Pukfel
3 Nifai 11


Jises Kraist a pwarano inisin ngeni ekkewe aramasen Nifai, nupwen ewe mwicheich a ionfengen non ewe fonu Fonuen ras, me a afanafan ngeni ir; iwe non ei napanap i a pwarano inisin ngeni ir.

Mi kapachenong non sopun 11 ngeni 26.

Sopun 11

Ewe Sam a pwarata usun Noun mi Achengicheng—Christ a pwato me affatano usun An we Achasefan—Ekkewe aramas ra attapa ekkewe esisinen kinas non poun kewe me pechen me nepekin—Ra pupuchor ne apasa Mwareiti—A aitir usun me napanapen papatais—Ewe ngunun anini fengen a feito seni ewe tefin—An Kraist nongonong mi ennet pwe aramas repwe nuku me papatais me angei ewe Ngun mi Fel. Arap ngeni Ierin ewe Samon 34.

1 Iwe iei non ewe fansoun pwe a wor ew watten mwicheich a ioifengen, seni ekkewe aramasen Nifai, ra pwennieno ewe tempel minne a nom non ewe fonu Fonuen ras; iwe ra ingeno me mwar emon ngeni pwan emon, me ra pwar ngeni emon me emon ewe watten me amwararen siwin minne a fen fis.

2 Iwe ra pwan kakapas usun ei Jises Kraist, i ewe esisin a fen kawor usun an mano.

3 Iwe non ewe fansoun pwe nupwen ir mi chiwen kakapas fengen nefiner, ra rongorong ew mongungu usun ita a feitiw seni nang; iwe ra nenefetanei meser, pun rese weweiti ewe mongungu minne ra fen rongorong; iwe esap ew mongungu mi pochokun, ese pwan ew mongungu mi neuwomong; nge inamo, me nukun an ew mongungu mi pwetete a tonong non ir ekkewe mi rongorong ngeni netiper, ina popun pwe ese wor ekis kinikinin inisir ese pouk; ewer, a kur tori ngunur, me a efisi netiper pwe epwe pwichipwich.

4 Iwe non ewe fansoun pwe ra rongorong ewe mongungu sefan, iwe rese weweiti.

5 Iwe pwan ewe aunungatin fansoun ra rongorong ewe mongungu, me ra suku seninger pwe repwe rongorong; iwe meser kewe ra nenengeni mongungun we; iwe ra nikitu neneta ngeni nang, seni ian ewe mongungu a feito me ia.

6 Iwe nengeni, ewe aunungatin fansoun ra weweiti ewe mongungu minne ra rongorong; iwe a apasa ngeni ir:

7 Nengeni Nei mi Achengicheng, non i ngang ua pwapwa, non i ua fen eningano itei—rongorong ngeni i.

8 Iwe non ewe fansoun, nupwen ra weweiti ra sachetai meser sefan ngeni nang; iwe nengeni, ra kuna emon Mwan a feitiw seni nang; iwe a ufouf echo uf mi pwech; iwe a feitiw me uta nukanaper; iwe mesen unusen ewe mwicheich ra kunnuno ngeni i, iwe rese pwaracho ne suki awer, pwan mwo ngeni emon me emon, me rese sinei met a wewe ngeni, pun ra ekieki pwe emon chon nang ewe a pwato ngeni ir.

9 Iwe non ewe fansoun pwe a eitieu poun me kapas ngeni ekkewe aramas, a apasa:

10 Nengeni, ngang Jises Kraist, ewe ekkewe soufos ra pwarata pwe epwe wareto ngeni ewe fonufan.

11 Iwe nengeni, Ngang ewe saram me ewe manauen ewe fonufan; ua fen un seni ewe kap mi kipwin minne ewe Sam a fen ngeniei, me ua fen eningano ewe Sam non ai wata woi tipisin ewe fonufan, non minne ua fen riaffouni mochenin ewe Sam non mettoch meinisin seni nepoputan.

12 Iwe non ewe fansoun pwe nupwen an Jises wes ne apasa ekkei kapas ewe unusen mwicheich a turuno ngeni ewe puun; pun ra chechemeni pwe a fen pin osini me neir pwe Kraist epwe pwarano inisin ngeni ir mwirin an feita ngeni nang.

13 Iwe non ewe fansoun pwe ewe Samon a kapas ngeni ir a apasa:

14 Uta me feito rei, pwe oupwe tongeni wanong poumi non nepeki, me oupwe pwan tongeni attapa nemon ekkewe chufon non pei me won pechei, pwe oupwe tongeni sinei pwe Ngang ewe Koten Israel, me ewe Koten ewe unusen fonufan, me ua fen ninnino fan iten tipisin ewe fonufan.

15 Iwe non ewe fansoun pwe ewe mwicheich ra feino, me wata pour won nepekin, me attapa nemon ekkewe chufon non poun me won pechen; iwe ei ra fori, feino emon me emon tori ar ra feino meinisin, me ra kuna ren meser me ra attapa ren pour, me ra sinei usun ennetin me ra pwarata, pwe i ewe, usun a fen makketiw me ren ekkewe soufos, pwe epwe wareto.

16 Iwe nupwen ar ra feino meinisin me ra kuna ren pwisin inisir, ra puchoruu meinisin, ra apasa:

17 Mwareiti! Feioch ewe iten ewe Kot mi Fokkun Tekia! Iwe ra chappetiw ren pechen Jises, me ra fen ngeni i.

18 Iwe non ewe fansoun pwe a kapas ngeni Nifai (pun Nifai a nom nein ewe mwicheich) iwe a annuku ngeni i pwe epwe feito ren.

19 Iwe Nifai a uta me feino, me a chappetiw me mwen ewe Samon me a kisi pechen.

20 Iwe ewe Samon a annuku ngeni i pwe epwe pwáta. Iwe a pwáta me uta me mwen i.

21 Iwe ewe Samon a apasa ngeni i: Ua ngonuk ewe mumuta pwe kopwe papataisei ekkei aramas nupwen upwe feita sefan ngeni nang.

22 Iwe ewe Samon a pwan kokkori ekkoch, me apasa ngeni ir ekkewe pwan chok kapas; iwe a ngeni ir ewe mumuta ne papatais. Iwe a apasa ngeni ir: Non ei napanap oupwe fori angangen papatais; iwe esap wor anini fengen nefinemi.

23 Ennet ua apasa ngenikemi, pwe ion chok epwe aier seni an tipis pokiten ami kapas, me mochen pwe epwe papatais non itei, non ei napanap oupwe papataiser—Nengeni, oupwe feitiw me uta non ewe konik, iwe non itei oupwe papataiser.

24 Iwe iei nengeni, ikkei ekkewe kapas minne oupwe apasa, kori ir ren iter, me apasa:

25 Seni ewe mumuta me ren Jises Kraist a nom rei, ua papataisek fan iten ewe Sam, me ewe Nau, me ewe Ngun mi Fel. Amen.

26 Iwe mwirin oupwe otuonor non ewe konik, me uweireu sefan seni ewe konik.

27 Iwe anongonong won ei napanap oupwe fori papatais non itei; pun nengeni, ennetin ua apasa ngenikemi, pwe ewe Sam, me ewe Nau, me ewe Ngun mi Fel ir chok ew; iwe ngang mi nom non ewe Sam, me ewe Sam mi nom non ngang, iwe ewe Sam me ngang am ew chok.

28 Iwe usun chok ua annuku ngenikemi iei usun oupwe fori papatais. Iwe esap wor anini fengen nefinemi, usun mi fen fis me akkom; esap pwan wor anini fengen nefinemi usun ekkewe kinikinin ai we nongonong mi ennet, usun mi fen fis me akkom.

29 Pun ennet, ennet ua apasa ngenikemi, i ewe a wor ren ewe ngunun anini i ese feito seniei, nge a feito seni ewe tefin, i ewe semenapen anini, iwe i a amwasangata netipen aramas pwe repwe anini ren song, emon ngeni pwan emon.

30 Nengeni, esap iei ai nongonong mi ennet, ne amwasangata netipen aramas ren song, emon ngeni pwan emon; nge iei ai nongonong mi ennet, pwe ekkena sokkun mettoch repwe kouno.

31 Nengeni, ennet, ennet, ua apasa ngenikemi, upwe affata ngenikemi ai nongonong mi ennet.

32 Iwe iei ai nongonong mi ennet, me ewe nongonong mi ennet minne ewe Sam a fen ngeniei; me ua pwarata usun ewe Sam, me ewe Sam a pwarata usun ngang, me ewe Ngun mi Fel a pwarata usun ewe Sam me ngang; iwe ua pwarata pwe ewe Sam a annuku aramas meinisin, ekis meinisin, pwe repwe aier me nuku non ngang.

33 Iwe ion chok a nuku non ngang, me a papataisino, i ewe pwan chok epwe manau; iwe ir ekkewe repwe muuni ewe muun Kot.

34 Iwe ion chok ese nuku non ngang, me esap papataisino, epwe poutmwanino.

35 Ennet, ennet, ua apasa ngenikemi, pwe iei ai nongonong mi ennet, iwe ua pwarata usun seni ewe Sam; iwe ion chok epwe nuku non ngang mi pwan nuku non ewe Sam; iwe ewe Sam epwe pwarata ngeni i usun ngang, pun epwe churi i ren ekkei me ren ewe Ngun mi Fel.

36 Iwe iei ewe Sam epwe pwarata usun ngang, me ewe Ngun mi Fel epwe pwarata ngeni i usun ewe Sam me ngang; pun ewe Sam, me ngang, me ewe Ngun mi Fel am chok ew.

37 Iwe ua apasa ngenikemi sefan, oupwe fokkun aier, me winiti usun emon kukkun semirit, me oupwe papatais non itei, are esap ina iwe ese pwan wor ew aan an ami oupwe tongeni angei ekkei mettoch.

38 Iwe ua apasa ngenikemi sefan, oupwe fokkun aier, me oupwe papatais non itei, me winiti usun emon kukkun semirit, are esap ina iwe ese pwan wor ew aan an ami oupwe muuni ewe muun Kot.

39 Ennet, ennet, ua apasa ngenikemi, pwe iei ai nongonong mi ennet, iwe ion epwe foruta won ei a foruta won ai nongonong, iwe ekkewe tittin hell resap tongeni pwaracho ngeni ir.

40 Iwe ion chok epwe anapano are ekisano seni ei, me forata pwe ai nongonong mi ennet, i ewe pwan chok a feito seni ngaw, me ese foruta won ai we nongonong; nge a foruta won ew nongonongen pi, iwe ekkewe tittin hell ir mi sukkuno pwe repwe etiwa ekkena sokkun nupwen ekkewe konik ra puu me ekkewe asepwan ra wichir.

41 Iei minne, feino ngeni ekkei aramas, me affatano ekkewe kapas minne ua fen apasa, ngeni nesopun ewe fonufan.