1 Thiab tau muaj tias peb tau rov qab tsiv mus hauv roob moj sab qhua; thiab peb tau mus ze rau sab hnub tuaj txij li lub sij hawm ntawd mus. Thiab peb tau mus thiab tau ntsib ntau yam kev kub ntxhov nyob rau hauv roob moj sab qhua; thiab peb tej poj niam tau tu me nyuam nyob rau hauv roob moj sab qhua.

2 Thiab tus Tswv tau foom koob hmoov ntau kawg nkaus rau peb, txawm yog thaum peb nyob tom roob moj sab qhua es peb noj nqaij nyoos xwb los, peb cov poj niam tseem muaj mis txaus rau lawv cov me nyuam noj thiab, thiab muaj zog, muaj tseeb tiag, ib yam li cov txiv neej; thiab lawv tau pib uv taus lawv tej kev tsiv tsis yws lawm.

3 Thiab xws li no peb pom tias Vajtswv tej lus txib yeej yuav tsum muaj tiav. Thiab yog hais tias noob neej coj Vajtswv tej lus txib, nws thiaj yuav pub lawv noj, thiab txhawb lawv lub dag lub zog, thiab txhawb lawv tej cuab yeej rau lawv kom lawv yuav ua tau tiav tej yam uas nws tau txib lawv ua lawm; yog li ntawd, nws thiaj tau muab tej cuab yeej rau peb thaum uas peb tseem nyob rau hauv roob moj sab qhua.

4 Thiab peb tau nyob tau ntau xyoo, muaj tseeb tiag, nyob tau yim xyoo diam rau hauv roob moj sab qhua.

5 Thiab peb tau los txog thaj av uas peb tau hu ua Huaj Vam, vim qhov ntawd muaj txiv hmab txiv ntoo ntau thiab kuj muaj zib ntab qus; thiab ib puas tsav yam no yog tus Tswv tau npaj los xwv kom peb txhob piam sij. Thiab peb tau pom dej hiav txwv, cov uas peb hu ua Ile-atus, qhov uas txhais hais tias yog cov dej ntau.

6 Thiab tau muaj tias peb tau tsa peb cov tsev pheeb suab ntaub nyob ntawm ntug dej hiav txwv; thiab txawm li ntawd los peb tseem tau raug ntau yam kev kub ntxhov thiab ntau yam kev nyuaj siab, muaj tseeb tiag, twb muaj ntau yam kawg nkaus uas peb tsis muaj peev xwm sau tau tas, tiam sis peb tau zoo siab kawg nkaus thaum uas peb tau los txog ntawm ntug dej hiav txwv; thiab peb tau hu qhov chaw ua Huaj Vam, vim rau qhov muaj txiv hmab txiv ntoo ntau heev.

7 Thiab tau muaj tias tom qab uas kuv, Nifais, tau los nyob rau hauv thaj av Huaj Vam tau ntau hnub lawm, tus Tswv lub suab tau los hais rau kuv hais tias: Sawv thiab koj cia li nce mus lawm pem roob. Thiab tau muaj tias kuv tau sawv thiab tau mus rau pem roob, thiab tau tsa ncauj thov tus Tswv.

8 Thiab tau muaj tias tus Tswv tau hais rau kuv, hais tias: Koj yuav tsum txua ib lub nkoj, raws li txoj kev uas kuv tseem yuav qhia rau koj no, xwv kom kuv yuav thauj tau koj cov neeg hla cov dej no mus.

9 Thiab kuv tau teb hais tias: Tus tswv, kuv yuav mus qhov twg es kuv thiaj yuav nrhiav tau hlau coj los nchuav, xwv kom kuv yuav ua tau twj tes los txua lub nkoj raws li txoj kev uas koj tau piav rau kuv?

10 Thiab tau muaj tias tus Tswv tau qhia rau kuv qhov chaw uas kuv yuav mus nrhiav tau hlau, xwv kom kuv yuav ua tau tej twj tes.

11 Thiab tau muaj tias kuv, Nifais, txawm tau ua ib lub foob xab coj los tshuab hluav taws, uas yog tawv tsiaj qus; thiab tom qab uas kuv tau ua ib lub foob xab, xwv kom kuv muaj ib yam coj los tshuab hluav taws lawm, kuv tau txhuam ob lub pob zeb ua ke xwv kom kuv ua tau hluav taws.

12 Vim tus Tswv tsis tau cia peb rauv hluav taws ntau, thaum uas peb tseem tsiv nyob rau tom roob moj sab qhua; vim nws hais tias: Kuv yuav ua kom nej tej nqaij noj qab zib, xwv nej thiaj tsis tau muab nws ua noj;

13 Thiab kuv kuj yuav ua nej lub teeb nyob rau tom roob moj sab qhua; thiab kuv yuav npaj txoj hau kev ua nej ntej, yog hais tias nej yuav coj raws li kuv tej lus txib; yog li ntawd, npaum tias nej yuav ua raws li kuv tej kev txib nej yuav raug coj mus rau thaj av uas tau cog lus cia lawm; thiab nej yuav paub tias kuv yog tus uas coj nej kev.

14 Muaj tseeb tiag, tus Tswv kuj tau hais tias: Tom qab uas nej tau mus txog thaj av uas tau cog lus cia lawm, nej yuav paub tias kuv, tus Tswv, yog Vajtswv; thiab hais tias kuv, tus Tswv, yeej tau cawm nej dim ntawm txoj kev puas tsuaj; muaj tseeb tiag, hais tias kuv tau coj nej tawm ntawm lub nroog Yeluxalees.

15 Yog li ntawd, kuv, Nifais tau ua tag zog coj raws li tus Tswv tej lus txib, thiab kuv tau ntuas kuv cov tij laug rau txoj kev ntseeg thiab kev mob siab ua zoo.

16 Thiab tau muaj tias kuv tau muab cov hlau uas kuv tau nchuav tawm ntawm tej pob zeb los ua tej twj tes.

17 Thiab thaum kuv ob tug tij laug tau pom tias kuv tau npaj yuav txua ib lub nkoj, nkawd tau pib yws yws kuv, hais tias: Wb tus kwv yog ib tug neeg vwm, vim nws xav tias nws yuav muaj peev xwm txua tau ib lub nkoj, muaj tseeb tiag, nws kuj xav tias nws yuav muaj peev xwm hla tau cov niag dej loj no thiab.

18 Thiab kuv ob tug tij laug tau yws kuv li no, thiab xav tias nkawd yuav tsis ua hauj lwm, vim nkawd tsis tau ntseeg tias kuv yuav txua tau ib lub nkoj; nkawd kuj tsis ntseeg tias tus Tswv tau txib kuv ua thiab.

19 Thiab nim no tau muaj tias kuv, Nifais, tau tu siab heev vim yog nkawd tej kev siab tawv; thiab nim no thaum nkawd tau pom tias kuv tau pib tu siab nkawd txawm tau zoo siab, npaum tias nkawd tau thuam kuv, hais tias: Wb paub tias koj txua tsis tau ib lub nkoj, vim wb paub tias koj tsis muaj tswv yim; yog li ntawd koj yuav tsis muaj peev xwm ua kom ib txog hauj lwm loj npaum ntawd tiav taus.

20 Thiab koj ces zoo nkaus li peb txiv thiab ntag, tau yuam kev ua raws li nws lub siab vwm xwb; muaj tseeb tiag, nws tau coj peb tawm ntawm lub nroog Yeluxalees, thiab peb tau ua loj leeb nyob rau hauv roob moj sab qhua tau ntau xyoo li no; thiab peb cov poj niam tseem tau raug ua hauj lwm hnyav heev, thaum xeeb me nyuam loj; thiab lawv tau tu me nyuam nyob rau tom roob moj sab qhua thiab raug ib puas tsav yam mob, tsuas yog tsis tuag xwb; thiab nws yuav zoo dua yog lawv tau tuag ua ntej lawv khiav tawm ntawm Yeluxalees es los raug kev kub ntxhov zoo li no.

21 Saib seb, peb tau raug txom nyem ntau npaum li no xyoo nyob rau hauv roob moj sab qhua, yog peb txhob tuaj ntshe lub sij hawm ntawd peb twb tau zoo nyob siv tej uas peb muaj thiab peb thaj av uas yog peb qub txeeg qub teg; muaj tseeb tiag, thiab ntshe peb twb tau muaj kev zoo siab lug lawm los pob.

22 Thiab peb paub tias cov tib neeg uas nyob hauv lub nroog Yeluxalees yog ib cov tib neeg ncaj ncees; vim lawv tau coj tus Tswv tej lus txib thiab tej txiav txim ntawm tus Tswv, thiab tag nrho nws cov lus txib, raws li Mauxes txoj kev cai: yog li ntawd, peb thiaj paub tias lawv yog tib neeg ncaj; thiab peb txiv tau txiav txim rau lawv, thiab tau coj peb tawm khiav vim tias peb pheej mloog nws tej lus; muaj tseeb tiag, thiab peb tus kwv los zoo ib yam li nws thiab. Thiab kuv ob tug tij laugtau siv cov lus zoo li no yws yws thiab nkaug tawm tsam wb.

23 Thiab tau muaj tias kuv, Nifais, tau hais rau nkawd, hais tias: Neb puas ntseeg tias peb cov yawg koob cov uas yog Ixayees tej me nyuam, puas yuav raug coj tawm ntawm cov neeg Iyiv tes yog lawv tsis tau mloog tus Tswv tej lus?

24 Muaj tseeb tiag, neb puas xav tias lawv yuav raug coj tawm tau ntawm txoj kev ua luag tauj luag qhev, yog hais tias tus Tswv tsis tau txib Mauxes kom nws yuav tsum coj lawv dim tawm ntawm txoj kev ua luag tauj luag qhev?

25 Nim no neb paub tias cov neeg Ixayees tau raug ua luag tauj luag qhev; thiab neb paub tias lawv tau raug ris nra, cov nra uas hnyav heev; yog li ntawd, neb paub tias nws yog ib yam zoo rau lawv, uas lawv tau raug coj tawm ntawm txoj kev ua luag tauj luag qhev mus.

26 Nim no neb paub tias tus Tswv tau txib Mauxes ua txoj hauj lwm tseem ceeb ntawd; thiab neb paub tias los ntawm nws cov lus cov dej ntawm tus Dej Hiav Txwv Liab tau raug faib rau sab ped sab nrad, thiab lawv tau hla dhau mus saum av qhuav.

27 Tiam sis neb twb paub tias cov neeg Iyiv tau poob tuag rau hauv Dej Hiav Txwv Liab, cov uas yog Falaus cov tub rog.

28 Thiab neb twb paub tias tus Tswv tau muab manas rau lawv noj nyob rau hauv roob moj sab qhua thiab.

29 Muaj tseeb tiag, thiab neb twb paub tias Mauxes, los ntawm nws cov lus raws Vajtswv lub hwj chim uas muaj nyob hauv nws, thiaj tau ntaus lub pob zeb, ces dej txawm txhawv tawm los, xwv kom cov neeg Ixayees tau haus daws lawv txoj kev nqhis dej.

30 Thiab txawm tias lawv tau raug coj, tus Tswv lawv tus Vajtswv, lawv tus Txhiv Dim, tseem mus ua lawv ntej thiab, tseem coj lawv mus nruab hnub, thiab ua lub teeb ci rau lawv thaum hmo ntuj, thiab ua ib puas tsav yam uas tsim nyog ib tug neeg yuav tsum tau txais rau lawv, tiam sis lawv tseem tau ua lawv tej siab tawv qhwb qhawv thiab tau npog lawv tej cim xeeb, thiab lawv tseem tau cem Mauxes thiab cem rau Vajtswv tus uas tseeb thiab tus uas tseem muaj txoj sia nyob.

31 Thiab tau muaj tias raws nraim li nws txoj lus nws tau ua kom lawv puas tsuaj; thiab raws nraim li nws txoj lus nws tseem tau coj lawv; thiab raws nraim li nws txoj lus nws tau ua ib puas tsav yam pab lawv; thiab yeej tsis muaj ib yam dab tsi yuav ua tau li tsuas yog los ntawm nws txoj lus xwb.

32 Thiab tom qab uas lawv tau hla tus dej Yauladees nws tau ua kom lawv muaj zog xwv lawv thiaj raws tau cov neeg ntawm lub teb chaws ntawd tawm mus, muaj tseeb tiag, kom muab lawv caum ua ri niab rau txoj kev puas tsuaj.

33 Thiab nim no, neb puas xav tias cov neeg uas nyob lub teb chaws ntawd, cov uas tau nyob hauv thaj av uas tau cog lus cia lawm, cov uas raug peb cov poj koob yawm txwv ntiab caum khiav, neb puas xav tias lawv yog neeg ncaj ncees? Saib seb, kuv hais rau neb tias, lawv tsis yog.

34 Neb puas xav tias peb cov poj koob yawm txwv puas yuav tseem ceeb dua li lawv yog hais tias lawv tau ua neeg ncaj ncees? Kuv hais rau neb tias, tsis yog.

35 Saib seb, tus Tswv saib txhua leej txhua tus muaj nqis ib yam nkaus; tus uas ho yog neeg ncaj ncees tus ntawd yog tus uas Vajtswv nyiam. Tiam sis saib seb, cov neeg no tau tsis kam txais yuav Vajtswv txhua txhia lo lus, thiab lawv tau siav nyob hauv txoj kev tsis ncaj ncees; thiab Vajtswv txoj kev npau taws tag nrho huv si tau nyob rau saum lawv; thiab tus Tswv tau foom tsis zoo rau thaj av ntawd rau lawv, thiab foom koob hmoov rau nws pub rau peb cov poj koob yawm txwv; muaj tseeb tiag, nws tau foom tsis zoo rau lub teb chaws rau lawv kom lawv puas tsuaj, thiab nws tau foom koob hmoov rau lub teb chaws pub rau peb cov poj koob yawm txwv kom lawv muaj hwj chim kov yeej lub teb chaws ntawd.

36 Saib seb, tus Tswv tau tsim lub ntiaj teb xwv kom tib neeg tau nyob; thiab nws tau tsim nws cov me nyuam xwv kom lawv tau lub ntiaj teb no.

37 Thiab nws yuav txhawb tsa ib haiv neeg ncaj ncees, thiab ua kom cov neeg phem puas tsuaj mus.

38 Thiab nws coj cov neeg ncaj ncees mus rau hauv tej thaj av uas muaj nqis, thiab nws tau ua kom cov neeg phem puas tsuaj, thiab foom tsis zoo rau tej thaj av rau lawv vim lawv txoj kev phem.

39 Nws kav nyob siab puag saum ntuj ceeb tsheej, vim qhov ntawd yog nws lub rooj zaum, thiab lub ntiaj teb no yog nws lub rooj tiag taw.

40 Thiab nws hlub cov uas xav tau nws los ua lawv tus Vajtswv. Saib seb, nws tau hlub peb cov poj koob yawm txwv, thiab nws tau khi lus rau lawv, muaj tseeb tiag, twb tau khi rau Anplaham, Ixaj, thiab Yakhauj; thiab nws tseem nco txog cov lus uas nws tau khi tseg lawm; yog li ntawd, nws thiaj tau coj lawv tawm dim ntawm lub teb chaws Iyiv los.

41 Thiab nws tau muab nws rab nplawm qhuab lawv nyob rau tom roob moj sab qhua; vim lawv tej siab tau tawv qhwb qhawv, tib yam li neb; thiab tus Tswv tau qhuab lawv vim lawv txoj kev tsis ncaj ncees. Nws tau tso cov nab tsiv tsaim uas ya tau tuaj rau lawv; thiab tom qab uas lawv tau raug tom lawm nws twb npaj ib txog kev los kho kom lawv zoo; thiab qhov uas lawv yuav tsum ua yog muab lub qhov muag los ntsia xwb; thiab vim txoj kev ntawd yooj yim heev, los sis tias nws tsis nyuaj, thiaj tau muaj coob leej tau piam sij.

42 Thiab lawv tau ua lawv tej siab tawv ib ntus dhau ib ntus, thiab lawv tau cem Mauxes, thiab kuj tau cem Vajtswv thiab; tiam sis, neb paub tias lawv twb tau raug coj tawm los ntawm nws lub hwj chim uas piv tsis tau mus rau thaj av uas tau cog lus cia lawm.

43 Thiab nim no, tom qab ib puas yam tsav no, lub sij hawm tau los es lawv tau rais los ua ib cov neeg phem, muaj tseeb tiag, ze rau qhov yuav siav lawm; thiab kuv tsis paub tiam sis niaj hnub nim no lawv twb yuav raug puas tsuaj mus; vim kuv paub tias hnub ntawd yeej yuav los tiag kom lawv yuav tsum raug puas tsuaj, es tsuas tshuav ob peb leeg xwb, cov uas yuav raug coj mus ua qhev.

44 Yog li ntawd, tus Tswv thiaj tau kom kuv txiv khiav tawm mus rau hauv roob moj sab qhua; thiab cov Neeg Yudais kuj tau nrhiav yuav muab nws txoj sia txo pov tseg, muaj tseeb tiag, thiab neb los kuj tau nrhiav yuav muab nws txoj sia txo pov tseg thiab; yog li ntawd, neb yog neeg tua neeg nyob hauv neb tej siab thiab neb zoo li lawv.

45 Neb mas nrawm kawg mus ua qhov uas tsis ncaj ncees tiam sis mas nco qeeb kawg txog tus Tswv neb tus Vajtswv. Neb twb tau pom ib tug tim tswv, thiab nws twb tau hais lus rau neb lawm; muaj tseeb tiag, neb twb tau hnov nws lub suab ib lub sij hawm txog ib lub sij hawm thiab nws twb tau maj mam ua suab yau yau hais lus rau neb, tiam sis neb tej siab tsis xeev li, es neb thiaj hnov tsis tau nws cov lus; yog li ntawd, nws thiaj tau hais lus rau neb zoo li suab xob quaj, qhov uas tau ua rau tej av qeeg nkaus li uas yuav faib hlo ua ob sab.

46 Thiab neb kuj paub hais tias los ntawm nws lo lus uas muaj hwj chim loj nws yeej ua tau kom lub ntiaj teb no ploj mus; muaj tseeb tiag, thiab neb twb paub tias los ntawm nws lo lus nws ua tau kom tej chaw siab qis tiaj taus, thiab tej chaw tiaj tus tawg ntsoog ntxaws tau. Au, ces, yog vim li cas tiag, neb tej siab thiaj yuav tawv ua luaj?

47 Saib seb, kuv lub siab twb tawg tag nrog kev nyuaj siab los vim yog neb, thiab mob mob kuv lub siab; kuv ntshai nyob tsam neb yuav raug muab tso pov tseg mus ib txhis li. Saib seb, kuv muaj Vajtswv tus Ntsuj Plig puv npo, kawg tias kuv lub cev tsis muaj zog lawm.

48 Thiab nim no tau muaj tias thaum kuv tau hais cov lus no lawm, nkawd tau npau taws rau kuv, thiab tau xav muab kuv pov rau hauv qab thu dej hiav txwv tob; thiab thaum nkawd tau yuav los tsa tes rau kuv, kuv tau hais rau nkawd, hais tias: Los ntawm Vajtswv tus uas muaj Hwj Chim Loj kawg nkaus lub npe, kuv hais kom neb tsis txhob chwv kuv, vim kuv muaj Vajtswv lub hwj chim puv npo, twb ua rau kuv nqaij tawv kub lug; thiab yog leej twg tsa nws txhais tes rau kuv nws yuav qhuav ib yam li ib tug xyoob rawm qhuav; thiab tus ntawd yuav zoo li tsis muaj dab tsi rau Vajtswv lub hwj chim, vim Vajtswv yuav ua kom nws puas tsuaj.

49 Thiab tau muaj tias kuv, Nifais, tau hais rau nkawd tias nkawd yuav tsum tseg tsis txhob yws yws nkawd txiv lawm; thiab yuav tsum tsis txhob tsis pab kuv ua hauj lwm, vim Vajtswv tau txib kom kuv yuav tsum txua ib lub nkoj.

50 Thiab kuv tau hais rau nkawd tias: Yog Vajtswv tau txib kom kuv ua ib puas tsav yam kuv yeej ua tau xwb. Yog tias nws txib kuv kom kuv hais rau cov dej no tias, cia li ua av, ces cov dej no yeej yuav ua av; thiab yog tias kuv yuav hais li ntawd, ces nws yeej yuav ua li ntawd tiag.

51 Thiab nim no, yog hais tias tus Tswv muaj hwj chim loj npaum li ntawd, thiab tau ua ntau yam txuj ci tseem ceeb rau noob neej, ua li cas nws thiaj yuav tsis muaj peev xwm qhia tau kuv, kom kuv txua tau ib lub nkoj?

52 Thiab tau muaj tias kuv, Nifais, tau hais ntau yam rau kuv ob tug tij laug, kawg tias nkawd tsis paub hais li cas lawm thiab tsis muaj peev xwm cem tau kuv; thiab nkawd kuj tsis kam muab nkawd tej tes tsa rau kuv los sis muab nkawd tej ntiv tes chwv kuv, twb mus txog tau ntau hnub. Nim no nkawd tsis kam ua li no ntshai nyob tsam nkawd yuav qhuav ntawm kuv lub xub ntiag, vim Vajtswv tus Ntsuj Plig muaj hwj chim loj heev li; thiab xws li no nws thiaj tau ua qhia rau nkawd.

53 Thiab tau muaj tias tus Tswv tau hais rau kuv tias: Rov qab xyab koj txhais tes dua rau koj ob tug tij laug, thiab nkawd yuav tsis qhuav ntawm koj lub xub ntiag, tiam sis kuv yuav ua kom nkawd ceeb nkaus, tus Tswv tau hais li ntawd, thiab kuv yuav ua li no, xwv kom nkawd yuav paub tias kuv yog tus Tswv nkawd tus Vajtswv.

54 Thiab tau muaj tias kuv tau xyab kuv txhais tes mus rau kuv ob tug tij laug, thiab nkawd tsis qhuav ntawm kuv lub xub ntiag; tiam sis tus Tswv tau ua rau nkawd tshee hnyo, raws nraim li lo lus uas nws tau hais lawm.

55 Thiab nim no, nkawd tau hais tias: Wb paub tseeb tseeb lawm hais tias tus Tswv nrog koj nyob, vim wb paub tias nws yog tus Tswv lub hwj chim uas tau ua rau wb tshee hnyo. Thiab nkawd tau qhau caug ntua ntawm kuv lub xub ntiag, thiab twb yuav luag pe kuv, tiam sis kuv tsis kheev nkawd ua li, hais tias: Kuv yog neb tus kwv, muaj tseeb tiag, twb yog neb tus kwv yau; yog li ntawd, cia li teev tiam tus Tswv neb tus Vajtswv, thiab hwm neb txiv thiab neb niam, es neb thiaj yuav muaj sia nrog luag ua neej nyob ntev hauv lub teb chaws uas tus Tswv neb tus Vajtswv yuav muab pub rau neb.