1 Kuv hais tseeb tseeb tias, kuv xav kom nej yuav tsum ua tej qhov zoo pab rau cov neeg pluag; tiam sis ceev faj kom nej tsis txhob ua tej qhov zoo rau neeg ntsia kom lawv pom; yog nej ua li ntawd nej yuav tsis tau nqi zog ntawm nej Leej Txiv tus uas nyob saum ntuj ceeb tsheej.

2 Yog li ntawd, thaum nej yuav ua tej qhov zoo tsis txhob tshuab raj tshuab hom ua ntej nej, ib yam li cov neeg siab phem yuav ua nyob hauv tej tsev sab laj thiab nyob tom tej kev, xwv kom neeg yuav qhuas lawv. Kuv hais tseeb rau nej tias, lawv twb tau lawv nqi zog lawm.

3 Tiam sis thaum nej ua tej qhov zoo tsis txhob cia nej sab tes laug paub yam uas nej sab tes xis ua;

4 Xwv kom nej tej qhov zoo yuav nyob hauv qhov ntsiag to; thiab nej Leej Txiv tus uas pom hauv qhov ntsiag to, nws tus kheej mam li yuav qhib lug muab nqi zog rau nej.

5 Thiab thaum nej thov Vajtswv nej tsis txhob ua li cov neeg siab phem ua, vim lawv nyiam thov Vajtswv sawv ntsug hauv tej tsev sab laj thiab nyob tom tej ces kaum kev, xwv kom tej neeg yuav pom lawv. Kuv hais tseeb rau nej tias, lawv twb tau lawv nqi zog lawm.

6 Tiam sis nej, thaum nej thov Vajtswv, nkag mus rau hauv nej chav me tsev, thiab thaum nej tau kaw nej lub qhov rooj lawm, mam thov rau nej Leej Txiv tus uas nyob hauv qhov ntsiag to; thiab nej Leej Txiv, tus uas pom tau hauv qhov ntsiag to, yuav qhib lug muab nqi zog rau nej.

7 Tiam sis thaum nej thov Vajtswv, tsis txhob hais mus hais los qhov qub, ib yam li cov neeg tsis paub Vajtswv ua, vim lawv xav tias lawv yuav raug hnov vim lawv txoj kev hais ntau.

8 Yog li ntawd nej tsis txhob zoo li lawv, vim nej Leej Txiv twb paub yam uas nej xav tau ua ntej nej thov nws lawm.

9 Yog li no nej yuav tsum thov Vajtswv zoo li no: Peb Leej Txiv tus uas nyob saum ntuj ceeb tsheej, thov kom koj lub npe raug hwm dawb huv.

10 Thov kom yam koj siab xav yuav ua tiav nyob hauv ntiaj teb ib yam li nyob saum ntuj ceeb tsheej.

11 Thiab thov zam txim rau peb tej kev tshuav nuj nqis, ib yam li peb zam txim rau cov uas tshuav peb nqi.

12 Thiab tsis txhob coj peb mus rau kev ntxeev ntxias, tiam sis pab kom peb dim ntawm kev phem.

13 Vim lub nceeg vaj, thiab lub hwj chim, thiab lub yeeb koob, yog koj li mus ib txhis. Amees.

14 Vim, yog nej zam txim rau neeg tej kev txhaum ces nej Leej Txiv tus nyob saum ntuj ceeb tsheej yeej yuav zam txim rau nej;

15 Tiam sis yog nej tsis zam txim rau neeg tej kev txhaum ces nej Leej Txiv los yeej yuav tsis zam txim rau nej thiab.

16 Ntxiv, thaum nej yoo mov tsis txhob ua li cov neeg siab phem, es ua ntsej muag mluas mlob, vim lawv ua kom lawv tej ntsej ntshaus mluas mlob xwv kom neeg yuav pom tias lawv yoo mov. Kuv hais tseeb rau nej tias, lawv twb tau lawv nqi zog lawm.

17 Tiam sis nej, thaum nej yoo mov, pleev roj rau tej taub hau, thiab ntxuav nej tej ntsej muag;

18 Xwv kom neeg yuav tsis pom tias nej yoo mov, tiam sis rau nej Leej Txiv, tus uas nyob hauv qhov ntsiag to; thiab nej Leej Txiv, tus uas pom hauv qhov ntsiag to, yuav qhib lug muab nqi zog rau nej.

19 Tsis txhob khaws tej nyiaj txiag cia rau nej tus kheej rau hauv ntiaj teb no, qhov uas muaj npauj thiab xeb yuav ua tau kom puas tsuaj, thiab tub sab yuav tsoo tawg tau thiab tuaj nyiag;

20 Tiam sis khaws tej nyiaj txiag cia rau nej tus kheej rau saum ntuj ceeb tsheej, qhov uas tsis muaj npauj thiab xeb ua kom puas tsuaj, thiab qhov uas tej tub sab tsoo tsis tau tawg tuaj nyiag.

21 Vim nej tej nyiaj txiag nyob qhov twg, nej lub siab yeej yuav nyob qhov ntawd.

22 Qhov pom kev ntawm lub cev yog lub qhov muag; yog li ntawd, yog nej lub qhov muag ua ib ke, tag nrho nej lub cev yuav pom kev huv tib si.

23 Tiam sis yog nej lub qhov muag phem, tag nrho nej lub cev yuav muaj kev tsaus ntuj puv nkaus. Yog li ntawd, yog qhov pom kev uas nyob hauv nej yog kev tsaus ntuj, ces qhov kev tsaus ntuj ntawd yuav loj heev!

24 Tsis muaj ib tug neeg yuav ua tau hauj lwm rau ob tug tswv; vim nws yeej yuav ntxub ib tug thiab nyiam ib tug, los sis nws yeej yuav puab ib tug thiab tsis quav ntsej ib tug. Nej yeej ua tsis tau hauj lwm rau Vajtswv thiab Nyiaj Txiag.

25 Thiab nim no tau muaj tias thaum Yexus tau hais cov lus no tas nws tau ntsia kaum ob tug uas nws tau xaiv, thiab tau hais rau lawv tias: Nco ntsoov tej lus uas kuv tau hais lawm. Vim saib seb, nej yog lawv cov uas kuv tau xaiv los muab kev pab rau cov neeg no. Yog li ntawd kuv hais rau nej tias, tsis txhob xav txog nej lub neej, yam dab tsi uas nej yuav noj, los sis yam dab tsi uas nej yuav haus; los sis rau nej lub cev, yam dab tsi nej yuav hnav. Tsis yog txoj sia muaj nuj nqis dua nqaij thiab lub cev muaj nuj nqis dua tej khaub ncaws hnav los?

26 Saib seb tej noog uas nyob saum huab cua, lawv twb tsis cog qoob loos, thiab lawv twb tsis hlais los sis sau los rau hauv txhab; tiam sis nej Leej Txiv tus uas nyob saum ntuj ceeb tsheej twb pub lawv noj. Nej tseem tsis muaj nuj nqis dua li lawv los?

27 Nej leej twg yog xav txog es yuav ntxiv tau ib nti kom nws siab me ntsis tuaj?

28 Thiab vim li cas nej pheej xav txog khaub ncaws? Xav rau tej paj deg tom tej liaj saib lawv tuaj li cas; lawv tsis ua hauj lwm, thiab lawv twb tsis ntos ntaub ntos xov;

29 Thiab tsis tas li kuv hais rau nej, tias txawm yog Xaulaumoos, nyob hauv tag nrho nws lub yeeb koob, los twb tsis tau hnav zoo nkauj li ib lub nyuag paj no.

30 Yog li ntawd, yog Vajtswv twb ua kom tej nyom tom tej liaj zoo nkauj, uas hnub no nyob, thiab tag kis raug pov rau hauv qhov cub, tib yam li ntawd nws yeej yuav muab ris tsho rau nej hnav, yog nej tsis txhob muaj kev ntseeg me me.

31 Yog li ntawd tsis txhob xav, hais tias, Peb yuav noj dab tsi? los sis, Peb yuav haus dab tsi? los sis, Peb yuav hnav dab tsi?

32 Vim nej Leej Txiv tus uas nyob saum ntuj ceeb tsheej yeej paub tias nej yuav tsum muaj tag nrho txhua yam no.

33 Tiam sis nej yuav tsum xub nrhiav Vajtswv lub nceeg vaj thiab nws txoj kev ncaj ncees tso, thiab tag nrho tej yam no yeej yuav raug muab ntxiv rau nej.

34 Yog li ntawd tsis txhob xav txog tag kis, vim tag kis muaj kev xav txaus tau nws tus kheej lawm. Txhua hnub twg yeej muaj kev phem txaus nyob hauv lawm.