1 Ket mapasamakto, a no imdenganto ^adagiti Gentil ti Kordero ti Dios iti dayta nga aldaw a panagpakitananto kadakuada iti balikas, kasta met iti ^bbileg, iti tunggal aramid, ken ti pannakaikkat dagiti ^clappedda—

2 Ket saanda a patangkenen dagiti pusoda a maibusor iti Kordero ti Dios, maibilangdanto kadagiti kaputotan ti amam; wen, ^amaibilangdanto kadagiti balay ti Israel; ket ^bnagasatdanto a tattao iti naikari a daga iti agnanayon; ket saandanton a maiturong iti pannakaadipen; ket saanton a malaokan ti sabali a tattao ti balay ti Israel.

3 Ket dayta nauneg nga ^aabut, a kinali para kadakuada ti nabileg ken makarimon a simbaan, a binangon ti sairo ken dagiti annakna, tapno maiturongna iti impierno dagiti kararua dagiti tattao—wen, dayta nauneg nga abut a nakali a pakadadaelan dagiti tattao ket mapunnonto kadagiti nangkali iti daytoy, nga agbalin a naan-anay a pakadadaelanda, kinuna ti Kordero ti Dios; saan daytoy a pakadadaelan ti kararua, malaksid iti pannakaipuruak daytoy iti ^bimpierno nga awan ti patinggana.

4 Ta kitaen, mayannurot daytoy iti pannakaadipen ti sairo, ken mayannurot pay iti linteg ti Dios, kadagiti agaramid iti kinadakes ken kinaalas kenkuana.

5 Ket napasamak a nagsao ti anghel kaniak, a ni Nephi, a kinunana: Naimatangam a no agbabawi dagiti Gentil nasayaatto kadakuada; ken ammom met ti maipanggep kadagiti katulagan ti Apo iti balay ti Israel; ken nangngegmo met a dagiti saan nga ^aagbabawi nasken a mapukaw.

6 Ngarud, ^akaasinto pay dagiti Gentil no kasta a patangkenenda dagiti pusoda a maibusor iti Kordero ti Dios.

7 Ta umayto ti panawen, kinuna ti Kordero ti Dios, nga agaramidakto iti naindaklan ken ^anakaskasdaaw nga aramid kadagiti annak ti tattao; aramid a mataginayonto, uray aniaman a panirigam—uray pay iti pannakaallukoy kadakuada iti kappia ken ^bagnanayon a biag, wenno iti pannakapabus-oyda iti kinatangken dagiti pusoda ken ti kinabulsek ti pampanunotda a pakaiturongan iti pannakaadipen, ken iti pay pannakadadaelda, pada-pada a temporal ken naespirituan, a mayannurot iti ^cpannakaadipen ti sairo, a nasaokon.

8 Ket napasamak a kalpasan ti panangibaga ti anghel kadagitoy a balikas, kinunana kaniak: Malagipmo kadi dagiti ^akatulagan ti Ama iti balay ti Israel? Kinunak kenkuana, Wen.

9 Ket napasamak a kinunana kaniak: Kitaem, ket imatangam dayta nabileg ken makarimon a simbaan, nga ina dagiti naalas nga aramid, a binangon ti ^asairo.

10 Ket kinunana kaniak: Kitaen, ^adua laeng dagiti simbaan: maysa ti simbaan ti Kordero ti Dios, ken ti ^bsabali isu ti simbaan ti sairo; gapuna, asino man a saan a kameng iti simbaan ti Kordero ti Dios ket kameng dayta nabileg a simbaan, nga ina dagiti makarimon nga aramid; ket isu ti ^cbalangkantis iti amin a daga.

11 Ket napasamak a kimmitaak ket naimatangak ti balangkantis iti amin a daga, ket nakatugaw isuna iti adu a ^adandanum; ket addaan ^bisuna ti turay iti amin a dagdaga, iti amin a pagilian, puli, pagsasao, ken tattao.

12 Ket napasamak a naimatangak ti simbaan ti Kordero ti Dios, ket ti bilang ti kamengna ^abassit, gapu iti kinadakes ken makarimon nga aramid ti balangkantis a nakatugaw iti adu a dandanum; nupay kasta, naimatangak a ti simbaan ti Kordero, nga isu dagiti santo ti Dios, nga addada met iti rabaw ti ^bamin a daga; ket bassit ti masakupanda iti rabaw ti daga, gapu iti kinadakes ti nabileg a balangkantis a nakitak.

13 Ket napasamak a naimatangak a pinagtitipon ti nabileg nga ina dagiti naalas nga aramid dagiti ummong iti rabaw ti amin a dagdaga, iti amin a pagilian dagiti Gentil, a ^amakiranget iti Kordero ti Dios.

14 Ket napasamak a siak, ni Nephi, naimatangak ti bileg ti Kordero ti Dios, a bimmaba kadagiti santo ti simbaan ti Kordero, ken kadagiti natulagan a tao ti Apo, a naiwaraswaras iti rabaw ti amin a daga; ket naarmasanda ti kinalinteg ken addaanda iti nadayag a ^abileg ti Dios.

15 Ket napasamak a naimatangak a ^anaibuyat ti pungtot ti Dios iti dayta nabileg ken makarimon a simbaan, isu nga naaddaan kadagiti gubat ken sayangguseng ti gubgubat kadagiti amin a ^bpagilian ken agkakabagian iti daga.

16 Ket gapu ta nangrugi dagiti ^agubat ken dagiti sayangguseng ti gubgubat kadagiti amin a pagilian a kameng ti ina dagiti kinarimon, nagsao ti anghel kaniak, a kinunana: Kitaen, agpaay ti pungtot ti Dios iti ina dagiti balangkantis; ket kitaen, makitam amin dagitoy a banag—

17 Ket inton dumteng ti ^aaldaw a maibukbok ti ^bpungtot ti Dios iti ina dagiti balangkantis, nga isu ti nabileg ken makarimon a simbaan iti amin a daga, a binangon ti sairo, ket, iti dayta nga aldaw, mangruginto ti ^caramid ti Ama, iti panangisagana iti wagas ti panangipatungpal dagiti ^dkatulaganna, nga inaramidna kadagiti taona iti balay ti Israel.

18 Ket napasamak a nagsao ti anghel kaniak, a kinunana: Kitaen!

19 Ket kimmitaak ket nakitak ti maysa a lalaki, ket nakakawes isuna iti puraw a roba.

20 Ket kinuna ti anghel kaniak: Kitaen ti ^amaysa kadagiti sangapulo ket dua nga apostol ti Kordero.

21 Kitaen, makitananto ken isuratnanto ti natda kadagitoy a banag; wen, ken kasta met dagiti banag a napasamaken.

22 Ken isuratnanto met ti maipanggep iti panungpalan ti lubong.

23 Gapuna, nalinteg ken pudno dagiti banag nga isuratnanto; ket kitaen naisuratda iti ^alibro a naimatangam nga agtaud iti ngiwat ti Hudio; ket iti kanito a nagtaudda iti ngiwat ti Hudio, wenno, iti kanito a nagtaud ti libro iti ngiwat ti Hudio, nalawag ken umiso dagiti banag a naisurat, ken ^bkapatgan ken nalaka a maawatan ti amin a tao.

24 Ken kitaen, dagiti banag nga isuratto daytoy nga ^aapostol ti Kordero ket dagiti banag a nakitamon; ket kitaen, makitamto dagiti natda.

25 Ngem saanmonto nga isurat dagiti makitam pay a sumarsaruno; ta naordenanen ti Apo a Dios ti apostol ti Kordero ti Dios a ^amangisuratto kadagitoy.

26 Ken kasta met kadagiti sabsabali idi, a nangipakita kadakuada dagiti amin a banag, ket naisuratdan dagitoy; ket ^anairikepdan dagitoy tapno mairuardanto nga addaan kinatarnaw, a mayannurot iti kinapudno nga adda iti Kordero, iti naikeddeng a panawen ti Apo, iti balay ti Israel.

27 Ket siak, ni Nephi, nangngegko ken paneknekak a ti nagan ti apostol ti Kordero ket ^aJuan, kas maibatay iti balikas ti anghel.

28 Ket kiaten, siak, ni Nephi, naparitanak a mangisurat iti nabati kadagiti banag a nakitak ken nangngegko; gapuna napnekakon kadagiti banag nga insuratko; ket bassit a paset laeng dagiti banag a nakitak ti insuratko.

29 Ket paneknekak a nakitak dagiti banag a nakita ti ^aamak, ket ti anghel ti Apo ti nangipakaamo dagitoy kaniak.

30 Ket ita gibusakon ti panagsaok iti maipanggep kadagiti banag a nakitak bayat ti panangituray kaniak ti espiritu; ket no saan a naisurat amin dagiti banag a nakitak, dagiti banag nga insuratko ket ^apudno. Ket kastan. Amen.