Iesu ’e tāna mau pipi i te tāmā’ara’a hope’a

Peace I Leave with You [E hau tā’u e vaiiho ia ’oe nei], nā Walter Rane

Ha’api’i i te ta’ata nō ni’a ia Iesu Mesia noa atu te mea tā ’oeh e ha’api’i ra

E rave rahi mau mea e ha’api’i i roto i te ’evanelia a Iesu Mesia tei fa’aho’i-fa’ahou-hia mai—te mau parau tumu, te mau fa’auera’a, te mau parau tohu, ’e te mau ’ā’amu o te pāpa’ira’a mo’a. Terā rā ’o te mau ’āma’a ana’e teie nō te hō’ē ā tumu rā’au, nō reira hō’ē ana’e fā tā rātou pā’āto’a : tauturu i te mau ta’ata ato’a ’ia haere mai i te Mesia ra ’e ’ia maita’i roa iāna (hi’o Iaroma 1:11 ; Moroni 10:32). Nō reira, noa atu te mea tā ’oe e ha’api’i ra, ’a ha’amana’o ē tē ha’api’i mau nei ’oe nō ni’a ia Iesu Mesia ’e nāhea ’ia riro mai iāna ra te huru. E tauturu te Vārua Maita’i ia ’oe ’ia ’apo mai nō te ’ite i te mau parau mau nō ni’a i te Fa’aora ’e tōna mana fa’aora i roto i te parau tumu tāta’itahi o te ’evanelia, te fa’auera’a, ’e te ha’api’ira’a tohu (hi’o Iakoba 7:10–11).

Tē ha’api’i ra ānei ’oe nō ni’a i te fa’atusiara’a ? ’A feruri i te hi’o haere ’e te mau pīahi e nāhea te mau tusia tā tātou e rave nei nō te fa’atoro i tō tātou vārua i ni’a i « te tusia rahi ’e te hope’a » a te Fa’aora (Alama 34:10). Tē ha’api’i ra ānei ’oe nō ni’a i te hō’ēra’a ? ’A ’ōpua i te ’āparau nō ni’a i te hō’ēra’a tā Iesu Mesia i fa’atupu ’e tōna Metua ’e tāna ani-manihini-ra’a ia tātou ’ia hō’ē tātou ia rāua (hi’o Ioane 17). Hi’o i te tumu parau ato’a o te ’evanelia ’ei rāve’a nō te ha’api’i ’e nō te ’apo mai nō ni’a ia Iesu Mesia.

E hōro’a ato’a mai te mau fa’auera’a i teie rāve’a. ’Eiaha e rōtahi noa i ni’a i te mau ture o te ’evanelia—’a ’apo ato’a mai nō ni’a i te Fa’atere ture. Mai te mea e tāu’aparau ’oe i te Parau Pa’ari ’e e fa’aea noa ’oe i ni’a i te mau mea e rave ’e ’eiaha e rave nō te ora i te hō’ē orara’a maita’i, ’ua ’ere ïa ’oe i te rāve’a nō te feruri i te hōhonura’a e ti’a ia Iesu Mesia ’ia ha’ape’ape’a nō tātou—tō tātou orara’a pae vārua ’e pae tino—nō te hōro’a mai ia tātou i teie ture. E fa’atumu i ni’a i te hina’aro ’e te mana’ona’ora’a o te Fa’aora i te ha’amaita’ira’a ia tātou ma tōna mana, nō te tauturu ia tātou ’ia ora i tāna mau ture. Tē heheu mai nei te mau fa’auera’a ato’a tāna e hōro’a mai nei ia tātou i te hō’ē mea nō ni’a i tōna mana’o ’e tōna hina’aro ’e tōna ’ā’au—’ia ’ite i te ’oa’oa i roto i te roa’a-’āmui-ra’a te reira !

Tūra’i i te parau nō te hiʼoraʼa o Iesu Mesia

E nehenehe tātou e tu’u ia Iesu Mesia i rōpū i te ha’api’ira’a ’e te ’apora’a mai ma te ’itera’a ’e te ha’apāpūra’a ē ’o ’oia te hi’ora’a maita’i roa a’e o te mau parau tumu ato’a o te ’evanelia. ’Ei mau pipi, e’ita tātou e pe’e noa i te mau parau tumu—e pe’e ra tātou ia Iesu Mesia. ’A fa’atumu ai tātou i ni’a i te hi’ora’a maita’i roa a’e o te Fa’aora, e fa’a’ite pāpū mai te Vārua Maita’i nōna ’e e fa’auru ia tātou ’ia pe’e iāna.

’A feruri na i te hō’ē taime ē tē ha’api’i ra ’oe i te parau tumu nō te tāpe’a-māite-ra’a e tae noa atu i te hope’a. E nehenehe te hō’ē ’āparaura’a nō ni’a e nāhea te Fa’aora i riro ai ’ei hi’ora’a nō te tāpe’a-māite-ra’a ē tae noa atu i te hope’a, e fa’atae mai i te mana’o fa’atura marū nōna. E aha tā te feiā ’o tā ’oe e ha’api’i ra e ’apo mai ’e e fāri’i nā roto mai i tōna hi’ora’a ?

Te Fa’aora e fa’aora ra i te hō’ē ta’ata e tārava ra i ni’a i te repo

’Ua hōro’a mai te Fa’aora i te hi’ora’a maita’i roa a’e nō tātou pā’āto’a. ’Ua fa’aora ’oia ia rātou pā’āto’a, nā Michael Malm

Ha’api’i nō ni’a i te mau ti’ara’a, te mau hōpoi’a, ’e te huru o Iesu Mesia

E rave rahi ti’ara’a tō Iesu Mesia i roto i te mau pāpa’ira’a mo’a. E fa’a’ite mai te ta’ata tāta’itahi i te hō’ē o tōna ti’ara’a i roto i te fa’anahora’a a te Atua ’e tē ha’api’i nei te reira ia tātou nō ni’a i tōna huru hanahana. E nehenehe ’oe e hi’o haere ’e te mau pīahi e aha tā te mau ti’ara’a mai te Arenio a te Atua, te pāruru, te ta’ata fa’aoti o tō tātou fa’aro’o, ’e te māramarama o teie nei ao, e ha’api’i nei ia tātou nō ni’a ia Iesu Mesia. Hau atu, ’a tauturu ai ’oe i te mau pīahi ’ia ’ite rahi atu ā nō ni’a i te Fa’aora, ’a haere i’ō atu i tāna i parau ’e i rave nō te ’ite ’o vai ’oia ’e e aha te ti’ara’a tāna e hina’aro e fa’a’ohipa i roto i tō tātou orara’a. ’A ’apo ’āmui mai ai ’oe nō ni’a i te nāturara’a ’e te huru o te Fa’aora, e fa’ahōhonu atu ā te Vārua Maita’i i tō ’oe hāro’aro’ara’a ’e tō ’oe here nōna.

’Imi i te mau taipe ’o tē parau pāpū nei nō Iesu Mesia

« Te mau mea ato’a, » ’ua parau te Fatu « ’ua hāmani ’e ’ua ravehia ho’i nō te fa’a’ite i te parau nō ni’a iā’u » (Mose 6:63 ; hi’o ato’a 2 Nephi 11:4). Ma taua parau mau ra i roto i te ferurira’a, e nehenehe tātou e ’apo mai nō te hi’o i te naho’a taipe i roto i te mau pāpa’ira’a mo’a ’o tē fa’a’ite pāpū nei nō ni’a i te Fa’aora. I roto i teie mau taipe tē vai ra te mau mea mai te faraoa, te pape ’e te māramarama. ’Ia māramarama ana’e tātou nāhea teie mau tao’a e tū’ati ai i te Fa’aora, e nehenehe rātou e ha’api’i ia tātou i tōna mana ’e tōna huru. E nehenehe ato’a ’oe e ’ite mai i te mau tū’atira’a o te orara’a o te Fa’aora i roto i te orara’a o te mau peropheta ’e te tahi atu mau tāne ’e mau vahine ha’apa’o maita’i i roto i te mau pāpa’ira’a mo’a. E heheu mai te ma’imira’a i te mau taipe i te mau parau mau nō ni’a i te Fa’aora i te mau vāhi e’ita e mo’ehia ia ’outou.