1 Pea ko ʻeni ko au, Nīfai, ʻoku ʻikai te u hiki ʻa e tohi hohoko ʻo ʻeku ngaahi tamaí ʻi he konga ko ʻeni ʻo ʻeku lekōtí; pea ʻe ʻikai ai pē te u hiki ia ʻamui ʻi he ngaahi peletí ni ʻa ia ʻoku ou tohi aí; he ʻoku tuʻu ia ʻi he lekooti kuo fai ʻe heʻeku tamaí; ko ia, ʻoku ʻikai te u hiki ia ʻi he tohí ni.

2 Ka ʻoku feʻunga pē ke u pehē, ko e hako ʻa kimautolu ʻo Siosefa.

3 Pea ʻoku tatau ai pē kiate au pe ʻoku ou fai ha fakamatala fakaʻāuliliki ki he ngaahi meʻa kotoa pē ʻa ʻeku tamaí; koeʻuhí ʻoku ʻikai lava ke tohi ia ki he ngaahi peleti ko ʻení, he ʻoku ou fie maʻu ʻa e konga ʻataʻatā kotoa pē ke u lava ʻo hiki ai ʻa e ngaahi meʻa ʻa e ʻOtuá.

4 He ko hono kotoa ʻeni ʻo ʻeku taumuʻá ke u lava ʻo fakalotoʻi ʻa e kakaí ke nau haʻu ki he ʻOtua ʻo ʻĒpalahamé, mo e ʻOtua ʻo ʻAisaké, mo e ʻOtua ʻo Sēkopé, ʻo moʻui.

5 Ko ia, ko e ngaahi meʻa ʻoku mālie ki he māmaní ʻoku ʻikai te u tohi, ka ko e ngaahi meʻa ʻoku fakahōifua ki he ʻOtuá pea kiate kinautolu ʻoku ʻikai te nau ʻo e māmaní.

6 Ko ia, te u fekau ki hoku hakó, ke ʻoua naʻa nau ngāue ʻaki ʻa e ngaahi peletí ni ʻo hiki ki ai ʻa e ngaahi meʻa ʻoku ʻikai mahuʻinga ki he fānau ʻa e tangatá.