Vaj Lug Kub
2 Nifais 4


Tshooj 4

Lihais ntuas thiab foom koob hmoov rau nws tej tub tej ki—Nws tuag thiab raug muab faus—Nifais zoo siab rau Vajtswv txoj kev zoo rau nws—Nifais tso siab plhuav rau tus Tswv mus ib txhis li. Kwv yees li 588–570 xyoo ua ntej yug Yexus.

1 Thiab nim no, kuv, Nifais, hais txog cov lus qhia yam uas yuav muaj los yav tom ntej uas kuv txiv tau hais lawm, hais txog Yauxej, tus uas tau cab mus rau tim Iyiv teb chaws.

2 Vim saib seb, nws tau qhia tseeb txog tej uas yuav muaj los yav tom ntej uas hais txog nws tej noob txhua tus huv tib si. Thiab tej kev qhia yam uas yuav muaj los yav tom ntej uas nws tau sau, yeej tsis muaj ntau yam uas tseem ceeb dua tej no. Thiab nws tau qhia tej uas yuav muaj los yav tom ntej txog peb, thiab peb cov tiam neeg uas yuav muaj los yav tom ntej; thiab lawv raug muab sau rau saum cov phiaj toog.

3 Yog li ntawd, tom qab uas kuv txiv tau hais txog txoj kev qhia yam uas yuav muaj los yav tom ntej ntawm Yauxej tas lawm, nws tau hu Lamas cov me nyuam, nws tej tub, thiab tej ntxhais, thiab tau hais rau lawv hais tias: Saib seb, kuv tej me tub, thiab me ntxhais, nej cov uas yog kuv thawj tug tub tej tub thiab tej ntxhais, kuv xav kom nej cia li cuab pob ntseg rau kuv tej lus.

4 Vim tus Tswv uas yog Vajtswv tau hais tias: Npaum tias yuav ceev kuv tej lus txib ces nej yuav huaj vam nyob rau hauv thaj av no; thiab npaum tias nej yuav tsis ceev kuv tej lus txib ces nej yuav raug ntiab khiav ncaim ntawm kuv qhov chaw mus.

5 Tiam sis saib seb, kuv tej me tub thiab kuv tej me ntxhais es, kuv yuav tsis kam nqes mus rau hauv kuv lub qhov ntxa yog tias kuv tsis tau foom koob hmoov rau nej; vim saib seb, kuv paub tias yog nej raug qhia los mus rau txoj kev uas nej yeej yuav tsum mus nej yuav tsis ncaim nws mus li.

6 Yog li ntawd, yog hais tias nej raug foom phem, saib seb, kuv yuav foom kuv tej koob hmoov rau nej, xwv kom txoj kev foom tsis zoo yuav raug tshem tawm ntawm nej mus thiab kom poob mus rau saum nej niam nej txiv tej taub hau.

7 Yog li ntawd, vim kuv txoj kev foom koob hmoov tus Tswv uas yog Vajtswv yuav tsis cia kom nej piam sij; yog li ntawd, nws yuav muaj lub siab hlub rau nej thiab rau nej tej noob mus ib txhis li.

8 Thiab tau muaj tias tom qab uas kuv txiv tau tsum tsis hais rau Lamas tej tub thiab tej ntxhais lawm, nws tau kom coj Lemu-ees tej tub thiab tej ntxhais los cuag nws.

9 Thiab nws tau hais rau lawv, hais tias: Saib seb, kuv tej me tub thiab me ntxhais, nej cov uas yog kuv tus tub thib ob tej me tub thiab me ntxhais; saib seb kuv yuav foom koob hmoov rau nej tib yam li cov uas kuv tau foom rau Lamas tej tub thiab tej ntxhais lawm; yog li ntawd, nej yuav tsis raug puas tsuaj huv tib si; tiam sis thaum kawg nej tej noob yuav tau txais koob hmoov.

10 Thiab tau muaj tias thaum uas kuv txiv tau tsum tsis hais rau lawv lawm, saib seb, nws tau hais rau Ixama-ees tej tub, muaj tseeb tiag, thiab twb hais rau nws tsev neeg tag nrho.

11 Thiab tom qab uas nws tau tsum tsis hais rau lawv lawm, nws tau hais rau Xam, hais tias: Koj yuav tau koob hmoov, thiab koj tej noob los yuav tau koob hmoov; vim nej yuav tau txais thaj av no ua nej qub txeeg qub teg tib yam li koj tus kwv Nifais. Thiab koj tej noob yuav huaj vam coob nrog nws tej noob; thiab koj yuav zoo tib yam li koj tus kwv, thiab koj tej noob yuav zoo li nws tej noob; thiab koj yuav tau txais koob hmoov nyob tag nrho hauv koj lub neej.

12 Thiab tau muaj tias tom qab uas kuv txiv, Lihais, tau hais rau nws tsev neeg txhua leej txhua tus, raws li nws lub siab xav thiab raws li tus Tswv tus Ntsuj Plig uas nyob hauv nws lawm, nws tau laus laus lawm. Thiab tau muaj tias nws tau tuag lawm, thiab tau coj nws mus faus.

13 Thiab tau muaj tias tsis ntev tom qab uas nws tuag lawm, Lamas thiab Lemu-ees thiab Ixama-ees cov tub tau npau taws rau kuv vim tus Tswv tej lus qhuab ntuas.

14 Vim kuv, Nifais, tau raug txib kom hais rau lawv, raws li nws lo lus; kuv tau hais ntau yam tsav rau lawv, thiab kuv txiv los kuj tau hais ntau yam tsav rau lawv, ua ntej nws tuag thiab; muaj ntau yam cov uas tau hais no tau muab sau rau saum kuv lwm cov phiaj; vim feem ntau uas hais txog keeb kwm tau muab sau rau saum kuv lwm cov phiaj lawm.

15 Thiab nyob rau saum cov no kuv sau ntau yam xwm ntawm kuv tus ntsuj plig, thiab sau ntau cov vajlugkub cov uas muab sau rau saum cov phiaj toog. Vim kuv nyiam cov vajlugkub heev, thiab kuv lub siab xav ntsoov txog lawv, thiab sau cov no cia rau kuv tej me nyuam tau kawm thiab cia tau pab lawv.

16 Saib seb, kuv nyiam tej yam uas yog tus Tswv li heev; thiab kuv lub siab yeej xav ntsoov tsis tseg rau tej yam uas kuv tau pom thiab tau hnov lawm.

17 Tiam sis, txawm li ntawd los tus Tswv txoj kev zoo uas tseem ceeb, tseem tau qhia rau kuv txog nws tes dej num uas loj thiab zoo kawg nkaus uas xav tsis thoob, kuv lub siab thiaj tau qw hais tias: Au tus neeg phem uas yog kuv es! Muaj tseeb tiag, kuv lub siab muaj kev nyuaj siab yeej vim yog kuv cev nqaij daim tawv; kuv tus ntsuj plig muaj kev nyuaj siab yeej vim kuv tej kev tsis ncaj ncees.

18 Kuv raug vij vog ib puag ncig, yeej vim yog tej kev haub kev ntxias thiab tej kev txog kev txhaum uas yooj yim ua rau kuv poob siab.

19 Thiab thaum kuv xav zoo siab, kuv lub siab muaj kev txom nyem vim yog kuv tej kev txog kev txhaum; tiam sis, kuv paub tus uas kuv tau cia siab rau.

20 Kuv tus Vajtswv tau yog kuv qhov chaw txhawb zog; nws tau coj kuv dim dhau kuv tej kev kub ntxhov nyob rau hauv hav zoov; thiab nws tau tsom kwm kuv thaum kuv tseem nyob rau saum tej dej uas tob heev.

21 Nws tau pub rau kuv nws txoj kev hlub, twb ua rau kuv lub cev kub lug.

22 Nws tau kov yeej kuv tej yeeb ncuab, kawg ua rau lawv tshee hnyo rau ntawm kuv xub ntiag.

23 Saib seb, nruab hnub nws tau hnov kuv lub suab hu, thiab hmo ntuj nws tau muab txoj kev paub rau kuv los ntawm txoj kev ua yog toog pom.

24 Thiab thaum nruab hnub kuv tau thov nws kawg kuv siab kuv ntsws; muaj tseeb tiag, kuv tau xa kuv lub suab mus siab; thiab cov tim tswv tau nqis los thiab tau los pab txhawb kuv.

25 Thiab tus ntsuj plig tau thauj kuv rau saum nws phab tis coj kuv mus rau puag saum tej roob uas siab heev. Thiab kuv lub qhov muag tau pom tej yam xwm tseem ceeb, muaj tseeb tiag, twb yog tej uas tseem ceeb dhau rau tib neeg; yog li ntawd kuv tau raug txwv tias kuv yuav tsum tsis txhob muab tej no sau cia.

26 Au ces, yog kuv twb tau pom tej yam xwm tseem ceeb heev li no, yog tias tus Tswv, nyob hauv txoj kev uas nws nqis los nrog noob neej nyob, tau los ua kom neeg muaj kev tau zoo nyob npaum li ntawd, ua li cas kuv lub siab tseem yuav quaj thiab kuv tus ntsuj plig tseem yuav nyob hauv lub hav nyuaj siab, thiab kuv cev nqaij daim tawv tseem yuav piam mus, thiab kuv lub zog tseem yuav qaug zuj zus mus, vim kuv tej kev kub ntxhov?

27 Thiab vim li cas kuv thiaj xij mus rau tej kev txhaum, vim kuv cev nqaij daim tawv? Muaj tseeb tiag, yog vim li cas kuv thiaj mloog tej lus haub ntxias, xwv kom tus uas phem muaj tau ib qho chaw nyob rau hauv kuv lub siab es los rhuav kuv txoj kev thaj yeeb nyab xeeb thiab los ua kom kuv tus ntsuj plig muaj kev kub ntxhov ua tus dab tsi? Yog vim li cas kuv thiaj li npau taws vim kuv tus yeeb ncuab?

28 Kuv tus ntsuj plig es, cia li tsim los mas! Tsis txhob tsau nyob hauv txoj kev txhaum ntev ntxiv lawm. Cia li zoo siab, Au kuv lub siab es, thiab tsis txhob cia ib qho chaw rau kuv tus ntsuj plig tus yeeb ncuab ntxiv li lawm.

29 Tsis txhob npau taws ntxiv lawm vim yog kuv tej yeeb ncuab. Tsis txhob cia kuv qaug dag qaug zog vim yog kuv tej kev kub ntxhov.

30 Cia li zoo siab, Au kuv lub siab es, thiab cia li thov rau tus Tswv, thiab hais tias: Au tus Tswv es, kuv yuav qhuas koj mus ib txhis li; muaj tseeb tiag, kuv tus ntsuj plig yuav nyob kaj siab lug hauv koj, kuv tus Vajtswv, uas yog kuv txoj kev cawm seeg qhov chaw vam khom.

31 Au tus Tswv es, koj puas yuav txhiv kuv tus ntsuj plig thiab lauj? Koj puas yuav pab kom kuv dim ntawm kuv tej yeeb ncuab tes thiab lauj? Koj puas yuav ua kom kuv paub ntshai thaum uas kuv yuav ua kev txhaum thiab?

32 Thov kom ntuj txiag teb tsaus lub qhov rooj cia li kaw tas mus li rau kuv, vim tias kuv lub siab twb tawg tag thiab kuv tus ntsuj plig tau xav ua qhov zoo! Au tus Tswv es, thov koj txhob kaw tej qhov rooj ntawm koj txoj kev ncaj ncees rau kuv lauj, xwv kom kuv thiaj yuav tau taug txoj kev uas mus hauv tej hav qis, xwv kom kuv tsuas yuav nyob hauv txoj kev tiaj xwb!

33 Au tus Tswv es, thov koj muab lub tsho tshaj sab ntawm koj txoj kev ncaj ncees los qhwv nkaus kuv! Au tus Tswv, thov koj tho ib txog kev rau kuv kom kuv tau kev khiav dim ntawm kuv tej yeeb ncuab! Thov koj kho kom kuv txoj kev ncaj yuav pub rau kuv! Thov koj txhob tso kom muaj pob zeb dawm ko taw rau tom kuv hauv ntej—tiam sis thov koj cheb kom kuv txoj kev du pub rau kuv, thiab thov koj txhob ua laj kab thaiv kuv txoj kev, tiam sis thov koj ua laj kab thaiv kuv tus yeeb ncuab tej hau kev.

34 Au tus Tswv es, kuv tau tso siab plhuav rau koj, thiab kuv yuav cia siab rau koj mus ib txhis li. Kuv yuav tsis muab kuv txoj kev cia siab tso rau ib tug neeg twg lub hwj chim li; vim kuv paub hais tias tus uas muab nws txoj kev cia siab tso rau noob neej lub hwj chim tus ntawd yuav raug foom tsis zoo. Muaj tseeb tiag, tus uas muab nws txoj kev cia siab tso rau noob neej los sis tso rau neeg lub hwj chim tus ntawd yuav raug foom tsis zoo.

35 Muaj tseeb tiag, kuv paub tias Vajtswv yuav ua siab dawb paug pub rau tus uas thov. Muaj tseeb tiag, kuv tus Vajtswv yuav muab pub rau kuv, yog hais tias kuv tsis thov yam uas phem; yog li ntawd kuv yuav tsa kuv lub suab rau koj; muaj tseeb tiag, kuv yuav thov koj, kuv tus Vajtswv, uas yog qhov chaw cuab zog ntawm kuv txoj kev ncaj ncees. Saib seb, kuv lub suab yeej yuav nce mus rau koj mus ib txhis li, kuv qhov chaw vam khom thiab kuv tus Vajtswv uas kav ib txhis. Amees.