1 I teienei, i muri a’era, ’ia ma’iri a’era te iva ’ahuru ’e ma hō’ē o te matahiti, ’e ’o te ono hānere o te matahiti mai te taime i fa’aru’e ai Lehi i Ierusalema ; ’e ’o te matahiti ho’i teie i riro ai Lakoneusa ’ei ha’avā rahi ’e ’ei tāvana i ni’a iho i te fenua.

2 ’E ’ua haere atu o Nephi, te tamaiti a Helamana, i rāpae i te fenua ra nō Zarahemela, ma te hōro’a atu i te fa’aterera’a i tāna tamaiti ra ia Nephi, ’oia ho’i tāna tamaiti matahiapo, nō ni’a i te mau ’api veo, ’e te mau pāpa’a parau ato’a i ha’apa’ohia na, ’e te mau mea ato’a i ha’apa’ohia nā ma te mo’a, mai te taime i fa’aru’e ai Lehi i Ierusalema.

3 E i reira ’ua haere atu ’oia i rāpae i te fenua, ’e te vāhi tāna i haere atu, ’aita roa e ta’ata i ’ite ; ’e ’ua ha’apa’o noa tāna tamaiti ra o Nephi i te mau pāpa’a parau ’ei mono nōna, ’oia ïa, te pāpa’a parau nō tōna ra mau ta’ata.

4 ’E i muri a’era, i te ha’amatara’aa nō te iva ’ahuru ’e ma piti o te matahiti, inaha, ’ua tupu mau ihora te mau parau tohu a te mau peropheta ; ’e ’ua rahi te mau tāpa’o ’e te mau semeio i ravehia i rotopū i te mau ta’ata.

5 ’Āre’a rā tē parau ra te tahi pae ē, ’ua ma’iri te tau nō te tupura’a o te mau parau i parauhia na e Samuela, te ’āti Lamana.

6 ’E ’ua ha’amata ihora rātou i te oaoa nō ni’a i tō rātou mau taea’e, i te nā-’ō-ra’a ē : Inaha, ’ua ma’iri ’ē te tau, ’e ’aita te mau parau a Samuela i tupu ; nō reira, ’ua faufa’a ’ore tō ’outou oaoa e tō ’outou fa’aro’o nō ni’a i taua mea ra.

7 ’E i muri a’era, ’ua fa’atupu rātou i te ti’arepu rahi i ni’a i te fenua ē ’ati noa a’e ; ’e ’ua ’oto roa ihora te mau ta’ata ato’a ’o tei ti’aturi i te reira, penei a’e e’ita roa taua mau mea ra ’o tei parauhia na e tupu.

8 Inaha rā, ’ua tīa’i māite noa rātou nō taua mahana ra e taua pō ra e taua mahana ra, ’e ’ua riro te reira mai te hō’ē mahana ’aita e pō, ’e nā roto i te reira rātou e ’ite ai ē, e ’ere tō rātou fa’aro’o i te mea faufa’a ’ore.

9 I teienei, i muri a’era, tē vai ra te hō’ē mahana i fa’ata’ahia e te feiā ti’aturi ’ore nō te taparahi i te mau ta’ata ato’a i ti’aturi i taua mau peu tumu ra, maori rā ’ia tupu te tāpa’o ’o tei fa’a’itehia mai e te peropheta ra o Samuela.

10 I teienei, i muri a’era, ’ia ’ite a’era Nephi, te tamaiti a Nephi, i teie parauti’a ’ore o tōna ra mau ta’ata, ’ua ’oto rahi ihora tōna ’ā’au.

11 ’E i muri a’era, ’ua haere atu ra ’oia i rāpae ’e ’ua tīpapa ihora i raro i te repo, ’e ’ua ti’aoro ’ū’ana atu ra i tōna Atua nō tōna mau ta’ata, ’oia ïa, nō te mau ta’ata ’o tei fātata i te taparahihia nō tō rātou ti’aturi i te mau peu tumu a tō rātou mau metua.

12 ’E i muri a’era, ’ua ti’aoro ’ū’ana atu ra ’oia i te Fatu i te tā’āto’ara’a nō taua mahana ra ; ’E inaha, ’ua tae mai ra te reo o te Fatu iāna, i te nā-’ō-ra’a mai ē :

13 ’A fa’ateitei i tō ’outou upo’o i ni’a ’e ’a fa’aitoito ; inaha ho’i, ’ua fātata te taime, ’e i teie pō e fa’a’itehia atu ai te tāpa’o, e ananahi e tae mai ai au i te ao nei, nō te fa’a’ite i tō te ao nei ē, e fa’atupu vau i te mau mea ato’a tā’u i fa’aue ia parauhia e te vaha o tō’u mau peropheta mo’a.

14 Inaha, e haere mai au i tō’u ihora, nō te fa’atupu i te mau mea ato’a o tā’u i fa’a’ite atu i te mau tamari’i a te ta’ata nei mai te ha’amatara’a mai ā o te ao nei, ’e ’ia rave i te hina’aro o te Metua ’e te Tamaiti—to te Metua nō’u nei, e tō te Tamaiti nō tō’u nei tino. ’E inaha, ’ua fātata te taime, ’e i teie nei ru’i e fa’a’itehia mai ai te tāpa’o.

15 ’E i muri a’era, ’ua tupu mau atu ra te mau parau i fa’ataehia mai ia Nephi ra, mai te au i tei parauhia mai ; inaha ho’i, i te ma’irira’a te mahana i raro, aita e pōiri ; ’e ’ua māere ihora te mau ta’ata nō te mea ’aita e pōiri i tae mai i te taera’a mai te ru’i.

16 ’E tē vai ra e rave rahi tei ’ore i ti’aturi i te mau parau a te mau peropheta ’o tei ma’iri i raro i te repo, ’e ’ua riro ihora mai te mea ra ē, ’ua pohe rātou, ’e ’ua ’ite ho’i rātou ē, ’ua fa’a’orehia tā rātou ’ōpuara’a rahi nō te ha’amoura’a, ’o tā rātou i ’ōpua nō te feiā i ti’aturi i te mau parau a te mau peropheta ; ’ua tupu ho’i te tāpa’o i parauhia na.

17 ’E ’ua ha’amata ihora rātou i te ’ite ē, ’ua fātata roa te Tamaiti a te Atua i te fā mai ; ’oia ïa, ’ua māere roa te mau ta’ata ato’a i ni’a i te fenua pā’āto’a mai te tō’o’a o te rā e tae atu i te hiti’a o te rā, tō ni’a i te fenua i te pae apato’erau e tae atu i te fenua i te pae apato’a, ’e ’ua ma’iri rātou i raro i te repo.

18 ’Ua ’ite ho’i rātou ē, ’ua fa’a’ite pāpū mai na te mau peropheta i taua mau mea nei e rave rahi a’enei matahiti, ’e te tāpa’o i fa’a’itehia ra ’ua tupu ïa ; ’e ’ua tupu a’era tō rātou mata’u nō tā rātou mau ’ohipa ’ī’ino e tō rātou ti’aturi ’ore.

19 ’E i muri a’era, ’aita e pōiri i taua ru’i ato’a ra, ’āre’a rā ’ua māramarama te reira mai te mahana i te avatea. ’E i muri a’era, ’ua hiti fa’ahou mai ra te mahana i te po’ipo’i, mai te au i tōna fa’anahora’a tano mau ; ’e ’ua ’ite ihora rātou ē, ’o te mahana teie e fānauhia mai ai te Fatu, nō te mea ’ua tupu te tāpa’o i fa’a’itehia.

20 ’E ’ua tupu mau atu ra te mau mea ato’a, ’oia ïa, ’aita e vāhi toe, mai te au i te mau parau a te mau peropheta.

21 ’E i muri a’era, ’ua hiti mai ra te hō’ē feti’a ’āpī, mai te au i te parau.

22 ’E i muri a’era, mai teie taime atu ’ua fa’atupu Sātane i te tahi mau ha’avarera’a i rotopū i te mau ta’ata, nō te fa’a’eta’eta i tō rātou ’ā’au, ’ia ’ore rātou ’ia ti’aturi i taua mau tāpa’o ra ’e te mau ’ohipa ’ūmerehia tā rātou i ’ite ; e noa atu ā teie mau ha’avarera’a e teie mau fa’ahemara’a ’ua ti’aturi noa te pae rahi o te mau ta’ata, ’e ’ua fa’afāriuhia rātou i te Fatu.

23 ’E i muri a’era, ’ua haere atu ra Nephi i rotopū i te mau ta’ata, ’e ’ua nā reira ato’a e rave rahi mau ta’ata, ma te bāpetizo i tei tātarahapa, ’e nō reira ’ua rahi roa te ha’amatarara’a nō te mau hara. E nō reira ho’i ’ua ha’amata fa’ahou te mau ta’ata i te fāri’i i te hau i ni’a i te fenua.

24 E ’aita atu ra ho’i e mau mārōra’a, maori rā tē vai ra te tahi pae iti ’o tei ha’amata i te a’o, ma te tāmata i te fa’a’ite nā roto i te mau pāpa’ira’a mo’a ē, ’aita e faufa’a ’ia ha’apa’o i te ture a Mose. I teienei, i roto i taua mea nei, ’ua hape rātou, ’e ’aita ho’i rātou i māramarama i te mau pāpa’ira’a mo’a.

25 ’Āre’a rā i muri a’era, ’ua fa’afāriu-’oi’oi-hia mai rātou, ’e ’ua ’ite ihora rātou i te mau hape tā rātou i topa na i roto, nō te mea ’ua fa’a’itehia mai ia rātou ē, ’aita ā te ture i fa’ati’ahia, ’e e fa’ati’ahia te reira ’aita e vāhi toe ; ’oia ïa, ’ua tae mai te parau ia rātou ē, e fa’ati’ahia te reira ; ’oia ïa, e ’ore roa te hō’ē iota ’e te hō’ē vāhi iti e mou nā mua te reira e tupu ai ; nō reira i teie iho matahiti ’ua fa’a’itehia ihora rātou i tā rātou hape ’e ’ua fa’i atu ra rātou i tā rātou ra mau hape.

26 ’E nō reira ’ua hope ihora te iva ’ahuru ’e ma piti o te matahiti, ’e ’ua tae mai te mau parau ’oa’oa i rotopū i te mau ta’ata nō te mau tāpa’o i tupu, mai te au i te mau parau nō te parau tohu a te mau peropheta mo’a ato’a.

27 ’E i muri a’era, ’ua hope ato’a a’era te iva ’ahuru ’e ma toru matahiti ma te hau, maori rā ’o te feiā ’eiā haru o Gadianetona, ’o tei pārahi i ni’a i te mau mou’a, ’e ’o tei fa’a’ino roa i te fenua ; ’e nō te pa’ari o tō rātou mau ha’apūra’a e tō rātou mau vāhi tāpunira’a, ’aita i ti’a i te mau ta’ata ’ia ha’avī atu ia rātou ; nō reira ’ua rahi roa atu ra tā rātou mau taparahira’a i te ta’ata, ’e ’ua taparahi rahi rātou i te ta’ata.

28 ’E i muri a’era, i te matahiti e iva ’ahuru ’e ma maha, ’ua tupu rahi roa rātou, nō te mea e rave rahi te feiā ’ōrurehau o te mau ’āti Nephi i horo atu ia rātou ra, ’e ’ua fa’atupu te reira i te ’oto rahi i rotopū i te mau ’āti Nephi ’o tei fa’aea mai i taua fenua ra.

29 ’E tē vai ato’a ra te tumu nō te ’oto rahi i rotopū i te mau ’āti Lamana ; inaha ho’i, e rave rahi tā rātou mau tamari’i tei tupu i te pa’ari, ’e tei mā’iti i tō rātou iho hina’aro, ’e ’ua arata’i-’ē-hia rātou nā te tahi pae o te mau ’āti Zorama, nā roto i tā rātou mau ha’avare e tā rātou mau parau tāvaimanino, ’ia ’āmui atu i te feiā ’eiā haru o Gadianetona.

30 ’E ’ua nā reira ato’a te mau ’āti Lamana i te fāri’i i te mau ati, ’e ’ua ha’amata rātou i te ha’aparuparu i tō rātou fa’aro’o e tō rātou parauti’a, nō te parauti’a ’ore o te u’i ’āpī ra.