Pukfel
1 Nifai 11


Sopun 11

Nifai a kuna Ngunun ewe Samon me a pwá non nemasepwi ewe iran manau—A kuna inen ewe Noun Kot me a kaeo usun ewe tekisosonun Kot—A kuna ewe papatais, angangen afanafan, me irapengesinon ewe Namen Kot—A pwan kuna ewe koko me angangen afanafan an ekkewe Engon me Ruemon Aposel noun ewe Nam. Arap ngeni 600–592 Ier Mwen Kraist.

1 Pun non ewe fansoun mwirin ai ua mochen sinei ekkewe mettoch semei we a fen kuna, me ua nuku pwe ewe Samon a tufichin pwarano ngeniei, nupwen ua momot ne ekipwichi non netipei ua ono non emmwenien ewe Ngunun ewe Samon, ewer, ngeni ew chuk mi fokkun tekia, minne use kukkuna me akkom, me minne use mwo aipwatiw pechei won.

2 Iwe ewe Ngun a apasa ngeniei: Nengeni, met ka mochen?

3 Iwe ua apasa: Ua mochen pwe upwe kuna ekkewe mettoch minne semei we a fen kuna.

4 Iwe ewe Ngun a apasa ngeniei: Ka nuku pwe semom we a kuna ewe ira minne i a kapas usun?

5 Iwe ua apasa: Ewer, ka sinei pwe ua nuku meinisin ekkewe kapasen semei we.

6 Iwe nupwen ua apasa ekkei kapas, ewe Ngun a puchor ren neuwomongun mongungu, a apasa: Mwareiti ngeni ewe Samon, ewe Kot mi fokkun tekia; pun i Koten unusen fonufan, ewer, pwan asen mettoch meinisin. Me ka feioch en, Nifai, pokiten ka nuku non Noun ewe Kot mi fokkun tekia; ina minne, kopwe kuna ekkewe mettoch minne ka mochen.

7 Iwe nengeni ei mettoch epwe pwá ngonuk pwe epwe ew esisin, pwe mwirin om kuna ewe ira minne a uwani ewe foun ira minne semom we a neni, kopwe pwan kuna emon mwan mi feitiw seni nang, iwe kopwe kuna i; iwe mwirin om kuna i kopwe pwarata pwe i ewe Noun Kot.

8 Iwe non ewe fansoun ewe Ngun a apasa ngeniei: Nengeni! Iwe ua nengeni me kuna efoch ira; me a usun ewe ira minne semei we a fen kuna; me ningan a fokkun napanap, ewer, a nap seni unusen ning; me pwechepwechan a nap seni pwechepwechan toropasen snow.

9 Iwe non ewe fansoun mwirin ai ua kuna ewe ira, ua apasa ngeni ewe Ngun: Ua kuna pwe ka pwar ngeniei ewe ira minne a auchea seni meinisin.

10 Iwe a apasa ngeniei: Met ka mochen?

11 Iwe ua apasa ngeni i: Ai upwe sinei wewen—pun ua kapas ngeni i usun emon mwan a kapas; pun ua kuna pwe i a nom non ewe ununun emon mwan; nge inamo, ua sinei pwe i ewe Ngunun ewe Samon; iwe a kapas ngeniei usun emon mwan a kapas ngeni pwan emon.

12 Iwe non ewe fansoun a apasa ngeniei: Nengeni! Iwe ua nengeni usun nge ita upwe nengeni i, nge use kuna; pun a fen no seni mwen mesei.

13 Iwe non ewe fansoun ua nengeni me kuna ewe teninimwen Jerusalem mi napanap, me pwan ekkoch teninimw. Iwe ua kuna ewe teninimwen Nazareth; iwe non ewe teninimwen Nazareth ua kuna emon fopun nimenimoch, me i a fokkun murino me pwechepwech.

14 Iwe non ewe fansoun ua kuna ekkewe nang ra suk; me emon chon nang a feitiw me uta me mwei; me a apasa ngeniei: Nifai, met ka kuna?

15 Iwe ua apasa ngeni i: Emon fopun nimenimoch, fokkun nioch me murino seni meinisin ekkewe ekkoch fopun nimenimoch.

16 Iwe a apasa ngeniei: Ka sinei ewe tekisosonun Kot?

17 Iwe ua apasa ngeni i: Ua sinei pwe i a tongei noun aramas; nge inamo, use sinei ewe wewen mettoch meinisin.

18 Iwe a apasa ngeniei: Nengeni, ewe fopun nimenimoch ka kuna i ewe inen ewe Noun Kot, non pekin aion.

19 Iwe non ewe fansoun ua kuna pwe i a uweano non ewe Ngun; iwe mwirin an a kekino non ewe Ngun ren ewe ukukun fansoun ewe chon nang a kapas ngeniei, a apasa: Nengeni!

20 Iwe ua nengeni me kuna sefani ewe fopun nimenimoch, a kamoch emon semirit non poun kewe.

21 Iwe ewe chon nang a apasa ngeniei: Nengeni ewe Namen Kot, ewer, ennetin ewe Noun ewe Sam Ese Much! Ka sinei wewen ewe ira minne semom we a kuna?

22 Iwe ua ponueni i, ua apasa: Ewer, iei ewe tongen Kot, minne a unusen pwisin mereseno non netipen ekkewe noun aramas; ina minne, ina ewe a fokkun anno seni mettoch meinisin.

23 Iwe a kapas ngeniei, a apasa: Ewer, me ewe mi fokkun apwapwa ngeni ewe ngun.

24 Iwe mwirin an a apasa ekkei kapas, a apasa ngeniei: Nengeni! Iwe ua nengeni, me ua kuna ewe Noun Kot a feino nein ekkewe noun aramas; iwe ua kuna chommong ra chappetiw ren pechen me fen ngeni.

25 Iwe non ewe fansoun ua kuna pwe ewe wokun mecha, minne semei we a fen kuna, ina ewe kapasen Kot, minne a emmwen ngeni ewe popunapen ekkewe konikin manau, are ngeni ewe iran manau; minne ekkewe konik ra asisinen ewe tongen Kot; iwe ua pwan kuna pwe ewe iran manau a ew esisinen ewe tongen Kot.

26 Iwe ewe chon nang a pwan apasa sefan ngeniei: Nengeni me kuna ewe tekisosonun Kot!

27 Iwe ua nengeni me kuna ewe Chon Angasanon ewe fonufan, usun ion semei we a kapas usun; iwe ua pwan kuna ewe soufos ewe epwe amonnata ewe aan me mwen i. Me ewe Namen Kot a feino me a papatais ren i; iwe mwirin a papatais, ua kuna ekkewe nang ra suk, me ewe Ngun mi Fel a feitiw seni nang me nonnom won i non ewe napanapen emon muro.

28 Iwe ua kuna pwe a feino afanafan ngeni ekkewe aramas, non manaman me ning napanap; iwe ekkewe mwicheichen aramas ra ioi fengen pwe repwe rongorong ngeni i; iwe ua kuna pwe ra aturau i me neir.

29 Iwe ua pwan kuna engon me ruemon ra tapweno mwirin i. Iwe non ewe fansoun ra uweano non ewe Ngun seni mwen mesei, iwe use chiwen kuner.

30 Iwe non ewe fansoun ewe chon nang a apasa sefani ngeniei, a apasa: Nengeni! Iwe ua nengeni, me ua kuna ekkewe nang ra suk sefan, iwe ua kuna chon nang ra feitiw won ekkewe noun aramas; iwe ra afanafan ngeni ir.

31 Iwe a kapas sefan ngeniei, a apasa: Nengeni! Iwe ua nengeni, me ua kuna ewe Namen Kot a feino nein ekkewe noun aramas. Iwe ua kuna ekkewe mwicheichen aramas mi semwen, me ekkewe ra riaffou ren chommongun napanapen samau, me ren ekkewe tefin me ngun mi nimengaw; iwe ewe chon nang a kapas me pwari meinisin ekkei mettoch ngeniei. Iwe ra chikar me ren ewe manamanen ewe Namen Kot; iwe ekkewe tefin me ngun mi nimengaw ra katuruu.

32 Iwe non ewe fansoun ewe chon nang a kapas sefan ngeniei, a apasa: Nengeni! Iwe ua nengeni me kuna ewe Namen Kot, pwe a ono seni ekkewe aramas; ewer, ewe Noun ewe Kot esemuch a kapung meren ewe fonufan; iwe ua kuna me pwarata usun.

33 Iwe ngang, Nifai, ua kuna pwe i a irapengesino won ewe irapenges me a ninnino ren tipisin fonufan.

34 Iwe mwirin an a ninnino ua kuna ekkewe mwicheichen ewe fonufan, pwe ra ioi fengen pwe repwe fiu ngeni ekkewe aposel noun ewe Nam; pun ir ekkewe engon me ruemon ra kokko seni ewe chon nangin ewe Samon.

35 Iwe ewe mwicheichen ewe fonufan a ioi fengen; iwe ua kuna pwe ra nom non ew watten me wamongun imw, usun chok ewe imw minne semei we a kuna. Iwe ewe chon nangin ewe Samon a pwan kapas sefan ngeniei, a apasa: Nengeni ewe fonufan me miritin we; ewer, nengeni ewe imwen Israel a ioi fengen pwe repwe fiu ngeni ekkewe engon me ruemon aposel noun ewe Nam.

36 Iwe non ewe fansoun ua kuna me pwarata, pwe ewe watten me wamongun imw ina ewe namanam tekian ewe fonufan; me a turutiw, iwe ewe turutiwan a fokkun napanap. Iwe ewe chon nangin ewe Samon a pwan kapas sefan ngeniei, a apasa: Epwe iei usun ewe kitetterinon meinisin muu, einang, sokopaten kapas, me aramas, ekkewe repwe fiu ngeni ekkewe engon me ruemon aposel noun ewe Nam.