1 Ut anajwan kik’ulman naq chirix naq laa’in, aj Nefi, kinye li na’leb’ a’in li tz’iib’anb’il chiruheb’ li ^aperel ch’iich’ bronce, eb’ li was ke’chal wik’in ut ke’xye we: K’a’ru xyaalal li na’leb’ a’in xaye? K’e reetal, ma natawman ru jo’ chanru li na’leb’ re li musiq’ej, li taak’ulmanq jo’ chanru li musiq’ej, ut moko tz’ejwalej ta?

2 Ut laa’in, aj Nefi, kinye reheb’: K’ehomaq reetal, ^akik’utb’esiik chiru li profeet rik’in xyaab’ xkux li ^bMusiq’ej; xb’aan naq xb’aan li Musiq’ej nak’ehe’ chinawmank chixjunil li k’a’aq re ru chiruheb’ li ^cprofeet, li taachalq sa’ xb’eeneb’ li ralal xk’ajoleb’ li winq jo’ chanru li tz’ejwalej.

3 Jo’kan ut, li na’leb’ xinye li tz’iib’anb’il, a’aneb’ li na’leb’ chirix li k’a’aq re ru ^are li yu’am a’in jo’ ajwi’ re li musiq’ej; xb’aan naq nak’utun naq lix junkab’al laj Israel, maare sa’ junpaat maare moqon, ^btaajek’imanq chiru chixjunil lix b’een li ruchich’och’, ut jo’kan ajwi’ sa’ xyanqeb’ chixjunil li tenamit.

4 Ut k’ehomaq reetal, wankeb’ naab’al li ak sachenaqeb’ sa’ xna’leb’eb’ li ani wankeb’ chaq Jerusalen. Relik chi yaal, lix k’ihaleb’ li ^ajar teepal ak ^bxe’k’ame’ chi najt; ut jek’inb’ileb’ yalaq b’ar sa’eb’ li ^cch’och’ sa’ xyi li palaw; ut maa’ani qe nanawok re b’ar wankeb’ chaq, ka’ajwi’ naqanaw naq k’amb’ileb’ chi najt.

5 Ut xb’aan naq k’amb’ileb’ chaq, xch’olob’aman li na’leb’ a’in jo’ profeetil aatin chirixeb’, ut chirixeb’ ajwi’ chixjunil li toj te’jek’iiq ut te’sache’q xna’leb’, sa’ xk’ab’a’ lix Santil Dios laj Israel; xb’aan naq chirix A’an te’xkawob’resi li raameb’, jo’kan naq te’jek’iiq sa’ xyanqeb’ chixjunil li tenamit ut ^axik’ te’ile’q xb’aaneb’ chixjunil li winq.

6 A’b’anan, chirix naq ^axe’ch’olaniik xb’aaneb’ laj ^bGentil, ut li Qaawa’ ak xtaqsi chaq li ruq’ sa’ xb’eeneb’ laj Gentil ut xxaqab’eb’ choq’ eetalil, ut eb’ lix ^ckok’al ak xe’k’ame’ sa’eb’ li ruq’, ut eb’ lix rab’in sa’ xb’eeneb’ lix tel, k’ehomaq reetal li na’leb’ a’in li aatinanb’il wi’, a’an re li yu’am a’in; xb’aan naq jo’ka’in lix sumwank li Qaawa’ rik’ineb’ li qayuwa’, ut naraj naxye laa’o sa’ li kutan toj taachalq, ut jo’kaneb’ ajwi’ chixjunil li qas qiitz’in xkomoneb’ lix junkab’al laj Israel.

7 Ut naraj naxye naq taachalq xkutankil naq chirix naq chixjunil lix junkab’al laj Israel ak xe’jek’iik ut xe’sache’ xna’leb’, naq li Qaawa’ Dios tixwaklesi jun li tenamit kaw xmetz’ew sa’ xyanqeb’ laj ^aGentil, relik chi yaal, chiru ajwi’ lix b’een li ch’och’ a’in, ut xb’aaneb’ a’an ^bte’jek’iiq li qiyajil.

8 Ut chirix naq jek’inb’ileb’ li qiyajil, li Qaawa’ Dios taa’ok chixb’aanunkil jun li ^asachb’a-ch’oolejil k’anjel sa’ xyanqeb’ laj ^bGentil, li nimaq ^cxloq’al choq’ reheb’ li qiyajil, jo’kan naq yeeb’il naq chanchan naq te’ch’olaniiq xb’aaneb’ laj Gentil, ut te’k’ameq’ sa’ li ruq’eb’ ut sa’ xb’eeneb’ xtel.

9 Ut nimaq ajwi’ ^axloq’al choq’ reheb’ laj Gentil; ut moko ka’aj ta wi’ choq’ reheb’ laj Gentil, ^breheb’ b’an chixjunil lix ^cjunkab’al laj Israel, re xk’eeb’al chi nawmank lix ^dsumwank lix Yuwa’il li choxa choq’ re laj Abraham, naq kixye: Sa’ laa ^ewiyajil ^fte’osob’tesiiq chixjunil li junkab’al re li ruchich’och’.

10 Ut tinwaj raj, ex was wiitz’in, naq teenaw naq ink’a’ neke’ru chi osob’tesiik chixjunil li junkab’al re li ruchich’och’ wi a’an ink’a’ ^atixt’usub’ lix tel sa’ rilob’aaleb’ chixjunil li tenamit.

11 Jo’kan naq li Qaawa’ Dios taa’ok chixt’usb’al lix tel sa’ rilob’aaleb’ chixjunil li tenamit, sa’ xtz’aqob’resinkileb’ ru lix sumwank ut lix evangelio choq’ reheb’ lix komoneb’ lix junkab’al laj Israel.

12 Jo’kan naq taarisiheb’ wi’ chaq chik chi preexil, ut ^ate’ch’utub’aaq sa’ junajil sa’ xch’och’il li reechanihomeb’; ut te’isiiq chaq sa’ aak’ab’ ut sa’ ^bq’ojyin, ut te’xnaw naq li ^cQaawa’ a’an laj ^dKolol reheb’ ut laj Tojol rixeb’, li ^eKaw Xmetz’ew re laj Israel.

13 Ut lix kik’el li nimla ^atz’eqb’eetal iglees a’an, laj yumb’eet re chixjunil li ruchich’och’, taasutq’iiq sa’ xb’een xjolomeb’ a’an; xb’aan naq eb’ a’an te’wanq sa’ ^bpleet chirib’ileb’ rib’, ut li yok’leb’ ch’iich’ sa’ ^ctz’aqal li ruq’eb’ taat’ane’q sa’ xb’een tz’aqal lix jolomeb’, ut te’kalaaq rik’in tz’aqal lix kik’eleb’.

14 Ut li junjunq chi ^atenamit li taapleetinq aawe, at xjunkab’al laj Israel, taasutq’isiiq chi pleetik li jun rik’in li jun chik, ut ^bte’t’ane’q sa’ li jul li ke’xb’ek chaq re xra’alenkil lix tenamit li Qaawa’. Ut chixjunileb’ li ^cneke’pleetink re Sion te’sache’q, ut li nimla aj yumb’eet a’an, li xpo’ok ruheb’ lix tiikil b’e li Qaawa’, relik chi yaal, li nimla tz’eqb’eetal iglees a’an, taa’uq’e’q chi ^dpoqs, ut nimaq lix t’anlijik.

15 Xb’aan naq k’ehomaq reetal, chan li profeet, chi seeb’ taachalq xq’ehil naq laj Satanas maak’a’aq chik xwankil sa’ xb’een lix ch’ooleb’ li ralal xk’ajoleb’ li winq; xb’aan naq chi seeb’ taachalq xkutankil naq chixjunileb’ laj q’etq’et ut li neke’b’aanunk re li maa’usilal te’wanq jo’ ^aroq waj; ut taachalq xkutankil naq tento ^bte’k’ate’q.

16 Xb’aan naq chi seeb’ taachalq xq’ehil naq lix tz’aqalil lix ^ajosq’il li Dios taahoymanq sa’ xb’een chixjunileb’ li ralal xk’ajoleb’ li winq; xb’aan naq a’an ink’a’ tixkanab’ naq eb’ laj maak te’xsacheb’ li tiikeb’ xch’ool.

17 Jo’kan ut, a’an ^atixkoleb’ rix li ^btiikeb’ xch’ool rik’in lix wankilal, us ta taa’aje’q naq taachalq xtz’aqalil lix josq’il, ut naq te’kole’q rix li tiikeb’ xch’ool, rik’in ajwi’ lix sachlijikeb’ li xik’ neke’ilok reheb’ rik’in xam. Jo’kan naq maak’a’ rajb’al naq te’xuwaq li tiikeb’ xch’ool, xb’aan naq jo’ka’in naxye li profeet, te’kole’q, us ta taa’uxmanq jo’ rik’in xam.

18 K’ehomaq reetal, ex was wiitz’in, ninye eere naq tento taachalq chi seeb’ li k’a’aq re ru a’in; relik chi yaal, li kik’, ut li xam, ut xb’ook li sib’ tento taachalq; ut tento taawanq chiru lix b’een li ruchich’och’ a’in; ut taachalq sa’ xb’eeneb’ li winq jo’ chanru li tz’ejwalej wi taa’uxq naq te’xkawob’resi li raameb’ chirix lix Santil Dios laj Israel.

19 Xb’aan naq k’ehomaq reetal, li tiikeb’ xch’ool ink’a’ te’oso’q, xb’aan naq tento taachalq chi yaal xq’ehil naq chixjunileb’ li neke’pleetink re Sion te’isiiq chaq.

20 Ut li Qaawa’ tixkawresi chi yaal jun li b’e choq’ re lix tenamit, choq’ re xtz’aqob’resinkil ru li raatin laj Moises li ki’aatinak wi’, naq kixye: Jun li ^aprofeet li Qaawa’ lee Dios tixwaklesi choq’ eere, chanchanin laa’in; a’an teerab’i sa’ chixjunil li k’a’aq re ru li b’arwan tixye eere. Ut taak’ulmanq naq chixjunileb’ li ink’a’ te’ab’inq re li profeet a’an ^bte’isiiq chaq sa’ xyanq li tenamit.

21 Ut anajwan laa’in, aj Nefi, ninch’olob’ cheru, naq li ^aprofeet a’in li ki’aatinak wi’ laj Moises a’an lix Santil Dios laj Israel; jo’kan ut, a’an tixk’anjela li ^braqb’a-aatin sa’ tiikilal.

22 Ut eb’ li tiikeb’ xch’ool moko aajel ta naq te’xuwaq, xb’aan naq a’aneb’ li ink’a’ te’sache’q xna’leb’. A’b’anan, a’an li rawa’b’ejihom laj tza, li waklesinb’ilaq sa’ xyanqeb’ li ralal xk’ajoleb’ li winq, ut li awa’b’ejihom a’an xaqab’anb’il sa’ xyanqeb’ li wankeb’ sa’ li tz’ejwalej—

23 Xb’aan naq chi seeb’ taachalq xq’ehil naq chixjunileb’ li ^aiglees li waklesinb’ileb’ re xk’ulb’al xtumineb’, ut chixjunileb’ li waklesinb’ileb’ re xtawb’al xwankil sa’ xb’een li tz’ejwalej, ut eb’ li waklesinb’ileb’ re naq ^bte’rahe’q sa’ rilob’aal li ruchich’och’, ut eb’ li neke’sik’ok re li ratawom li tz’ejwalej ut li k’a’aq re ru re li ruchich’och’, ut xb’aanunkil li jar paay chi maa’usilal; relik chi yaal ut, chixjunileb’ li xkomoneb’ li rawa’b’ejihom laj tza a’aneb’ li wan rajb’al naq te’xuwaq, ut te’siksotq, ut ^cte’chiq’chotq; a’aneb’ a’an li tento te’kub’siiq taq’a sa’ li poqs; a’aneb’ a’an li tento ^dte’oso’q jo’ li roq waj; ut a’in jo’ chanru li raatin li profeet.

24 Ut chi seeb’ taachalq xq’ehil naq te’k’ame’q xb’e li tiikeb’ xch’ool jo’eb’ li ^akok’ wakax sa’ xhilob’aaleb’ li wakax, ut lix Santil Dios laj Israel tento taa’awa’b’ejinq rik’in awa’b’ejil, ut kawil metz’ew, ut wankilal, ut nimla loq’alil.

25 Ut a’an ^anaxch’utub’eb’ chaq li ralal xk’ajol chalen chaq sa’ xkaajachalil li ruchich’och’; ut naxk’eheb’ sa’ ajl lix karneer, ut eb’ a’an neke’xnaw ru; ut jun korral naq taawanq, ut junaq aj ^bIlol Karneer; ut a’an tixch’olaniheb’ lix karneer, ut rik’in a’an te’xtaw ^cxtzakemq.

26 Ut sa’ xk’ab’a’ lix tiikilaleb’ xch’ool lix tenamit, laj ^aSatanas maak’a’ xwankil, jo’kan naq ink’a’ naru chi ach’ab’aak chiru xnumik ^bnaab’al chihab’; xb’aan naq maak’a’ xwankil sa’ xb’een lix ch’ooleb’ li tenamit, xb’aan naq neke’wan sa’ tiikilal, ut lix Santil Dios laj Israel ^cna’awa’b’ejin.

27 Ut anajwan k’ehomaq reetal, laa’in, aj Nefi, ninye eere naq chixjunil li k’a’aq re ru a’in tento taachalq jo’ chanru li tz’ejwalej.

28 A’ut k’ehomaq reetal, chixjunileb’ li tenamit, junkab’al, aatinob’aal ut teepal te’wanq sa’ xyaalal rik’in lix Santil Dios laj Israel wi taa’uxq naq ^ate’xjal xk’a’uxl.

29 Ut anajwan laa’in, aj Nefi, nink’e xraqik; xb’aan naq toj maji’ nachal inch’ool aatinak chik chirix li k’a’aq re ru a’in.

30 Jo’kan ut, ex was wiitz’in, nawaj naq teek’oxla chirix naq yaal li k’a’aq re ru li tz’iib’anb’il chiruheb’ li ^aperel ch’iich’ bronce; ut neke’xch’olob’ xyaalal naq jun li winq tento taa’ab’inq chiruheb’ lix taqlahom li Dios.

31 Jo’kan ut, moko na’aje’ ta naq teek’oxla naq laa’in ut lin yuwa’ qajunes kiqach’olob’ xyaalaleb’, ut jo’kan ajwi’ kiqak’uteb’. Jo’kan ut, wi tex’ab’inq chiruheb’ li ^ataqlahom, ut texkuyuq toj sa’ roso’jik, texkole’q sa’ roso’jik li kutan. Ut chi jo’kan wan. Amen.