Ngā Tūkinotanga
Otirā, kīhai i roa ka kite ahau, nā taku whakapuakanga i taua kōrero i nui ai ngā whakakino ki a au, i waenganui i ngā kai-karakia, ā nā reira i tīmata ai ngā tūkinotanga, ā ka tupu haere tonu; ā ahakoa he taitamariki noa iho ahau, i waenganui i te tekau mā whā me te tekau mā rima o ngā tau, ā ko ōku āhuatanga i roto i te ao, he mea tērā e rite ana ki tō tētahi tamaiti e kore e whai painga, otirā ko ngā tāngata i ngā tūranga teitei, nui rawa te whakaaro ki te whakaoho i ngā mahara o te katoa kia kino ki a au; kia nui hoki ngā tūkinotanga; ā pēnei ana te āhua i roto i ngā Hāhi katoa—e whakakotahi ana hei tūkino i a au.
Nā tērā i meinga ai kia nui rawa ōku whakaaro i taua wā, ā pērā tonu i muri iho, arā, anō te nui o te rerekē o tēnei, ko tētahi taitamariki noa iho, tekau mā whā tau te pakeke, ko ia hoki e meinga ana kia mahi ia rā, kia whiwhi oranga, e whakaarohia ai e ranea ana tōna āhua hei whakatahuri i ngā whakaaro o te hunga nui, o ngā Hāhi ingoa nui o tēnei rā, me te whakapuru ki roto i a rātou tētahi wairua mō te tūkino me te whakahē. Ahakoa he āhua rerekē tērā, kāhore rānei, koia tonu te āhua, ā meinga ana ahau kia nui te pouri.
He ahakoa rā, he tika tonu kua kite ahau i tētahi kitenga. Kua whakaaro ahau i muri iho, e pērā ana ahau i a Pāora, i a ia i tū atu ai i te aroaro o Kīngi Akaripa, ā kōrerotia ana te kitenga i kite ai ia i tētahi māramatanga, me te rongonga i te reo; heoi he ruarua noa iho te hunga i whakapono ki a ia; ko ētahi i mea e teka ana ia, ko ētahi i mea he pōrangi ia; ā taunutia ana, tāwaia ana. Otirā, kīhai tēnei katoa i whakangaro i te pono o tōnā kitenga. I kite ia i tētahi kitenga, i mōhio ia i kite ia, ā e kore rawa e taea e ngā tūkinotanga katoa i raro i te rangi te whakaputa kē; ā ahakoa ka tūkinotia ia e rātou, ā mate rawa, mōhio tonu ia, ā mau tonu tōna mōhiotanga, hemo tonu te ngā, kua kite ia i te māramatanga, kua rongo hoki i te reo e kōrero atu ana ki a ia, ā e kore e taea e te ao katoa te whakaputa kē i āna whakaaro, i tana whakapono rānei.
Pērā anō hoki ahau. Kua tino kite ahau i tētahi mārama, ā i waenganui o te mārama i kite ahau tokorua ngā Tāngata, ā i tino kōrero rāua ki a au; ā ahakoa taunutia ana au, tūkinotia ana mō taku meatanga i kite ai ahau i tētahi kitenga, he pono tonu tērā; ā i a rātou e tukino ana i a au, e tāwai ana, e kōrero ana hoki i ngā mea kikino katoa mōku, ka mea ahau i roto i tōku ngākau: He aha ahau e tūkinotia ai mō te pono? He pono kua kite ahau i tētahi kitenga, ā ko wai ahau e kore ai e taea e te Atua, ā he aha te ao e mea ai kia whakakāhore ahau i tōku kitenga? Nō te mea i kite ahau i te kitenga, i mōhio ahau i pērā, ā mōhio ana ahau e mōhio ana te Atua, ā e kore e āhei i a au te whakakāhore i tērā, kāhore hoki ahau i kaha ki te pērā, i mōhio anō hoki ahau ki te pērātia, e mea ana ahau i te Atua kia riri, ā ka puta ki raro i te whakangaromanga.
Ā nāna, kua tatū ōku whakaaro mō te taha ki ngā Hāhi o te ao; e hara i te mea tika māku te uru atu ki a rātou, engari me mau tonu i roto i tēnei āhua kia whiwhi rā anō ki ētahi atu tohu. Ā kua mōhio ahau he pono te whakaaturanga a Hemi, arā, ki te hapa tētahi tangata i te mātauranga, me inoi ia ki te Atua, me te whiwhi, ā kāhore he tāwai.
Ā hono tonu ana te mahi i aku mahi, ā tae noa ki te rua tekau mā tahi o ngā rā o Hepetema, kotahi mano e waru rau e rua tekau mā toru, ā i aua wā katoa e tūkinotia ana e ngā ringaringa o ngā āhua tāngata katoa, ngā hunga karakia, me ngā hunga kore karakia, nō te mea i ū tonu ahau ki te mea atu kua kite ahau i tētahi kitenga.
I roto i te takiwā i waenganui o te wā i puta mai ai te kitenga me te tau tekau mā waru rau e rua tekau mā toru—i te mea kua whakakāhoretia ahau kia kaua e uru atu ki tētahi o ngā Hāhi o taua rā, ā i te mea he torutoru noa ngā tau, ā e tūkinotia ana e te hunga i tika ai kia meinga hei hoa mōku, me te atawhai mai ki a au, ā mehemea e whakaaro ana rātou kua māmingatia ahau me whakatika rātou i a au i runga i te aroha—i tukua ahau ki ngā āhua whakamātautauranga katoa; ā i waenganui ahau i ngā āhua rōpū katoa, he maha ōku takanga ki ngā mahi kuare, ā whakaaturia ana ngā ngoikoretanga o te taitamariki, me ngā ngoikoretanga o te kikokiko; ā nō taua āhua, e pouri ana ahau te kī i taka ahau ki ngā whakamātautauranga maha, e riria ana i te aroaro o te Atua. I ahau i whāki pēnei mai, e hara i te mea kua taka iho au ki ngā hara nui. Ko taua āhua rā anō e hara nei i tōku āhua ake.