Vaj Lug Kub
1 Nifais 5


Tshooj 5

Xaliyas yws Lihais—Nkawd zoo siab rau qhov uas nkawd cov tub rov qab los txog lawm—Lawv ua kev cai txi—Cov phiaj toog muaj Mauxes thiab cov yaj saub tej lus sau—Lawv tshuaj tau tias Lihais yog Yauxej ib tug xeeb leej xeeb ntxwv—Lihais qhia tej uas yuav muaj los yav tom ntej ntsig txog nws tej xeeb leej xeeb ntxwv thiab txog kev ceev cov phiaj. Kwv yees li 600–592 xyoo ua ntej yug Yexus.

1 Thiab tau muaj tias tom qab uas peb tau nqes los rau nram roob moj sab qhua los cuag tau peb txiv, saib seb, nws tau xyiv fab heev, thiab kuv niam, Xaliyas, tau zoo siab heev ib yam nkaus, vim nws tau nyuaj siab heev tiag yog vim peb.

2 Vim nws tau xav tias peb tau piam sij nyob rau pem roob moj sab qhua lawm; thiab nws kuj tau yws yws rau kuv txiv, es tseem hais rau nws tias nws yog ib tug neeg uas pheej ua yog toog pom ntau yam; tseem hais tias: Saib seb koj tau coj peb tawm ntawm thaj av uas yog peb qub txeeg qub teg, thiab kuv cov tub los tsis muaj lawm, thiab peb yuav piam sij nyob ntawm roob moj sab qhua no.

3 Thiab kuv niam tau siv yam lus li no yws kuv txiv.

4 Thiab tau muaj tias kuv txiv tau hais rau nws, hais tias: Kuv paub tias kuv yog ib tug neeg uas pheej ua yog toog pom ntau yam; vim tias yog kuv tsis tau pom tej yam uas yog Vajtswv li nyob hauv txoj kev ua yog toog pom kuv yuav tsis paub txog Vajtswv txoj kev zoo, tiam sis tseem yuav nyob hauv Yeluxalees, thiab tau raug piam sij nrog kuv cov kwv tij.

5 Tiam sis saib seb, kuv tau txais ib thaj av uas tau cog lus cia lawm, qhov ntawd ua rau kuv zoo siab; muaj tseeb tiag, thiab kuv paub tias tus Tswv yuav cawm kuv cov tub tawm ntawm Lanpas txhais tes, thiab coj lawv rov qab los rau wb nyob nram roob moj sab qhua no dua.

6 Thiab tom qab uas kuv txiv, Lihais, tau hais cov lus zoo li no lawm, tau nplij kuv niam, Xaliyas, lub siab uas txhawj txog peb, thaum uas peb tseem taug kev nyob hauv roob moj sab qhua nce mus pem daim av Yeluxalees, mus nqa cov Neeg Yudais phau ceev xwm txheej.

7 Thiab thaum peb tau rov qab los txog ntawm peb txiv lub tsev pheeb suab ntaub, saib seb nkawd txoj kev xyiv fab twb puv npo, thiab kuv niam zoo siab hlo lawm.

8 Thiab kuv niam tau hais li no, tias: Nim no kuv paub tseeb tias tus Tswv tau kom kuv tus txiv khiav tawm mus rau hauv roob moj sab qhua; muaj tseeb tiag, thiab kuv kuj paub tseeb tias tus Tswv tau tsom kwm kuv cov tub, thiab cawm lawv tawm ntawm Lanpas tes, thiab tau muab hwj chim rau lawv xwv kom lawv yuav muaj peev xwm ua tiav tej yam uas tus Tswv tau txib kom lawv ua. Thiab nws thiaj tau hais tej yam lus zoo li no.

9 Thiab tau muaj tias lawv tau zoo siab heev kawg li, thiab tau ua kev cai txi thiab tau hlawv tsiaj pub rau tus Tswv; thiab lawv tau ua Ixayees tus Vajtswv tsaug.

10 Thiab tom qab uas lawv tau ua Ixayees tus Vajtswv tsaug tas lawm, kuv txiv, Lihais, tau muab cov ceev xwm txheej cov uas tau sau rau saum cov phiaj toog, thiab nws txawm tau tshawb nrhiav cov ceev xwm txheej no tom hauv paus tuaj.

11 Thiab nws tau pom tias cov ceev xwm txheej ntawd muaj Mauxes tsib phau ntawv nyob hauv, cov no qhia ib zag txog kev tsim lub ntiaj teb no, thiab kuj qhia txog Adas thiab Evas, ob tug uas yog peb thawj tug niam thiab txiv.

12 Thiab kuj muaj cov Neeg Yudais ib phau ceev xwm txheej txij thaum chiv keeb, los mus txog ntua thaum vaj ntxwv Xedekhiyas sawv kav teb chaws Yudas.

13 Thiab kuj muaj cov yaj saub dawb huv tej kev qhia tej uas yuav muaj los yav tom ntej, txij puag thaum chiv keeb los, mus txog ntua thaum Xedekhiyas pib sawv kav teb chaws; thiab kuj muaj ntau zaj lus qhia tej uas yuav muaj los yav tom ntej uas yog Yelemis lub qhov ncauj hais.

14 Thiab tau muaj tias kuv txiv, Lihais, kuj tshawb pom tias nyob hauv cov phiaj toog ntawd muaj ib zag keeb kwm qhia txog nws poj koob yawm txwv, yog li ntawd nws thiaj tau paub lawm tias nws yog Yauxej ib tug xeeb leej xeeb ntxwv; muaj tseeb tiag, twb yog tus Yauxej uas yog Yakhauj tus tub, tus uas tau raug muab muag mus rau lub teb chaws Iyiv, thiab yog tus uas tus Tswv txhais tes tau hwm tseg cia lawm, xwv kom nws yuav cawm tau nws txiv, Yakhauj, thiab tag nrho nws tsev neeg ntawm txoj kev tuag tshaib tuag nqhis.

15 Thiab lawv kuj tau raug coj khiav tawm ntawm kev ua qhev thiab ntawm thaj av Iyiv, los ntawm tib tug Vajtswv tus uas tau tsom kwm lawv lawm.

16 Thiab xws li no kuv txiv, Lihais, tau nrhiav tau zaj uas qhia txog nws poj koob yawm txwv lawm. Thiab Lanpas kuj yog Yauxej ib tug xeeb leej xeeb ntxwv thiab, yog li ntawd nws thiab nws tej poj koob yawm txwv thiaj tau khaws cov ceev xwm txheej no cia.

17 Thiab nim no thaum kuv txiv pom tej no huv tib si lawm, nws txawm tau muaj tus Ntsuj Plig puv npo, thiab tau pib qhia tej uas yuav muaj los yav tom ntej ntsig txog nws tej xeeb leej xeeb ntxwv—

18 Hais tias cov phiaj toog no yuav tsum mus rau txhua haiv neeg, txhua xeem neeg, txhua yam lus, thiab cov neeg uas yog nws xeeb leej xeeb ntxwv.

19 Yog li ntawd, nws tau hais tias cov phiaj toog no yuav tsis raug piam sij ib zaug li; los sis yuav tsis muaj ib lub caij nyoog uas lawv yuav ploj mus li. Thiab nws tau qhia ntau yam uas yuav muaj los yav tom ntej ntsig txog nws tej xeeb leej xeeb ntxwv.

20 Thiab tau muaj tias yav tag los kuv thiab kuv txiv wb tau coj raws li tej lus txib uas tus Tswv tau txib kom peb ua.

21 Thiab peb mus muab tau cov ceev xwm txheej uas tus Tswv tau txib peb, thiab tau muab tshawb thiab pom tias cov ceev xwm txheej no yog ib yam uas zoo; muaj tseeb tiag, twb muaj nuj nqis heev rau peb, kawg tias peb tseem khaws tau tus Tswv tej lus txib cia rau peb tej me nyuam thiab.

22 Yog li ntawd, nws yog tus Tswv lub tswv yim uas peb yuav tsum coj cov ceev xwm txheej no nrog nraim peb, thaum peb tsiv nyob hauv roob moj sab qhua mus rau thaj av uas tau cog lus cia lawm.