Tau Talahauaga Ne Tua Mautolu Ki Ai
Lotu a Iesu Keriso Mae Tau Tagata Tapu ke he Tau Aho Fakamui Nei

1. Kua tua a mautolu ke he Atua, ko e Matua Tukulagi, mo e Haana a Tama, ko Iesu Keriso, mo e Agaaga Tapu.

2. Kua tua a mautolu to fakahala e tau tagata ha ko e ha lautolu a tau agahala ka e nākai fakahala ha ko e holifono ha Atamu.

3. Kua tua a mautolu ko e Lukutotoaga ha Keriso ke fakamomoui ai e tau tagata oti kanaha ko e omaoma ke he tau fakatufono mo e tau gahua tapu he Evagelia.

4. Kua tua a mautolu ko e tau fakaakoaga mo e tau gahua tapu fakamua he Evagelia a nei: fakamua, tua ke he Iki ko Iesu Keriso; ke ua aki, Fakatokihala, ke tolu aki Papatisoaga ke tanumia ke he vai ma e fakamagaloaga he tau agahala; ke fa aki, Fakalagoaga he tau lima ke moua e mena fakaalofa noa ko e Agaaga Tapu.

5. Kua tua a mautolu, kua lata ke kotofa he Atua e tagata ke he perofetaaga mo e fakalago e tau lima ha lautolu ne toka ai e pule ke fakamatala e Evagelia mo e taute e tau gahua tapu kua hā hā i ai.

6. Kua tua a mautolu ke he tau fakatokatokaaga he Lotu ne fakatū i tuai, ne fakahigoa ko e tau aposotolo, tau perofeta, tau akoako, tau faiaoga, tau kau fakamatala, mo e falu foki.

7. Kua tua a mautolu ke hetau mena fakaalofa, ko e tau vagahau kehekehe, tau perofetaaga, tau fakaliliuaga he tau vagahau kehekehe mo e falu foki.

8. Kua tua a mautoluko e Tohi Tapu, ko e tau kupu he Atua kaeke kua hako mo e tonu haana a fakaliliuaga. Kua tua foki a mautolu ko e Tohi Moromona ko e tau kupu he Atua.

9. Kua tua a mautolu ke he tau mena oti kua fakakite he Atua, pihia foki mo e tau mena kua fakakite mai e Ia ke he vahā nei, mo e tua foki a mautolu to fakakite mai e Ia e tau mena lalahi mo e mahuiga hagaao ia ke he Kautū he Atua.

10. Kua tua a mautolu, to fakapotopoto ai e tau tagata Isaraela mo e liu fakamaopoopo e tau magafaoa ne hogofulu (10); to fakatū ai a Siona (Ierusalema foou) ke he motu na ko Amelika. To haele mai a Keriso ke pule ke he lalolagi, to fakafoou e lalolagi mo e to moua ai e tūaga lilifu fakaparataiso.

11. Kua hā hā ia mautolu e atāina mo e tonuhia ke hufeilo ke he Atua pule okooko uta ke he tau puhala kua fioia a mautolu ki ai, mo e fakaatā foki e tonuhiaaga nei ke he tau tagata oti, ke hufeilo ke he tau puhala, tau matavaki mo e tau mena ni kua manako a lautolu ki ai.

12. Kua tua a mautolu ko mautolu ko e tau tagata he tau patuiki, tau pelesiteni, tau pule, mo e tau iki fakafili mo e omaoma, fakalilifu mo eleveki atu a mautolu ke he tau fakatufono.

13. Kua tua a matulu ke mahani fakamooli, mahani hakohako, mahani meā, mahani totonu mo e mahanai mitaki ke he tau tagata oti: kua muitua a mautolu ke he tomatomaaga ha Paulo—Kua tua a mautolu ke he tau mena oti kua amaamanaki ke he tau mena oti, ne fakauka a mautolu ke he tau mena loga mo e amanaki ke fakauka ke he tau mena oti. Kumi atu foki a mautolu ke he tau mena mitaki, tau mena fulufuluola, tau talahauaga mitaki mo e tau mena kua lata ke nava mo e fakaheke atu ki ai.