1 Nengeni, iei non ewe fansoun pwe nupwen an Jises wes ne apasa ekkei kapas a nenefetan sefan won ewe mwicheich, iwe a apasa ngeni ir: Nengeni, ai fansoun a arapeto.

2 Ua weweiti pwe ami mi apwangapwang, pwe ouse tongeni weweiti ai kewe kapas meinisin minne ua fen annuk me ren ewe Sam pwe upwe apasa ngenikemi atun ei fansoun.

3 Iei minne, feino ngeni imwemi kewe, me ekipwichi usun ekkewe mettoch minne ua fen apasa, me tingorei ewe Sam, non itei, pwe oupwe tongeni wewe, me amonnata ami ekiek ren nesor, iwe upwe feito ngenikemi sefan.

4 Nge iei ua feino ngeni ewe Sam, me upwe pwan pwarano inisi ngeni ekkewe einangen Israel mi monucheno, pun rese monucheno ngeni ewe Sam, pun i mi sinei ian a wareno ie.

5 Iwe non ewe fansoun pwe nupwen an Jises apasa ekkei kapas, a nenefetanei mesan sefan won ewe mwicheich, me kuna pwe ir mi kechiw, me ra nukuchar ne nenengeni usun ita repwe tingorei pwe epwe nonnom ekis rer.

6 Iwe a apasa ngeni ir: Nengeni, nenukei a uren kirekiroch ngenikemi.

7 Mi wor emon neimi mi semwen? Uweireto ikei. Mi wor neimi mi pechema, are chun, are fetanengaw, are mwok, are kinipotur, are ekkewe ir mi pwaseno inisir, are ekkewe ir mi pung seninger, are ekkewe ir mi riaffou non sokopaten napanap? Uweireto ikei iwe upwe echikarareta, pun mi wor ai kirekiroch womi; nenukei a uren umoumoch.

8 Pun ua weweiti pwe oua mochen pwe upwe pwari ngenikemi met ua fen fori ngeni pwiumi kewe non Jerusalem, pun ua kuna pwe ami nuku a naf pwe upwe echikarakemi.

9 Iwe non ewe fansoun pwe nupwen an a kapas, unusen ewe mwicheich, fengen, ra feino fiti nour kewe mi semwen me nour kewe mi riaffou, me nour kewe mi pechema, me fiti nour kewe mi chun, me fiti nour kewe rese tongeni kapas, me fiti meinisin ir ekkewe mi riaffou non sokopaten napanap; iwe a echikarareta emon me emon nupwen ra emmwenito ngeni i.

10 Iwe ir meinisin, ekkewe ir ra fen chikar me pwan ir ekkewe mi unusoch, ra chappetiw ren pechen, me ra fen ngeni i; iwe meinisin ekkewe ra tongeni feito inamo ewe mwicheich ra kisi pechen, ina popun pwe ra tonu pechen ren chonun meser.

11 Iwe non ewe fansoun pwe a annuku pwe nour kewe kukkun semirit repwe emmwenito.

12 Iwe ra emmwenato nour kewe kukkun semirit me waretiw won ewe puun unukun, iwe Jises a uta nukanaper; iwe ewe mwicheichen aramas ra marfesen tori ir meinisin ra emmwenito ngeni i.

13 Iwe non ewe fansoun pwe nupwen ar emmwenito meinisin, me Jises a uta nukanaper, a annuku ewe mwicheich pwe repwe fotopukutiw won ewe puun.

14 Iwe non ewe fansoun pwe nupwen ra fotopukutiw won ewe puun, Jises a ngungures non netipan, me apasa: Semei, ngang ua osukosuk pokiten fofforungawen ekkewe aramasen ewe imwen Israel.

15 Iwe nupwen an apasa ekkei kapas, i pwisin a pwan fotopukutiw won ewe puun; iwe nengeni a iotek ngeni ewe Sam, iwe ekkewe mettoch minne a ioteki rese tongeni makketiw, iwe ewe mwicheich ra pwarata ekkewe ir mi rongorong ngeni i.

16 Iwe mwirin ei napanap ra pwarata: Ewe mas esamo kukuna, ewe pwan sening esamo rongorong, akkom, fokkun auchea me amwarar ekkewe mettoch usun am aua kuna me rongorong an Jises kapas ngeni ewe Sam;

17 Me ese wor channaw a tongeni apasa, rese pwan tongeni makketiw me ren emon aramas, are netipen aramas rese pwan tongeni ekiekieta ekkei auchean me amwararen mettoch usun am aua kuna me rongrong Jises a apasa; me ese wor emon a tongeni chok ekiekieta ewe pwapwa minne a aurano ngunum atun ewe fansoun am aua rongorong ngeni i an iotek fan item ngeni ewe Sam.

18 Iwe non ewe fansoun pwe nupwen an Jises awesano an iotek ngeni ewe Sam, a uta; nge a fokkun chouchou ewe pwapwa an ewe mwicheich ina pwata ra apwangapwangeno.

19 Iwe non ewe fansoun pwe Jises a kapas ngeni ir, me annukur pwe repwe uta.

20 Iwe ra uta seni ewe puun, iwe a apasa ngeni ir: Oua feioch pokiten ami nuku. Iwe iei nengeni, ai pwapwa a ureno.

21 Iwe nupwen an a apasa ekkei kapas, a kechiw, iwe ewe mwicheich ra pwarata usun, iwe a angei nour kewe kukkun semirit, emon me emon, me efeiochur, me iotek ngeni ewe Sam fan iter.

22 Iwe nupwen a fori ei a kechiw sefan;

23 Iwe a kapas ngeni ewe mwicheich, me apasa ngeni ir: Nengeni noumi kewe semirit.

24 Iwe nupwen ar nengeni pwe repwe kuna ra nenetai meser ngeni nang, iwe ra kuna ekkewe nang pwe ra sukkuno, iwe ra kuna chon nang ra feitiw seni nang usun ita non nukanapen ekkei; iwe ra feitiw me rokopwanieno ekkewe kukkun semirit, iwe ra rokopanino ren ekkei; iwe ekkewe chon nang ra angang ngeni ir.

25 Iwe ewe mwicheich ra kuna me rongorong me pwarata; iwe ir mi sinei pwe ar we pwarata mi ennet pun ir meinisin mi kuna me rongorong, emon me emon pwisin won inisin; iwe chochor a arap ngeni ru ngerou nime puku aramas; iwe mi wor mwan, fefin, me semirit.