1 Thiab nim no kuv, Nifais, xaus kuv txoj kev qhia tej yuav muaj los yav tom ntej rau nej, kuv cov kwv tij uas kuv hlub. Thiab kuv tsuas sau tau ob peb yam, uas kuv paub tseeb tias yeej yuav muaj los; thiab kuv tsuas sau tau kuv tus kwv Yakhauj ob peb lo lus.

2 Yog li ntawd, tej yam uas kuv tau sau cia twb txaus kuv siab lawm, tsuas yog tshuav ob peb lo lus uas kuv yuav tsum hais txog Khetos txoj lus qhuab qhia; yog li ntawd, kuv yuav qhia rau nej meej meej, raws li kuv txoj kev qhia meej txog tej uas yuav muaj los yav tom ntej.

3 Vim kuv tus ntsuj plig zoo siab rau kev qhia meej; vim tus Tswv uas yog Vajtswv ua hauj lwm rau noob neej zoo li no. Vim tus Tswv uas yog Vajtswv muab qhov kaj rau txoj kev to taub; vim nws hais lus rau tib neeg raws li lawv yam lus, kom lawv thiaj to taub.

4 Yog li ntawd, kuv xav kom nej sawv daws nco qab ntsoov tias kuv tau hais rau nej lawm ntsig txog tus yaj saub ntawd uas tus Tswv tau qhia rau kuv, tus uas yuav muab Vajtswv tus Me Nyuam Yaj ua kev cai raus dej, tus uas yuav los ris neeg ntiaj teb tej kev txhaum mus.

5 Thiab nim no, yog hais tias Vajtswv tus Me Nyuam Yaj, uas dawb huv, yuav tsum ua kev cai raus dej, kom ua raws li txhua txoj kev ncaj ncees, auj yog li ntawd, peb cov uas tsis dawb huv, haj yam yuav tsum ua kev cai raus dej, muaj tseeb tiag, twb yog nyob rau hauv dej!

6 Thiab nim no, kuv yuav nug nej, kuv cov kwv tij uas kuv hlub, ua li cas Vajtswv tus Me Nyuam Yaj thiaj ua raws li txhua txoj kev ncaj ncees thaum nws ua kev cai raus dej?

7 Nej puas paub tias nws dawb huv? Txawm tias nws dawb huv los, nws tseem ua qhia rau noob neej tias, raws li sab cev nqaij daim tawv nws tseem txo nws lub hwj chim rau Leej Txiv, thiab ua pov thawj rau Leej Txiv tias nws yuav mloog Leej Txiv lus kom ua raws li Leej Txiv tej lus txib.

8 Yog li ntawd, tom qab nws ua kev cai raus dej tus Vaj Ntsuj Plig Dawb Huv nqis los rau saum nws zoo li yog ib tug nquab.

9 Thiab qhov no qhia ntxiv rau noob neej txog qhov ti ntawm txoj kev, thiab qhov nqaim ntawm lub rooj vag, uas lawv yuav tau nkag mus, thiab nws tau coj yam ntxwv rau lawv.

10 Thiab nws hais rau noob neej hais tias: Nej cia li coj raws li kuv. Yog li ntawd, kuv cov kwv tij uas kuv hlub es, peb puas yuav coj raws li Yexus yog hais tias peb tsis txaus siab ua raws li Leej Txiv tej lus txib?

11 Thiab Leej Txiv tau hais tias: Nej cia li hloov siab lees txim, nej cia li hloov siab lees txim, thiab ua kev cai raus dej los ntawm kuv Leej Tub uas kuv hlub lub npe.

12 Thiab Leej Tub lub suab kuj los rau kuv, hais tias: Tus uas ua kev cai raus dej los ntawm kuv lub npe, Leej Txiv yuav muab tus Vaj Ntsuj Plig Dawb Huv rau nws, ib yam li muab rau kuv; yog li ntawd, cia li coj raws li kuv, thiab ua tej uas nej tau pom kuv ua.

13 Yog li ntawd, kuv cov kwv tij uas kuv hlub es, kuv paub tias yog nej yuav coj raws li Leej Tub, kawg siab kawg ntsws, tsis txhob lam ua txuj ua los sis lam dag rau Vajtswv, tiam sis mob siab tiag, hloov siab lees txim rau nej tej kev txhaum, ua pov thawj rau Leej Txiv tias nej yeej txaus siab ris Khetos lub npe, los ntawm kev cai raus dej—muaj tseeb tiag, yog nej coj raws li tus Tswv thiab nej tus Cawm Seej mus rau hauv dej, raws li nws txoj lus, saib seb, tom qab ntawd nej yuav tau txais tus Vaj Ntsuj Plig Dawb Huv; muaj tseeb tiag, tom qab ntawd txoj kev cai raus ntawm hluav taws thiab ntawm tus Vaj Ntsuj Plig Dawb Huv yuav los; thiab thaum ntawd nej yuav hais tau cov tim tswv yam lus, thiab qw qhuas Ixayees tus Dawb Huv.

14 Tiam sis, saib seb, kuv cov kwv tij uas kuv hlub es, Leej Tub lub suab tau los rau kuv, hais tias: Tom qab nej tau hloov siab lees txim rau nej tej kev txhaum, thiab tau ua pov thawj rau Leej Txiv tias nej txaus siab ua raws li kuv tej lus txib, los ntawm kev cai raus dej, thiab tau txais txoj kev cai raus ntawm hluav taws thiab ntawm tus Vaj Ntsuj Plig Dawb Huv, thiab hais tau ib yam lus tshiab, muaj tseeb tiag, twb yog cov tim tswv yam lus, thiab tom qab no yog tias nej tseem xyeej kuv, yuav zoo dua rau nej yog tias nej tsis tau paub kuv dua.

15 Thiab kuv tau hnov ib lub suab los ntawm Leej Txiv los hais tias: Muaj tseeb tiag, Tus kuv Hlub tej lus yeej muaj tseeb thiab ncaj tsis tu tsis tseg. Tus uas nyiaj mus kom txog thaum kawg, tus ntawd yuav txais kev cawm dim.

16 Thiab nim no, kuv cov kwv tij uas kuv hlub es, kuv paub los ntawm tej no tias tsuas yog ib tug neeg yuav nyiaj mus kom txog thaum kawg, coj raws li Vajtswv tus uas muaj txoj sia nyob Leej Tub tus yam ntxwv xwb, tsis li ntawd ces yuav cawm tsis tau tus ntawd dim.

17 Yog li ntawd, cia li ua tej uas kuv tau qhia rau nej uas kuv tau pom tias nej tus Tswv thiab nej tus Txhiv Dim yuav ua; yog vim li no tus Tswv thiaj tau muab tej no qhia los rau kuv paub, xwv kom nej yuav paub lub rooj vag uas nej yuav tsum nkag mus. Vim lub rooj vag uas nej yuav tsum nkag mus yog kev hloov siab lees txim thiab kev cai raus dej; thiab tom qab ntawd yuav kev zam txim rau nej tej kev txhaum los ntawm hluav taws thiab los ntawm tus Vaj Ntsuj Plig Dawb Huv.

18 Thiab thaum ntawd nej yuav nyob hauv txoj kev ti thiab nqaim no uas yuav coj mus rau txoj sia nyob mus ib txhis; muaj tseeb tiag, nej tau nkag mus hauv lub rooj vag; nej tau ua raws nraim li Leej Txiv thiab Leej Tub tej lus txib; thiab nej tau txais tus Vaj Ntsuj Plig Dawb Huv, uas ua pov thawj txog Leej Txiv thiab Leej Tub, kom muaj raws li kev cog lus uas nws tau cog, hais tias yog nej nkag mus hauv txoj kev ces nej yuav tau txais.

19 Thiab nim no, kuv cov kwv tij uas kuv hlub es, tom qab nej tau los rau hauv txoj kev ti thiab nqaim no lawm, kuv yuav nug tias saib txhua yam puas tau tiav? Saib seb, kuv hais rau nej tias, tsis tau; vim nej yuav tsis tau los deb npaum li no yog tsis muaj Khetos txoj lus nrog rau txoj kev ntseeg nws uas khov kho, vam khom tag nrho rau tej hauj lwm zoo ntawm tus uas muaj hwj chim cawm tau.

20 Yog li ntawd, nej yuav tsum sib zog mus lawm tom hauv ntej nrog txoj kev ntseeg Khetos uas khov kho, muaj ib txoj kev cia siab uas ci kawg nkaus, thiab muaj ib txoj kev hlub rau Vajtswv thiab rau tib neeg txhua tus. Yog li ntawd, yog tias nej yuav thawb lawm tom hauv ntej, mloog ntsoov Khetos tej lus, thiab nyiaj mus kom txog thaum kawg, saib seb, Leej Txiv hais li no tias: Nej yuav tau txoj sia nyob mus ib txhis.

21 Thiab nim no, saib seb, kuv cov kwv tij uas kuv hlub es, qhov no yog txoj kev; thiab yeej tsis muaj lwm txoj kev los sis lwm lub npe nyob hauv qab ntuj uas yuav cawm tau tib neeg dim nyob hauv Vajtswv lub nceeg vaj. Thiab nim no, saib seb, qhov no yog Khetos txoj lus qhuab qhia, thiab yog tib txoj lus qhuab qhia tseeb ntawm Leej Txiv, thiab ntawm Leej Tub thiab ntawm tus Vaj Ntsuj Plig Dawb Huv, uas yog ib tug Vajtswv, uas tsis muaj qhov kawg li. Amees.