Գլուխ 15
Սուրբ Քահանայությունը
«Ես սիրում եմ այս Եկեղեցու քահանայությունը: Այն կարևոր է և կենսունակ: Այն հանդիսանում է այս աշխատանքի սիրտն ու զորությունը: Դա այն զորությունն է և իշխանությունը, որի միջոցով Աստված՝ մեր Հավերժական Հայրը իրականացնում է Իր աշխատանքը երկրի վրա»:
Գորդոն Բ. Հինքլիի կյանքից
1980 թվականին Գորդոն Բ. Հինքլին և նրա կինը՝ Մարջորին մեկնեցին երեք շաբաթյա ուղևորության Ասիայում, որտեղ տարածքային համաժողովներում ելույթ ունեցան և մասնակցեցին Ճապոնիա Տոկիո Տաճարի նվիրագործմանը: Նախքան տուն վերադառնալը, նրանք մեկնեցին Ճապոնիայի Սենդայի Միսիա, որտեղ Երեց Հինքլին նախագահեց առաջին ցցի ստեղծման ժողովը : Նոր ցցի նախագահության հետ հենց ժողովից առաջ, Երեց Հինքլին մոտեցավ միսիայի Նախագահ Կիյոշի Սակայիին: «Նա հարցրեց զարմացած Նախագահ Սակայիին, թե արդյո՞ք նա ուներ սրբագործված յուղ, իսկ հետո ավելացրեց.«Ես այնքան հոգնած եմ, ինձ օրհնություն կտա՞ք»: Նախագահ Սակային հիշում էր. «Ես այնքան վախենում էի և շատ թույլ էի զգում Տիրոջ Առաքյալին օրհնություն տալու համար: Ես ասացի, որ չէի կարող օրհնությունն անգլերեն տալ: Երեց Հինքլին ասաց, որ ճապոներենով լավ է: Այսպիսով Երեց Հիտոշի Կաշիկուրան, տարածքային ներկայացուցիչը և ես սկսեցինք: Օրհնությունը տալուց հետո, Երեց Հինքլին պարզապես ասաց. «Շնորհակալություն, շնորհակալություն ձեզ: Այժմ ես կարող եմ վաղը տուն գնալ»:
«Հաջորդ առավոտ Երեց Հինքլին ուժեղ և առողջ էր երևում, և երբ Նախագահ Սակային հարցրեց, թե ինչպես էր նա զգում, նա պատասխանեց. «Dai Jobu, ավելի, քան լավ: Ես լավ եմ»: Մի քանի օր հետո Նախագահ Սակային նամակ ստացավ Երեց Հինքլիից, ով գրել էր. «… Այնքան շնորհակալ եմ այն օրհնության համար, որ դուք տվեցիք ինձ: Ես անմիջապես ավելի լավ սկսեցի զգալ դրանից հետո: Իմ ապաքինումը արագ էր և լիակատար: Քույր Հինքլին և ես խորապես երախտապարտ ենք այն հնարավորության համար, որ մենք մնացինք ձեր միսիայի տանը»:1
Նախագահ Հինքլին հաճախ վկայում էր քահանայության օրհնությունների վերաբերյալ, սկսած հրաշագործ, բայց ժամանակավոր օրհնություններից՝ ֆիզիկական ապաքինումից, մինչև հավերժական, կապող օրհնություններ տաճարային արարողությունների միջոցով: Նա հայտարարել է. «Ես հավատում եմ, որ Նրա քահանայությունում կա աստվածային իշխանություն՝ օրհնելու զորություն, բժշկելու զորություն, կառավարելու զորություն Աստծո երկրային գործերում, ուժ կապելու երկինքներում, այն ինչ կապվում է երկրի վրա»:2
«[Քահանայության] հետ անհնարին ոչինչ չկա Աստծո թագավորության աշխատանքն առաջ տանելիս:
Գորդոն Բ. Հինքլիի ուսմունքները
1
Աստված վերականգնել է քահանայությունը և երկնքի արքայության բանալիները:
Քահանայության զորությունն ու իշխանությունը մարդկանց տրվել [էին] հնուց: Ավելի ցածր իշխանությունը տրվել էր Ահարոնի որդիներին ժամանակավոր բաներում, ինչպես նաև որոշ սրբազան եկեղեցական արարողություններում սպասավորելու համար: Ավելի բարձր քահանայությունը տրվել էր Իր ՝ Տիրոջ կողմից Իր Առաքյալներին՝ համաձայն Պետրոսին արված Նրա հայտարարության: «Եվ ես կտամ քեզ երկնքի արքայության բանալիները, և այն որ կապես երկրի վրա, կապուած կլինի երկնքումը. և այն որ երկրի վրա արձակես, արձակուած կլինի երկնքումը» (Մատթեոս 16.19):
Քահանայության լիակատար վերականգնումը ներառում էր Հովհաննես Մկրտիչի … և Պետրոսի, Հակոբոսի ու Հովհաննեսի գալուստը: … Այն ընդգրկում էր Մովսեսին, Եղիասին և Եղիային. նրանցից յուրաքանչյուրը բերում էր քահանայության բանալիները, որպեսզի ավարտի վերականգնման աշխատանքը նախորդ տնտեսությունների բոլոր գործերում և արարողություններում, ժամանակների լրիվության այս մեծ, վերջին տնտեսությունում:
Քահանայությունն այստեղ է: … Մենք գիտենք, որովհետև մենք տեսել ենք այս քահանայության զորությունը: Մենք տեսել ենք հիվանդներին բժշկվելիս, կաղերին քայլելիս, և լույսի, գիտելիքի ու հասկացողության հասնելը նրանց, ովքեր եղել են խավարում:3
Մարգարե Ջոզեֆ Սմիթը մի առիթով նկարագրել է [քահանայությունը] հետևյալ բառերով. «Քահանայությունը հավիտենական սկզբունք է և գոյություն է ունեցել Աստծո հետ հավերժությունից և [գոյություն] կունենա մինչև հավերժություն, առանց օրերի սկզբի կամ տարիների վերջի»: (History of the Church, 3:386.)
Այն իսկապես Ամենազորի ուժն է, որը տրվել է մարդուն՝ գործելու Նրա անունով և Նրա փոխարեն: Դա լիազորումն է աստվածային իշխանության, որը տարբեր է երկրի երեսին գոյություն ունեցող բոլոր ուժերից և իշխանություններից: Զարմանալի չէ, որ այն վերականգնվեց մարդու համար` հարություն առած էակների կողմից, ովքեր կրում էին այն հնում, որպեսզի հարց չառաջանար դրա իշխանության կամ իսկության վերաբերյալ: Առանց դրա կլիներ միայն անունով եկեղեցի` Աստծո բաները սպասավորելու իշխանությունից զուրկ: Դրանով ոչինչ անհնարին գոյություն չունի Աստծո արքայության աշխատանքը առաջ տանելու համար: Այն իր բնույթով աստվածային է: Այն, ինչպես ժամանակավոր է, այնպես էլ` հավերժական իր իշխանությամբ: Դա միակ ուժն է երկրի վրա, որը հասնում է մահվան վարագույրից այն կողմ:4
2
Քահանայությունն այն ուժն է և իշխանությունը, որի միջոցով Աստված իրականացնում է Իր աշխատանքը երկրի վրա:
Ես սիրում եմ այս Եկեղեցու քահանայությունը: Այն կարևոր է և կենսունակ: Այն հանդիսանում է այս աշխատանքի սիրտն ու զորությունը: Դա այն զորությունն է և իշխանությունը, որի միջոցով Աստված՝ մեր Հավերժական Հայրը, իրականացնում է Իր աշխատանքը երկրի վրա:5
Սուրբ քահանայությունը իր հետ կրում է իշխանություն՝ կառավարելու Աստծո արքայության գործերը երկրի վրա: Տիրոջ հայտնությունների ներքո Եկեղեցին պետք է նախագահվի երեք նախագահող քահանայապետերի կողմից: Նրանց պետք է աջակցի Տասներկու Առաքյալների խորհուրդը, որոնց իրենց հերթին պետք է աջակցի … Յոթանասունը: Երեք հոգուց բաղկացած Նախագահող Եպիսկոպոսությունը պատասխանատու է աշխարհիկ գործերի համար Նախագահության ղեկավարության առաջ: Սրանք բոլորը քահանայության պաշտոնյաներ են: Աստվածայնորեն տրված այդ զորությունը իշխանությունն է, որի միջոցով նրանք կառավարում են: Դա այդպես է ցցերում և ծխերում, նախագահություններում և եպիսկոպոսություններում: Դա այդպես է քվորումներում: Օժանդակ ծառայողները կատարում են իրենց աշխատանքը քահանայության ղեկավարությամբ և լիազորությամբ: Առանց քահանայության կարող է լինել եկեղեցու ձևը, բայց ոչ թե իսկական բովանդակությունը: Սա Հիսուս Քրիստոսի եկեղեցին է, և այն ղեկավարվում է այդ իշխանությամբ, որը «ըստ Աստծո Որդու կարգի է»։ (ՎևՈւ 107.3:)6
3
Քահանայության օրհնությունները պետք է վայելեն բոլորը:
[Քահանայությունը] … Աստծո՝ մեր Երկնային Հոր ծրագրի մասն է կազմում, որ օրհնի բոլոր սերունդների Նրա որդիների և դուստրերի կյանքը։7
Սուրբ քահանայությունը ներառում է օրհնելու զորությունը: Ահարոնյան Քահանայություն կրողների համար այն իշխանություն ունի սպասավորելու համայնքին Տիրոջ մարմնի և արյան խորհրդանիշները, ով տվեց Իր կյանքը որպես զոհաբերություն բոլորի համար: Հաղորդությունը և այս խորհրդանիշերի ճաշակումը կիրակնօրյա երկրպագության սիրտն է հանդիսանում: Այն ներառում է Աստծո հետ ուխտերի նորոգումը: Այն իր հետ կրում է Նրա Սուրբ Հոգին մեզ հետ ունենալու խոստում: Դա իր հավասարը չունեցող օրհնություն է, որը պիտի բոլորը վայելեն և հնարավոր է դառնում իշխանությամբ, որը տրվում է արժանավոր երիտասարդ տղամարդկանց: …
Մելքիսեդեկյան Քահանայությունը իր հետ կրում է Սուրբ Հոգին շնորհելու իշխանություն: Ինչպիսի մեծ օրհնություն է ունենալ Աստվածագլխի անդամի սպասավորող ազդեցությունը, ստանալով այդ պարգևը նրանց ձեռքերով, ովքեր գործել են աստվածային իշխանությամբ: Եթե մենք շարունակենք քայլել առաքինությամբ, մենք կարող ենք վայելել խոստման կատարումը, որը արվել է Տիրոջ կողմից, երբ Նա ասել է. «Սուրբ Հոգին կլինի քո մշտական ընկերը, և քո գավազանը կլինի արդարության ու ճշմարտության անփոփոխ գավազան. և քո տիրապետությունը կլինի հավիտենական տիրապետություն և առանց հարկադրանքի կհոսի դեպի քեզ հավիտյանս հավիտենից» (ՎևՈւ 121․46։)
Քահանայությունը ներառում է հիվանդներին օրհնելու զորությունը: Արդյոք կա՞ որևէ մեկը, ում հասնում է իմ ձայնը, ով չի գործադրել կամ զգացել այդ աստվածային զորությունը: Կա՞ արդյոք մեզանից որևէ մեկը, ով կասկած ունի դրա արդյունավետութան վերաբերյալ: Մենք կարող ենք պատմել սրբազան և սքանչելի հրաշքների մասին, որոնց մենք ականատես ենք եղել մեր սեփական փորձառության ընթացքում: …
Այս սուրբ Մելքիսեդեկյան Քահանայությունը իր հետ կրում է մարգարեությամբ օրհնելու, մխիթարելու, հաստատելու, ղեկավարելու զորություն: Մենք ունենք հայրապետներ, ովքեր իրենց կրած իշխանության համաձայն, հայտարարում են տոհմագիծը և արտաբերում օրհնություններ մեր առաջնորդության համար: Այս օրհնությունները կարող են դառնալ մի խարիսխ, որից մենք կարող ենք բռնել՝ մեզ ամուր պահելով կյանքի փոթորիկների ժամանակ:
Վերջնական արտահայտությունը, որը սուրբ քահանայությունը կրում է իր հետ, երկրի վրա կնքելու իշխանությունն է և այդ կնքումը երկինքներում արդյունավետ ունենալու իշխանությունը: Դա եզակի է և սքանչելի: Դա այն իշխանությունն է, որը գործադրվում է Աստծո տաճարներում: Դա վերաբերում է ինչպես ապրողներին, այնպես էլ մահացածներին: Դա հավերժության բուն էությունն է: Դա աստվածային զորությունն է, որը շնորհվում է Ամենազորի կողմից, որպես Իր մեծ ծրագրի մաս՝ մարդու անմահության և հավերժական կյանքի համար:
Որքա՜ն թանկ է Աստծո պարգևը, որը եկել է մեզ:8
4
Աստծո որդիները, ովքեր կրում են Նրա աստվածային իշխանությունը, պետք է հավատարիմ լինեն իրենց մեջ եղած լավագույնին:
Յուրաքանչյուր արժանավոր մարդ, անկախ ազգությունից, էթնիկական ծագումից կամ որևէ այլ գործոնից, իրավունք ունի ստանալու քահանայություն: Նրա հնազանդությունը Աստծո պատվիրաններին դառնում է վճռական գործոն: Նրա շնորհումը հիմնված է միայն Տիրոջ առջև արժանավորության վրա: …
Այդպիսին է այս քահանայության հրաշքը: Հարստությունը գործոն չէ: Կրթությունը գործոն չէ: Մարդկանց գովասանքները գործոն չեն: Վերահսկող գործոնը՝ Տիրոջ համար ընդունելի լինելն է:9
Եկել է ժամանակը մեզ բոլորիս համար, ովքեր ձեռնադրվել են Ահարոնյան, Մելքիսեդեկյան Քահանայությամբ կամ դրա որևէ պաշտոններում, մտածել մեր կյանքի մասին, որոշել մեր թերությունները և ապաշխարել վարքագծի այն հարցերից, որոնք հակասում են այն բարձր և սուրբ լիազորությանը, որ մենք ենք ստացել: …
Ոչ մի մարդ` երիտասարդ թե ծեր, … ով … կարգվել է, չի կարող արհամարհանքով վերաբերվել նրան, ինչը նա կրում է: Նա ընկերակցության մեջ է գտնվում Աստծո հետ, և նրա վրա հանգչում է ծանրակշիռ և սրբազան պարտականություն՝ այնպես ապրել, որպես մարդ, որ արժանի լինի խոսելու և գործելու Աստծո անունով, որպես Նրա արժանավոր ներկայացուցիչ:10
Չնայած նրանք, ովքեր իշխանություն ունեն, մեր գլխին դնում են իրենց ձեռքերը և մենք ձեռնադրվում ենք, մենք կարող ենք մեր վարքով զրոյացնել և վտանգի ենթարկել որևէ իրավունք՝ այդ աստվածային իշխանությունը գործադրելու համար:
…«Ոչ մի զորություն կամ ազդեցություն չի կարող և չպետք է պահպանվի քահանայության շնորհիվ. միայն համոզումով, երկայնամտությամբ, մեղմությամբ և հեզությամբ և անկեղծ սիրով.
Բարությամբ և մաքուր գիտելիքով, որոնք անչափ մեծացնում են հոգին՝ առանց կեղծավորության ու առանց նենգության» (ՎևՈւ 121.41–42):
Այսպիսով, իմ եղբայրներ դրանք չափորոշիչներ են, որոնց սահմաններում այս քահանայությունը պետք է արտահայտություն գտնի: Այն վերարկու չէ, որը կարող եք հագնել կամ հանել ըստ ցանկության: Այն արդարակեցությամբ գործադրվելիս, ինչպես մեր մարմնի հյուսվածքները, պիտի կազմի մեր մի մասը բոլոր ժամանակներում և բոլոր հանգամանքներում:11
Մենք պետք է հավատարիմ լինենք մեր մեջ եղած լավագույնին: Մենք պատվի արժանացած Աստծո որդիներն ենք՝ կրելու Նրա աստվածային իշխանությունը: Բայց մենք ապրում ենք չարի աշխարհում: Կա մի մշտական ուժ, որը մեզ ներքև է քաշում, հրավիրելով մեզ ճաշակել այն բաներից, որոնք բացարձակապես անհամատեղելի են աստվածային քահանայության հետ, որը մենք կրում ենք: …
Ձեզ, տղամարդիկ, ես հղում եմ մի մարտահրավեր: Փախեք աղտոտության ալիքից, որը կհաղթահարի ձեզ: Փախեք աշխարհի չարիքներից: Հավատարիմ եղեք ձեր ինքնության ավելի լավ մասին: Եղեք հավատարիմ այն լավագույնին, որ ձեզանում կա: Եղեք հավատարիմ և ազնիվ ուխտերին, որոնք կապված են Աստծո քահանայության հետ:12
Յուրաքանչյուր պաշտոնյա, յուրաքանչյուր ուսուցիչ այս Եկեղեցում, ով գործում է քահանայության պաշտոնում, ենթարկվում է սրբազան պատասխանատվության՝ մեծարելու այդ քահանայության կոչումը: Մեզանից յուրաքանչյուրը պատասխանատու է մյուսների բարօրության և աճի համար: Մենք չենք ապրում միայն մեզ համար: Եթե մենք մեծարենք մեր կոչումները, մենք չենք կարող ապրել միայն մեզ համար:13
Շատ տղամարդիկ, թվում է, մտածում են, որ իրենք ձեռնադրվել են, ուրեմն քահանայությունն իրենցն է՝ մշտապես գործադրելու այն, ինչպես իրենք կնախընտրեն: Նրանք համարում են, թե իրենք կարող են այստեղ ու այնտեղ խախտել ուխտը և պատվիրանը և մեղանչել այս կամ այն ձևով, և այնուամենայնիվ, դեռ իրենց մեջ ունենալ քահանայության զորությունը, և որ Աստված կվավերացնի այն, ինչ իրենք կխոսեն Նրա սուրբ անունով և Քավիչի անունով: Սա ծաղր է դառնում, և ես հավատում եմ, որ այսպիսի գործադրման ժամանակ, նրանք զուր են օգտագործում Աստծո անունը: Նրանք պղծում են Նրա Սիրելի Որդու անունը: Նրանք սրբապղծում են այն սրբազան պարգևը, որը եկել է ձեռնադրման միջոցով և այն իշխանությունը, որը նրանք կորցրել են՝ օրինազանցության պատճառով: …
…Ես նախազգուշացնող ձայն եմ բարձրացնում բոլորին, տղաներին և տղամարդկանց, խուսափել մեղքից: Օրինազանցությունն անհամատեղելի է աստվածային իշխանության հետ: Խուսափեք պոռնոգրաֆիկ նյութերից, ինչպես կխուսափեիք ժանտախտից: Խուսափեք որևէ աստիճանի սեռական մեղքից: Զգուշացեք անազնվությունից և խաբեությունից: Ես աղերսում եմ ձեզ, հսկել հպարտության կամ սին փառասիրության որևէ տարր: Ես խնդրում եմ ձեզ, նայեք ինքներդ ձեր մեջ, տեսնեք , որ չլինի իշխանության կամ հարկադրանքի որևէ վարվելակեպ ձեր կանանց և երեխաների հանդեպ: …
… Ես բավարարված եմ, որ մեր Երկնային Հայրը գոհ չէ որևէ մարդուց կամ տղայից, ով ընդունում է կարգումը, իսկ հետո զբաղվում չար գործերով: Հենց կարգումը ստանալու ընթացքում նա իր և իր Աստծո միջև երդման և ուխտի մեջ է մտնում:14
Ոչ մի մարդ, լինի երիտասարդ թե ծեր, քահանայության չափանիշներով չի ապրում, ով նվաստացնում է կամ պղծում կանանց, ով թերանում է ընդունել հարգանքի այն չափը Աստծո դուստրերի հանդեպ, որը մեր Հայրը երկնքում կկամենար, որ նրանց ցույց տրվեր:15
Եկեք լավ ամուսիններ և հայրեր լինենք: Որևէ մարդ, որը բռնապետ է իր սեփական տանը, անարժան է քահանայության: Նա չի կարող հարմար գործիք լինել Տիրոջ ձեռքում, երբ նա հարգանք, բարություն ու սեր չի ցուցաբերում իր ընտրած զուգընկերոջ հանդեպ: Նմանապես, որևէ մարդ, ով վատ օրինակ է իր երեխաների համար, ով չի կարողանում վերահսկել իր տրամադրությունը, կամ, ով ներքաշվում է անազնիվ ևանբարոյական գործերի մեջ, կգտնի իր քահանայությունը զրոյացված վիճակում:16
Կինը, որին դուք ընտրում եք, կլինի ձեր հավասարը: … Նա ձեր ծառան չէ, ձեր կայքը, կամ որևէ նման բան: Որքան ողբերգական և ծայրաստիճան զզվելի երևույթ է կնոջն անարգելը: Այս Եկեղեցում որևէ մարդ, ով անարգում է իր կնոջը, ով նվաստացնում է նրան, ով վիրավորում է նրան, ով գործադրում է անարդար իշխանություն նրա վրա, անարժան է քահանայություն կրել: Չնայած նա կարող է կարգված լինել, երկինքները ետ են քաշվում, Տիրոջ Հոգին տրտմում է և կլինի ամեն այդ մարդու քահանայության իշխանությանը: Որևէ մարդ, ով զբաղվում է այդպիսի գործերով, անարժան է կրել տաճարային երաշխավորագիր: …
… Եթե կան ոմանք, … ովքեր մեղավոր են այդպիսի վարքագծում, ես կոչ եմ անում ձեզ ապաշխարել: Ծնկի իջեք և խնդրեք Տիրոջը ներել ձեզ: Աղոթեք Նրան ուժի համար, որպեսզի վերահսկեք ձեր լեզուն և ձեր ծանր ձեռքը: Խնդրեք ներողություն ձեր կնոջից և ձեր երեխաներից: …
Ես վստահ եմ, որ երբ մենք կանգնենք Աստծո դատարանի առջև, այնտեղ չի նշվի, թե որքան շատ հարստություն ենք կուտակել կյանքում կամ պարգևներ, որոնք մենք նվաճել ենք: Բայց կլինեն հետազոտող հարցեր մեր ընտանեկան հարաբերությունների վերաբերյալ: Եվ ես համոզված եմ, որ միայն նրանք, ովքեր քայլել են կյանքում սիրով և հարգանքով ու գնահատել իրենց զուգընկերներին և երեխաներին , կստանան մեր հավերժական դատավորից հետևյալ խոսքերը. «Լաւ, բարի եւ հաւատարիմ ծառայ. … մտիր քո տիրոջ ուրախութիւնը» (Մատթ. 25.21):17
5
Քահանայության քվորումը կարող է ուժի խարիսխ լինել իր անդամների համար:
Ես համոզված եմ, որ Տերը նախատեսել է, որ քահանայության քվորումը պիտի լինի ավելին, քան կիրակի առավոտյան աստվածաբանության դասը: Իհարկե, հոգևորության կառուցումն ու վկայության զորացումը արդյունավետ ավետարանական ուսուցման միջոցով քահանայության կարևոր պարտավորությունն է: Բայց սա քվորումի գործունեության մի հատվածն է: Յուրաքանչյուր քվորում պետք է լինի գործող եղբայրություն ամեն անդամի համար, եթե պիտի իրականացվի դրա նպատակը: …
… Քահանայության քվորումը Տիրոջ կազմակերպությունն է Եկեղեցու տղամարդկանց համար, ճիշտ ինչպես Սփոփող Միությունը Տիրոջ կազմակերպությունն է Եկեղեցու կանանց համար: Յուրաքանչյուրն ունի իր պարտավորությունները, իր գոյության համար հիմնական պատճառով՝ օգնելու նրանց, ովքեր կարիքի մեջ են:
Երբ կազմակերպվեց Սփոփող Միությունը, Մարգարե Ջոզեֆ Սմիթն ասաց Միության կանաց մասին. «Նրանք կսլանան անծանոթին սփոփելու համար, նրանք յուղ և գինի կլցնեն թշվառների վիրավոր սրտերին, կչորացնեն որբի արցունքները և կուրախացնեն այրու սիրտը» [Եկեղեցու Նախագահների Ուսմունքները. Ջոզեֆ Սմիթ. Ջոզեֆ Սմիթ (2007), 452]: Ես հուսով եմ, որ նույնը կարելի է ասել քահանայության տղամարդկանց մասին:
Սքանչելի օր կլինի … երբ մեր քահանայության քվորումները դառնան ամրության խարիսխ յուրաքանչյուր տղամարդու համար, ով պատկանում է դրան, երբ յուրաքանչյուր այդպիսի մարդ կարող է ասել. «Ես Հիսուս Քրիստոսի Վերջին Օրերի Սրբերի Եկեղեցու քահանայության քվորումի անդամ եմ: Ես պատրաստ կանգնած եմ բոլոր նրանց կարիքների համար, ինչպես որ վստահ եմ, նրանք էլ կանգնած են պատրաստ՝ աջակցելու ինձ իմ կարիքների մեջ: Միասին աշխատելով` մենք կաճենք հոգեպես որպես Աստծո ուխտի որդիներ: Միասին աշխատելով, մենք կարող ենք կանգնել առանց ամաչելու և առանց վախի ձախորդության ամեն քամու դեմ, որը կարող է փչել, լինի դա տնտեսական, սոցիալական, թե հոգևոր:18
Եկեղեցու առաջնորդները և անդամները, ինչպես տղամարդիկ այնպես էլ կանայք, աշխատում են միասին «առաջ տանել իրենց աշխատանքը քահանայության ղեկավարության և լիազորության ներքո»:
6
Օջախներում և Եկեղեցում տղամարդիկ և կանայք աշխատում են միասին առաջ տանել Տիրոջ արքայությունը:
Այո, տղամարդիկ կրում են քահանայություն, : Բայց իմ կինը իմ զուգընկերն է: Այս Եկեղեցում տղամարդը չի քայլում ոչ իր կնոջից առաջ և ոչ իր կնոջից ետ, այլ նրա կողքին: Նրանք հավասարներ են այս կյանքում՝ այս մեծ ձեռնարկման մեջ:19
Այս Եկեղեցու կանանց մեջ կա ուժ և մեծ կարողություն: Կա առաջնորդություն և ուղղություն, որոշ անկախության ոգի, այնուամենայնիվ Տիրոջ արքայության մասը լինելու մեծ բավականություն, կա նաև քահանայություն [կրողների] հետ ձեռք ձեռքի աշխատելու ոգի`այն առաջ տանելու համար:20
Ես շնորհակալ եմ իմ Հավերժական Հորը սուրբ քահանայության վերականգնման համար, որպեսզի «ամեն մարդ կարողանա խոսել Տեր Աստծո, այսինքն աշխարհի Փրկիչի անունով» (ՎևՈւ 1.20): Ես տեսել եմ այդ քահանայության գեղեցկությունն ու կառավարումը այս նշանավոր եկեղեցում: Ես զգացել եմ, թե ինչպես է դրա ուժը իմ միջով հոսում հիվանդներին օրհնելիս և բժշկելիս: Ես տեսել եմ այն ազնվացումը, որը դա տվել է խոնարհ տղամարդկանց, ովքեր կանչվել են մեծ և լուրջ պարտականության: Ես տեսել եմ դա, երբ նրանք խոսել են զորությամբ և իշխանությամբ բարձրից, կարծես Աստծո ձայնն էր խոսում նրանց միջոցով:
Ես շնորհակալություն եմ հայտնում Տիրոջը այն վկայության համար, որ Նա տվել է ինձ ավետարանի ամբողջականության, նրա լայնության, երկարության և խորության վերաբերյալ: Այն նախատեսված է օրհնելու բոլոր ժամանակների սերունդների որդիներին և դուստրերին, ինչպես ողջերին, այնպես էլ մահացածներին:21
Առաջարկներ ուսումնասիրության և ուսուցման համար
Հարցեր
-
Վերանայեք Նախագահ Հինքլիի ուսմունքների բաժին 1-ը՝ քահանայության վերականգնման վերաբերյալ: Ինչպիսի՞ փորձառություններ են օգնել վկայություն ձեռք բերել այս ճշմարտությունների մասին:
-
Նախագահ Հինքլին ուսուցանել է. «Սուրբ քահանայությունը կրում է իր հետ իշխանություն՝ կառավարելու Աստծո արքայության գործերը երկրի վրա» (բաժին 2): Ինչպե՞ս է այս ճշմարտությունը կիրառվում ծխերում և ճյուղերում, քվորումներում, Սփոփող Միությունում: Ինչպե՞ս է քահանայության իշխանությունը զորացնում ձեր ծառայությունը Աստծո արքայությունում:
-
Բաժին 3-ում վերանայեք այն օրհնությունները, որոնք մենք բոլորս կարող ենք ստանալ քահանայության միջոցով: Ինչպե՞ս եք զգացել քահանայության ուժն ու օրհնությունները:
-
Ի՞նչ կարող ենք սովորել Նախագահ Հինքլիի ուսմունքներից այն տարբերության վերաբերյալ, որը գոյություն ունի քահանայության իշխանության և քահանայության զորության միջև: (Տես բաժին 4:) Ի՞նչ եք կարծում, ի՞նչ է նշանակում քահանայություն կրողի համար «հավատարիմ լինել [իր] մեջ եղած լավագույնին»: Քահանայություն կրողներն ինչո՞ւ չպիտի «ապրեն միայն իրենց համար»:
-
Բաժին 5-ում, ի՞նչն է տպավորում ձեզ Նախագահ Հինքլիի կողմից նկարագրված քահանայության քվորումների և Սփոփող Միության վերաբերյալ: Ի՞նչ կարող ենք անել մեր ծխերում կամ ճյուղերում՝ նրա խորհրդին հետևելու համար:
-
Ինչո՞ւ տղամարդիկ և կանայք պետք է աշխատեն միասին որպես «հավասարներ»՝ Տիրոջ աշխատանքն իրականացնելու համար: (Տես բաժին 6:)
Առնչվող սուրբ գրություններ
Եբրայեցիս 5.1–4, 1 Նեփի 14.12–14, Ալմա 13.1–9, ՎևՈւ 84.33–44, 88.133, 112.30–32
Օգնություն ուսուցչին
«Ուղղեք հարցեր, որոնք պահանջում են սովորողներից գտնել պատասխաններ սուրբ գրություններում և վերջին օրերի մարգարեների ուսմունքներում» (Ուսուցում, չկա ավելի մեծ կոչում [1999], 62):