Vaj Lug Kub
1 Nifais 22


Tshooj 22

Cov neeg Ixayees yuav raug tawg ri niab mus thoob plaws hauv lub qab ntuj khwb no—Lwm Haiv Neeg yuav muab txoj moo zoo los yug thiab pab kom cov neeg Ixayees loj hlob nyob rau hauv hnub nyoog kawg—Cov neeg Ixayees yuav raug sib sau los ua ke thiab lawv yuav raug cawm dim, thiab cov neeg phem yuav raug kub hnyiab ib yam li tej quav nyab npleg—Tus dab txoj kev kav yuav raug puas tsuaj puas ntsoog, thiab Ntxwg Nyoog yuav raug muab khi. Kwv yees li 588–570 xyoo ua ntej yug Yexus.

1 Thiab nim no tau muaj tias tom qab uas kuv, Nifais, tau nyeem tej yam xwm uas tau muab sau rau saum cov phiaj toog no tas lawm, kuv cov tij laug tau los cuag kuv thiab tau hais rau kuv tias: Tej yam xwm uas koj tau nyeem tas los no txhais li cas? Saib seb, puas yog peb yuav tsum to taub raws li tej yam uas yog sab ntsuj plig, uas yuav muaj los raws li tus ntsuj plig thiab tsis yog sab cev nqaij daim tawv los?

2 Thiab kuv, Nifais, tau hais rau lawv hais tias: Saib seb tej yam xwm no tau qhia tawm rau tus yaj saub los ntawm tus Ntsuj Plig lub suab; vim tus Ntsuj Plig yog tus uas qhia txhua txhia yam rau tej yaj saub paub, tej yam uas yuav muaj los rau noob neej raws li sab nqaij tawv.

3 Yog li ntawd, tej yam xwm uas kuv tau nyeem yog tej uas tau sau hais txog tag nrho sab cev nqaij daim tawv thiab sab ntsuj plig; vim zoo nkaus li tias tsev neeg Ixayees, ziag no los sis lwm hnub, yeej yuav raug khiav ri niab mus thoob plaws hauv lub qab ntuj no, thiab kuj yuav mus nyob txuam nrog txhua txhia haiv neeg.

4 Thiab saib seb, tau muaj coob leej uas twb tau tsis paub txog cov neeg uas tseem nyob hauv Yeluxalees lawm. Muaj tseeb tiag, feem coob ntawm txhua txhia xeem neeg tau raug coj tawm mus lawm; thiab lawv raug tawg khiav rau ub rau no nyob rau saum tej koog pov txwv hauv dej hiav txwv; thiab peb tsis muaj leej twg paub tias lawv mus nyob qhov twg lawm, tiam sis peb tsuas paub tias lawv tau raug ploj mus lawm xwb.

5 Thiab vim lawv twb raug coj mus lawm, tej yaj saub twb tau qhia tej yam ntsig txog lawv lawm, thiab kuj tau qhia ntsig txog tag nrho cov uas tseem yuav tawg khiav ri niab tom qab no mus thiab raug xyaw nrog luag lwm pab lwm pawg, vim yog cov neeg Ixayees Tus Dawb Huv; vim lawv yuav ua lawv tej siab tej ntsws tawv qhwb qhawv rau nws; yog li ntawd, lawv thiaj yuav raug khiav tawg ri niab mus nyob nrog txhua txhia haiv neeg thiab yuav raug txhua leej txhua tus ntxub.

6 Txawm li ntawd los, tom qab uas lawv tau raug Lwm Haiv Neeg tu yug lawv lawm, thiab tus Tswv tau tsa nws txhais tes rau saum Lwm Haiv Neeg thiab muab lawv tsa zoo li tus chij, thiab lawv tej me nyuam raug muab nqa hauv lawv tej caj npab, thiab lawv tej ntxhais tau raug muab ev rau saum lawv tej xub pwg, saib seb tej yam xwm no cov uas tau hais txog yog tej yam uas yuav muaj tiag; vim li no yog tus Tswv tej kev khi lus nrog rau peb tej yawg koob; thiab nws kuj muaj lub ntsiab hais txog peb nyob rau lub caij nyoog uas yuav los yav tom ntej, thiab kuj hais txog peb cov kwv tij tag nrho cov uas yog tsev neeg Ixayees.

7 Thiab nws muaj lub ntsiab tias lub sij hawm yuav los es tom qab uas tsev neeg Ixayees tag nrho tau raug khiav ri niab thiab mus nyob txuam nrog lwm haiv neeg lawm, tus Tswv uas yog Vajtswv yuav tsa ib haiv neeg uas muaj zog heev los ntawm Lwm Haiv Neeg, muaj tseeb tiag, twb yuav yog nyob rau saum thaj av no; thiab peb tej xeeb leej xeeb ntxwv yuav raug tawg khiav ri niab los ntawm lawv.

8 Thiab tom qab uas peb tej xeeb leej xeeb ntxwv raug tawg khiav ri niab tag lawm tus Tswv uas yog Vajtswv yuav pib ua ib txoj hauj lwm tseem ceeb heev rau Lwm Haiv Neeg, uas yuav yog ib txoj uas muaj nqis heev rau peb tej xeeb leej xeeb ntxwv; yog li ntawd, txoj hauj lwm no muab piv ib yam li txoj kev uas Lwm Haiv Neeg tu lawv thiab muab lawv nqa hauv lawv tej caj npab thiab muab lawv ev saum lawv tej xub pwg.

9 Thiab txoj hauj lwm no kuj yuav muaj nqis heev rau Lwm Haiv Neeg thiab; thiab tsis yog tsuas muaj nqis rau Lwm Haiv Neeg xwb tiam sis kuj muaj nqis rau tag nrho tsev neeg Ixayees thiab, rau txoj kev qhia paub tej kev khi lus ntawm Leej Txiv tus nyob saum ntuj rau Anplaham, hais tias: Los ntawm koj tej xeeb leej xeeb ntxwv, txhua haiv neeg uas nyob hauv qab ntuj no yuav tau koob hmoov.

10 Thiab kuv cov kwv tij, kuv xav kom nej paub tias txhua haiv neeg uas nyob hauv qab ntuj no yuav txais tsis tau koob hmoov tsuas yog nws yuav tsum ua kom txhua haiv neeg pom nws lub hwj chim ntawm qhov muag tso.

11 Yog li ntawd, tus Tswv uas yog Vajtswv yuav pib ua kom txhua haiv neeg pom nws lub hwj chim ntawm qhov muag tso, nws thiaj li coj tau nws tej kev khi lus thiab nws txoj moo zoo mus rau cov uas yog tsev neeg Ixayees.

12 Yog li ntawd, nws yuav rov qab coj lawv tawm hauv txoj kev ua luag tauj luag qhev, thiab lawv yuav sib sau mus nyob ua ke rau hauv thaj av uas yog lawv qub txeeg qub teg dua; thiab lawv yuav dim plaws txoj kev uas pom tsis tseeb thiab dim plaws txoj kev tsaus ntuj; thiab lawv yuav paub tias tus Tswv yog lawv tus Cawm Seeg thiab lawv tus Txhiv Dim, cov neeg Ixayees Tus uas Muaj Hwj Chim Loj kawg nkaus.

13 Thiab lub koom txoos uas muaj zog thiab txaus ntxub, lub uas yog tag nrho ntiaj teb tus niam ntiav, nws cov ntshav yuav rov qab nchuav los ywg lawv taub hau; vim lawv yuav rov qab ua tsov ua rog rau lawv cov neeg, thiab rab ntaj ntawm lawv tej tes yuav rov qab ya los hlais lawv caj dab, thiab lawv yuav qaug rau lawv cov ntshav.

14 Thiab txhua haiv neeg uas yuav ua tsov ua rog tawm tsam nej, Au tsev neeg Ixayees es, lawv yeej yuav tig rov qab tawm tsam lawv, thiab lawv yuav poob mus rau hauv tus kwj uas lawv tau khawb cuab tus Tswv cov neeg. Thiab txhua leej txhua tus uas ntaus tawm tsam Xi-oos puav leej yuav raug puas tsuaj mus, thiab tus niam ntiav loj ntawd, tus uas tau coj tus Tswv tej kev ncaj mus rau qhov tsis zoo, muaj tseeb tiag, lub koom txoos muaj zog thiab txaus ntxub ntawd, yuav raug nphau mus rau hauv tej plua tshauv thiab qhov uas puas tsuaj ntawd yuav yog ib qhov uas zoo kawg nkaus.

15 Vim saib seb, tus yaj saub tau hais tias, lub caij nyoog yuav los nrawm kawg thaum ntawd Ntxwg Nyoog yuav tsis muaj hwj chim ntxias tau noob neej tej siab tej ntsws li lawm; vim lub sij hawm yuav los txog sai uas txhua txhia leej uas tsis txo hwj chim thiab lawv cov uas ua phem yuav raug kub hnyiab yam li tej quav nyab npleg; thiab thaum hnub ntawd los txog lawv yuav tsum raug kub hnyiab mus.

16 Vim lub caij nyoog yuav los sai heev Vajtswv yuav npau taws heev kawg nkaus rau noob neej txhua leej txhua tus; vim nws yuav tsis cia cov neeg phem ua kom cov neeg zoo puas tsuaj.

17 Yog li ntawd, txawm tias nws txoj kev npau taws yuav los, nws tseem yuav tsom kwm cov neeg ncaj ncees los ntawm nws lub hwj chim, thiab txawm nws yuav muab hluav taws hlawv kom lawv tej yeeb ncuab puas tsuaj mus los, nws tseem yuav tsom kwm cov neeg ncaj ncees. Yog li ntawd, cov neeg uas ncaj ncees tsis txhob ntshai; vim tus yaj saub tau hais li no, txawm tias yuav muaj hluav taws kub los lawv yeej yuav dim.

18 Saib seb, kuv cov kwv tij es, kuv hais rau nej tias, tej yam xwm no yeej yuav tsum muaj los tsis ntev tom ntej no; muaj tseeb tiag, twb yuav yog ntshav thiab hluav taws, thiab pa hluav taws yuav tsum muaj los; thiab tej no yeej yuav tshwm sim rau saum lub ntiaj teb no ntag; thiab nws yeej yuav muaj los rau noob neej thaum lawv tseem ua neej nyob no yog hais tias lawv tseem yuav ua lawv tej siab tej ntsws tawv qhwb qhawv rau cov neeg Ixayees Tus Dawb Huv.

19 Vim saib seb, cov neeg ncaj ncees yuav tsis raug piam sij; vim lub caij nyoog yeej yuav tsum los tias txhua leej txhua tus cov uas ntaus tawm tsam Xi-oos yeej yuav raug muab txiav tawm mus.

20 Thiab tus Tswv yeej yuav npaj ib txoj hau kev rau nws cov neeg tiag tiag, kom muaj raws li Mauxes cov lus, cov uas nws tau hais, hais tias: Tus Tswv nej tus Vajtswv yuav tsa ib tug yaj saub los rau nej, zoo ib yam li kuv; nws yog tus uas nej yuav hnov tag nrho txhua txhia yam tej uas nws yuav hais rau nej. Thiab yuav tau muaj tias txhua txhia leej uas yuav tsis mloog tus yaj saub ntawd yuav raug muab txiav tawm ntawm cov neeg mus.

21 Thiab nim no kuv, Nifais, tshaj tawm rau nej tias tus yaj saub uas Mauxes tau hais txog no twb yog cov neeg Ixayees Tus Dawb Huv; yog li ntawd, nws yeej yuav txiav txim kom ncaj ncees.

22 Thiab cov neeg ncaj ncees tsis txhob ntshai, vim lawv yog cov uas yuav tsis raug puas tsuaj. Tiam sis twb yog tus dab lub nceeg vaj, uas nws yuav txhim tsa nyob nrog noob neej, yog lub nceeg vaj uas tau raug tsa nyob nrog noob neej uas nyob hauv lub ntiaj teb no—

23 Vim lub sij hawm yuav los sai kawg tias txhua lub koom txoos uas tau txhim tsa kom nplua nuj, thiab txhua txhia leej uas tau txhim tsa kom lawv muaj hwj chim los kav lwm tus, thiab cov uas tau txhim tsa kom lawv rais los mus ua ib cov neeg muaj suab muaj npe rau tej qhov muag hauv lub ntiaj teb no, thiab cov neeg uas nrhiav tej uas lub cev ntshaw thiab nrhiav khoom ntawm kev ntiaj teb, thiab cov uas ua txhua txhia yam kev phem kev qias; muaj tseeb tiag, qhov tiag mas, txhua tus cov uas nyob hauv tus dab txoj kev kav yog cov uas yuav tsum ntshai, thiab ceeb, thiab tshee; lawv yog cov uas yuav tsum txo lawv tej hwj chim kom qis rau hauv av; lawv yog cov uas yuav tsum muab hlawv zoo li tej quav nyab npleg; thiab qhov no yog raws li tus yaj saub tej lus.

24 Thiab lub caij nyoog yuav los sai kawg nkaus thaum uas cov neeg ncaj ncees yuav raug saib xyuas zoo npaum li tej me nyuam nyuj uas kaw hauv tej nkuaj nyug, thiab cov neeg Ixayees Tus Dawb Huv yuav los kav teb kav chaw, muaj dag muaj zog, thiab muaj hwj chim zis, thiab muaj yeeb koob loj kawg li.

25 Thiab nws yuav sau nws co me nyuam uas nyob thoob plaws hauv plaub ceg kaum ntuj los ua ke; thiab nws suav nws cov yaj, thiab lawv paub nws; thiab thaum ntawd yuav ua ib pab yaj koom ib tug tswv yug yaj lawm xwb; thiab nws yuav pub nws pab yaj, thiab lawv yuav nrhiav tau zaub noj nyob hauv nws.

26 Thiab vim yog tej kev ncaj ncees ntawm nws haiv neeg, Ntxwg Nyoog yuav tsis muaj hwj chim; yog li ntawd, nws yuav raug khi tsis tso li mus ntau niaj ntev xyoo; vim nws yuav tsis muaj hwj chim uas yuav ntxias tau neeg tej siab tej ntsws, vim lawv ua neej nyob hauv txoj kev ncaj ncees, thiab cov neeg Ixayees Tus Dawb Huv yog tus los tswj hwm kav lawv.

27 Thiab nim no saib seb, kuv, Nifais, hais rau nej tias txhua txhia yam no yeej yuav muaj los raws li sab cev nqaij daim tawv.

28 Tiam sis, saib seb, txhua haiv neeg, txhua xeem neeg, txhua yam lus, thiab tej tib neeg sawv daws yuav nyob kaj siab lug hauv cov neeg Ixayees Tus Dawb Huv yog hais tias lawv yuav hloov siab lees txim.

29 Thiab nim no kuv, Nifais, tseg tsis sau lawm; vim ntshai kuv yuav tsis hais ntsig txog tej yam no mus ntxiv lawm.

30 Yog li ntawd, kuv cov kwv tij es, kuv xav kom nej paub tias tej yam xwm uas tau muab sau rau saum cov phiaj toog yeej muaj tseeb tiag; thiab lawv ua tim khawv tias ib tug neeg yuav tsum ua raws li Vajtswv tej lus txib.

31 Yog li ntawd, nej tsis txhob xav hais tias tsuas yog kuv thiab kuv txiv wb thiaj yog ob tug uas tau ua tim khawv lawm xwb, thiab yog ob tug uas tau qhia cov no lawm xwb. Yog li ntawd, yog hais tias nej yuav ua raws li tej lus txib, thiab nyiaj kom mus txog thaum kawg, ces hnub kawg nej yeej yuav dim xwb. Thiab txhua yam yeej muaj li ntawd tiag. Amees.