1 Thiab tau muaj tias thaum Yexus hais cov lus no rau Nifais tas lawm, thiab rau cov uas nws tau hu, (nim no cov uas nws tau hu, thiab muab hwj chim thiab txoj cai rau ua kev cai raus dej, muaj kaum ob leeg) thiab saib seb, nws xyab nws txhais tes rau cov neeg coob coob, thiab hais nrov nrov rau lawv, hais tias: Nej tau koob hmoov yog nej yuav mob siab mloog tej lus ntawm kaum ob leeg no uas kuv tau xaiv hauv nej los txhawb pab nej, thiab los ua nej cov tub qhe; thiab kuv tau muab hwj chim rau lawv xwv kom lawv yuav muab nej ua kev cai raus dej; thiab tom qab nej ua kev cai raus dej tas lawm, saib seb kuv yuav muab nej ua kev cai raus ntawm hluav taws thiab ntawm tus Vaj Ntsuj Plig Dawb Huv; yog li ntawd nej tau koob hmoov yog nej yuav ntseeg kuv thiab ua kev cai raus dej, tom qab nej tau pom kuv thiab paub tias kuv muaj sia nyob.

2 Thiab ntxiv, cov uas tau koob hmoov ntau dua yog cov uas yuav ntseeg nej tej lus vim tias nej yuav ua tim khawv tias nej tau pom kuv, thiab tias nej paub tias kuv muaj sia nyob. Muaj tseeb tiag, cov uas yuav ntseeg nej tej lus, thiab txo hwj chim kom kawg siab kawg ntsws thiab ua kev cai raus dej tau koob hmoov, vim hluav taws thiab tus Vaj Ntsuj Plig Dawb Huv yuav los xyuas lawv, thiab lawv yuav tau txais kev zam txim rau lawv tej kev txhaum.

3 Muaj tseeb tiag, cov neeg pluag ntawm sab ntsuj plig uas los cuag kuv tau koob hmoov, vim lub nceeg vaj ceeb tsheej yog lawv li.

4 Thiab ntxiv, tag nrho lawv cov uas quaj ntsuag tau koob hmoov, vim tus Tswv yuav nplij lawv lub siab.

5 Thiab cov uas muaj siab mos siab muag tau koob hmoov, vim lawv yuav tau lub ntiaj teb ua lawv tug.

6 Thiab txhua tus uas tshaib thiab nqhis txoj kev ncaj ncees tau koob hmoov, vim lawv yuav muaj tus Vaj Ntsuj Plig Dawb Huv puv npo.

7 Thiab cov uas muaj kev hlub tshua puv npo tau koob hmoov, vim lawv yuav tau txais kev hlub tshua.

8 Thiab tag nrho cov uas muaj siab dawb tau koob hmoov, vim lawv yuav pom Vajtswv.

9 Thiab txhua tus uas ua kom muaj kev thaj yeeb tau koob hmoov, vim yuav hu lawv ua Vajtswv cov me nyuam.

10 Thiab txhua tus uas raug tsim txom vim yog kuv lub npe tau koob hmoov, vim lub nceeg vaj ceeb tsheej yog lawv li.

11 Thiab nej tau koob hmoov thaum tib neeg yuav cem thiab tsim txom nej, thiab yuav hais txhua yam lus phem uas tsis tseeb tawm tsam nej, vim yog kuv;

12 Vim nej yuav muaj kev xyiv fab heev thiab yuav kaj siab lug heev, vim nej nqi zog nyob saum ntuj ceeb tsheej yuav tseem ceeb heev; vim lawv kuj tau tsim txom cov yaj saub uas nyob ua ntej nej.

13 Kuv hais tseeb tseeb rau nej tias, kuv cia nej ua cov ntsev rau lub ntiaj teb; tiam sis yog tias cov ntsev tsuag lawm ces yuav muab dab tsi los las lub ntiaj teb? Tom qab ntawd cov ntsev yuav tsis zoo rau dab tsi, tiam sis muab pov tseg thiab muab tsuj rau hauv neeg qab xib taws.

14 Kuv hais tseeb tseeb rau nej, kuv cia nej ua lub teeb rau cov neeg no. Ib lub nroog uas nyob rau saum ib lub pov roob yeej tsis muaj dab tsi zais tau.

15 Saib seb, neeg puas yuav taws ib tug tswm ciab thiab muab tso hauv qab ib lub thoob? Yeej tsis ua li ntawd, tiam sis muab tso rau saum qhov chaw taws tswm ciab, thiab tswm ciab yuav ci rau tag nrho cov uas nyob hauv lub tsev pom kev;

16 Yog li ntawd cia nej lub teeb ci li no rau cov neeg no, xwv kom lawv yuav pom tej yam uas nej ua zoo thiab muab yeeb koob rau nej Leej Txiv tus uas nyob saum ntuj ceeb tsheej.

17 Tsis txhob xav tias yog kuv los rhuav txoj kev cai los sis cov yaj saub. Kuv tsis yog los rhuav tiam sis yog los ua kom tiav;

18 Vim kuv hais tseeb rau nej tias, ib nyuag qhov los sis ib qho me xwb los twb tsis poob ntawm txoj kev cai mus, tiam sis los ntawm kuv twb muaj raws li txhua yam tiav tag.

19 Thiab saib seb, kuv tau muab kuv Txiv txoj kev cai thiab tej lus txib rau nej, xwv kom nej yuav ntseeg kuv, thiab xwv kom nej yuav hloov siab lees txim rau nej tej kev txhaum, thiab los cuag kuv nrog ib lub siab mob thiab lub siab xav ua zoo. Saib seb, nej twb tau tej lus txib nyob rau ntawm nej, thiab twb muaj raws li txoj kev cai tiav lawm.

20 Yog li ntawd cia li los cuag kuv thiab nej cia li txais kev cawm seej; vim kuv hais tseeb rau nej tias, tsuas yog nej yuav coj kuv tej lus txib, uas kuv tau txib nej nyob rau lub sij hawm no xwb, tsis li ntawd nej yuav tsis muaj kev nkag tau mus rau hauv lub nceeg vaj ceeb tsheej.

21 Nej twb hnov hais tias lawv txheej thaum ub tau hais tseg, thiab twb muab sau cia rau ntawm nej, hais tias nej yuav tsum tsis txhob tua neeg, thiab txhua tus uas tua neeg ntshe yuav raug Vajtswv txoj kev txiav txim.

22 Tiam sis kuv hais rau nej tias, tus uas npau taws rau nws tus kwv tij ces ntshe yuav raug Vajtswv txoj kev txiav txim. Thiab txhua uas hais rau nws tus kwv tij tias, Niag neeg vwm, ntshe yuav raug lub rooj txiav txim; thiab tus uas hais tias, Niag neeg ruam, ces ntshe yuav raug ntuj txiag teb tsaus tej hluav taws.

23 Yog li ntawd, yog nej yuav los cuag kuv, los sis xav los cuag kuv, thiab nej nco qab tias nej tus kwv tij muaj tej yam chim rau nej—

24 Cia li mus cuag nej tus kwv tij, thiab rov sib raug zoo nrog nej tus kwv tij ua ntej tso, thiab tom qab ntawd mam li los cuag kuv kawg siab kawg ntsws, thiab kuv yuav txais yuav nej.

25 Cia li yeem nrog nej tus yeeb ncuab sai sai thaum nej nrog nws mus ua ke, nyob tsam nws yuav txhom nej, thiab nej yuav raug muab tso rau hauv lub tsev kaw.

26 Kuv hais tseeb tseeb rau nej tias, nej yuav tawm tsis tau hauv los kom txog thaum nej them tag txhua npib nyiaj xinais. Thiab thaum nej tseem nyob hauv lub tsev kaw nej puas yuav them tau ib npib nyiaj xinais? Kuv hais tseeb tseeb rau nej tias, Tsis tau.

27 Saib seb, lawv txheej thaum ub sau tseg hais tias, nej yuav tsum tsis txhob deev luag poj luag txiv;

28 Tiam sis kuv hais rau nej tias, tus uas ntsia ib tug poj niam, xav nrog nws pw, ces twb deev luag poj nyob hauv nws lub siab lawm.

29 Saib seb, kuv muab ib lo lus txib rau nej, kom nej tsis txhob cia ib yam no nkag tau rau hauv nej lub siab;

30 Vim qhov uas nej xyeej tej yam no, uas ua rau nej yuav kwv nej tus ntoo khaub lig, yeej zoo dua li qhov uas nej yuav raug muab pov rau hauv ntuj txiag teb tsaus.

31 Twb tau sau tseg tias, tus uas yuav muab nws tus poj niam tso tseg, cia tus txiv ntawd muab ib tsab ntawv sib nrauj rau nws.

32 Kuv hais tseeb tseeb rau nej tias, tus uas yuav muab nws tus poj niam tso tseg, tsuas yog tsis yog vim tus poj niam deev nraug, ces twb ua rau tus poj niam ntawd deev luag txiv; thiab leej twg uas yuav tus poj niam uas nrauj ntawd twb deev luag poj.

33 Thiab ntxiv twb tau sau tseg tias, nej yuav tsum tsis txhob lam tau lam lav lus, tiam sis yuav tsum ua raws li nej tej kev lav lus rau tus Tswv;

34 Tiam sis kuv hais tseeb tseeb rau nej tias, tsis txhob twv dab tsi hlo li; tsis txhob twv ntuj, vim ntuj yog Vajtswv lub rooj theej kiab;

35 Thiab tsis txhob twv lub ntiaj teb, vim lub ntiaj teb yog Vajtswv lub rooj tiag taw;

36 Thiab nej yuav tsum tsis txhob siv nej lub taub hau los twv, vim nej twb tsis muaj peev xwm ua tau ib txoj plaub hau kom dub los sis dawb;

37 Tiam sis nej cia li sib txuas lus li no hais tias Yog, los sis Tsis yog; vim txhua yam uas hais tshaj no yog kev phem.

38 Thiab saib seb, twb sau tseg tias, ib lub qhov muag pauj rau ib lub qhov muag, thiab ib tug hniav pauj rau ib tug hniav;

39 Tiam sis kuv hais rau nej tias, nej yuav tsum tsis txhob ua pauj kev phem, tiam sis tus uas ntaus nej sab plhu xis, cia li tig sab tod rau tus ntawd thiab;

40 Thiab yog ib tug neeg yuav foob nej rau ntawm tsev hais plaub thiab txeeb nej lub tsho, cia li muab nej lub tsho loj rau nws thiab;

41 Thiab txhua tus uas yuam kom nej nrog nws mus ib tawm kev, cia li nrog nws mus ob tawm kev.

42 Pub rau tus uas thov nej, thiab tsis txhob tig khiav ntawm tus uas xav qiv txais nej.

43 Thiab saib seb twb sau tseg thiab hais tias, nej yuav tsum hlub nej tus neeg zej zog thiab ntxub nej tus yeeb ncuab;

44 Tiam sis saib seb kuv hais rau nej tias, hlub nej cov yeeb ncuab, foom koob hmoov rau cov uas foom tsis zoo rau nej, ua zoo rau cov uas ntxub nej, thiab thov Vajtswv rau cov uas txhob txwm siv nej thiab tsim txom nej;

45 Xwv kom nej yuav los ua nej Leej Txiv tus uas nyob saum ntuj ceeb tsheej cov me nyuam; vim nws cia nws lub hnub ci rau cov neeg phem thiab rau cov neeg zoo.

46 Yog li ntawd tej yam uas yog txheej thaum ub, uas muaj los ntawm txoj kev cai los, kuv twb ua kom muaj raws li tej ntawd tag nrho tiav lawm.

47 Tej yam qub twb dhau mus, thiab txhua yam twb hloov los ua tshiab.

48 Yog li ntawd kuv xav kom nej ua neeg zoo tag nrho ib yam li kuv, los sis nej Leej Txiv tus uas nyob saum ntuj ceeb tsheej uas zoo tag nrho.