Ngaahi Fakataha Alēlea Faka-Faiako—Maʻá e Ngaahi Mātuʻá mo e Kau Faiako Kuo Uiuiʻí

ʻOku totonu ke fakahoko ʻe he uooti takitaha ha ngaahi fakataha alēlea faka-faiako faka-kuata, ki he ngaahi mātuʻá mo e kau faiako kuo uiuiʻi ʻi he uōtí fakatouʻosi. ʻI he ngaahi fakataha ko ʻení, ʻe lava ke fealēleaʻaki fakataha ai ʻa e ngaahi mātuʻá mo e kau faiako kehé ʻo kau ki he ngaahi tefitoʻi moʻoni ʻo e faiako faka-Kalaisí (vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 13.4, 13.5, 17.4, 17.5, Gospel Library).

ʻOku fakatou fakahoko tuʻo taha ʻi he kuata ʻa e faʻahinga fakataha alēlea faka-faiakó lolotonga e taimi kalasi miniti ʻe 50 ʻi he Sāpaté.

Ngaahi Fakataha Alēlea Faka-Faiako maʻá e Ngaahi Mātuʻá

Ko Hai ʻOkú Ne Tataki e Ngaahi Fakataha Ko ʻEní? Ko e angamahení, ʻoku tataki ʻa e ngaahi fakataha alēlea fakafaiakó ʻe ha mēmipa ʻo e kau palesitenisī ʻo e Lautohi Faka-Sāpaté . Ka neongo ia, ʻe lava ke vahe ʻe he kau pīsopelikí ha kau mēmipa kehe ʻo e uōtí ke nau tataki ʻa e ngaahi fakatahá ʻi ha taimi ʻe niʻihi.

ʻOku tokangaʻi e ngaahi fakataha alēlea faka-faiako maʻá e ngaahi mātuʻá ʻe he fakataha alēlea fakauōtí, pea tokoni ki ai e kau palesitenisī ʻo e Lautohi Faka-Sāpaté. ʻOku nau fealēleaʻaki fakataha ʻo kau ki he ngaahi fiemaʻu ʻa e mātuʻá mo e ngaahi fāmilí, pea ʻoku nau ngāue fakataha ke fakapapauʻi pe ko e fē ʻi he ngaahi tefitoʻi moʻoni mei he Ko e Faiako ʻi he Founga ʻa e Fakamoʻuí te ne feau lelei taha ʻa e ngaahi fiemaʻu ko iá.

Ko Hai ʻOku Totonu ke Kau Ki Aí? ʻE pule pē ʻa e fakataha alēlea fakauōtí pe te nau fakaafeʻi mai ha ngaahi mātuʻa pau pe fakaʻatā ki he taha kotoa pē ʻoku fie kau maí.

Ko e Fē Taimi ʻOku Totonu ke Fakahoko ai e Ngaahi Fakataha ko ʻEní? ʻE lava ke fakahoko ʻa e fakataha alēlea fakafaiako maʻá e ngaahi mātuʻá ʻi ha faʻahinga Sāpate pē, ʻo fakatatau ki he tuʻutuʻuni ʻa e fakataha alēlea fakauōtí.

Ngaahi Fakataha Alēlea Fakafaiako maʻá e Kau Faiako Kuo Uiuiʻí

Ko Hai ʻOkú Ne Tataki e Ngaahi Fakataha Ko ʻEní? Ko e angamahení, ʻoku tataki ʻe ha mēmipa ʻo e kau palesitenisī ʻo e Lautohi Faka-Sāpaté ʻa e ngaahi fakataha alēlea maʻá e kau faiako kuo uiuiʻí. Ka neongo ia, ʻe lava ke vahe ʻe he kau pīsopelikí ha kau mēmipa kehe ʻo e uōtí ke nau tataki ʻa e ngaahi fakatahá ʻi ha taimi ʻe niʻihi.

ʻOku tokangaʻi e ngaahi fakataha alēlea faka-faiako maʻá e kau faiako kuo uiuiʻí ʻe he fakataha alēlea fakauōtí, pea tokoni ki ai e kau palesitenisī ʻo e Lautohi Faka-Sāpaté. ʻOku nau fealēleaʻaki fakataha ʻo kau ki he ngaahi fiemaʻu ʻa e kau faiakó mo e kau akó, pea ʻoku nau ngāue fakataha ke fakapapauʻi pe ko e fē ʻi he ngaahi tefitoʻi moʻoni mei he Ko e Faiako ʻi he Founga ʻa e Fakamoʻuí te ne feau lelei taha ʻa e ngaahi fiemaʻu ko iá.

Ko Hai ʻOku Totonu ke Kau Ki Aí? ʻOku totonu ke kau ʻa e tokotaha kotoa pē ʻoku faiako ʻi ha kōlomu pe kalasi ʻi he uōtí ki he ngaahi fakataha alēlea faka-faiakó. ʻOku fakaafeʻi foki mo e kau mēmipa ʻo e kau palesitenisī ʻo e kōlomú mo e houalotú.

Ko e Fē Taimi ʻOku Totonu ke Fakahoko ai e Ngaahi Fakataha ko ʻEní? ʻOku kau atu ʻa e kau faiakó ki he ngaahi fakataha alēlea fakafaiakó ʻi ha Sāpate ʻi he taimi ʻoku ʻikai ke nau faiako ai ʻi heʻenau kalasi angamahení.

• ʻE lava ke kau atu e kau faiako mei he kōlomu ʻo e Lakanga Fakataulaʻeikí, Fineʻofá mo e Kau Finemuí ʻi he Sāpate ʻuluakí pe Sāpate tolú, ʻo fakatatau ki he fakahinohino ʻa e kau taki fakalotofonuá.

• ʻE lava ke kau atu e kau faiako Lautohi Faka-Sāpaté ʻi he Sāpate uá pe Sāpate faá, ʻo fakatatau mo e fakahinohino ʻa e kau taki fakalotofonuá.

• ʻE lava ke kau atu e kau faiako Palaimelí ʻi ha faʻahinga Sāpate pē, ʻo fakatatau mo e fakahinohino ʻa e kau palesitenisī Palaimeli mo e Lautohi Faka-Sāpate ʻi he uōtí. Kapau ʻe fiemaʻu, ʻe lava ke fakataha mavahevahe ʻa e kau faiako Palaimelí ia mei he kau faiako kehé ke nau talatalaifale fekauʻaki mo e ngaahi fiemaʻu makehe ki hono akoʻi ʻo e fānaú. ʻE lava ke fakahoko ʻeni lolotonga e taimi hiva miniti ʻe 20, kimuʻa pe hili e ngaahi fakataha angamaheni ʻo e Sāpaté, pe ʻi ha ʻaho kehe ʻo e uiké. ʻE lava ke fakahoko ha fakataha alēlea ʻo tuʻo taha pe lahi ange lolotonga e kuatá, maʻá e kau faiako Palaimelí ke ʻoua naʻa nau mavahe kotoa he taimi tatau, kae liʻaki e ngaahi kalasi Palaimelí ʻi he uike tatau. (Fakatokangaʻi ange: Kapau ʻe fiemaʻu, ʻe vahe ʻe he kau palesitenisī ʻo e Palaimelí ha kau faiako talifaki, fakatahaʻi e ngaahi kalasí pe fai ha ngaahi fokotuʻutuʻu kehe kae lava e kau faiako Palaimelí ʻo ʻalu ki he ngaahi fakataha alēlea faka-faiakó.)

Fokotuʻutuʻu ki he Ngaahi Fakatahá

Ko e ngaahi fakataha alēlea faka-faiakó—maʻá e ngaahi mātuʻá mo e kau faiako naʻe uiuiʻí—ʻoku nau muimui ki he sīpinga ko ʻení:

1. Fevahevaheʻaki mo fealēleaʻaki fakataha (ʻi ha miniti nai ʻe 20). Fakaafeʻi e ngaahi mātuʻá pe kau faiakó ke nau vahevahe ʻa e meʻa ʻoku ngāue lelei ʻi heʻenau akoʻi ʻa e ongoongoleleí ʻi ʻapí pe ʻi heʻenau ngaahi kalasí. Te nau lava foki ʻo vahevahe ʻa e ngaahi faingataʻa ʻoku nau fehangahangai mo iá pe ngaahi meʻa ʻoku nau loto ke fakaleleiʻí.

2. Ako fakataha (ʻi ha miniti nai ʻe 15). Aleaʻi mo e ngaahi mātuʻá pe kau faiakó ha taha ʻo e ngaahi tefitoʻi moʻoni ʻi he Ko e Faiako ʻi he Founga ʻa e Fakamoʻuí. ʻE lava pē foki ke fakaʻaongaʻi ʻa e Haʻu, ʻo Muimui ʻIate Aú ko ha maʻuʻanga tokoni ki he ngaahi fealēleaʻaki ko ʻení.

3. Palani mo fakaafe (ʻi ha miniti nai ʻe 10). Fakaafeʻi e ngaahi mātuʻá pe kau faiakó ke nau vahevahe ʻa e meʻa naʻa nau ako lolotonga e fakatahá mo e founga ʻoku nau palani ke fakaʻaongaʻi ai iá.