Tsir 9
Nephi yɛ mprɛtse ahorow ebien—Kor biara dzin dze Nephi ne mprɛtse—Hɔn wiadzedze ho abakɔsɛm na ɔwɔ mprɛtse akɛse no do; na nyamesom ho nkyekyeree so wɔ nkakraba no do. Bɛyɛ mfe 600–592 Ansaana wɔbɔwo Christ.
1 Na ndzɛmba yi nyinara na m’egya hunii, na ɔtsee na ɔkãe, ber a ɔtse ne ntamadan no mu no, wɔ aLemuel bɔnsa no mu, na ndzɛmba pii so a murunntum nnkyerɛw wɔ mprɛtse yi do.
2 Na afei dɛ mbrɛ makã wɔ mprɛtse yi ho no hwɛ ɔnnyɛ mprɛtse no a makyerɛw mo nkorɔfo hɔn abakɔsɛm nyina wɔ do; na dɛm amprɛtse no a makyerɛw mo nkorɔfo ho nsɛm wɔ do no mato no dzin Nephi, dɛm ntsi wɔfrɛ no Nephi mprɛtse, medze mankasa me dzin ato do; na dɛm mprɛtse yi so wɔfrɛ no Nephi mprɛtse.
3 Na menya Ewuradze hɔ mbrasɛm dɛ menyɛ dɛm mprɛtse yi wɔ abotae soronko ho ama meekrukye nsɛm a ɔfa mo nkorɔfo hɔn bɔsomdwuma ho wɔ do.
4 Mprɛtse afofor bi so do no wobokrukye nsɛm a ɔfa ahemfo hɔn ahendzi ho nye akõkoekõ na wentwiwentwi a osii mo nkorɔfo hɔn mu no wɔ do; dɛm ntsi, dɛm mprɛtse yi do nsɛm no dodowara fa ɔsomdwuma ho; na amprɛtse nkaa no so mu nsɛm dodowara fa ahemfo hɔn ahendzi nye akõkoekõ na wentwiwentwi a osii mo nkorɔfo hɔn mu ho.
5 Dɛm ntsi na Ewuradze ahyɛ me dɛ menyɛ dɛm mprɛtse yi wɔ noara ne anyansaa botae do a dɛm kwan no minnyim.
6 Mbom Ewuradze dze aonyim adze nyinara fitsi ahyɛse; dɛm ntsi osiesie kwan a wɔdze yɛ no ndwuma nyinara wɔ adasamba mu; na hwɛ, ɔwɔ btum nyinara dɛ ɔma ne nsɛm nyinara hyɛ mã. Na dɛm na ɔtse. Amen.