Vaj Lug Kub
3 Nifais 16


Tshooj 16

Yexus yuav mus xyuas lwm cov yaj uas ploj lawm ntawm Ixayees—Nyob rau hauv hnub nyoog kawg txoj moo zoo yuav mus rau Lwm Haiv Neeg thiab tom qab ntawd yuav mus rau tsev neeg Ixayees—Tus Tswv cov neeg yuav pom ntawm qhov muag kiag thaum nws rov qab coj Xi-oos rov los. Kwv yees li 34 xyoo tom qab yug Yexus.

1 Thiab kuv hais rau nej tseeb tseeb tias, kuv muaj lwm cov yaj, uas tsis nyob hauv thaj av no, thiab kuj tsis nyob hauv thaj av Yeluxalees, thiab kuj tsis nyob hauv tej feem av uas nyob ib puag ncig ntawd uas kuv tau mus muab kev pab.

2 Vim lawv cov uas kuv hais txog yog lawv cov uas tseem tsis tau hnov kuv lub suab; thiab kuv kuj tsis tau ua kuv tus kheej rau lawv pom ib lub sij hawm twg li.

3 Tiam sis kuv tau txais ib lo lus txib los ntawm Leej Txiv tias kuv yuav tsum mus rau lawv, thiab xwv kom lawv yuav hnov kuv lub suab, thiab yuav raug suav nrog kuv cov yaj, xwv kom yuav muaj ib pab thiab ib tug tswv yug yaj; yog li ntawd kuv mus ua kuv tus kheej rau lawv pom.

4 Thiab kuv txib nej tias nej yuav tsum sau tej lus hais no tom qab uas kuv tau mus lawm, xwv kom yog tias kuv cov neeg nyob hauv Yeluxalees, lawv cov uas tau pom kuv thiab tau nrog kuv nyob hauv kuv txoj kev ua hauj lwm qhuab qhia txoj moo zoo, tsis thov Leej Txiv nyob hauv kuv lub npe, kom lawv yuav tau txais ib txoj kev paub txog nej los ntawm tus Vaj Ntsuj Plig Dawb Huv, thiab txog lwm xeem neeg uas lawv paub tsis txog, kom tej lus hais no uas nej yuav sau kom yuav raug ceev thiab yuav raug ua rau Lwm Haiv Neeg pom, kom dhau los ntawm txoj kev cai muaj puv npo ntawm Lwm Haiv Neeg, cov neeg seem ntawm lawv tej noob, uas tau raug khiav tawg ri niab mus rau saum lub ntiaj teb vim yog lawv txoj kev tsis ntseeg, yuav raug coj los rau hauv, los sis yuav raug coj los paub txog kuv, lawv tus Txhiv Dim.

5 Thiab tom qab ntawd kuv yuav sau lawv ntawm plaub ceg kaum ntawm lub ntiaj teb los ua ke; thiab tom qab ntawd kuv yuav ua kom muaj puv npo cov kev khi lus uas Leej Txiv tau khi rau tag nrho cov neeg ntawm tsev neeg Ixayees.

6 Thiab Lwm Haiv Neeg tau koob hmoov, vim yog lawv txoj kev ntseeg kuv, nyob hauv thiab los ntawm tus Vaj Ntsuj Plig Dawb Huv, uas ua tim khawv rau lawv txog kuv thiab txog Leej Txiv.

7 Saib seb, vim yog lawv txoj kev ntseeg kuv, Leej Txiv hais tias, thiab vim yog txoj kev tsis ntseeg ntawm nej, Au tsev neeg Ixayees es, nyob hauv hnub nyoog kawg qhov tseeb yuav los rau Lwm Haiv Neeg, xwv kom txoj kev muaj puv npo ntawm tej yam no yuav raug ua paub rau lawv.

8 Tiam sis kev txom nyem, Leej Txiv hais tias, yuav raug rau cov uas tsis ntseeg ntawm Lwm Haiv Neeg—vim txawm tias lawv tau tuaj txog rau saum thaj av no, thiab tau ua tawg ri niab rau kuv cov neeg uas yog tsev neeg Ixayees; thiab kuv cov neeg uas yog cov ntawm tsev neeg Ixayees tau raug ntiab tawm ncaim ntawm lawv, thiab tau raug lawv tsuj hauv qab xib taws;

9 Thiab vim yog tej kev hlub tshua ntawm Leej Txiv rau Lwm Haiv Neeg, thiab tej kev txiav txim ntawm Leej Txiv uas nyob saum kuv cov neeg uas yog tsev neeg Ixayees, kuv hais rau nej tseeb tseeb tias tom qab ib puas yam tsav no, thiab kuv tau ua kom kuv cov neeg uas yog tsev neeg Ixayees raug ntaus, thiab raug txom nyem, thiab raug tua, thiab raug ntiab tawm ncaim ntawm lawv, thiab rais los mus raug lawv ntxub, thiab rais los mus ua lub suab ntxub thiab paj lug phem nyob hauv lawv—

10 Thiab Leej Txiv tau txib li no tias kuv yuav tsum hais rau nej: Nyob rau hnub ntawd thaum uas Lwm Haiv Neeg yuav ua txhaum rau kuv txoj moo zoo, thiab yuav tsis kam txais yuav txoj kev muaj puv npo ntawm kuv txoj moo zoo, thiab lawv tej siab yuav khav theeb tshaj tag nrho tej haiv neeg, thiab tshaj tag nrho tej neeg ntawm lub ntiaj teb huv si, thiab yuav muaj puv npo nrog txhua yam kev dag, thiab tej kev ntxias, thiab tej kev ua tsis zoo, thiab tag nrho txhua yam kev ua siab phem, thiab tej kev tua neeg, thiab tej ua dab, thiab tej kev sib daj sib deev, thiab tej kev qias ntsiag to; thiab yog lawv yuav ua tag nrho tej yam ntawd, thiab yuav tsis kam txais yuav txoj kev muaj puv npo ntawm kuv txoj moo zoo, saib seb, Leej Txiv hais tias, kuv yuav tshem txoj kev muaj puv npo ntawm kuv txoj moo zoo ntawm lawv mus.

11 Thiab tom qab ntawd kuv yuav nco txog kuv txoj kev khi lus uas kuv tau khi rau kuv cov neeg, Au tsev neeg Ixayees es, thiab kuv yuav coj kuv txoj moo zoo los rau lawv.

12 Thiab kuv yuav ua rau nej pom, Au tsev neeg Ixayees es, kom Lwm Haiv Neeg yuav tsis muaj hwj chim rau saum nej; tiam sis kuv yuav nco ntsoov kuv txoj kev khi lus rau nej, Au tsev neeg Ixayees es, thiab nej yuav los paub txog txoj kev muaj puv npo ntawm kuv txoj moo zoo.

13 Tiam sis Leej Txiv hais tias, yog Lwm Haiv Neeg yuav hloov siab lees txim thiab tig rov qab los cuag kuv, saib seb lawv yuav raug suav nrog kuv cov neeg, Au tsev neeg Ixayees es.

14 Thiab kuv yuav tsis cia kuv cov neeg, uas yog tsev neeg Ixayees, mus dhau rau hauv lawv, thiab muab lawv tsuj, Leej Txiv hais li.

15 Tiam sis yog lawv yuav tsis tig los cuag kuv, thiab mloog rau kuv lub suab, kuv yuav cia lawv, muaj tseeb tiag, kuv yuav cia kuv cov neeg, Au tsev neeg Ixayees, kom lawv yuav mus dhau rau hauv lawv, thiab yuav muab lawv tsuj, thiab lawv yuav zoo ib yam li tej ntsev uas tau tsuag lawm, uas tom qab ntawd tsis zoo rau dab tsi lawm tsuas yog yuav muab pov tseg xwb, thiab kom raug muab tsuj rau hauv qab xib taws ntawm kuv cov neeg, Au tsev neeg Ixayees.

16 Kuv hais rau nej tseeb tseeb, Leej Txiv tau txib kuv li no—kom kuv yuav muab thaj av no rau cov neeg no ua lawv qub txeeg qub teg.

17 Thiab tom qab ntawd tej lus ntawm tus yaj saub Yaxayas yuav muaj puv npo, uas hais tias:

18 Koj tej neeg zov xyuas yuav tsa lawv tej suab; lawv yuav hu nkauj nrog tej suab ua ke; vim lawv yuav pom qhov muag rau qhov muag thaum tus Tswv yuav coj Xi-oos rov qab los.

19 Cia li tawg plho los rau hauv txoj kev xyiv fab; cia li hu nkauj ua ke, nej tej chaw uas tsis muaj nuj nqis ntawm Yeluxalees; vim tus Tswv tau nplij nws cov neeg, nws tau txhiv Yeluxalees;

20 Tus Tswv tau ua nws lub hwj chim dawb huv rau ntawm txhua haiv neeg lub qhov muag, thiab tag nrho hauv qab ntuj kawg yuav pom Vajtswv txoj kev cawm seeg.