1 K’ehomaq reetal, kik’ulman naq laa’in, aj Nefi, kin’elajin chi naab’al chiru li Qaawa’ lin Dios, sa’ xk’ab’a’ lix ^ajosq’ileb’ li was.

2 A’ut k’ehomaq reetal, kiniman lix josq’ileb’ chiwix, jo’kan naq ke’xsik’ risinkil lin yu’am.

3 Relik chi yaal, ke’xwech’i wix, ut ke’xye: Li qiitz’in naxk’oxla ^ataqlank sa’ qab’een, ut k’a’jo’ li ch’a’ajkilal xqak’ul xmaak a’an, jo’kan ut, qakamsihaq anajwan, re naq ink’a’ chik tootawasiiq sa’ xk’ab’a’ li raatin. Xb’aan naq k’ehomaq reetal, ink’a’ taqakanab’ a’an chi wanq choq’ aj taqlanel sa’ qab’een, xb’aan naq ak qe laa’o li asb’ej, naq tootaqlanq sa’ xb’een li tenamit a’in.

4 Anajwan ink’a’ nintz’iib’a chiruheb’ li perel ch’iich’ a’in chixjunil li aatin ke’xwech’i wi’ wix. Tz’aqalin b’an rik’in xyeeb’al naq ke’xsik’ risinkil inyu’am.

5 Ut kik’ulman naq li Qaawa’ ^akinixtij naq laa’in, aj ^bNefi, tin’eelq chaq rik’ineb’ ut tin’eeleliq chiru li yamyookil ch’och’, wochb’eenaqeb’ chixjunil li te’ajoq re xik chiwix.

6 Jo’kan ut, kik’ulman naq laa’in, aj Nefi, kink’am lin junkab’al, jo’ ajwi’ laj ^aTzoram ut lix junkab’al, ut laj Sam, li was, ut lix junkab’al, ut laj Jakob ut laj Jose, wiitz’ineb’, ut jo’kaneb’ ajwi’ li wanab’, ut chixjunileb’ li te’ajoq re xik chiwix. Ut chixjunileb’ li ke’raj xik chiwix, a’aneb’ li neke’paab’ank re lix ^btijom ut lix k’utb’esihom li Dios; jo’kan naq ke’ab’in chiru li waatin.

7 Ut kiqak’am li qamuheb’aal t’ikr ut jo’ k’ihal li k’a’aq re ru kiru chiqu, ut koob’eek chiru li yamyookil ch’och’ chiru lix numik k’iila kutan. Ut chirix naq koob’eek chiru xnumik k’iila kutan kiqayiib’ li qamuheb’aal t’ikr.

8 Ut eb’ lin tenamit ke’raj naq taqak’e ^aNefi choq’ xk’ab’a’ li na’ajej, jo’kan naq Nefi kiqaye re.

9 Ut chixjunileb’ li ke’wan wik’in ke’xk’e xch’ool naq lix ^atenamit laj Nefi taayeemanq reheb’.

10 Ut kiqak’e qach’ool chixpaab’ankileb’ lix raqb’a-aatin, ut lix k’uub’anb’il aatin, ut lix taqlahom li Qaawa’ sa’ chixjunil li k’a’aq re ru, jo’ chanru lix ^achaq’rab’ laj Moises.

11 Ut li Qaawa’ kiwan qik’in; ut koo’usa chi numtajenaq, xb’aan naq kiqaw li iyaj, ut kooq’olok wi’chik chi naab’al. Ut koo’ok chixk’iresinkileb’ li ketomq, ut li teep chi xul, ut li jar paay chi xul wan.

12 Ut laa’in, aj Nefi, kink’ameb’ ajwi’ chaq li tz’iib’anb’il esil li wan chi tz’iib’anb’il chiruheb’ li ^aperel ch’iich’ bronce; ut jo’kan ajwi’ li ^bt’ort’ookil ch’iich’, malaj li ^ck’utleb’aal b’e, li kikawresiik choq’ re lin yuwa’ xb’aan li ruq’ li Qaawa’, jo’ chanru li k’a’ru tz’iib’anb’il.

13 Ut kik’ulman naq koo’ok chi usaak chi numtajenaq, ut chi k’ihank sa’ li ch’och’.

14 Ut laa’in, aj Nefi, kinchap lix ^ayok’leb’ ch’iich’ laj Laban, ut jo’ chanru a’an kinyiib’ k’iila yok’leb’ ch’iich’, maare anchal te’chalq sa’ qab’een li tenamit aj ^bLamanita jo’ nayeeman chik reheb’, ut toohe’xsach; xb’aan naq kinnaw chan ru naq xik’ nikine’ril laa’in ut eb’ li walal ink’ajol, ut eb’ li ani intenamit ke’k’ab’a’in.

15 Ut kintzoleb’ lin tenamit chixkab’lankil li kab’l, ut chi k’anjelak rik’in li k’iila paay chi che’, ut rik’in ^ach’iich’, ut rik’in kaqi ch’iich’, ut rik’in ch’iich’ bronce, ut rik’in kawil ch’iich’, ut rik’in oor, ut rik’in plaat, ut rik’ineb’ li pek ch’iich’ xsa’ li terto xtz’aq, li kiwan chi q’axal naab’al.

16 Ut laa’in, aj Nefi, kinkab’la jun li ^asantil ochoch, ut kinyiib’ jo’ chanru xyiib’ankil li ^bsantil ochoch re laj Salomon, ka’ajwi’ naq maak’a’ xk’ihal li k’a’aq re ru ^cterto xtz’aq li okenaq wi’; xb’aan naq ink’a’ neke’tawman sa’ xb’een li ch’och’, jo’kan naq ink’a’ kiru xkab’lankil jo’ chanru lix santil ochoch laj Salomon. A’b’an lix yiib’ankil chanchan ajwi’ re li santil ochoch re laj Salomon, ut q’axal chaab’il lix k’anjelankil.

17 Ut kik’ulman naq laa’in, aj Nefi, kink’e naq eb’ lin tenamit te’wanq ^axsak’ahil, ut naq te’k’anjelaq rik’ineb’ li ruq’.

18 Ut kik’ulman naq eb’ a’an ke’raj naq tinwanq choq’ ^axreyeb’. A’b’anan laa’in, aj Nefi kiwaj naq maak’a’aq junaq rey sa’ xb’eeneb’; a’ut kinb’aanu choq’ reheb’ jo’ chanru li wan wi’ inwankilal.

19 Ut k’ehomaq reetal, kitz’aqlok ru li raatin li Qaawa’ reheb’ li was, li ki’aatinak wi’ chirixeb’, naq laa’in tinwanq choq’ aj ^ataqlanel ut aj ^btzolonel chiruheb’. Jo’kan ut, laa’in kinwan ajwi’ choq’ aj taqlanel ut aj tzolonel chiruheb’, jo’ chanru lix taqlahom li Qaawa’, toj kiwulak xq’ehil naq ke’xsik’ risinkil inyu’am.

20 Jo’kan naq kitz’aqlok ru li raatin li Qaawa’ li kinraatina wi’, naq kixye naq: Jo’ chanru naq ^aink’a’ te’ab’inq chiru laa waatin, te’isiiq chaq chiru li Qaawa’. Ut k’ehomaq reetal, ^bke’isiik chaq chiru.

21 Ut a’an kixkanab’ chi chalk li ^amajewaak sa’ xb’eeneb’, relik chi yaal, jun li rahil majewaak, sa’ xk’ab’a’ li maa’usilal ke’xb’aanu. Xb’aan naq k’ehomaq reetal, ke’xkawob’resi li raameb’ chirix, jo’kan naq ke’wan chanchan jun kawil pek; jo’kan naq us ta saqeb’ chaq xtib’el, ut numtajenaq xchaq’aleb’ chaq ru ut ^bsa rilb’aleb’, re naq ink’a’ te’wulaq chiru lin tenamit li Qaawa’ Dios kixkanab’ chi chalk sa’ xb’eeneb’ jun ^cxq’eqil li tib’elej.

22 Ut jo’ka’in naxye li Qaawa’ Dios: Laa’in tink’e ^axyib’aleb’ ru chiruheb’ laa tenamit, wi ink’a’ neke’xjal xk’a’uxl chirix li maa’usilal neke’xb’aanu.

23 Ut majewanb’ilaq li riyajil li ani ^anaxjunaji rib’ rik’ineb’ li riyajil a’an; xb’aan naq eb’ a’an te’majewaaq rik’in ajwi’ li majewank a’an. Kixye ut li Qaawa’, ut kib’aanuman.

24 Ut sa’ xk’ab’a’ li majewaak li kiwan sa’ xb’eeneb’, ke’ok choq’ jun tenamit ^aaj q’em, nujenaqeb’ chi maa’usilal ut chi muqmuukil b’alaq’, ut neke’xsik’ li xul aj yo sa’ li yamyookil ch’och’.

25 Ut li Qaawa’ Dios kixye we: Eb’ a’an te’wanq choq’ rapleb’ chiruheb’ laa wiyajil, re reek’asinkileb’ xch’ool chinjultikankil; ut wi ink’a’ tinjultiko’q reheb’, ut ink’a’ te’ab’inq chiru li waatin, te’xrapleheb’, toj reetal ajwi’ li sache’k.

26 Ut kik’ulman naq laa’in, aj Nefi, ^akiwosob’tesi laj Jakob ut laj Jose re te’wanq choq’ aj tij ut choq’ aj tzolonel sa’ xb’een li ch’och’ re lin tenamit.

27 Ut kik’ulman naq koowan jo’ chanru li sahil ch’oolejil.

28 Ut ak kinume’ lajeeb’ xka’k’aal chihab’ qelik chaq Jerusalen.

29 Ut laa’in, aj Nefi, kintz’iib’a chaq chiruheb’ lin perel ch’iich’ li esil kinyiib’ chaq chirix lin tenamit toj aran.

30 Ut kik’ulman naq li Qaawa’ Dios kixye we: Taayiib’ chik ^ajalaneb’ li perel ch’iich’, ut chiruheb’ a’an taatz’iib’a naab’al chi na’leb’ li chaab’il sa’ wilob’aal, choq’ re lix chaab’ilal laa tenamit.

31 Jo’kan naq laa’in, aj Nefi, re ab’ink chiru lix taqlahom li Qaawa’, xkohin ut kinyiib’eb’ ^ali perel ch’iich’ a’in li xintz’iib’a wi’ li k’a’aq re ru a’in.

32 Ut nintz’iib’a li k’a’ru nawulak chiru li Dios. Ut wi eb’ lin tenamit te’saho’q sa’ xch’ool rik’in li k’a’ru re li Dios, te’saho’q sa’ xch’ool rik’in lin tz’iib’ahom li wan chiruheb’ li perel ch’iich’ a’in.

33 Ut wi eb’ lin tenamit te’raj xnawb’al li jun raqal ch’olch’o wi’ li esil chirix lin tenamit, tento te’xsik’ sa’eb’ lin perel ch’iich’ jun ch’ol chik.

34 Tz’aqalin rik’in xyeeb’al naq ak numenaq chaq ka’k’aal chihab’, ut ak wanjenaqo chaq sa’ pleet ut sa’ wech’ok-ib’ rik’ineb’ li qas qiitz’in.