Maʻá e Kau Takí—Ko Hono Fakataukeiʻi mo Tokoniʻi e Kau Faiakó

ʻI hoʻo hoko ko e takí, ʻoku ʻi ai ho fatongia ke ke “fakataha mo e kau faiako naʻe toki uiuiʻi foʻoú” ʻi hoʻo houalotú pea “tokoniʻi ke nau mateuteu ki honau ngaahi fatongiá” (Tohi Tuʻutuʻuni Fakakātoa, 17.3, Gospel Library). ʻOku hoko e ngaahi fakatahá ni ko ha faingamālie ke fakafeʻiloaki ai ha kau faiako foʻou ki honau uiuiʻi toputapú pea fakalotoa kinautolu ʻaki ha vīsone ki he ʻuhinga ʻo e faiako ʻi he founga ʻa e Fakamoʻuí. ʻI hoʻo hoko ko ha takí, ʻe lava ke ke tokoni ki he kau faiako foʻoú ke nau teuteu ke ngāue ʻi hono fai ʻo e ngaahi meʻá ni:

• Fakahaaʻi hoʻo loto falala ʻe tokoniʻi kinautolu ʻe he Fakamoʻuí ʻi honau uiuiʻí (vakai, Tokāteline mo e Ngaahi Fuakava 88:78).

• ʻOange ki he kau faiako foʻoú ha tatau ʻo e maʻuʻanga tokoni ko ʻení, pea poupouʻi kinautolu ke nau kumi ha ngaahi founga ke fakaʻaongaʻi ai hono ngaahi tefitoʻi moʻoní ʻi heʻenau faiakó.

• Vahevahe mo e kau faiako foʻoú ha faʻahinga meʻa fekauʻaki mo hoʻo houalotú ʻe ʻaonga ke nau ʻiloʻi.

• ʻO ka fiemaʻu, talaange ki he kau faiako foʻoú ʻa e loki ke nau faiako aí pea mo e lēsoni ke kamata ʻakí. ʻOange ha faʻahinga fakamatala pē ʻoku nau fiemaʻu fekauʻaki mo ʻenau kalasí mo e kau mēmipa ʻo e kalasí.

• Fakamatalaʻi ange ki he kau faiako foʻoú te ke lava ʻo tokoniʻi kinautolu ʻi honau uiuiʻí. Fai ha tokoni ʻi he loki akó pea ʻai ke nau lava ke maʻu e ngaahi maʻuʻanga tokoni fakafaiakó ʻo ka fiemaʻu.

• Fokotuʻu ange te ke faʻa vakaiʻi e ngaahi kalasi ʻa e kau faiakó, pea ʻoange ha ngaahi fakamatala tokoni ʻo fakatatau ki he ueʻi ʻa e Laumālié.

• Fakaafeʻi e kau faiakó ke nau kau ʻi he ngaahi fakataha alēlea fakakuata faka-faiakó.

Hokohoko atu hoʻo fakataha mo e kau faiakó ke fai maʻu pē ha tokoni lolotonga e vahaʻataimi ʻoku nau faiako aí. Hangē ko ʻení, te ke lava ʻo fai ha fealeaʻaki nounou mo ha faiako kimuʻa pe ʻi he ʻosi ʻa e kalasí ke aleaʻi ʻa e ngaahi tefitoʻi moʻoni ʻo e Ko e Faiako ʻi he Founga ʻa e Fakamoʻuí. ʻEke ki he faiakó ʻo kau ki he meʻa ʻokú ne ongoʻi ʻokú ne fakahoko leleí mo e ngaahi founga te nau fie fakalakalaka aí. Poupouʻi kinautolu ʻi he angaʻofa mo e houngaʻia ʻi he ngāue ʻoku nau faí.

ʻOku totonu ke ke mateuteu ki he fealēleaʻaki ko ʻení ʻaki haʻo sio ki he faiako ʻa e faiakó. Feinga ke mahino lelei ange ʻa e ngaahi mālohinga ʻo e faiakó pea ʻiloʻi e ngaahi founga te ke lava ai ʻo fai ha tokoní. ʻOku mahuʻinga tatau pē hono langaki ʻo e ngaahi mālohinga ʻo ha faiakó mo hono ʻiloʻi ʻo e ngaahi faingamālie ke fakalakalaka aí.