Vaj Lug Kub
3 Nifais 17


Tshooj 17

Yexus qhia kom cov neeg ua tib zoo xav txog nws cov lus thiab thov Vajtswv rau txoj kev to taub—Nws kho lawv tej neeg mob zoo—Nws thov Vajtswv rau cov neeg, siv yam lus hais uas tsis muaj peev xwm muab sau tau—Tej tim tswv los rau thiab hluav taws vij lawv tej me nyuam yaus ib puag ncig. Kwv yees li 34 xyoo tom qab yug Yexus.

1 Saib seb, nim no tau muaj tias thaum Yexus tau hais tej lus no tas lawm nws tau rov ntsia ib puag ncig rau cov neeg coob coob dua, thiab nws tau hais rau lawv tias: Saib saib, kuv lub sij hawm los txog lawm.

2 Kuv pom tau tias nej qaug zog, tias nej tsis muaj peev xwm to taub tag nrho kuv tej lus uas Leej Txiv tau txib kuv hais rau nej nyob rau lub sij hawm no.

3 Yog li ntawd, nej cia li mus rau hauv nej tej tsev, thiab ua tib zoo xav txog tej yam uas kuv tau hais lawm, thiab thov Leej Txiv, los ntawm kuv lub npe, xwv kom nej yuav to taub, thiab npaj nej tej siab rau tag kis, thiab kuv yuav rov los cuag nej dua.

4 Tiam sis nim no kuv mus cuag Leej Txiv, thiab kuj yuav mus ua kuv tus kheej rau tej xeem neeg ntawm Ixayees uas ploj lawm pom, vim lawv tsis raug ploj rau Leej Txiv, vim nws yeej paub qhov uas nws tau coj lawv mus lawm.

5 Thiab tau muaj tias thaum Yexus tau hais li no tas lawm, nws tau rov tsa nws lub qhov muag ntsia ib puag ncig rau saum cov neeg coob coob dua, thiab tau pom tias lawv tau quaj, thiab tau ntsia ntsoov rau nws zoo li lawv xav thov kom nws nrog lawv nyob ib nyuag ntev me ntsis.

6 Thiab nws tau hais rau lawv tias: Saib seb, kuv lub siab muaj kev hmov tshua puv npo rau nej.

7 Nej puas muaj tej neeg mob nyob hauv nej? Coj lawv los ntawm no. Nej puas muaj tej neeg ceg tawv, los sis dig muag, los sis tej neeg khoov duav, los sis tej neeg tu ceg tu npab, los sis tej neeg mob ruas, los sis tej uas qhuav tes qhuav taw, los sis tej uas lag ntseg, los sis tej uas raug txom nyem ib yam dab tsi? Coj lawv los ntawm no thiab kuv yuav kho kom lawv zoo, vim kuv muaj kev hmov tshua rau nej; kuv lub siab muaj kev hlub tshua puv npo.

8 Vim kuv pom tau tias nej xav kom kuv ua rau nej pom tej yam uas kuv tau ua rau nej cov kwv tij nyob tim Yeluxalees lawm, vim kuv pom tias nej txoj kev ntseeg muaj txaus kom kuv yuav kho kom nej zoo.

9 Thiab tau muaj tias thaum nws tau hais li no tas lawm, tag nrho cov neeg coob coob, ua ib ke, tau coj lawv tej neeg muaj mob mus thiab lawv tej neeg raug txom nyem, thiab lawv tej neeg ceg tawv, thiab nrog lawv tej neeg dig muag, thiab nrog lawv tej neeg hais tsis tau lus, thiab nrog tag nrho lawv tej neeg uas raug txom nyem txhua yam; thiab nws tau kho lawv zoo txhua tus thaum uas lawv tau raug coj tuaj cuag nws.

10 Thiab lawv tag nrho, tsis hais cov uas tau raug kho zoo thiab lawv cov uas tsis muaj mob, tau khoov rau hauv nws ko taw, thiab tau teev tiam nws; thiab txhua tus uas tau tawm ntawm cov neeg coob coob los tau nwj nws txhais ko taw, kawg tias lawv tau ntxuav nws txhais ko taw nrog lawv tej kua muag.

11 Thiab tau muaj tias nws tau txib kom lawv yuav tsum coj lawv tej me nyuam yaus tuaj.

12 Yog li ntawd lawv tau coj lawv tej me nyuam yaus tuaj thiab tau muab lawv tso rau hauv av ncig nws, thiab Yexus tau sawv ntsug hauv nruab nrab; thiab cov neeg coob coob tau cia kev kom lawv raug coj los cuag nws.

13 Thiab tau muaj tias thaum lawv tau raug coj tag nrho tuaj lawm, thiab Yexus tau sawv ntsug hauv nruab nrab, nws tau txib cov neeg coob coob kom lawv yuav tsum txhos caug rau hauv av.

14 Thiab tau muaj tias thaum lawv tau txhos caug rau hauv av lawm, Yexus tau nyuaj siab nyob hauv nws, thiab tau hais tias: Leej Txiv, kuv muaj kev nyuaj siab vim yog txoj kev phem ntawm cov neeg ntawm tsev neeg Ixayees.

15 Thiab thaum nws tau hais cov lus no tas, nws tus kheej los kuj tau txhos caug rau hauv av thiab; thiab saib seb nws tau thov rau Leej Txiv, thiab tej yam uas nws tau thov tsis muaj peev xwm muab sau tau cia, thiab cov neeg coob coob uas tau hnov nws tau ua tim khawv.

16 Thiab lawv tau ua tim khawv raws li nram no: Lub qhov muag yeej ib txwm tsis tau pom, thiab lub pob ntseg los ib txwm tsis tau hnov, yav tas los, tej yam loj thiab zoo kawg uas xav tsis thoob ib yam li peb tau pom thiab tau hnov Yexus hais rau Leej Txiv;

17 Thiab tsis muaj ib tug nplaig uas txawj hais, thiab yuav muaj peev xwm muab sau tseg cia los ntawm ib tug neeg, thiab neeg tej siab los tsis muaj peev xwm to taub txog tej yam loj thiab zoo kawg xav tsis thoob ib yam li peb tau pom thiab tau hnov Yexus hais; thiab tsis muaj ib tug uas yuav to taub txog txoj kev xyiv fab uas tau muaj puv npo rau peb tej ntsuj plig nyob rau lub sij hawm uas peb tau hnov nws thov Leej Txiv rau peb.

18 Thiab tau muaj tias thaum Yexus tau thov Leej Txiv tas, nws tau sawv; tiam sis vim txoj kev uas xyiv fab kawg nkaus li ntawm cov neeg coob coob ces lawv thiaj raug hwj chim qaug zog.

19 Thiab tau muaj tias Yexus tau hais rau lawv, thiab hais kom lawv sawv.

20 Thiab lawv tau sawv hauv av los, thiab nws tau hais rau lawv tias: Nej tau koob hmoov vim yog nej txoj kev ntseeg. Thiab nim no saib seb, kuv txoj kev xyiv fab muaj puv npo lawm.

21 Thiab thaum nws tau hais cov lus no tas, nws tau quaj, thiab cov neeg coob coob tau ua tim khawv txog nws, thiab nws tau muab lawv tej me nyuam yaus, ib tug dhau ib tug, thiab tau foom koob hmoov rau lawv, thiab tau thov Leej Txiv rau lawv.

22 Thiab thaum nws tau ua li no tas lawm nws tau rov quaj dua;

23 Thiab nws tau hais rau cov neeg coob, thiab tau hais rau lawv tias: Saib seb nej tej me nyuam yaus.

24 Thiab thaum lawv tau ntsia kom pom lawv tau ntsia lawv tej qhov muag mus rau saum ntuj, thiab lawv tau pom rooj ntug qhib, thiab lawv tau pom tej tim tswv tau nqis tawm saum ntuj ceeb tsheej los zoo ib yam li nyob hauv plawv hluav taws; thiab lawv tau nqis los thiab tau vij ib puag ncig cov me nyuam ntawd, thiab lawv tau raug hluav taws vij ib puag ncig; thiab tej tim tswv tau muab kev pab rau lawv.

25 Thiab cov neeg coob coob tau pom thiab tau hnov thiab tau ua tim khawv; thiab lawv paub tias lawv tej lus tim khawv yeej muaj tseeb vim lawv txhua tus yeej tau pom thiab tau hnov, txhua tus yeej pom rau nws tus kheej; thiab lawv tau muaj kwv yees ncua li ob txhiab thiab tsib puas leej; thiab lawv tau muaj txiv neej, poj niam, thiab me nyuam yaus.