Tshooj 3
Lihais cov tub rov qab mus pem Yeluxalees mus nqa cov phiaj toog—Lanpas tsis kam muab cov phiaj rau lawv—Nifais ntuas thiab yaum nws cov tij laug—Lanpas txhav lawv tej khoom thiab yuav muab lawv tua—Lamas thiab Lemu-ees ntaus Nifais thiab Xam thiab ib tug tim tswv tsis pub nkawd ntaus nws. Kwv yees li 600–592 xyoo ua ntej yug Yexus.
1 Thiab tau muaj tias kuv, Nifais, tom qab uas kuv nrog tus Tswv tham tas lawm, kuv tau rov qab los rau tom kuv txiv lub tsev pheeb suab ntaub.
2 Thiab tau muaj tias nws tau hais rau kuv, hais tias: Saib seb kuv tau ua ib zag npau suav, nyob hauv zaj npau suav no tus Tswv tau txib kuv tias kom koj thiab koj cov tij laug yuav tsum rov qab mus lawm pem Yeluxalees.
3 Vim saib seb, Lanpas tau cov Neeg Yudais phau ceev xwm txheej thiab kuj muaj ib zag keeb kwm uas qhia txog kuv cov poj koob yawm txwv, thiab muab lawv sau rau hauv cov phiaj toog.
4 Yog li ntawd, tus Tswv tau txib kuv tias kom koj thiab koj cov tij laug yuav tsum mus lawm pem Lanpas tsev, thiab nrhiav cov ceev xwm txheej, thiab coj cov ntawd los rau ntawm roob moj sab qhua no.
5 Thiab nim no, saib seb koj cov tij laug yws yws, hais tias yam uas kuv hais kom lawv ua mas nyuaj heev; tiam sis saib seb twb tsis yog kuv hais kom lawv ua, tiam sis nws yog ib txoj lus txib ntawm tus Tswv.
6 Yog li ntawd kuv tus me tub es, cia li mus, thiab koj yuav raug txhawb pab los ntawm tus Tswv, vim tias koj tsis tau yws nws li.
7 Thiab tau muaj tias kuv, Nifais, tau hais rau kuv txiv tias: Kuv yuav mus thiab ua tej uas tus Tswv tau txib kom ua, vim kuv paub tias tus Tswv yeej tsis muab tej lus txib rau tib neeg ua ib yam dab tsi li, tsuas yog nws yuav npaj ib txoj hau kev rau lawv xwv kom lawv yuav ua tau yam uas nws tau txib lawv ua lawm xwb.
8 Thiab tau muaj tias thaum kuv txiv tau hnov cov lus no nws tau zoo siab heev, vim nws paub lawm tias tus Tswv tau foom koob hmoov rau kuv lawm.
9 Thiab kuv, Nifais, thiab kuv cov tij laug tau taug kev mus hauv roob moj sab qhua, peb nqa peb cov tsev pheeb suab ntaub, nce rov qab mus pem daim av Yeluxalees.
10 Thiab tau muaj tias thaum peb nce rov mus txog pem daim av Yeluxalees lawm, kuv thiab kuv cov tij laug txawm tau sib tham.
11 Thiab peb tau sib twv hmoov—saib peb leej twg yuav tsum mus hauv Lanpas lub tsev; Thiab tau muaj tias twv hmoov tau poob rau Lamas; thiab Lamas txawm tau mus hauv Lanpas lub tsev, thiab nws nrog Lanpas tham thaum nws zaum nyob hauv nws lub tsev.
12 Thiab nws tau thov rau Lanpas kom muab cov ceev xwm txheej uas tau muab sau rau saum cov phiaj toog, uas muaj ib zag keeb kwm uas qhia txog kuv txiv tej poj koob yawm txwv.
13 Thiab saib seb, tau muaj tias Lanpas tau npau taws, thiab muab Lamas thawb tawm ntawm nws lub xub ntiag mus; thiab nws tsis kam muab cov ceev xwm txheej no rau Lamas. Yog li ntawd, nws thiaj hais rau Lamas tias: Saib seb koj yog ib tug tub sab, thiab kuv yuav muab koj tua.
14 Tiam sis Lamas tseem tau khiav tawm ntawm nws lub xub ntiag mus, thiab tau piav tej uas Lanpas tau ua, rau peb. Thiab peb kuj tau pib nyuaj siab heev, thiab kuv cov tij laug twb tau yuav luag rov qab mus cuag kuv txiv nram roob moj sab qhua.
15 Tiam sis saib seb kuv tau hais rau lawv tias: Ib yam li tus Tswv muaj txoj sia nyob, thiab ib yam li uas peb tseem muaj txoj sia nyob, peb yuav tsis rov qab mus cuag peb txiv nram roob moj sab qhua, txog thaum uas peb tau ua tiav yam uas tus Tswv tau txib kom peb tuaj ua lawm tso.
16 Yog li ntawd, cia peb muaj txoj kev ntseeg coj raws nraim li tus Tswv tej lus txib; yog li ntawd cia peb mus lawm nram thaj av uas yog peb txiv qub txeeg qub teg, vim saib seb nws tau tso tej nyiaj thiab tej kub tseg, thiab ib puas tsav yam uas muaj nuj nqis. Thiab nws tau ua ib puas yam tsav zoo li no los vim yog tej uas tus Tswv kom ua.
17 Vim nws paub lawm tias Yeluxalees yuav tsum raug puas tsuaj mus, rau qhov vim tej tib neeg txoj kev phem.
18 Vim saib seb, lawv tau tsis kam lees yuav cov yaj saub tej lus. Yog li ntawd, yog tias kuv txiv tseem nyob hauv lub teb chaws ntawd tom qab uas nws tau raug hais kom khiav tawm ntawm lub teb chaws ntawd mus, saib seb, nws yeej yuav piam sij tib yam. Yog li ntawd, nws thiaj yuav tsum tau khiav tawm ntawm lub teb chaws ntawd mus.
19 Thiab saib seb, yam no yog Vajtswv lub tswv yim tias peb yuav tsum nqa kom tau cov ceev xwm txheej no, xwv kom peb yuav khaws tau peb cov yawg koob tej lus cia rau peb tej me nyuam.
20 Thiab kom peb yuav khaws tau cov yaj saub dawb huv tej lus uas lawv tau hais los ntawm lawv qhov ncauj lawm cia rau peb tej me nyuam thiab, cov ntawd yog cov uas lawv twb tau txais los ntawm Vajtswv tus Ntsuj Plig thiab nws lub hwj chim, txij puag thaum ntuj tsim teb raug los mus txog ntua niaj hnub nim no.
21 Thiab tau muaj tias tom qab uas kuv tau hais zoo li no lawm kuv thiaj yaum tau kuv cov tij laug, kom lawv yuav cia siab coj raws nraim li Vajtswv tej lus txib.
22 Thiab tau muaj tias peb tau mus nram thaj av uas yog peb qub txeeg qub teg, thiab peb tau sau peb tej nyiaj tej kub thiab peb tej khoom muaj nuj nqis los ua ke.
23 Thiab tom qab uas peb tau sau tej yam no los ua ke lawm, peb txawm rov qab nce mus pem Lanpas lub tsev dua.
24 Thiab tau muaj tias peb txawm tau mus rau hauv Lanpas, thiab thov kom nws muab cov ceev xwm txheej uas muab sau rau saum cov phiaj toog rau peb, ces peb yuav muab peb tej nyiaj tej kub, thiab tag nrho peb tej khoom muaj nuj nqis rau nws.
25 Thiab tau muaj tias thaum Lanpas pom peb tej khoom, thiab nws yog ib co uas zoo heev li, kawg tias, nws thiaj muab peb ntiab tawm, thiab tau xa nws cov tub qhe tuaj muab peb tua, xwv kom nws yuav tau peb tej khoom.
26 Thiab tau muaj tias peb tau khiav ua Lanpas cov tub qhe ntej, thiab peb yuav tsum tso peb tej khoom rau tom qab, thiab cov khoom no txawm tau poob rau Lanpas tes.
27 Thiab tau muaj tias peb tau khiav mus rau tom roob moj sab qhua lawm, thiab Lanpas cov tub qhe txawm raws tsis tau peb, thiab peb tau mus nkaum nyob rau hauv ib lub qhov tsua.
28 Thiab tau muaj tias Lamas tau npau taws rau kuv, thiab rau kuv txiv thiab; thiab Lemu-ees los kuj npau taws ib yam, vim nws mloog Lamas lus. Yog li ntawd Lamas thiab Lemu-ees tau cem ntau yam lus hnyav rau wb, nkawd cov kwv, thiab nkawd twb tau muab ib tug pas ntaus wb.
29 Thiab tau muaj tias thaum nkawd tseem xuas ib tug pas ntaus wb, saib seb, tus Tswv ib tug tim tswv tau los thiab sawv ntawm nkawd xub ntiag, thiab nws hais rau nkawd, hais tias: Tim li cas neb muab ib tug pas ntaus neb tus kwv? Neb tsis paub tias tus Tswv tau xaiv nws los ua tus kav neb los, thiab li no los vim neb tej kev phem? Saib seb nej yuav tsum rov qab nce mus lawm pem Yeluxalees dua, thiab tus Tswv yuav muab Lanpas rau nej tes.
30 Thiab tom qab uas tus tim tswv tau hais lus rau peb tas lawm, nws tau ncaim mus lawm.
31 Thiab tom qab uas tus tim tswv tau ncaim mus lawm, Lamas thiab Lemu-ees rov pib yws yws dua, hais tias: Yuav muaj tau li cas tias tus Tswv yuav muab tau Lanpas rau peb tes? Saib seb, nws yog ib tug neeg muaj meej mom thiab nws muaj peev xwm txib tau tsib caug leej, muaj tseeb tiag, nws tseem muaj peev xwm tua tau tsib caug leej thiab; ces ua li cas nws thiaj yuav tua tsis tau peb?