Mga Lagda sa Komperensiya sa Young Single Adult

Mga Lagda sa Komperensiya sa Young Single Adult (2022)

Katuyoan

Ang mga komperensiya sa Young single adult (YSA) naghiusa sa mga young single adult isip “mga katagilungsod sa mga balaan” (Mga Taga-Efeso 2:19), diin sila nagtukod og mga pagpamatuod, nagtampo sa ilang mga talento ug panahon, ug nagpalambo sa panaghiusa ug personal nga paglambo. Ang mga komperensiya nakatabang sa paglig-on sa mga young single adult pinaagi sa paghatag kanila og pagbati nga nahisakop ug suporta sa tanan. Kini nakatabang sa mga young single adult nga mobati nga konektado sa Manluluwas ug sa Simbahan.

Pagtugot sa Kapangulohan sa Area

Ang mga komperensiya sa YSA gi-esponsoran sa area ug kinahanglan nga aprobahan daan sa Kapangulohan sa Area. Ang agenda sa komperensiya sa YSA kinahanglan nga himuon sa komitiba sa YSA nga komperensiya. Ang gisugyot nga agenda sa komperensiya sa YSA kinahanglan nga isumiter ngadto sa Kapangulohan sa Area alang sa pagtugot.

Buhat sa Kaluwasan ug Kahimayaan

Ang mga komperensiya sa YSA nagpunting diha sa buhat sa kaluwasan ug sa kahimayaan ug sa pagdapit ni Presidente Russell M. Nelson ngadto sa mga young adult sa pag-andam alang sa kinabuhing dayon ug sa pagsabot sa ilang balaan nga pagkatawo isip mga anak sa Dios, mga anak sa pakigsaad, ug mga disipulo ni Jesukristo (tan-awa sa Russell M. Nelson, “Mga Pagpili alang sa Kahangtoran” [tibuok kalibotan nga debosyonal alang sa mga young adult, Mayo 15, 2022], broadcasts.ChurchofJesusChrist.org). Kini nagtabang sa paghiusa sa mga young single adult diha sa hugot nga pagtuo ug katuyoan samtang sila nagpunting sa balaanong gitudlo nga mga responsibilidad sa:

Pagsunod sa ebanghelyo ni Jesukristo.
Pag-atiman niadtong nanginahanglan.
Pagdapit sa tanan nga modawat sa ebanghelyo.
Paghiusa sa mga pamilya alang sa kahangtoran.

Ang pagpunting sa komperensiya diha sa usa o sa daghan pa niining balaanong gitudlo nga mga responsibilidad makatabang sa mga partisipante sa paglig-on sa ilang mga relasyon uban ni Jesukristo ug sa usag usa, paghimo ug pagtuman sa sagradong mga pakigsaad, pagpangalagad sa usag usa, ug pagserbisyo niadtong nanginahanglan.

Mga Pangutana nga Hunahunaon

Hunahunaa sa mainampoong paagi ang mosunod nga mga pangutana, ug gamita kini isip giya diha sa tanang yugto sa pag-organisar og usa ka komperensiya. Kini modapit og pagpadayag, moawhag og pagkamamugnaon, ug modugang sa inyong pagkasensitibo sa mga panginahanglan sa mga young single adult diha sa inyong piho nga lugar.

Sa unsang paagi kini nga komperensiya magdala sa mga young single adult nga mas maduol kang Jesukristo?
Unsaon niini nga komperensiya pagtabang ang mga young single adult nga mobati sa gugma sa Dios alang kanila sa personal nga paagi?
Unsaon niini nga komperensiya pagpalig-on sa mga tinguha sa mga young single adult sa paghimo ug pagtuman og mga pakigsaad uban sa Dios?
Unsaon niini nga komperensiya paghiusa ang nagtubo nga henerasyon ug pagtabang sa pagpundok sa Israel?
Unsaon niini nga komperensiya pagtabang ang mga young single adult nga mahimong mas lig-on sa espirituhanong paagi?
Sa unsang paagi ang programa sa komperensiya makatubag sa mga panginahanglan sa mga young single adult diha sa inyong dapit?
Unsa ang positibo nga epekto nga mahimo niini nga komperensiya sa lokal nga komunidad?
Sa unsang paagi nga ang komperensiya makatabang sa mga young single adult nga makapadayon sa pagkonektar sa usag usa pinaagi sa institute o sa mga dapit nga kapundokan sa YSA? (Tan-awa sa Establishing a YSA Gathering Place [Pag-establisar og Dapit nga Kapundokan sa YSA] (2021), Librarya sa Ebanghelyo.)

Kon ikaw adunay mga pangutana bahin sa mga komperensiya sa YSA, mahimong ka nga mokontak sa team sa YSA nga komperensiya sa mga ulohang buhatan sa Simbahan.ysa-conferences@ChurchofJesusChrist.org.

Mga Tahas ug Mga Responsibilidad

5.1

Kapangulohan sa Area

Ang Kapangulohan sa Area mohatag og pagtugot ug mohatag og direksiyon sa pagkapari alang sa gi-esponsor sa area nga mga komperensiya sa YSA ug sa gisugyot nga agenda sa komperensiya. Ang Kapangulohan sa Area mahimo usab nga mosangon og usa ka stake o mga stake sa pag-host sa usa ka komperensiya sa YSA.

5.2

Gitudlo nga Area Seventy

Ang gitudlo nga Area Seventy moila, motawag, ug mo-set apart og mga koordinitor sa komperensiya sa YSA ug mohatag og direksiyon sa pagkapari ug suporta ngadto sa komitiba sa komperensiya.

5.3

Mga Komitiba sa Stake sa Young Single Adult

Kon daghang stake ang mag-uban alang sa usa ka komperensiya sa YSA, ang matag komitiba sa stake sa YSA mohatag sa Area Seventy og mga rekomendasyon alang sa usa o daghan pang mga young single adult nga maapil sa komitiba sa komperensiya sa YSA. Ang tanang mga komperensiya sa YSA nagkinahanglan og pagtugot sa Kapangulohan sa Area, bisan og usa lamang ka stake ang esponsor.

5.4

Mga Koordinitor sa Komperensiya

Ang mga koordinitor sa komperensiya sa YSA mao ang young single adult nga igsoong babaye [sister] ug igsoong lalaki [brother] kinsa gitawag sa usa ka Area Seventy. Ang mga koordinitor sa komperensiya mangulo diha sa pagplano, pag-andam, ug mopahigayon sa komperensiya. Sila mosumiter usab og report pagkahuman sa komperensiya.

5.5

Komitiba sa Komperensiya sa YSA

Ang usa ka komitiba sa komperensiya sa YSA pangulohan sa mga koordinitor sa komperensiya sa YSA ubos sa giya sa usa ka sakop sa kapangulohan sa stake nga nagpasiugda (o sa Area Seventy). Ang ubang mga young single adult itudlo isip kaabag nga mga koordinitor [assistant coordinators] nga mahimong responsable sa mahinungdanong mga aspeto sa komperensiya, sama sa badyet, panglawas ug kahilwasan [safety], rehistrasyon, serbisyo ug mga kalihokan, pag-andam sa pagkaon [catering], pagpahibalo [marketing] ug komunikasyon, ug lugar sa kalihokan [venue]. Ang eksakto nga istraktura sa komitiba sa komperensiya sa YSA ug lebel sa suporta matino pinaagi sa mga katuyoan alang sa komperensiya ug lokal nga mga kahimtang.

Kon sobra pa sa usa ka stake ang maapil, ang Area Seventy motawag sa mga miyembro sa komitiba sa komperensiya. Kon adunay usa lamang ka stake ang apil, ang kapangulohan sa stake mahimong motawag sa komitiba sa komperensiya.

5.6

Konseho sa Institute

Ang mga sakop sa konseho sa institute, sa pakig-alayon sa direktor sa institute, kinahanglan nga dapiton sa pag-apil sa komitiba sa komperensiya sa YSA. Ang mga sakop sa konseho sa institute makapanalangin og dako sa pagplano ug pagpahigayon sa komperensiya sa YSA pinaagi sa pagrekomendar og makadasig nga mga mamumulong ug mga mopresentar, maghatag og mamugnaon nga mga ideya sa kalihokan, ug makigkoordinar sa mga kawani sa institute.

5.7

Direktor sa Institute ug Koordinitor sa S&I

Ang mga direktor sa institute ug mga koordinitor sa mga seminary ug mga institute (S&I) mahimong hangyoon nga motabang sa pagtudlo ug sa ubang mga buluhaton ubos sa direksiyon sa Kapangulohan sa Area ug sa mga koordinitor sa komperensiya.

Pagbutang og Pundo

Ang mga Kapangulohan sa Area mahimong mohangyo og pundo aron ibayad sa pipila o sa tanan nga gasto sa mga komperensiya sa YSA. Ang mga bayronan sa partisipante, kon aduna man, aprobahan sa Kapangulohan sa Area nga adunay ekspektasyon nga ang bayad dili makapugong sa pag-apil. Ang mga Kapangulohan sa Area makatino og mga kausaban sa mga bayronon sa partisipante alang sa mga young single adult nga motambong apan wala magpuyo sa maong area o dili mga miyembro sa Simbahan.

Ang mga hangyo alang sa pagpundo kinahanglan nga makompleto sa mas sayo nga panahon aron makakuha og usa ka angay nga lugar ug mga akomodasyon ug, kon gikinahanglan, tabangan ang mga indibidwal o mga grupo nga mobiyahe sa lagyo (tulo o sobra pa ka oras).

Ang mga Kapangulohan sa Area mahimong mohangyo og pundo alang sa mga komperensiya sa YSA pinaagi sa:

Pag-organisar og usa ka komitiba sa komperensiya sa YSA ug pahimuon sila og agenda ug plano sa komperensiya.
Pagparebyo sa agenda sa kontroler o sa representante sa panalapi sa area.
Pagpaendorso sa ilang plano sa komperensiya sa YSA gikan sa ilang nagdumala nga sakop sa Korum sa Napulog Duha ka Apostoles ug sa gitahasan nga miyembro sa Kapangulohan sa Seventy.
Pagkompleto og usa ka hangyo sa badyet gamit ang Young Single Adult Conference and Gathering Places Funding Request Form [Porma sa Hangyo alang sa Pundo sa Komperensiya ug mga Dapit nga Kapundokan sa Young Single Adult].
Pagseguro nga ang nakompleto nga porma sa hangyo sa badyet napadala ngadto sa kontroler sa area o representante sa panalapi sa area.

Ang hangyo rebyohon dayon sa Priesthood and Family Executive Council, ug sa Budget and Appropriations Committee alang sa kataposang pag-aprobar.

Ang Local Unit Budget Allowance (LUBA) kinahanglan nga dili gamiton aron sa pagpundo sa mga komperensiya sa YSA kon ang komperensiya mas taas pa sa usa ka adlaw ug ang mga galastohan makabalda sa nagpadayon nga programa sa YSA sa stake.

Mga Palisiya ug mga Lagda

Palihog tun-i og maayo ug sunda ang seksiyon 20 sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw (ChurchofJesusChrist.org). Ang komperensiya bukas alang sa tanang mga young single adult, lakip ang dili tig-apilan nga mga miyembro sa Simbahan ug mga higala sa Simbahan kinsa andam nga mosunod sa mga sumbanan sa Simbahan sa gidugayon sa komperensiya. Himoa ang tanang paningkamot nga maapil ang tanang young single adult.

Programa sa Komperensiya

Ang komitiba sa komperensiya sa YSA ug ang gitudlo nga Area Seventy mainampoong mokonsiderar sa seksiyon 1 ug 20 diha sa Kinatibuk-ang Tamdanan nga Basahon samtang ilang himoon ang programa sa komperensiya. Ang mga young single adult mireport nga ilang gipasalamatan ang usa ka komperensiya nga:

Nakasentro kang Kristo ug adunay adlaw-adlaw nga espirituhanong mga importanteng panghitabo.
Naghatag og makapadasig nga mga mamumulong ug mga magtutudlo kinsa nagtutok sa may kalabotan nga mga panginahanglan sa young single adult.
Igo ang gidak-on alang sa mga young single adult nga makahimamat og bag-o nga mga tawo apan igo ang gigamyon aron nga madasig sa pagpakig-uban ug pagpakigtapok sa usag usa.
Naghatag og oportunidad nga makig-uban sa usa ka sakop sa Kapangulohan sa Area o gitudlo nga Area Seventy ug sa iyang kapikas o sa uban pang kinatibuk-ang mga lider sa Simbahan (kini mahimong maglakip sa pangutana-ug-tubag nga sesyon isip usa ka paagi aron mas masabtan ang mga kabalaka ug panginahanglan sa mga young single adult).
Naghatag og usa ka lugar nga komportable, walay mga makabalda, ug sulod sa usa ka makataronganon nga distansiya sa pagbiyahe.
Nakasentro sa maayong pagkaplano nga mga oportunidad sa pagserbisyo nga makahimo og tinuod nga kalainan diha sa lokal nga komunidad.
Molakip sa templo ug family history nga mga oportunidad kon mahimo.
Nagtanyag ug lainlain nga dekalidad nga mga workshop gikan sa mga eksperto ug mga mamumulong sa lainlaing relihiyon [interfaith speakers] gikan sa mas lapad nga komunidad.
Naghatag og mga oportunidad sa pagtukod og bag-ong mga interes ug pagpalambo sa mga talento.
Nagtugot og igong libreng oras tali sa giplano nga mga kalihokan aron makapahuway ug makighigalaay.
Naglakip sa giplano nga pagpakighigala ug kalingawan, sama sa mga sayaw ug mga konsyerto.
Nagpasiugda ang pagtagamtam sa kalidad nga musika.

Kon ang komperensiya sa YSA naglakip og mga tulumanon sa pagsimba sa Domingo, sunda ang mga sumbanan nga gilatid diha sa Kinatibuk-ang Tamdanan nga Basahon, 20.4.

Pagdapit sa mga Young Single Adult sa mga Komperensiya

Ang tanang young single adult sa tagsa-tagsa ka rehiyon kinahanglang dapiton sa pagtambong sa ilang komperensiya sa YSA. Ang mga koordinitor ug komitiba sa komperensiya sa YSA makigtinabangay uban sa mga presidente sa stake ug mga koordinitor sa institute sa pagdapit sa tanang young single adult, ilabi na niadtong dili kaayo aktibo ug mga higala nga dili mga miyembro. Ang hatagan og prayoridad sa pag-apil kinahanglang ihatag ngadto sa mga young single adult gikan sa gitudlo nga nasod o sa miapil nga mga coordinating council. Ang dugang nga mga partisipante gikan sa ubang mga lugar mahimong dapiton sumala sa kapasidad. Sa imong pagdapit sa mga young single adult, pagmainampoong ikonsiderar ang mosunod:

Unsaon nato sa mahigugmaong paagi pagdapit sa tagsa-tagsa ang mga young single adult?
Unsaon nato paggamit ang teknolohiya sa mamugnaon ug epektibo nga paagi, lakip ang social media?
Unsaon man nato sa pagdapit niadtong kasamtangang dili magtambongan sa Simbahan?
Unsaon nato paggamit sa tukma ang regular nga mga paagi sa komunikasyon sa Simbahan (sama sa miting, mga pahibalo, mga email sa ward o mga grupo sa social media, ug pag-text), lakip na ang mga paagi nga gigamit pinaagi sa institute ug sa mga dapit nga kapundokan?
Sa unsang paagi nga ang komperensiya makapaapil niadtong dili sa atong tinuohan? Unsaon nato sa pagtabang ug pagdapit kanila?

10.

Gisugyot nga Dagan sa Panahon

Gidugayon sa Panahon	Mga Aksiyon
Gidugayon sa Panahon Sa wala pa ang 24 ka bulan	Mga Aksiyon Ang Kapangulohan sa Area naghatag sa stake o mga stake og buluhaton sa pagpasiugda og usa ka gi-esponsor sa area nga komperensiya sa YSA o nagtugot sa usa ka hangyo alang sa usa ka komperensiya.
Gidugayon sa Panahon Sa wala pa ang 20 ka bulan	Mga Aksiyon Ang Area Seventy magtawag og mga koordinitor sa komperensiya sa YSA. Ang mga koordinitor morebyo sa mga lagda sa komperensiya sa YSA.
Gidugayon sa Panahon Sa wala pa ang 18 ka bulan	Mga Aksiyon Ang Area Seventy o kapangulohan sa stake motawag sa komitiba sa komperensiya. Ang komitiba sa komperensiya magsugod sa pagmiting ubos sa direksiyon sa mga koordinitor sa komperensiya.
Gidugayon sa Panahon Sa wala pa ang 16 ka bulan	Mga Aksiyon Ang komitiba sa komperensiya motino og usa ka programa ug lugar alang sa komperensiya. Ang Area Seventy mosumiter og usa ka opisyal nga hangyo ug badyet alang sa komperensiya ngadto sa Kapangulohan sa Area.
Gidugayon sa Panahon Sa wala pa ang 14 ka bulan	Mga Aksiyon Ang mga koordinitor sa komperensiya ug ang komitiba sa komperesniya mosugod sa pagsumiter sa mga resibo aron maseguro ang usa ka dapit ug ang mga akomodasyon. Ang mga resibo isumiter ngadto sa opisina sa area ug sa stake o mga stake nga nag-esponsor.
Gidugayon sa Panahon Sa wala pa ang 12–0 ka bulan	Mga Aksiyon Ang komitiba sa komperensiya: Regular nga magkita aron magplano ug mag-organisar sa komperensiya. Modapit og mga bisitang mamumulong ug mga mopresentar. Mohimo og kampanya sa kasayoran aron sa pagpahibalo sa mga young single adult diha sa lugar.
Gidugayon sa Panahon Sa wala pa ang 6–0 ka bulan	Mga Aksiyon Ang komitiba sa komperensiya: Magpadala og mga resibo ngadto sa opisina sa general accounting sa area. Mokompirma sa rehistrasyon. Motapos ug mohimo niini nga mga logistik sa programa nga dili na mausab.
Gidugayon sa Panahon 0	Mga Aksiyon Ipahigayon ang komperensiya.
Gidugayon sa Panahon Sulod sa 1 ka bulan pagkahuman	Mga Aksiyon Ang mga koordinitor sa komperensiya mopadala og human sa komperensiya nga report ngadto sa Kapangulohan sa Area.

11.

Human sa Komperensiya nga Pagreport

Sa pagtapos sa komperensiya, ang mga koordinitor sa komperensiya sa YSA mosumiter og human sa komperensiya nga report ngadto sa Kapangulohan sa Area. Kini nga report kinahanglang maglakip sa:

Usa ka mubo nga kinatibuk-an sa komperensiya, lakip ang mga litrato, mga kinutlo sa partisipante, ug uban pa.
Mga asoy sa makapabayaw nga mga kasinatian gikan sa komperensiya.
Matinuoron nga unsay gikasulti [feedback] bahin sa kon unsa ang nahimong maayo ug kon unsa ang wala, lakip ang matinuoron nga mga pagbati bahin sa kaayohan sa umaabot nga mga komperensiya. (Ikonsiderar ang mga pangutana diha sa seksiyon 4 niini nga dokumento kon mohatag og unsay ikasulti.)
Mga estatistika (gidaghanon sa mga miyembro ug mga higala nga mitambong, heyograpikanhon nga pagkabahin sa mga partisipante pinaagi sa stake o district, mga survey sa partisipante, ug uban pa nga mga sukdanan sa kalamposan.)
Usa ka pinansiyal nga report, lakip ang bayad sa pag-apil, badyet, ug uban pa.

Kini nga report kinahanglang ipadala gikan sa Kapangulohan sa Area ngadto sa nagdumala nga sakop sa Korum sa Napulog Duha ka Apostoles, sa Kapangulohan sa Seventy, Kinatibuk-ang Kapangulohan sa Relief Society, ug sa managing director alang sa Seminaries and Institutes of Religion.

Mahimo nimong gamiton ang template sa online nga report pinaagi sa pag-adto sa Post YSA Conference Report [Report Human sa YSA nga Komperensiya]. Rebyoha ug mahimong pamilyar sa piho nga mga pangutana gikan niini nga report sa sayong bahin sa proseso sa pagplano sa komperensiya sa YSA.