Ti Maikadua a Libro ni Nephi

1 Ket napasamak a siak, ni Nephi, ingibuskon ti panangisurok kadagiti lallaki a kabsatko, adu pay a banag ti insao kadakuada ti ^aamami, ni Lehi, ket inulitna kadakuada, no kasano ti kinaindaklan dagiti banag nga inaramid ti Apo para kadakuada iti panangiruarna kadakuada manipud iti daga ti Jerusalem.

2 Ket imbagana kadakuada ti maipapan kadagiti ^apanagsupringda iti idadaliasatda iti baybay, ken dagiti asi ti Dios iti panangisalakanna kadakuada, ta saanda a naalun-on iti baybay.

3 Ket imbagana pay kadakuada ti maipapan iti naikari a daga, a nagun-odda—no kasano ti kinamanangngaasi ti Apo a nangpatigmaan kadakami a nasken a pumanaw manipud iti daga ti Jerusalem.

4 Ta, kitaen, kinunana, ^anaparmatak, nga ammok a nadadael ti ^bJerusalem; ket no koma nagtalinaedtayo idiay Jerusalem ^cnataytayo.

5 Ngem, kinunana, iti laksid ti panagsagabatayo, nagun-odtayo ti ^anaikari a daga, ti daga a ^bkasayaatan kadagiti amin a daga; ti daga nga intulag ti Apo a Dios kaniak a tawidento dagiti kaputotak. Wen, ^cintulag ti Apo daytoy a daga kaniak, ken kadagiti annakko iti agnanayon, ken kasta met kadagiti amin a nasken a maiturongto babaen ti ima ti Apo manipud kadagiti dadduma a pagilian.

6 Gapuna, siak, ni Lehi, ipadtok ti mayannurot kadagiti aramid ti Espiritu nga adda kaniak, nga ^aawanto ti umay ditoy a daga malaksid no maiturongdanto babaen ti ima ti Apo.

7 Gapuna, naikonsagrar daytoy a ^adaga iti tao nga iturongnanto ditoy. Ket no agserbidanto kenkuana a mayannurot kadagiti bilin nga intedna, agbalinto daytoy a daga ti ^bwayawaya para kadakuada; gapuna saandanto a pulos a maadipen, no kasta, mapasamakto gapu iti kinadangkesda; ta no naruayto ti kinadangkes, ^cmailunodto ti daga gapu kadakuada, ngem maparaburanto daytoy iti agnanayon para iti nalinteg.

8 Ket kitaen, nainsiriban a mailimedto pay laeng daytoy a daga manipud kadagiti pannakaammo dagiti sabali a pagilian; ta matmatan, adu a pagilian ti manggamgamto iti daga, agingga nga awanton ti lugar a matawid.

9 Gapuna, siak, ni Lehi, nagun-odkon ti kari, a ^ano la ket tungpalen dagiti iruarto ti Apo a Dios manipud iti Jerusalem dagiti bilinna, ^brumang-aydanto iti rabaw daytoy a daga; ket mailemmeddanto kadagiti sabali a pagilian, tapno matagikuada daytoy a daga. Ket maparaburandanto iti daytoy a daga no la ket ^ctungpalenda dagiti bilinna, ket awanto ti mangriribuk kadakuada, wenno mangagaw iti daga a tinawidda; ket agtaengdanto a sitatalged iti agnanayon.

10 Ngem kitaen, no dumtengto ti panawen a mapukaw ti pammatida, kalpasan ti panangawatda iti adu a bendision manipud iti ima ti Apo—addaanda iti pannakaammo iti pannakaparsua ti daga, ken amin a tao, ta ammoda iti naindaklan ken datdatlag nga aramid ti Apo manipud iti pannakaparsua ti lubong; nga addaanda iti bileg a naited kadakuada a mangaramid iti amin a banag babaen ti pammati; nga addaanda kadagiti amin a bilin manipud idi punganay, ken agsipud ta naiturongda babaen iti awan patinggana a kinaimbagna iti daytoy napateg a naikari a daga—kitaen, ibagak, a no dumteng ti aldaw nga ilaksiddanto ti Nasantuan ti Israel, ti pudno a ^aMesias, ti Mannubbot ken Diosda, kitaen, maipatayto kadakuada ti panangukom ti nalinteg.

11 Wen, iturongnanto dagiti ^asabali a pagilian kadakuada, ket ikkannanto ida iti bileg, ket alaennanto kadakuada ti dagdagada, ket ^biwaraswaras ken saplitannanto ida.

12 Wen, iti panaglabas ti maysa a sangkaputotan iti sabali pay a sangkaputotan, addanto ^apanagpipinnatay, ken nakaro a pannusa kadakuada; gapuna, annakko, kayatko a laglagipenyo; wen, kayatko a denggenyo dagiti saok.

13 O ta agriingkayo koma; agriingkayo manipud iti nargaan a pannaturog, wen, uray pay manipud iti pannaturog iti ^aimpierno, ket wagwagenyo ^bdagiti kawar a nangpungo kadakayo, dagiti kawar a mangpungo kadagiti annak ti tattao, ta maipanda nga adipen iti lansad ti agnanayon a ^ctaaw ti kinaleddaang ken kinay-ay-ay.

14 Agriingkayo! ken bumangonkayo manipud iti tapok, ket denggenyo ti timek ti agtigtigerger a ^anagannak, a ti bagina maitabonton iti nalamiis ken naulimek a ^btanem, manipud iti lugar nga awan ti agdaliasat a makasubli; iti sumagmamano pay nga aldaw innakton iti ^cdana ti amin a daga.

15 Ngem kitaen, ^asinubbot ti Apo ti kararuak manipud iti impierno; nakitakon ti dayagna, ket inrakusnak ^bkadagiti takkiag iti agarup awan patinggana a ^cpanagayatna.

16 Ket tarigagayak a nasken a lagipenyo a tungpalen dagiti ^apagalagaden ken pangngeddeng ti Apo; kitaen, daytoy ti pagdandanagan ti kararuak manipud idi punganay.

17 Pasaray a nadagsenan ti pusok iti ladingit, gapu ta nagbutengak, amangan ta ti kinatangken dagiti pusoyo ipaayto ti Apo a Diosyo ti nakaro a ^apungtotna kadakayo, ta ^bmailaksid ken madadaelkayo iti agnanayon;

18 Wenno, ta mailunodkayo iti las-ud ti ^aadu a sangkaputotan; ket sarungkarannakayo ti espada, ken panagbisin, ken magurgurakayo, ken maiturongkayo ti pagayatan ken pannakaadipen ti ^bsairo.

19 O annakko, saan koma a mapasamak kadakayo dagitoy a banag, ngem no mabalin dakayo koma ti napili ken ^anaparaburan a tattao ti Apo. Ngem kitaen, matungpal ti pagayatanna; gapu ta kinalinteg ^bdagiti wagasna nga agnanayon.

20 Ket kinunana a: ^aNo la ket tungpalenyo ^bdagiti bilinko ^cagrang-aykayonto iti daga; ngem no la ket saanyo a tungpalen dagiti bilinko, mailaksidkayonto iti imatangko.

21 Ket ita tapno maaddaan ti rag-o ti kararuak kadakayo, ken tapno siraragsak ti pusok iti ipapanawko ditoy lubong gapu kadakayo, ken tapno saannak a maitabon a naliday ken maldaang iti tanem, bumangonkayo manipud iti tapok, lallaki nga annakko, ket agbalinkayo a ^amalalaki, ken sititibkerkayo nga ^bagkaykaysa iti panunot ken puso, sangsangkamaysa iti amin a banag, tapno saankayo a maadipen;

22 Tapno saankayo a mailunod iti nasaem a pannakailunod; ken kasta met a tapno saanyo a matukay ti gura ti ^analinteg a Dios kadakayo, iti pannakadadael, wen, ti agnanayon a pannakadadael ti kararua ken bagi.

23 Agriingkayo, annakko a lallaki; ikawesyo ti ^akalasag ti kinalinteg. Wagwagenyo dagiti kawar a nangbalud kadakayo, ket rummuarkayo iti kasipngetan, ken bumangonkayo manipud iti tapok.

24 Saanyon a suppiaten ti kabsatyo, a nadayag dagiti kapanunotanna, ken nagtungpal kadagiti bilin manipud idi pimmanawtayo iti Jerusalem; ken isu ti inaramat ti Dios iti panangiturongna kadatayo iti naikari a daga; ta no saan a gapu kenkuana, mabalin a nataytayo koman gapu iti ^abisin iti langalang; nupay kasta, pinanggepyo a ^bkettelen ti biagna; wen, ket nagsagaba iti adu a ladingit gapu kadakayo.

25 Ket napalaus ti buteng ken kintayegako gapu kadakayo, ta amangan ta agsagabanto manen isuna; ta kitaen, pinabasolyo a nangagaw iti bileg ken ^apanangituray kadakayo, ngem ammok a saanna a pinanggep ti bileg wenno panangituray kadakayo, ngem pinanggepna ti gloria ti Dios, ken ti agnanayon a pagsayaatanyo.

26 Ket nagdayamudomkayo agsipud ta nabatad kadakayo. Kunayo nga inaramatna kadakayo ti ^akinainget; kunayo a nakapungtot kadakayo; ngem kitaen, ti kinaingetna isu ti kinainget ti balikas ti Dios, nga adda kenkuana; ket dayta a kunayo a pungtot isu ti kinapudno, a mayannurot a kas iti adda iti Dios, a saanna a malapdan, a mangiparangarang a situtured maipapan iti kinadakesyo.

27 Ket nasken nga adda kenkuana ti ^abileg ti Dios, uray pay iti panangbilinna kadakayo a nasken nga agtungpalkayo. Ngem kitaen, saan nga isu ngem ti ^bEspiritu ti Apo nga adda kenkuana, a ^cnanglukat iti ngiwatna nga agsao a saanna a makaem.

28 Ket ita, Laman, anakko, ken kasta met kadakayo Lemuel ken Sam, ken kasta met dagiti annakko nga annak a lallaki ni Ismael, kitaen, saankayo a mapukaw no dumngegkayo iti timek ni Nephi. Ken no dumngegkayo kenkuana ibatiankayo iti ^abendision, wen, uray ti umuna a bendisionko.

29 Ngem alaek ti ^aumuna a pammendisionko no saankayo a dumngeg kenkuana, wen, uray ti bendisionko, ket agtalinaedto kenkuana.

30 Ket ita Zoram, kunak kenka: Kitaen, sika ti ^aadipen ni Laban; nupay kasta, naipanawka iti daga ti Jerusalem, ket ammok a pudnoka a gayyem ti anakko a ni Nephi, iti agnanayon.

31 Gapuna, agsipud ta napudnoka, mabendisionanto dagiti kaputotam ^aagraman ti kaputotanna, ta napaut ti panagnaedda a sirarang-ay iti rabaw daytoy a daga; ken awan, malaksid laeng ti kinadangkesda, ti mangdangran wenno mangriribuk iti rang-ayda iti rabaw daytoy a daga iti agnanayon.

32 Gapuna, no tungpalem dagiti bilin ti Apo, kinonsagraran ti Apo daytoy a daga nga agpaay iti pagtalgedan ti kaputotam a kadua dagiti kaputotan ti anakko.