi mai ra rātou i tā rātou mau tamari’i ri’i ’e ’ua ha’apārahi ihora ia rātou i raro i te repo ra nā pīha’i iho iāna, ’e ’ua ti’a noa ihora Iesu i rōpū mau ; ’e ’ua ’ōtohe atu ra te mau ta’ata e tae roa atu ’ua hope te mau tamari’i pā’āto’a i te hōpoihia mai iāna ra.

13 ’E i muri a’era, ’ia hope rātou pā’āto’a i te hōpoihia mai, ’ua ti’a noa ihora Iesu i rōpū mau, ’e ’ua fa’aue atu ra ’oia i te mau ta’ata ’ia tūturi rātou i raro i te fenua ra.

14 ’E i muri a’era, ’ia oti a’era rātou i te tūturi i raro i te repo ra, ’ua ’ū’uru ihora Iesu i roto iāna iho, ’e ’ua nā ’ō a’era : E tō’u Metua, ’ua horuhoru vau nō te mau ’ohipa ’ī’ino a te mau ta’ata nō te ’utuāfare o ’Īserā’ela.

15 ’E ’ia oti a’era tāna paraura’a i teie mau parau, ’ua tūturi ato’a ihora ’oia i raro i te repo ra ; ’e inaha, ’ua pure atu ra ’oia i te Metua, ’e te mau mea tāna i pure ra ’aita roa ïa e ti’a ’ia pāpa’ihia, ’e ’ua fa’a’ite pāpū mai te mau ta’ata ato’a i fa’aro’o iāna i te reira.

16 ’E teie te huru o te mau mea tā rātou i fa’a’ite pāpū mai : ’Aita roa te hō’ē mata i hi’o na, ’e ’aita roa ato’a te hō’ē tari’a i fa’aro’o na, i te mātāmua, i te mau mea faufa’a rahi ’e te māere mai teie ’o tā rātou i hi’o ’e i fa’aro’o ia Iesu i te paraura’a atu i te Metua.

17 ’E ’aita roa e ti’a i te hō’ē vaha ’ia parau, ’e ’aita roa ato’a e ti’a i te hō’ē ta’ata ’ia pāpa’i, ’e ’aita roa ato’a ho’i e ti’a i te ’ā’au o te ta’ata ’ia ’ite i te mau mea faufa’a rahi ’e te māere ’o tā mātou i hi’o ’e i fa’aro’o ia Iesu i te paraura’a ; ’e ’aita roa ho’i e ti’a i te hō’ē ta’ata ’ia ’ite i te ’oa’oa ’o tei fa’a’ī i tō mātou vārua i te taime ’a fa’aro’o ai mātou iāna i te purera’a atu i te Metua nō mātou.

18 ’E i muri a’era, ’ia fa’aoti a’era Iesu i tāna pure i te Metua, ’ua ti’a a’era ’oia i ni’a ; ’āre’a rā nō te rahi o te ’oa’oa o te mau ta’ata ’ua putapū roa ihora rātou.

19 ’E i muri a’era, ’ua paraparau atu ra Iesu ia rātou, ’e ’ua ani atu ra ia rātou ’ia ti’a mai i ni’a.

20 ’E ’ua ti’a mai rātou i ni’a mai te repo mai ra, ’e ’ua nā ’ō atu ra ’oia ia rātou : E ao tō ’outou nō tō ’outou fa’aro’o. ’E i teienei, inaha, ’ua ’ī roa vau i te ’oa’oa.

21 ’E ’ia oti a’era tāna paraura’a atu i teie mau parau, ’ua ’oto ihora ’oia, ’e ’ua ’ite pāpū atu te mau ta’ata i te reira, ’e ’ua rave atu ra ’oia i tā rātou mau tamari’i ri’i, te tahi i muri iho i te tahi, ’e ’ua ha’amaita’i atu ra ia rātou, ’e ’ua pure atu ra i te Metua nō rātou.

22 ’E ’ia oti a’era ’oia i te nā-reira-ra’a, ’ua ’oto fa’ahou ihora ’oia.

23 ’E ’ua parau atu ra ’oia i te mau ta’ata, ’e ’ua nā ’ō atu ra ia rātou : ’A hi’o na i tā ’outou mau tamari’i ri’i.

24 ’E ’a hi’o atu ai rātou, ’ua nānā a’era rātou i tō rātou mata i ni’a i te ra’i, ’e ’ua ’ite atu ra rātou i te mau ra’i i te vēteara’a, ’e ’ua ’ite atu ra rātou i te mau melahi i te poura’a mai nā te ra’i mai, mai te mea ra e tei roto rātou i te auahi ; ’e ’ua pou mai ra rātou i raro, ’e ’ua ha’a’ati a’era i taua mau tamari’i ri’i ra, ’e ’ua ha’a’ati-ato’a-hia rātou i te auahi ; ’e ’ua poihere mai ra te mau melahi ia rātou.

25 ’E ’ua hi’o atu te mau ta’ata ’e ’ua fa’aro’o ’e ’ua fa’a’ite pāpū i te reira ; ’e ’ua ’ite ho’i rātou ē, e parau mau tā rātou i fa’a’ite, nō te mea ’ua hi’o atu rātou pā’āto’a, te ta’ata tāta’itahi, ’e ’ua fa’aro’o ho’i ; ’e e piti tauatini ’e e pae hānere ta’ata ; e i roto i te reira tē vai ra te mau tāne, te mau vahine, ’e te mau tamari’i.