1 Ma o lenei faauta, sa oo ina lagona e tagata uma o le laueleele nei fetalaiga, ma sa latou molimau i ai. Ma ina ua mavae atu nei fetalaiga, sa taaligoligoa le laueleele mo le va o itula e tele;

2 Ona sa matua tele le ofo o tagata sa oo ina latou tuu le aue ma le uio mo le toesea o tagata o o latou aiga ia na fasiotia; o lea na taaligoligoa ai le laueleele atoa mo le va o itula e tele.

3 Ma sa oo ina toe oo mai se leo i tagata, ma sa lagona e tagata uma, ma sa latou molimauina lava, ua fetalai mai:

4 E, outou e tagata o nei aai ^atetele ia ua pa’u’ū, o e na tupuga mai ia Iakopo, ioe, o e o le aiga o Isaraelu, ua faafia ea ona ou faapotopotoina o outou e pei ona ofaofatai mai e se matuamoa lana toloai i lalo o ona apaau, ma ^etausia outou.

5 Ma ou te toe fai atu, ua ^afaafia ona ou manao e faapotopoto mai outou e pei ona ofaofatai mai e se matuamoa lana toloai i lalo o ona apaau, ioe, outou e tagata o le aiga o Isaraelu, o e ua pa’u’ū; ioe, outou e tagata o le aiga o Isaraelu, outou o e o nonofo i Ierusalema, e pei o outou o e ua pa’u’ū; ioe, ua faafia ea ona ou manao e faapotopoto mai outou e pei ona ofaofatai mai e se matuamoa lana toloai, ae outou le mananao i ai.

6 E, outou e le aiga o Isaraelu o e ua ou ^afaasaoina, ua faafia ea ona ou manao e faapotopoto mai outou e pei ona ofaofatai mai e se matuamoa lana toloai i lalo o ona apaau, pe afai tou te salamo ma ^efoi mai ia te au ma le faamoemoe atoa o le ⁱloto.

7 Ae afai e leai, le aiga e o Isaraelu, o le a faatuufua nofoaga o loo outou nonofo ai seia oo i le taimi o le faataunuuga o le ^afeagaiga i o outou tamā.

8 Ma o lenei sa oo ina ua uma ona faalogo atu o tagata i nei upu, faauta, sa amata ona latou toe tagitui ma uio i le toesea o tagata o o latou aiga ma uo.

9 Ma sa oo ina faapea ona mavae atu aso e tolu. Ma o le taeao lava, ma ua mou ese atu le ^apouliuli mai luga o le laueleele, ma ua te’a le gatete o le eleele, ma ua uma le mavaevae o papa, ma ua maea le oi matautia, ma ua te’a atu leo vavaō e tele uma.

10 Ma sa toe pipii faatasi le eleele, ua tu; ma ua iu le tagi faanoanoa, ma le tagitui, ma auega a tagata o e na faasaoina; ma ua liua lo latou tagi faanoanoa i le olioli, ma a latou auega i le viiga ma le faafetai i le Alii o Iesu Keriso, lo latou Togiola.

11 Ma sa faapea ona ^afaataunuuina i lea taimi tusitusiga paia ia na fofogaina e perofeta.

12 Ma o le vaega o tagata sa ^asili atu ona amiotonu sa faasaoina, ma o i latou ia na latou talia perofeta ma lei fetogia i latou i maa; ma o i latou o e sa latou lei faamasaaina toto o le au paia, o e na faasaoina—

13 Ma sa faasaoina i latou ma sa lei gogoto ifo ma tanumia i latou i le eleele; ma sa latou lei malelemo i le loloto o le sami; ma sa latou le mu i le afi, pe na pa’u’ū ifo i o latou luga ni mea ma nutipala ai i le oti; ma sa lei lelea ese atu i latou i le asiosio; pe na lofituina i latou i le ausa o le asu ma le pouliuli.

14 Ma o lenei, soo se tasi e faitau, ia malamalama o ia; o le ua i ai tusitusiga paia, tuu atu ia te ia e ^asuesue i ai, ma vaai ma tagai pe le o nei oti uma ma faaumatiaga i le afi, ma le asu, ma matagi, ma asiosio, ma le ^eveteina o le eleele e talia ai i latou, ma o nei mea uma pe le o le faataunuuina lava ia o valoaga a perofeta paia e toatele.

15 Faauta, ou te fai atu ia te outou, Ioe, e toatele i latou na molimau mai e uiga i nei mea i le afio mai o Keriso, ma sa ^afasiotia i latou ona sa latou molimau atu e uiga i nei mea.

16 Ioe, sa molimau mai le perofeta o ^aSenosa e uiga i nei mea, ma sa tautala mai foi Senoka e uiga i ia mea, ona sa laua molimau faapitoa mai e uiga ia te i tatou, o e na totoe o a latou fanau.

17 Faauta, sa molimau mai foi lo tatou tamā o Iakopo e uiga i se ^avaega o totoe o le fanau a Iosefa. Ma faauta, pe le o tatou ea o se vaega o totoe o le fanau a Iosefa? Ma o nei mea ua molimau mai e uiga ia te i tatou, po ua le tusia ea i luga o papatusi apamemea ia na aumai e lo tatou tamā o Liae mai Ierusalema?

18 Ma sa oo i le iuga o le tausaga e tolusefulu ma le fa, faauta, o le a ou faaali atu ia te outou, o tagata o le nuu o Nifae o e na faasaoina, ma i latou foi o e sa ta’ua o sa Lamanā, o e foi na faasaoina, sa faaali mai ia te i latou ni agalelei tetele, ma sa liligi ifo i luga o o latou ulu ni faamanuiaga silisili, sa oo ina sa lei umi ona mavae atu o le ^aafio a’e o Keriso i le lagi, ae ia faaali moni mai o ia lava ia te i latou—

19 O le ^afaaali atu o lona tino ia te i latou; ma le auauna atu ia te i latou; ma o se tala o lana auaunaga o le a tuuina atu i le lumanai. O lea, ou te faaiu ai au upu mo le taimi nei.