1 Ao ngkai e a koro bukina bwa ngke e a tia n taekin taeka aikai Iesu ao e taratara nako i aoia aomata ake a uanao akekei, ao e taku nakoia: Nooria, kam a tia n ongo reirei ake I reirei i mwain ae I riarake nakon Tamau; mangaia are, ane e uring au taeka aikai ma ni ^akaraoi nanoia, ao N na bon ^bkateirakea n te kabanea ni bong.

2 Ao e a koro bukina bwa ngke e a tia Iesu n taekin taeka aikai e nooria bwa bon iai mai i buakoia ake a miimii ma n iangoia bwa teraa ae kananonaa n a na ^atua Mote; bwa aki oota n te taeka are e kangai bwa a na bane n toki tain bwaai ake ngkoa, ao a na bane ni boou bwaai.

3 Ao e taku nakoia: Tai miimi bwa I taku nakoimi bwa a bane tain bwaai ake ngkoa, ao a manga boou bwaai ngkai.

4 Nooria, I taku nakoimi bwa e kakoroaki nanon te ^atua are e anganaki Mote.

5 Nooria, boni Ngai are ^aI anga te tua, ao boni Ngai are I karaoa au berita ae tabu ma te botanaomata are Iteraera; mangaia are e a ^bkakoroaki nanon te tua irou, bwa I roko bwa N na kakoroa nanon te tua; ngaia are iai tokina.

6 Nooria, I ^aaki kamaunaia burabeti, bwa ake a mwaiti ake a bon tuai koro bukiia irou, e koaua ae I tuangkami, a na bane ni kakoroaki bukiia.

7 Ao ibukina bwa I a tia n taetae nakoimi bwa a bane tain bwaai ake ngkoa, I aki kamaunai taeka ake a taekinaki ibukin bwaai aika a na roko.

8 Bwa noria, te ^aberita ae tabu are I a tia ni karaoia ma au botanaomata e bon tuai ni bane ni kakoroaki bukina; ma te tua are e anganaki Mote e toki irou.

9 Nooria, bon Ngai te ^atua, ao te ^boota. Tarai, ao teimatoa n uaa te toki, ao kam na ^cmaiu; bwa ane e ^dteimatoa n uaa te toki ao N na anganna te maiu ae akea tokina.

10 Nooria, I a tia n anganingkami au ^atua; ngaia are kaawakin au tua. Ao aio te tua ao aia taeka burabeti, bwa a boni ^bkakoaua ibukiu.

11 Ao ngkai e a koro bukina bwa ngke e a tia Iesu n taekin taeka aikai, e taku nakoia ake tengaun ma uoman ake e a tia n rineia:

12 Ngkami au reirei; ao ngkami te oota nakoia te botanaomata aio, ake nikiraia kaain te bata are ^aIotebwa.

13 Ao nooria, bon aio ^aabami ni bwaibwai; ao e a tia te Tama n anganingkami.

14 Ao bon akea te tai ae e a tia te Tama n anganai te tua bwa N na ^atuangiia tarimi ake i Ierutarem.

15 Ao akea naba te tai ae e anganai te Tama te tua bwa N na tuangiia taeka aika a kaineti ma ^abaronga ake tabeua ake kaain te bata are Iteraera, are e a tia te Tama ni kairiia nako man te aba.

16 Bon ti aio ae e tua te Tama nakoiu, bwa N na tuangiia:

17 Iai riki au tiibu tabemwaang ake tiaki kaina te nanai aio; ao N na riai naba ni kawariaa, ao a na ongo bwanaau; ao e na ti teuana te nanai ao temanna te ^atia kaawakin tiibu.

18 Ao ngkai, ibukin imanonoia ma aia kakewekewe a bon aki ^aoota n au taeka; ngaia are I anganaki te tua bwa N na aki manga taekina riki te Tama ni kaineti ma te bwai aio nakoia.

19 Ma, e koaua, I tuangkami bwa e a tia te Tama n tuangai, ao I a manga tuangkami, bwa kam kamaenakoaki mai irouia ibukin aia bure; mangaia are bon ibukin aia bure are a bon aki ataingkami iai.

20 Ao e koaua, ae I tuangkami riki bwa a tia baronga ake tabeua ni kamaenakoaki mai irouia ao aio bon ibukin buakakaia are a bon aki kinaingkami iai.

21 Ao e koaua ae I tuangkami, bwa bon ngkami ake I taetae ibukimi ni kangai: Iai au tiibu ^atabemwaang ake tiaki kaain te nanai aio; ao N na kawaria naba; ao a na ongo bwanaau; ao e na ti teuana te nanai ao temanna te tia kaawakin tiibu.

22 Ao a bon aki oota iroou, bwa a taku inanoia bwa taekaia ^aTientaire; bwa aki ataia bwa a na ^brairaki Tientaire man aia kabwarabwara.

23 Ao a bon aki oota irou ngke I taku bwa a na ongo bwanaau; ao aki oota irou ngke I taku bwa a na bon aki ongo bwanaau ^aTientaire—bwa N na aki kaotai nakoia, ma ti iroun te ^bTamnei ae Raoiroi.

24 Ma nooria, kam a tia n ongo ^abwanaau ma n noorai; ao ngkami au tiibu, ao kam warekaki i buakoia ake e a tia te Tama n ^banganai.