mga lalaki nga nagatudlo sang pamilya

Mga Panugyan para sa Lainlain nga Sitwasyon sang Pagtudlo kag Mga Manugtuon

Ang mga prinsipyo sa pagtudlo sa paagi sang Manluluwas mahimo nga gamiton sa bisan ano nga oportunidad sa pagtudlo—sa balay, sa simbahan kag bisan diin. Ugaling, ang tagsa ka oportunidad nagaabot nga may iya kaugalingon nga pinasahi nga mga sirkumstansya. Ang ini nga seksyon nagahatag sang dugang nga mga panugyan nga para gid sa lainlain nga mga manugtuon kag sitwasyon sang pagtudlo.

Sa Balay kag Pamilya

Ang Puluy-an Amo ang Pinakamaayo nga Lugar para sa Pagtudlo kag Pagtuon sang Ebanghelyo

Si Pangulong Russell M. Nelson nagtudlo nga ang puluy-an amo dapat ang “sentro sang pagtuon sang ebanghelyo” (“Becoming Exemplary Latter-day Saints,” Liahona, Nob. 2018, 113). Ang pagpanudlo nga nagakatabo sa simbahan ukon sa seminary malahalon kag kinahanglanon, pero gintuyo ini agud suportahan ang pagpanudlo nga nagakatabo sa balay. Ang mayor nga lugar—kag ang pinakanami nga lugar—sa pagtuon sang ebanghelyo, para sa aton kaugalingon kag sa aton mga pamilya, amo ang puluy-an.

Pero wala ina nagakahulugan nga ang maayo nga pagtuon sang ebanghelyo gilayon nagakatabo sa puluy-an; nagakinahanglan ini sang mahinalungon nga pagtinguha. Si Pangulong Nelson nagpanugyan nga basi kinahanglan mo nga “bag-uhon” ukon “kay-uhon ang imo puluy-an”—indi paagi sa pagguba sang mga dingding ukon pagdugang sang bag-o nga salog kundi paagi sa pag-usisa sang kabilogan nga panimuot sa inyo puluy-an, lakip na ang imo amot sa sina nga panimuot (“Becoming Exemplary Latter-day Saints,” 113). Halimbawa, pamensara ang musika, mga video, kag iban pa nga media sa imo balay, ang mga litrato sa dingding, kag ang paagi sang paghambalanay kag pagtrato sang mga miyembro sang imo pamilya sa isa kag isa. Ang ining mga butang bala nagaimbitar sang impluwensya sang Balaan nga Espiritu? Nagapain ka bala sang oras sa pagtuon sang ebanghelyo, bilang indibidwal kag bilang isa ka pamilya? Ang mga miyembro bala sang pamilya nakabatyag nga ginapalangga, hilway, kag malapit sa Dios kon ara sila sa inyo balay?

Mahimo nga indi mo mabatyagan nga kontrolado mo ang espirituhanon nga panimuot sa inyo puluy-an. Kon amo sina, magmangin pinakamaayo ka nga impluwensya sa imo masarangan kag magpangayo sang bulig sa Ginuo. Tahuron Niya ang imo matarong nga mga pagpaninguha. Kon ginatinguhaan mo nga magtudlo kag magtuon sang ebanghelyo, bisan pa nga indi mo dayon makita ang gusto mo nga resulta, nagamadinalag-on ka.

Ang Pagtuon sa Balay Nasandig sa mga Kaangtanan

Ang “palanggaa ang imo mga ginatudloan” magamit sa tanan nga sitwasyon sang pagtudlo sang ebanghelyo, pero sa balay, dapat ang pagpalangga mas natural kag mas mabatyagan. Bisan pa nga ang imo balay indi gid suno sa imo ginahandum, gintuyo ini nga mangin sentro sang pagtudlo sang ebanghelyo tungod diri ginapasad ang aton pinakanagalawig nga mga relasyon. Ang mga manunudlo sa gwa sang balay mahimo nga mas may eksperiyensya ukon paghanas bilang mga titser, pero indi nila mabaylohan ang kadangatan sang mapinalanggaon, wala katapusan nga mga relasyon nga makita sa puluy-an. Gani sagura ina nga mga relasyon. Ihatag ang oras kag pagpanikasog nga kinahanglanon para magpamati sa mga miyembro sang imo pamilya kag magpatubo sang pagsalig kag pag-intiendi upod sa ila. Makabulig ini sa pagplastar sang mabakod nga pundasyon para sa imo mga pagtinguha sa pagtudlo kag pagtuon sang ebanghelyo sa balay.

Ang Pagtuon sa Balay Mahimo nga Planuhon kag Pwede Man Wala Ginhungod

Kalabanan nga mga klase sa Simbahan nagakatabo kis-a sa isa ka semana, nga may iskedyul sa pagsugod kag pagtapos, pero indi amo sini pirme ang nagakatabo sa balay. Mahimo nga may gin-iskedyul ka nga leksyon sa home evening ukon pang-pamilya nga pagtuon sang balaan nga mga kasulatan, pero ang mga oportunidad sa pagtudlo sa pamilya masami nagakatabo sa indi pormal, pang-adlaw-adlaw nga tinion—samtang nagakaon, nagahimo sang mga ulobrahon sa balay, nagahampang, nagapakadto sa trabaho ukon eskwelahan, nagabasa sang libro, ukon nagatan-aw sang sine nga ululupod. Ang mabaskog nga ulan pwede mangin tsansa para hambalan kon paano kita ginasilungan sang Manluluwas batok sa espirituhanon nga mga unos. Ang isa ka tin-edyer nga may hilimuon nga mabudlay nga desisyon mahimo nga handa magtuon parte sa personal nga rebelasyon. Ang bata nga nahadlok mahimo nga makabenepisyo sa imo testimonya parte sa Manugpaumpaw. Ang kabataan nga nagapasaway ukon nagailinaway sarang matudloan parte sa paghinulsol kag kapatawaran.

Tungod ining mga tinion wala ginaplano, indi mo ini mahandaan pareho sang imo pagpreparar para sa kinaandan nga leksyon. Ugaling, sarang mo nga ihanda ang imo kaugalingon paagi sa pagkasensitibo sa Espiritu kag pagtinguha nga “maghanda gihapon” (1 Pedro 3:15). Ang bisan ano nga tion mahimo nga mangin tion sa pagtudlo ukon pagtuon.

Ang Pagtuon sa Balay Nagalakip sang Ginagmay, Simple, Sige-sige nga Pagpaninguha

Ang mga ginikanan kon kaisa ginaluyahan kon ang ila mga pagpaninguha sa pagtudlo sang ebanghelyo sa balay daw wala nagamadinalag-on. Kon tinag-isaisa, ang isa ka home evening, sesyon sa pagtuon sang balaan nga kasulatan, ukon diskusyon parte sa ebanghelyo daw wala kaayo sang epekto. Pero ang nasupot nga ginagmay, simple nga mga pagtinguha, nga sige-sige nga ginasulit sa kadugayon, sarang nga mangin mas mabaskog kag makapabakod sangsa panalagsa nga dalagko nga tinion ukon importante kaayo nga leksyon. “Ang tanan nga butang kinahanglan matabo sa ila panahon,” siling sang Ginuo. “Karon, indi magpaluya sa paghimo sang maayo kay nagapasad kamo sang pundasyon sing isa ka dako nga buluhaton. Kag halin sa magagmay nga mga butang nagaluntad inang mga dalagko” (Doktrina kag mga Kasugtanan 64:32–33; tan-awa man sa Alma 37:6–7). Gani indi magpangampo, kag indi pagkabalak-i ang pagtigayon sang dalagko nga mga butang sa tagsa ka tion. Magmangin tayuyon lang sa imo mga pagpaninguha.

Sa Balay, ang Pagtuon kag Pagpangabuhi Indi Maseparar

Ang ebanghelyo may gilayon nga kapuslanan sa balay. Didto ang mga tawo nga upod mo sa pagtuon sang ebanghelyo mga tawo nga upod mo sa pagpangabuhi sini—adlaw-adlaw. Ang matuod, sa kalabanan nga tion, ang pagpangabuhi sang ebanghelyo amo ang kon paano kita nagatuon sang ebanghelyo. Gani samtang nagatuon ka kag nagatudlo sang ebanghelyo sa balay, magpangita sang mga paagi nga iangot ang imo ginatun-an sa imo ginahimo. Sa inyo balay, tugoti ang ebanghelyo nga mangin butang nga ginatinguhaan mo nga ipangabuhi, indi lamang butang nga inyo ginahambalan.

babayi nga nagatudlo sang kabataan

Ang mga oportunidad sa pagtudlo sa pamilya nagakatabo sa indi pormal, adlaw-adlaw nga tinion.

Pagtudlo sang Kabataan

Ang Kabataan Nagakinahanglan sang Lainlain nga Paagi

Ang tanan nga bata lainlain, kag samtang nagatubo sila, ang ila mga panginahanglan nagaliwat. Ang paglainlain sang imo pamaagi sa pagtudlo makabulig sa imo nga masabat ang ila lainlain nga mga panginahanglan. Halimbawa, pamensara nga gamiton ang masunod:

• Mga istorya. Ang mga istorya nagabulig sa kabataan nga makita kon paano magamit ang ebanghelyo sa adlaw-adlaw nga pagpangabuhi. Gamita ang mga istorya halin sa balaan nga mga kasulatan, halin sa imo kabuhi, halin sa kasaysayan sang inyo pamilya, ukon halin sa mga magasin sang Simbahan, ilabi na gid ang mga istorya parte sa Manluluwas. Magplano sang mga paagi nga ilakip ang kabataan sa istorya—paagi sa pag-uyat sang mga litrato, pagsulit sang mga dinalan, ukon sa pagdrama-drama sang mga bahin sini.

• Bulig nga mga talan-awon (visual aids). Ang mga litrato, mga video, kag mga bagay makabulig sa kabataan nga maintiendihan kag madumduman ang mga prinsipyo sang ebanghelyo. Madamo nga litrato kag mga video ang makita sa Media Library sa ChurchofJesusChrist.org.

• Musika. Ang mga himno kag iban pa nga sagrado nga mga kanta makabulig sa kabataan nga mabatyagan ang pagpalangga sang Dios, mabatyagan ang Espiritu, kag matun-an ang mga kamatuoran sang ebanghelyo. Ang tono, ritmo, kag simple nga pagbagay sang mga tinaga makabulig sa kabataan nga madumduman ang mga kamatuoran sang ebanghelyo sa masunod nga mga tinuig. Samtang nagakanta ka upod sa kabataan, buligi sila nga diskubrehon kag maintiendihan ang mga prinsipyo nga ginatudlo sa mga kanta.

Kalabanan sa mga kabataan makatuon sing maayo kon ginagamit ang madamo nga igbalatyag. Magpangita sang paagi nga buligan ang kabataan nga gamiton ang ila panulukan, palamatin-an, kag pagtandog samtang nagatuon sila. Sa pila ka mga sitwasyon, mahimo nga makakita ka sang paagi nga ilakip ang ila pagpanimaho kag panabor!

Ang Kabataan Matugahon (Creative)

Kon imo hagaron ang kabataan nga magdrowing, maghimo, magkolor, ukon magsulat sang isa ka butang nga may koneksyon sa isa ka prinsipyo sang ebanghelyo, ginabuligan mo sila nga mas maintiendihan ang prinsipyo kag ginahatagan mo sila sang makaptan nga pahanumdom sang ila natun-an. Pwede man nila gamiton ang ila ginhimo para ipaambit ang ila natun-an sa iban. Ang kada isyu sang Abyan nga magasin nagalakip sang matugahon nga aktibidades para sa kabataan.

Mausisa ang mga Kabataan

Kon magpamangkot ang mga kabataan, kabiga ini bilang mga oportunidad, indi bilang pagpanabad. Ang pamangkot sang kabataan nagapakita nga handa na sila sa pagtuon kag ang ila mga pamangkot makahatag sa imo sang ideya kon ano ang ila ginapamensar kag ginabatyag. Buligi sila nga makita nga ang mga sabat sa ila espirituhanon nga mga pamangkot sarag makita sa balaan nga mga kasulatan kag sa mga pulong sang buhi nga mga propeta.

Ang Kabataan Nagakinahanglan sang Pagpalangga Bisan Pa nga Masabad Sila

Kon kaisa ang bata nagagiho sa mga paagi nga nagasabad sa pagtuon sang iban. Ang kalabanan sa pagsinabad nagahalin sa wala mahatag nga panginahanglan. Kon matabo ini, magmangin pasensyoso, mapinalanggaon, kag mahinangpanon sa mga hangkat nga mahimo ginaatubang sang bata. Basi kinahanglan lang niya sang dugang nga mga oportunidad nga magpartisipar sa leksyon sa positibo nga pamaagi—halimbawa, paagi sa pag-uyat sang litrato, pagdrowing sang isa ka butang, ukon pagbasa sang balaan nga kasulatan.

Kon padayon ang bata sa pagsinabad, mahimo nga makabulig nga istoryahon sia nga sia lang. Sa espiritu sang pagpalangga kag pagpasensya, ipaathag ang imo mga ginapaabot sa iya kag ang imo kompiyansa nga mahimo niya ang mga ini. Dayawa ang bata kon maghimo sia sang mas maayo nga mga pagpili.

Madamo sang Pwede Ipaambit and Kabataan

Kon ang kabataan may matun-an nga bag-o, natural sa ila nga gusto nila ini ipaambit sa iban. Pabakura ining handum paagi sa paghatag sa mga kabataan sang mga oportunidad sa pagtudlo sang mga prinsipyo sang ebanghelyo sa kada isa, sa mga miyembro sang ila pamilya, kag sa ila mga abyan. Pangabaya man sila nga ipaambit sa imo ang ila mga panghunahuna, mga balatyagon, kag mga eksperiyensya mahiangot sa mga prinsipyo nga imo ginatudlo. Makita mo nga may mga paghangop sila nga simple, puro, kag mabaskog.

Ang Mga Kabataan Sarang nga Makabatyag sang Espiritu pero Mahimo nga Magakinahanglan sang Bulig nga Kilalahon ang Iya Impluwensya

Bisan ang kabataan nga wala pa makabaton sang dulot sang Balaan nga Espiritu sarang makabatyag sang Iya impluwensya, ilabi na gid kon nagatuon sila parte kay Jesucristo kag sa Iya ebanghelyo. Kon maghimo sila sang matarong nga mga pagpili, sarang nila mabatyagan ang pag-ugyon sang Manluluwas paagi sa Espiritu. Tudloi ang kabataan parte sa lainlain nga paagi nga nagapakighambal ang Espiritu sa aton. Buligi sila nga makilala ang Iya tingug kon makighambal Sia sa ila. Mabuligan sila sini nga magpatubo sang pangginawi sa pagpangita kag pag-akto sa personal nga rebelasyon sa bilog nila nga kabuhi.

Pagtudlo sang mga Lamharon

Ang mga Lamharon May Dako nga Potensyal

Ang mga lamharon may potensyal sa paghimo sang dalagko nga mga butang sa pag-alagad sa Ginuo. Madamo nga eksperiyensya nga nasulat sa balaan nga kasulatan ang nagapakita nga ang Dios may kompiyansa sa espirituhanon nga mga ikasarang sang mga lamharon. Kon mabatyagan sang mga lamharon nga may salig ka sa ila, ang ila kompiyansa sa ila diosnon nga potensyal magadako kag kibuton ka nila sa mahimo nila malab-ot. Mapinalanggaon nga buligi sila nga makita kon ano ang nahibal-an sang Amay nga Langitnon nga pwede sila mangin. Sunda ang ehemplo sang Manluluwas paagi sa pagpadayon sa pagpalangga kag pagpaisog sa ila, pasensyoso nga pagtrabaho upod sa ila, kag indi pagpangampo sa ila.

Ang Mga Lamharon Nagatuon parte sa Ila Mga Kaugalingon

Ang mga lamharon nga imo ginatudloan nagaporma sang mga pundasyon sang ila testimonya. Ara sila sa proseso sang pagdiskubre sang ila pagtuluohan kag mga pagpati. Nagahimo sila sang mga desisyon nga magaapekto sang dalagan sang ila mga kabuhi. Para mabuhi sa espirituhanon sa sining peligroso nga mga panahon kag agud matuman ang misyon sang Ginuo para sa ila, ang mga lamharon nga imo ginatudlan kinahanglan nga makahibalo kon paano magpangita sang kusog sa tion sang ila mga pagtilaw, mga sabat sa ila mga pamangkot, kag kaisog nga “magtindog bilang mga saksi sang Dios” (Mosias 18:9).

Ang mga lamharon may nagadako nga kaluyag sa pagtuon sang mga butang paagi sa pagpanghunahuna kag eksperiyensya sangsa hambalon lang parte sa mga butang. Buot silingon sini nga ang pagtudlo sang mga lamharon magakinahanglan sang maayo nga abilidad sa pagpamati. Kon mabatyagan sang mga lamharon nga naintiendihan sila, magabatyag sila nga mas bukas sa laygay kag giya. Pasaliga sila nga kilala sila sang Ginuo kag buligi sila samtang nagapakigbato sila sa mga palamangkutanon kag mga pagtilaw. Mahimo man nila gamiton ang ila pagtuo sa Iya paagi sa pagpatubo sang adlaw-adlaw nga pangginawi sang pagpangamuyo kag pagtuon sang balaan nga mga kasulatan kag paagi sa pagserbisyo sa iban. Ang pagpaisog sa mga lamharon nga magpartisipar sa mga klase sa Simbahan kag magtuon nga sila lang makabulig sa ila nga makaangkon sang personal nga mga eksperiyensya nga magapatubo sang ila testimonya parte sa ila diosnon nga palanublion.

Madamo sa Mga Lamharon ang Komportable sa Paggamit sang Teknolohiya

Kon ang mga lamharon nga imo ginatudloan may ila kaugalingon nga elektroniko nga mga gadyet, tandai nga ang mga ini mga gamit sa pagpauswag sang pagtuon. Tudloi sila kon paano gamiton ang ila elektroniko nga balaan nga mga kasulatan kag iban pa nga manwal nga makita sa Librarya sang Ebanghelyo [Gospel Library]. Pwede ka man magpadala sang mga mensahe kag mga link sa mga lamharon para buligan sila nga magpreparar para sa magaabot nga mga leksyon.

Klase sa Sunday School

Kinahanglan nga maintiendihan sang mga lamharon kon ano ang nahibal-an sang Amay nga Langitnon nga sarang sila magmangin.

Pagtudlo sang mga Hamtong

Ang Mga Hamtong Sarang nga Mangin Responsable para sa Ila Pagtuon

Ang hamtong nga manugtuon makasarang na sa paggiho para sa ila kaugalingon sa pagtuon sang ebanghelyo (tan-awa sa 2 Nefi 2:26). Agdaha sila nga maghanda para sa mga diskusyon parte sa ebanghelyo paagi sa pagtuon sang isa ka butang antes pa, kag paisoga sila nga iistorya ang ila matun-an paagi sa Espiritu. Mahimo mo man sila pamangkuton kon ano nga mga prinsipyo sang ebanghelyo ang gusto nila nga hatagan sang oras nga tun-an sing ululupod.

Ang Mga Hamtong Nagabase sa Ila Mga Eksperiyensya Kon Nagatuon

Si Job nagsiling, “Sa mga tawo nga tigulang yara ang kaalam; kag sa kalawigon sang mga adlaw ang paghangop” (Job 12:12). Sa kabilogan, ang kaalam kag espirituhanon nga paghangop nagaabot pagkatapos sang tinuig nga eksperiyensya. Kon magtudlo ka sang mga hamtong, agdaha sila nga iistorya ang mga eksperiyensya nga nagpatubo sang ila pagtuo sa Amay nga Langitnon kag kay Jesucristo. Hatagan sila sini sang mga oportunidad sa pagsaksi kon paano nila nahibal-an nga ang mga prinsipyo sang ebanghelyo nga ila ginatun-an matuod. Ang pag-istorya sang mga eksperiyensya magapatubo man sang mga kaangtanan sa tunga sang imo mga ginatudloan, nga ginabuligan “ang tanan … nga mapasanagan sang tanan” (Doktrina kag mga Kasugtanan 88:122).

Ang Mga Hamtong Nagapangita sang Praktikal nga Paggamit

Ang mga hamtong nga imo ginatudloan mahimo nga may madamo nga mga papel kag responsibilidad sa ila mga propesyon, mga komunidad, mga calling sa Simbahan, kag mga pamilya. Kon magtuon sila sang ebanghelyo, masami nila ginapamensar kon paano makabulig ang ila ginatun-an sa sina nga mga papel. Agdaha sila nga tan-awon kon paano nangin mapuslanon ang pulong sang Dios sa ila pinasahi nga mga sirkumstansya. Sarang mo ini himuon paagi sa pagpamangkot sa ila kon daw ano ka makahulugan kag mapuslanon ang mga prinsipyo sang ebanghelyo sa ila mga kabuhi.

Ang Mga Hamtong Sarang Magpamensar sa Komplikado nga Mga Paagi

Tungod sang ila eksperiyensya kag ihibalo, ang mga hamtong nakahibalo nga indi pirme mahapos ang mga sabat sa mga pamangkot parte sa ebanghelyo. Maapresyar nila nga ang dinalan sa balaan nga kasulatan mahimo nga may madamo nga kahulugan, kag magamit nila ang isa ka prinsipyo sang ebangheyo sa lainlain nga mga sitwasyon sang kabuhi. Agdaha sila nga binagbinagon kon paano nagaangot ang mga prinsipyo sang ebanghelyo sa kada isa kag sa mga nagakalatabo sa ila mga kabuhi. Paisoga ang partisipasyon kag diskusyon para makatuon sila halin sa pinasahi nga mga panan-awan sang kada isa.

babayi nga nagatudlo sang klase

Ang mga hamtong mahimo nga magpaambit sang madamo nga mga eksperiyensya nga nagpatubo sang ila pagtuo sa Amay nga Langitnon kag kay Jesucristo.

Pagtudlo sang mga Tawo nga may mga Kasablagan

Buligi ang Tagsa ka Tawo nga Magtubo kag Magprogreso

Si Joseph Smith nagtudlo, “Ang tanan nga mga kaisipan kag espiritu nga ginpadala sang Dios sa kalibutan mahapos maimpluwensyahan nga magdako” (Teachings of Presidents of the Church: Joseph Smith [2007], 210). Hunahunaa nga ang tanan nga mga anak sang Dios makasarang sa pagpatubo sang ihibalo kag pagprogreso. Pangabaya ang Ginuo nga buligan ka nga mas mahibal-an kon paano tudloan ang kada tawo.

Magtuon parte sa Partikular nga Mga Panginahanglan

Istoryaha ang mga nagatuon ukon ang ila ginikanan ukon ang mga nagabantay sa ila. Hibaloa kon paano ang tagsa ka indibidwal nagatuon sang pinakamaayo kag kon ano nga mga stratehiya ang pinaka-makabulig. Pwede ka man makighambal sa iban nga mga lider kag manunudlo nga may eksperiyensya kag ihibalo nga ipaambit. Para sa mabinuligon nga mga stratehiya sa pagtudlo, tan-awa sa disabilities.ChurchofJesusChrist.org.

Magtuga sang Positibo nga Palibot

Magtuga sang positibo nga palibot kon sa diin ang tanan-tanan makabatyag nga hilway kag ginapalangga. Indi maghaum-haum nga ang tanan nga nagatuon nga may mga kasablagan palareho, kag tratuha ang tagsa ka tawo nga may pagpalangga kag respeto. Paisoga ang iban nga mangin mabuot kag mainabiabihon.

Siguroha nga Ang Tanan Makapartisipar

Ang magagmay nga mga pagbag-o sarang himuon sa mga aktibidades para siguruhon nga ang tanan nga nagatuon makatuon, lakip na ang mga may pisikal nga limitasyon ukon kabudlayan sa pagtuon. Halimbawa, kon ang isa ka aktibidades nagapanugyan sang pagpakita sang litrato, pwede kamo nga magkanta sang naangot nga kalantahon sa baylo sini para malakip ang mga nagatuon nga may sablag sa panulukan.

Magpahamtang sang Tayuyon nga Hilikuton kag Istraktura

Isa ka paagi sa pagpahamtang sang hilikuton amo ang paghimo sang poster nga may iskedyul. Ang imo nga iskedyul mahimo nga magalakip sang mga pangamuyo, oras sang pagtudlo, kag oras sang aktibidades. Ang pagsunod sang iskedyul makabulig buhin sang pamatyagan sang kawala-kasigurohan kag indi pagkahamtang para sa iban nga nagatuon.

Intiendiha Kon Ngaa Nagakatabo ang Mabudlay nga Mga Pamatasan

Tun-i ang mga kasablagan ukon sirkumstansya nga mahimo makaimpluwensya sa tawo nga maggiho sang indi nagakabagay. Hatagi sang maid-id nga atensyon ang nagakatabo kon magsugod ang mabudlay nga mga pamatasan. Mapinangamuyuon nga pamensara kon paano liwaton ang sitwasyon para mas masuportahan ang mga nagatuon.

Para sa dugang nga impormasyon parte sa pagtudlo sang mga tawo nga may kasablagan, tan-awa sa disabilities.ChurchofJesusChrist.org.

klase sang Young Women

Ang mga titser sarang nga magtuga sang positibo nga palibot kon sa diin ang tanan-tanan makabatyag nga hilway kag ginapalangga.

Pagtudlo Gamit ang Internet

Mangin Pamilyar sa Teknolohiya

Antes sang imo klase ukon miting, hatagi sing panahon agud mangin pamilyar ka sa teknolohiya nga imo pagagamiton. Tun-i ang pila ka features sini, pareho sang kon paano mag-share sang mga video ukon mga litrato. Pamensara nga maghiwat sang “testing” nga miting upod ang mga miyembro sang pamilya ukon kaabyanan.

Kalabanan sa mga ward kag stake may espesyalista sa teknolohiya. Mahimo nga may kilala ka man nga iban nga may eksperiyensya sa mga miting gamit ang internet. Magpangayo sang ila laygay ukon giya.

Kakasa ang Posible nga Mga Sablag

Kon posible, magpangita sang malinong nga lugar para magkadto sa imo miting. Ang mga gahod sa palibot mahimo nga makasabad. Paisoga ang mga manugtuon nga himuon ang amo man ukon i-mute ang ila mga mikropono kon wala sila nagahambal.

Maggamit sang Kamera

Kon posible, ipabilin nga nakabukas ang imo kamera agud nga makita sang mga manugtuon ang imo hitsura. Imbitara (apang indi pagpilita) ang mga manugtuon nga buksan man ang ila mga kamera. Makabulig ini nga magpahamtang sang espiritu sang pag-isa kag suporta sa isa kag isa.

Maggamit sang Virtual Chat nga Feature

Madamo sang mga programa para magmiting gamit ang internet nga nagatugot sa mga partisipante nga magsulat sang mga pamangkot ukon mga komento sa chat. May iban man nga nagatugot sa mga partisipante nga alsahon ang ila mga kamot paagi sa internet. Pahibal-a ang mga manugtuon parte sining mga features. Mahimo nga gusto mo magtoka sang tawo nga magbantay sang gin-alsa nga mga kamot ukon mga komento sa chat agud nga makatutok ka sa pagpanguna sa diskusyon.

Magpangita sang Mga Paagi para Ilakip ang mga Nagatuon

Ang kahimtangan sang pagtuon paagi sa internet kon kaisa nagapabudlay sa mga tawo nga makita kag mabatian. Maghimo sang hungod nga pagtinguha nga ilakip ang mga gusto malakip. Kon kaisa nagakahulugan ini sang paghimo sang mas magagmay nga mga grupo (halimbawa, paagi sa pagtunga sang dako nga klase sa Sunday School). Kon kaisa nagakahulugan ini sang pagpangabay sa mga nagatuon antes pa sang klase nga magpartisipar sa partikular nga paagi. Indi pagtugti ang mga limitasyon sang teknolohiya nga magpalipat sa imo ukon magbale-wala sa mga tawo nga gusto kag handa nga magtuon.