Pukfel
1 Nifai 5


Sopun 5

Saraia a anini ngeni Liai—Ir me ruemon ra pwapwa ren niwinton nour kewe anuon—Ra asorata ar asor—Ekkewe seleichen brass ra masoweni makkean Moses me ekkewe soufos—Ekkewe seleich ra pwarata pwe Liai i emon mwirimwirin Joseph—Liai a osini usun mwirimwirin me usun tumunun ekkewe seleich. Arap ngeni 600–592 Ier Mwen Kraist.

1 Iwe non ewe fansoun me mwirin am aua feitiw non ewe fonu pon ngeni semem we, nengeni, a wesen uren pwapwa, me pwan inei we, Saraia, a fokkun pwapwa, pokiten a fokkun netipeta pokitem.

2 Pokiten a fen ekieki pwe aua mano me non ewe fonu pon; iwe a pwan anini ngeni semei we, a ereni pwe i emon mwan mi sou nemasepwi; a apasa: Nengeni ka emmweni kicheno seni ewe fonuen ach kewe neuo, me nei kewe at rese chiwen manau, iwe sipwene mano non ewe fonu pon.

3 Iwe mwirin ei sokkun napanapen kapas inei we a anini ngeni semei we.

4 Iwe non ewe fansoun semei we a kapas ngeni, a apasa: Ngang mi sinei pwe ngang emon mwan mi sou nemasepwi; pwe are use kuna ekkewe mettochun Kot non ew nemasepwi usap sinei ewe kirekirochun Kot, nge sipwe nometiw non Jerusalem, me mano fiti pwi kewe.

5 Nge nengeni, ua fen angei ew fonuen pwon, non ekkewe mettoch minne ngang ua pwapwaiti; ewer, me ua sinei pwe ewe Samon epwe angasa nei kewe anuon seni ne poun Laban kewe, me weiretiw sefan ngenikich non ewe fonu pon.

6 Iwe mwirin ei sokkun napanapen kapas an semei we, Liai, a aururu netipan inei we, Saraia, usun am, nupwen am sai non ewe fonu pon feita ngeni ewe fonuen Jerusalem, ren am aupwe angei ekkewe uruon ekkewe chon Jew.

7 Iwe nupwen am aua niwiniti ewe imw mangaku imwen semei we, nengeni ar pwapwa a unusoch, me inei we a kinamweino.

8 Iwe a kapas, a apasa: Iei ua ennetin sinei pwe ewe Samon a annuk ngeni punuwei we pwe epwe su ngeni ewe fonu pon; ewer, me ngang mi ennetin sinei pwe ewe Samon a fen tumunu nei kei anuon, me angasereu seni poun Laban kewe, iwe a ngenir pochokun seni minne ra tongeni awesano ekkewe mettoch minne ewe Samon a annuku ngenir. Iwe usun ei napanapen kapas i a fen kapas.

9 Iwe non ewe fansoun ra pwapwa chapur, iwe ra pwan asorata ar asor pwan asoren kek ngeni ewe Samon; me ra apasa ar kinisou ngeni ewe Koten Israel.

10 Iwe mwirin ar apasa ar kinisou ngeni ewe Koten Israel, semei we, Liai, a angei ekkewe uruo minne ra makketiw won ekkewe seleichen brass, me a attonaochur seni nepoputan.

11 Iwe a kuna pwe ra masoweni ekkewe nimu puken Moses, minne a masoweni ew uruon ewe forutan ewe fonufan, me pwan usun Adam me Eve, ir ekkewe aewin semach me inach;

12 Me pwan ew uruon ekkewe chon Jew seni nepoputan, pwan feitiw tori ewe poputan ewe muun Zedekiah, kingen Judah;

13 Me pwan ekkewe osini an ekkewe soufos mi fel, seni nepoputan, pwan feitiw tori ewe poputan muun Zedekiah; me pwan chommong osini minne ra fen kapas seni awan Jeremiah.

14 Iwe non ewe fansoun semei we, Liai, a pwan kuna me won ekkewe seleichen brass ew uruon an kewe neuo; ina minne a sinei pwe i mwirimwirin Joseph; ewer, ewe chok Joseph i noun Jacob we at, ewe a amömöno non Egypt, me ewe a tumun me ren poun ewe Samon, pwe epwe tumunu seman we, Jacob, me meinisin chon non imwan we seni mano ren nengita.

15 Iwe ra pwan emmweniu seni fotek me tou seni ewe fonuen Egypt, seni pwan ewe chok Kot ewe a tumunur.

16 Iwe iei semei we, Liai, a kuna ewe uruon an kewe neuo. Me Laban pwan mwirimwirin Joseph, ina minne i me saman kewe ra wisen isoni ekkewe uruo.

17 Iwe iei nupwen semei we a kuna ekkei mettoch meinisin, a ureno ren ewe Ngun, me a poputa ne osini usun mwirimwirin kewe—

18 Pwe ekkei seleichen brass repwene no ngeni meinisin ekkewe muu, einang, sokopaten kapas, me aramas ir mwirimwirin kewe.

19 Ina minne, a apasa pwe ekkei seleichen brass resap tongeni tano; resap pwan parang ren fansoun. Me a osini chommong mettoch usun mwirimwirin kewe.

20 Iwe non ewe fansoun tori ikenai ngang me semei we aua aneasochisi ekkewe annuk minne ewe Samon a fen annuku ngenikem.

21 Iwe aua angei ekkewe uruo minne ewe Samon a annuk ngenikem, me aua attonaochur me kuna pwe ra fokkun murino; ewer, a pwan watte auchear me rem, pokiten epwe etufichi kem, pwe aupwe tumunu ekkewe annukun ewe Samon ngeni mwirimwirim.

22 Ina minne, ina ewe mirit non ewe Samon pwe aupwe uweir, nupwen am aua sai non ewe fonu pon ngeni ewe fonuen pwon.