Ebʼ li loqʼlaj hu
2 Nefi 30


Ch’ol 30

Eb’ laj Gentil li jalb’ileb’ xch’ool te’k’ehe’q sa’ ajl sa’ li tenamit re li sumwank—Naab’aleb’ laj Lamanita ut laj Judio te’xpaab’ li aatin, ut te’ok choq’ chaq’al ru tenamit—Taak’ojob’aaq wi’chik Israel ut te’sachmanq laj maak. Wan na 559–545 chihab’ ma nayo’la li Kristo.

1 Ut anajwan k’ehomaq reetal, ex was wiitz’in, nawaj eeraatinankil, xb’aan naq laa’in, aj Nefi, ink’a’ nawaj xkanab’ankil naq teek’oxla naq laa’ex q’axal wi’chik tiik eech’ool chiruhaqeb’ laj Gentil. Xb’aan naq k’ehomaq reetal, wi ink’a’ nekepaab’eb’ lix taqlahom li Dios, tex’oso’q ajwi’ chi jo’kan chejunilex; ut rik’in li aatin li yeeb’il, ink’a’ na’aje’ naq teek’oxla naq te’sache’q laj Gentil chi tz’aqal tz’aqal.

2 Xb’aan naq k’ehomaq reetal, ninye eere naq jo’ k’ihaleb’ laj Gentil li te’xjal xk’a’uxleb’, a’aneb’ lix tenamit li Qaawa’ are li sumwank; ut jo’ k’ihaleb’ laj bJudio li ink’a’ te’xjal xk’a’uxl te’tz’eqe’q; xb’aan naq li Qaawa’ maa’ani aj-ik’in na’ok sa’ sumwank, ka’ajwi’ rik’ineb’ li cneke’jalok xk’a’uxl ut neke’xpaab’ li Ralal, a’an lix Santil Dios laj Israel.

3 Ut anajwan, nawaj aatinak ka’ch’inaq chik jo’ profeet chirixeb’ laj Judio ut laj Gentil. Xb’aan naq chirix naq taak’utmanq li hu li kin’aatinak wi’, ut taatz’iib’amanq choq’ reheb’ laj Gentil, ut taak’ehe’q wi’chik xtz’apb’al choq’ re li Qaawa’, te’wanq naab’al li ate’paab’anq re li aatin li tz’iib’anb’il; ut bte’xk’am rik’in li rela’ li qiyajil.

4 Toja’ ut naq eb’ li rela’ li qiyajil te’xnaw chiqix laa’o, chan ru naq koo’el chaq Jerusalen, ut naq a’aneb’ ralal xk’ajoleb’ laj Judio.

5 Ut taach’olob’amanq lix evangelio li Jesukristo asa’ xyanqeb’; jo’kan naq btaak’ojob’aaq wi’chik cxnawomeb’ chirixeb’ lix yuwa’eb’, jo’ ajwi’ xnawomeb’ chirix li Jesukristo, jo’ kiwan chaq sa’ xyanqeb’ lix yuwa’eb’.

6 Toja’ ut naq te’saho’q sa’ xch’ool; xb’aan naq te’xnaw naq a’an jun li osob’tesink ke’xk’ul sa’ ruq’ li Dios; ut lix lep li q’ojyin taa’ok chi t’ane’k chaq sa’ ru; ut moko taanume’q ta k’iila tasal tenamit sa’ xyanqeb’, naq te’ok choq’ jun tenamit saqeb’ ru ut asa rilb’aleb’.

7 Ut taak’ulmanq naq eb’ laj aJudio li jek’inb’ileb’ bte’ok ajwi’ chixpaab’ankil li Kristo, ut te’xtikib’ xch’utub’ankil rib’ chiru lix b’een li ch’och’; ut li jo’ k’ihal reheb’ te’paab’anq re li Kristo te’ok ajwi’ choq’ jun tenamit sa rilb’al.

8 Ut taak’ulmanq naq li Qaawa’ Dios tixtikib’ lix k’anjel sa’ xyanqeb’ chixjunil li tenamit, junkab’al, aatinob’aal, ut teepal, re taa’uxmanq xk’ojob’ankil wi’chik lix tenamit sa’ xb’een li ruchich’och’.

9 Ut rik’in tiikilal li aQaawa’ Dios btixraq aatin chirixeb’ li neb’a’, ut taach’iilanq rik’in juntaq’eetalil choq’ reheb’ li ctuulan re li ruchich’och’. Ut a’an tixsak’ li ruchich’och’ rik’in xxuq’ li re; ut rik’in li namusiq’ak wi’ lix tz’uumal re tixkamsiheb’ laj maak.

10 Xb’aan naq chi seeb’ taachalq axq’ehil naq li Qaawa’ Dios tixk’anjela jun li nimla bjachok-ib’ sa’ xyanq li tenamit, ut tixsacheb’ laj maak; a’ut ctixkol xyu’ameb’ lix tenamit, relik chi yaal, us ta taa’uxq naq tento dtixsacheb’ laj maak rik’in xam.

11 Ut li atiikilal taawanq choq’ xk’aamal lix yiitoq, ut li tiikilal chi paab’ank choq’ xk’aamal lix juruch’.

12 aToja’ ut naq li xojb’ taawanq rochb’een li karneer, ut taayoklaaq li hix rochb’een li saaj yuk, ut sa’ wotzil li ch’ina wakax rochb’een li saaj kaqkojl ut li ketomq nimob’resinb’il xtib’el; ut jun li ch’ina al tixk’ameb’ xb’e.

13 Ut li wakax ut li oso te’tzekanq; eb’ li ral, wotz te’yoklaaq; ut li kaqkojl tixk’ux li ichaj chanchan li b’ooyx.

14 Ut li ch’ina al natu’uk taab’atz’unq chire rochoch li ik’b’olay, ut li ch’ina al ink’a’ chik natu’uk tixk’e li ruq’ sa’ xsok li k’amb’olay.

15 Ink’a’ te’rahob’tesinq chi moko te’sachoq sa’ chixjunil lin santil tzuul, xb’aan naq taanujaq li ruchich’och’ rik’in xnawb’al chirix li Qaawa’ jo’ chanru naq nujenaq li palaw rik’in ha’.

16 Jo’kan naq taak’ehe’q chi nawmank li k’a’aq re ru chirix achixjunileb’ li tenamit; relik chi yaal, chixjunil li k’a’aq re ru btaak’utb’esimanq chiruheb’ li ralal xk’ajoleb’ li winq.

17 Maak’a’ k’a’ru muqmu li ink’a’ ta ataak’utb’esimanq; maak’a’ junaq k’anjel re q’ojyin li ink’a’ ta taak’ute’q chi saqenkil; ut maak’a’ k’a’ru tz’aptz’o ta sa’ li ruchich’och’ li ink’a’ taahite’q.

18 Jo’kan ut, chixjunil li k’a’aq re ru li k’utb’esinb’il chaq chiruheb’ li ralal xk’ajoleb’ li winq taak’utb’esimanq sa’ li kutan a’an; ut laj Satanas amoko taawanq ta chik xwankil sa’ xb’een lix ch’ooleb’ li ralal xk’ajoleb’ li winq chiru naab’al kutan. Ut anajwan, ex was wiitz’in raarookex inb’aan, nink’e xraqik inyehom.