Vaj Lug Kub
2 Nifais 27


Tshooj 27

Kev tsaus ntuj thiab txoj kev tso qhov tseeb tseg yuav los duav lub ntiaj teb nyob hauv hnub kawg—Phau Ntawv Maumoos yuav tawm los—Peb tug tim khawv yuav ua tim khawv txog phau ntawv—Tus neeg txawj ntse yuav tsis muaj cuab kav nyeem tau phau ntawv uas tau muab zwm tseg—Tus Tswv yuav ua ib txog hauj lwm zoo kawg nkaus uas xav tsis thoob thiab xav tsis tag—Piv rau Yaxayas 29. Kwv yees li 559–545 xyoo ua ntej yug Yexus.

1 Tiam sis, saib seb, nyob rau hauv hnub kawg, los sis nyob rau hauv Lwm Haiv Neeg lub caij—muaj tseeb tiag, saib seb txhua txhia haiv neeg ntawm Lwm Haiv Neeg thiab kuj yog cov Neeg Yudais thiab, tsis hais cov uas yuav tuaj rau saum thaj av no thiab cov uas yuav nyob rau saum lwm thaj av, muaj tseeb tiag, nyob saum txhua thaj av hauv ntiaj teb no huv tib si, saib seb, lawv yuav raug qaug rau txoj kev tsis ncaj ncees thiab txhua txhia yam kev qias—

2 Thiab thaum hnub ntawd los lawv yuav raug Ib Tsoom Tub Rog tus Tswv los xyuas, nrog xob quaj thiab nrog av qeeg, thiab nrog ib lub suab nrov heev, thiab nrog cua daj cua dub, thiab nrog khaub zeeg cua, thiab nrog nplaim hluav taws leej faj.

3 Thiab txhua txhia haiv neeg uas tawm tsam Xi-oos, thiab cov uas ua kom nws muaj kev nyuaj siab, yuav raug zoo li ib zag npau suav uas pom thaum tsaus ntuj; muaj tseeb tiag, nws yeej yuav muaj li ntawd rau lawv, twb yuav zoo li rau ib tug neeg tshaib plab uas npau suav, thiab saib seb zoo li nws tau noj tiam sis nws tsim los no nws plab tseem qhuav qhawv; los sis yuav zoo li ib tug neeg nqhis dej uas tau npau suav, thiab saib seb zoo li nws tau haus dej tiam sis thaum nws tsim los no saib seb nws tsis nco qab lawm, thiab nws tus ntsuj plig tseem nqhis; muaj tseeb tiag, twb yuav muaj li ntawd rau tej neeg ntawm txhua txhia haiv neeg uas tseem pheej yuav tawm tsam nkaug Roob Xi-oos.

4 Vim saib seb, nej txhua tus uas ua kev tsis ncaj ncees, cia li nyob twj ywm thiab cia li ua zoo xav, vim nej yuav qw, thiab quaj; muaj tseeb tiag, nej yuav raug vwm tiam sis tsis yog qaug cawv, nej yuav vau koj vau kus tiam sis tsis yog haus cawv ntau.

5 Vim saib seb, tus Tswv tau hliv tus ntsuj plig uas tsaug zog heev rau nej. Vim saib seb, nej tau kaw nej tej qhov muag, thiab nej tau tsis lees yuav tej yaj saub; thiab nej tej nom tej tsw, thiab tej tub pom yav tom ntej nws tau muab zais vim yog nej tej kev tsis ncaj ncees.

6 Thiab yuav tau muaj tias tus Tswv uas yog Vajtswv yuav coj tej lus ntawm ib phau ntawv los rau nej, thiab lawv yuav yog tej lus ntawm lawv cov uas tau pw so hauv kev tuag lawm.

7 Thiab saib seb phau ntawv yuav raug muab zwm; thiab nyob hauv phau ntawv yuav muaj ib qho kev tshwm sim los ntawm Vajtswv, txij li puag thaum ntuj tsim teb raug los mus rau thaum ntuj tag teb kawg.

8 Yog li ntawd, vim tej uas tau raug muab zwm cia lawm, tej uas tau raug muab zwm cia lawm yuav tsis raug muab coj los rau cov neeg thaum uas lawv tseem muaj kev phem thiab kev qias. Yog li ntawd phau ntawv yuav raug tsis pub rau lawv.

9 Tiam sis phau ntawv yuav raug muab rau ib tug txiv neej, thiab nws yuav muab tej lus ntawm phau ntawv, uas yog cov neeg uas tau pw so hauv av lawm tej lus, thiab nws yuav coj tej lus no mus rau lwm tus;

10 Tiam sis tej lus uas raug muab zwm lawm nws yuav tsum tsis txhob muab, thiab nws yuav tsum tsis txhob muab phau ntawv. Vim phau ntawv yuav raug muab zwm los ntawm Vajtswv lub hwj chim, thiab tej kev tshwm sim uas raug muab zwm cia rau hauv lawm yuav tsum raug muab ceev rau hauv phau ntawv mus txog thaum tus Tswv lub sij hawm, uas lawv yuav tawm los; vim saib seb, lawv qhia txhua yam huv tib si txij li puag thaum ntuj tsim teb raug los mus txog rau thaum ntuj tag teb kawg.

11 Thiab hnub ntawd yeej yuav los xwv kom tej lus ntawm phau ntawv uas tau raug muab zwm cia lawm yuav raug muab nyeem nyob puag saum tej ru tsev; thiab lawv yuav raug muab nyeem los ntawm Khetos lub hwj chim; thiab txhua yam tsav uas ib txwm tau tshwm sim rau tib neeg lawm yuav raug muab qhia rau tib neeg, thiab tej uas tseem yuav tshwm sim los mus txog thaum ntuj tag teb kawg.

12 Yog li ntawd, nyob rau hnub ntawd thaum uas phau ntawv yuav raug muab rau tus txiv neej uas kuv tau hais, phau ntawv yuav tau raug muab zais ncaim ntawm neeg ntiaj teb lub qhov muag, xwv kom tsis muaj ib tug neeg twg lub qhov muag yuav pom nws tsuas yuav yog peb tug tim khawv thiaj li yuav pom nws xwb, los ntawm Vajtswv lub hwj chim nrog nws tus uas tau raug muab phau ntawv rau xwb; thiab lawv yuav ua tim khawv txog qhov tseeb ntawm phau ntawv thiab txog tej xwm txheej uas nyob hauv.

13 Thiab yuav tsis muaj dua lwm tus uas yuav pom phau ntawv no, tsuas yog qho tug uas raws li Vajtswv pom zoo thiaj li pom thiab los ua tim khawv txog nws tej lus pub rau tib neeg xwb; vim tus Tswv uas yog Vajtswv tau hais tias cov neeg mob siab rau ntseeg tej lus yuav nrov zoo li tej uas los ntawm kev tuag lawm los.

14 Yog li ntawd, tus Tswv uas yog Vajtswv yuav pib coj tej lus ntawm phau ntawv ntawd tawm los; thiab nyob rau ntawm coob tus tim khawv li uas zoo rau nws tej qhov ncauj nws yuav tsa nws txoj lus; thiab kev txom nyem yuav raug rau nws tus uas tsis kam lees yuav Vajtswv txoj lus!

15 Tiam sis saib seb, yuav muaj tau tias tus Tswv uas yog Vajtswv yuav hais rau nws tus uas nws yuav muab phau ntawv rau hais tias: Coj tej lus no uas yog cov uas tsis muab zwm tseg thiab coj lawv mus rau lwm tus, xwv kom nws yuav tau coj mus qhia rau tus neeg txawj ntse hais tias; Kuv thov koj nyeem qhov no. Thiab tus neeg txawj ntse yuav teb hais tias: Coj phau ntawv los rau kuv, thiab kuv yuav nyeem lawv.

16 Thiab nim no, vim txoj kev xav tau yeeb koob ntawm lub ntiaj teb thiab xav nplua nuj lawv yuav hais li no, thiab yuav tsis yog rau Vajtswv lub yeeb koob.

17 Thiab tus txiv neej yuav hais tias: Kuv coj tsis tau phau ntawv los, vim nws twb raug muab zwm cia lawm.

18 Ces tus neeg txawj ntse yuav teb hais tias: Kuv nyeem tsis tau nws.

19 Yog li ntawd yuav muaj tau tias tus Tswv uas yog Vajtswv yuav rov qab muab phau ntawv thiab tej lus nyob hauv los rau nws tus uas tsis txawj ntse dua; thiab tus txiv neej uas tsis txawj ntse yuav hais tias: Kuv twb tsis txawj ntse.

20 Ces tus Tswv uas yog Vajtswv yuav hais rau nws hais tias: Cov neeg uas txawj ntse lawv yuav tsis nyeem tej lus no, rau qhov lawv tau tsis kam lees yuav tej lus no lawm, thiab kuv yuav muaj peev xwm ua tau kuv txoj hauj lwm; yog li ntawd koj yuav tsum nyeem tej lus uas kuv yuav muab rau koj.

21 Tsis txhob kov tej uas raug muab zwm cia lawm, vim kuv mam li coj lawv los thaum txog kuv lub sij hawm; vim kuv yuav ua kom tib neeg pom hais tias kuv yeej muaj cuab kav ua kuv txoj hauj lwm.

22 Yog li ntawd, thaum uas koj tau nyeem tej lus uas kuv tau kom koj nyeem, thiab tau txais tej tim khawv uas kuv tau cog lus tseg rau lawm, ces koj yuav tsum rov qab muab phau ntawv mus zwm dua, thiab muab nws coj mus zais rau kuv, xwv kom kuv yuav hwm tau tej lus uas koj tsis tau nyeem tseg cia, mus txog thaum uas kuv yuav pom tias haum rau hauv kuv txoj kev txawj ntse uas yuav muab txhua yam tsav los qhia rau tib neeg.

23 Vim saib seb, kuv yog Vajtswv; thiab kuv yog ib tug Vajtswv uas muaj txuj ci tseem ceeb; thiab kuv yuav qhia rau lub ntiaj teb tias nag hmo kuv zoo li cas, hnub no thiab mus ib txhis li kuv yeej yuav zoo li ntawd; thiab kuv tsuas ua hauj lwm rau tib neeg mus raws li lawv tej kev ntseeg xwb.

24 Thiab yuav tau muaj dua tias tus Tswv yuav hais rau nws tus uas yuav nyeem tej lus tias yuav tsum tau nyeem tej uas muab rau nws:

25 Vim npaum tias yog cov neeg no muab lawv lub qhov ncauj txav los ze kuv thiab muab lawv tej di ncauj hwm kuv, tiam sis lawv tau tshem lawv tej siab mus deb ntawm kuv, thiab lawv tej kev ntshai kuv yog raug qhia los ntawm neeg tej kev qhuab qhia—

26 Yog li ntawd, kuv yuav pib ua ib txog hauj lwm zoo kawg nkaus uas xav tsis thoob nyob hauv cov neeg no, muaj tseeb tiag, ib txog hauj lwm zoo kawg nkaus uas xav tsis thoob thiab ib txog uas xav tsis tas li, vim txoj kev txawj ntse ntawm lawv cov neeg txawj ntse thiab cov neeg paub ntaub paub ntawv yuav piam sij, thiab txoj kev to taub ntawm lawv cov neeg ntse yuav raug muab zais.

27 Thiab kev txom nyem yuav raug rau lawv cov uas nrhiav muab lawv tej lus uas lawv hais zais tob tsis pub tus Tswv paub! Thiab lawv tej hauj lwm yog nyob hauv qhov tsaus ntuj; thiab lawv hais tias: Leej twg yuav pom peb, thiab leej twg yuav paub? Thiab lawv kuj hais tias: muaj tseeb tiag, yog nej muab tej no ntxeev sab hauv tuaj sab nrauv ces yeej yuav pom zoo li tus neeg puab lauj kaub tej av. Tiam sis saib seb, Ib Tsoom Tub Rog tus Tswv hais tias, kuv yuav qhia rau lawv, tias kuv twb paub tag nrho lawv tej hauj lwm huv tib si. Vim tej hauj lwm puas yuav hais rau tus neeg uas ua tej hauj lwm ntawd tias, nws tsis yog tus tsim kuv? Los sis tej khoom uas raug kho puas yuav hais tau rau nws tus uas kho nws hais tias, nws tsis muaj kev to taub?

28 Tiam sis saib seb, Ib Tsoom Tub Rog tus Tswv hais tias: Kuv yuav qhia rau noob neej tias nws tshuav tsis ntev pes tsawg lawm uas Lenpanoos yuav raug muab pauv mus ua ib thaj teb uas zoo heev; thiab thaj teb uas zoo ntawd yuav raug suav hais tias yog ib thaj hav zoov.

29 Thiab nyob rau hnub ntawd cov neeg lag ntseg yuav hnov phau ntawv tej lus, thiab cov neeg dig muag tej qhov muag yuav pom tawm hauv qhov tsis tseeb los thiab tawm hauv qhov tsaus ntuj los.

30 Thiab cov neeg uas txo hwj chim yuav tau koob hmoov ntxiv, thiab lawv tej kev xyiv fab yuav nyob hauv tus Tswv, thiab cov pluag uas ua neej nrog luag nyob yuav xyiv fab hauv Ixayees Tus Dawb Huv.

31 Vim tseeb npaum li tus Tswv tseem muaj txoj sia nyob lawv yuav pom tias tus uas phem kawg nkaus yuav raug ua kom tsis muaj nuj nqis dab tsi, thiab cov neeg uas pheej thuam lwm tus yuav raug puas tsuaj, thiab txhua tus uas nrhiav ntsoov txoj kev tsis ncaj yuav raug ntiab tawm mus;

32 Thiab lawv cov uas hais lus nkaug ib tug neeg tsis muaj txim tias nws muaj txim, thiab cuab ib rooj ntxiab rau nws tus uas tau qhuab ntawm lub rooj vag, thiab muab cov neeg ncaj ncees thawb rau ib sab rau qhov tsis muaj nuj nqis li.

33 Yog li ntawd, tus Tswv tau hais li no, tus uas tau txhiv Anplaham, txog rau Yakhauj tsev neeg: Nim no Yakhauj yuav tsis txaj muag, thiab nim no nws lub ntsej muag yuav tsis daj li.

34 Tiam sis thaum nws pom nws tej me nyuam, txoj hauj lwm ntawm kuv txhais tes, nyob hauv nws nruab nrab, lawv yuav qhuas kuv lub npe, thiab qhuas Yakhauj Tus Dawb Huv, thiab yuav ntshai Ixayees tus Vajtswv.

35 Lawv cov uas tau ua txhaum nyob hauv sab ntsuj plig kuj yuav los mus to taub, thiab lawv cov uas yws yws yuav kawm lus qhuab qhia.