Fakahinohino ʻo e Polokalama maʻá e Fānaú
FAQs ki he Polokalama maʻá e Fānaú

FAQs ki he Polokalama maʻá e Fānaú

ʻOku ʻofa ʻa e Tamai Hēvaní ʻi he fānau mo e toʻu tupu ʻo e Siasí. ʻOkú Ne vēkeveke ke tāpuakiʻi kinautolu ʻaki ʻa e fiefia mo e nonga ʻi heʻenau fāifeinga ke moʻui ʻaki ʻa e ongoongoleleí.

ʻI he 2020, naʻe kamata ai ʻe he Siasí ʻa e polokalama Fānaú mo e Toʻu Tupú ke tokoni ki he toʻu tangata kei tupu haké ke nau hoko ko ha kau ākonga tuʻuloa ʻa Sīsū Kalaisi. Naʻe fakatefito ia ʻi ha ngaahi meʻa tefito ʻe tolu: ko hono ako e ongoongoleleí, ngāue tokoní mo e ngaahi ʻekitivitií, mo e fakalakalaka fakatāutahá. ʻI he langa ʻi he fakavaʻe ko iá, kuo tākiekina ʻe he ʻEikí ha ngaahi fakalelei ki he polokalamá, ʻo kamata ʻi Sānuali 2027, ke tokoni ki he fānau mo e toʻu tupu ʻi he kuonga ní ke hokohoko atu ke nau:

  • TUI kia Sīsū Kalaisi.

  • KAU FAKATAHA mo Sīsū Kalaisi mo Hono Siasí.

  • HOKO ʻo hangē ange ko Sīsū Kalaisí.

ʻOku fokotuʻutuʻu fēfē ʻa e polokalamá, pea ʻe tāpuekina fēfē ai ʻa e fānaú?

ʻE tui lahi ange ʻa e fānaú kia Sīsū Kalaisi ʻi heʻenau:

  • Ako fekauʻaki mo ha tefitoʻi moʻoni ʻe taha ʻo e ongoongolelei ʻa e Fakamoʻuí ʻi he Sāpate ʻaukai takitaha, ʻo muimui ʻi he sīpinga “Naʻe fai ʻeni ʻe Sīsū, pea te u lava foki mo au.”

  • Hokohoko atu hono ako ʻo e Haʻu, ʻo Muimui ʻIate Aú mo honau fāmilí pea ʻi heʻenau kalasi Palaimelí.

ʻE ongoʻi ʻe he fānaú ʻoku nau kau kia Sīsū Kalaisi mo Hono Siasí ʻi heʻenau:

  • Teuteu pea kamata ha vā fetuʻutaki fuakava mo e ʻEikí ʻo fakafou ʻi he papitaisó, hilifakinima ko e kāingalotu ʻo e Siasí, pea maʻu ʻa e meʻafoaki ʻo e Laumālie Māʻoniʻoní.

  • Kau ʻi he ngaahi fakatahaʻanga ʻa e Siasí mo tokoni ke palani ʻa e ngaahi ʻekitivitī ʻa e Palaimelí, kau ai ha ʻekitivitī ngāue tokoni fakataʻu.

ʻE feinga ʻa e fānaú ke nau hoko ʻo hangē ange ko Sīsū Kalaisí ʻi heʻenau:

  • Fokotuʻu pea ngāueʻi ha taumuʻa ʻe taha ʻi he māhina takitaha ʻoku fekauʻaki mo e lēsoni ʻo e Sāpate ʻaukaí pea hiki ʻa e meʻa naʻa nau akó (fānau taʻu 8–11).

  • Ako fekauʻaki mo e mālohi ʻo e ʻOtuá mo teuteu ke ngāue ʻi he temipalé.

Ko e fē feituʻu ʻoku totonu ke tau ʻalu ki ai ke maʻu ha fakahinohinó?

Fakaʻaongaʻi ʻa e ngaahi tefitoʻi maʻuʻanga tokoni ko ʻení:

ʻE tokoni fēfē ʻa e mātuʻá mo e kau takí?

Kuo foaki ʻe he Tamai Hēvaní ki he ngaahi mātuʻá ʻa e tefitoʻi fatongia ʻi hono tokoniʻi ʻenau fānaú ke nau tupulaki ko ha kau ākonga ʻa Sīsū Kalaisí. ʻE lava ke fakahoko ʻeni ʻe he mātuʻá ʻi ha ngaahi founga lahi. ʻOku ʻomi ʻe he polokalama Fānaú mo e Toʻu Tupú ha ngaahi faingamālie ki he mātuʻá ke:

  • Talanoa mo ʻenau fānaú fekauʻaki mo e meʻa ʻoku nau ako fekauʻaki mo e Fakamoʻuí mo ʻEne ongoongoleleí. Te nau lava ʻo vahevahe ha ngaahi aʻusia, fakamoʻoni, ʻofa, mo ha fakalotolahi.

  • Tokoniʻi ʻa e fānau taʻu 8–11 ʻi hono fili ʻe he fānau takitaha ʻi he faʻa lotu ha taumuʻa fakamāhina ke muimui kia Sīsū Kalaisi.

ʻOku tokoni ʻa e kau faiako Palaimelí ʻaki ʻenau:

  • Akoʻi ʻa e ngaahi lēsoni ʻo e Sāpate ʻaukaí.

  • Poupouʻi ʻa e fānau taʻu 8 mo motuʻa angé ke nau talanoa mo ʻenau mātuʻá fekauʻaki mo e meʻa naʻa nau akó pea mo fokotuʻu ha taumuʻa fakamāhina ke muimui ʻia Sīsū Kalaisi.

  • Poupouʻi ʻa e fānaú mo e ngaahi fāmilí ʻi he fokotuʻu taumuʻá ʻo ka fiemaʻu.

ʻE palani ʻe he kau palesitenisī ʻo e Palaimelí ʻa e ngaahi polokalama fakataʻu ko ʻení:

  • Ko ha polokalama Fakafiefiaʻi ʻo e Fakalakalaká maʻá e fānau taʻu 8 mo motuʻa angé. ʻI he polokalama ko ʻení, ʻoku fiefia fakataha ʻa e fānaú, mātuʻá, mo e kau takí ʻi he ngaahi aʻusia ʻa e fānaú ʻi he muimui ki he Fakamoʻuí ʻi he taʻu ko iá.

  • Ko ha fakataha Teuteu ki he Papitaisó mo e Hilifakinimá maʻá e fānau ʻoku hoko honau taʻu 8.

  • Ko ha fakataha Teuteu ki he Temipalé mo e Lakanga Fakataulaʻeikí maʻá e fānau ʻoku hoko honau taʻu 11.

ʻOku tokoni ʻa e kau taki ʻekitivitī loto-toʻá ʻaki ʻenau:

  • Palani ha ngaahi ʻekitivitī fakafiefia mo longomoʻui ʻoku fekauʻaki mo e tefito fakamāhina ʻo e Sāpate ʻaukaí ʻo ka fiemaʻu.

  • Fakaafeʻi ʻa e fānau toʻu Loto-toʻá ke nau tokoni ʻi hono palani mo tataki ʻa e ngaahi ʻekitivitií.

Ko e hā ʻa e meʻa ʻe liliu ʻi he Palaimelí ʻi he ʻaho Sāpaté?

ʻI he Sāpate ʻaukai kotoa pē, ʻe maʻu ai ʻe he fānaú ha lēsoni makehe fekauʻaki mo ha tefitoʻi moʻoni ʻo e ongoongolelei ʻa e Fakamoʻuí. ʻOku maʻu ʻa e ngaahi lēsoni ko ʻení ʻi he fakaʻosinga ʻo e Haʻu, ʻo Muimui ʻIate Au—Maʻá e ʻApí mo e Lotú pea ʻi he Gospel Library.

ʻOku fokotuʻu ʻe he ngaahi lēsoni ʻo e Sāpate ʻaukaí ha ongo fakalaumālie ki he māhiná. Te ne lava ʻo kamataʻi ha fepōtalanoaʻaki ʻofa ʻi he vā ʻo e fānaú mo e mātuʻá, pea te nau lava ʻo tākiekina ha ngaahi taumuʻa ke tokoniʻi ʻa e fānaú ke nau muimui faivelenga ange kia Sīsū Kalaisi.

ʻE kei fokotuʻu nai ʻe he fānaú ha ngaahi taumuʻa?

ʻIo. Kamata ʻi he taʻu ʻoku taʻu 8 ai ʻa e fānaú, ʻoku fakaafeʻi kinautolu ke nau fili ʻi he faʻa lotu ha taumuʻa faingofua ʻe taha ki he māhina takitaha ʻo fakatefito ʻi he meʻa ʻoku nau ako ʻi he lēsoni Sāpate ʻaukaí. ʻI he ngāue ʻa e fānaú ke aʻusia ʻenau taumuʻá, ʻoku fakaafeʻi kinautolu ke tohi fekauʻaki mo ʻenau ngaahi aʻusiá—ko e hā ʻa e meʻa ʻoku nau ako fekauʻaki mo Sīsū Kalaisí, founga ʻokú Ne tāpuekina mo tokoniʻi ai kinautoú, mo e founga ʻoku nau maʻu ai ʻa e fiefiá ʻi he muimui kiate Iá.

ʻE fakaʻaongaʻi nai ʻe he fānaú ʻa e Tohi Fakahinohino ʻa e Fānaú lolotongá?

ʻIkai. He ʻikai toe fakaʻaongaʻi ʻa e Tohi Fakahinohino ʻa e Fānaú ʻi he kamata pē ʻa e ngaahi liliu ko ʻení. ʻE lava ke fili ʻe he fānaú mo e ngaahi fāmilí ke hiki ʻa e ngaahi taumuʻá ʻi ha tohinoa pe hiki ʻi ha founga kehe ʻoku faingofua.

ʻE ʻilo fēfē ʻe he fānaú mo e ngaahi fāmilí ʻa e meʻa ke fai ʻi he māhina takitaha?

ʻI he māhina takitaha, ʻe nofotaha ʻa e fānaú ʻi he ngaahi tefitoʻi moʻoni naʻe akoʻi ʻi heʻenau lēsoni Sāpate ʻaukaí, ʻo muimui ʻi he sīpinga “Naʻe fai ʻeni ʻe Sīsū, pea te u lava foki mo au.” ʻOku tokoni ʻa e sīpinga faingofua ko ʻení ki he fānaú ke nau vakai ki he founga te nau lava ai ʻo muimui ʻia Sīsū Kalaisi ʻi heʻenau moʻui fakaʻahó. ʻOku lisi ʻi he Fakahinohino ki he Mātuʻá mo e Takí ʻa e tefito ki he māhina takitaha. ʻIkai ngata aí, ʻoku kau ʻi he makasini Ko e Kaumeʻá ha ngaahi ʻekitivitī fakafiefia ʻoku fehokotaki ki he tefito fakamāhiná.

ʻOku uesia nai ʻe he ngaahi liliu ko ʻení ʻa e ngaahi ʻekitivitī Loto-toʻá?

ʻIo. ʻOku poupouʻi ʻa e kau taki ʻekitivitī Loto-toʻá ke nau tokoniʻi ʻa e fānaú ke palani ha ngaahi ʻekitivitī fakafiefia ʻoku poupou ki he lēsoni Sāpate ʻaukai ʻo e māhina lolotongá ʻo ka fiemaʻu. ʻI ha polokalama fakataʻu ki hono Fakafiefiaʻi ʻo e Fakalakalaká, naʻe palani ʻe he kau palesitenisī ʻo e Palaimelí, ʻoku fakafiefiaʻi ʻe he mātuʻá mo e kau takí fakataha mo e fānaú ʻi heʻenau fakaʻilongaʻi ʻa e founga kuo tupulaki ai ʻa e fānaú ko e kau muimui ʻo e Fakamoʻuí ʻi he lolotonga ʻa e taʻú. ʻIkai ngata aí, ʻoku poupouʻi ʻa e fānau toʻu Loto-toʻá ke nau tokoni ʻi hono palani ha ʻekitivitī fakataʻu ki he ngāue tokoni ʻi he koló.

ʻE kei maʻu nai ʻe he fānaú ha ngaahi fakaʻilonga?

ʻIo. Ko e ngaahi fakaʻilongá ko ha founga ia ke tokoniʻi ai ʻa e fānaú ke nau ʻiloʻi mo fakafiefiaʻi ʻenau ngaahi aʻusiá mo e fakalakalaká ʻi heʻenau hoko ko e kau ākonga ʻa Sīsū Kalaisí.

  • ʻI he māhina ʻoku papitaiso ai ʻa e fānaú pe ko e hoko honau taʻu 8, ʻoku nau maʻu ai ʻa e:

    • Tā valivali ʻo Sīsū Kalaisi.

    • Tatau ʻo e Tohi ʻa Molomoná.

  • ʻI he taimi ʻoku ako maʻuloto pe ako ai ʻe he fānaú ʻa e ʻuhinga ʻo e Ngaahi Tefito ʻo e Tuí, te nau maʻu ha foʻi mama temipale. Te nau fakahaaʻi ʻa e mahino ʻoku nau maʻú ki ha mātuʻa, faiako, pe mēmipa ʻo e kau palesitenisī ʻo e Palaimelí.

ʻOku fatongia ʻaki ʻe he kau taki fakalotofonuá hono foaki ʻo e ngaahi fakaʻilonga ko ʻení ki he fānaú.

ʻE tokoni fēfē ʻa e ngaahi fāmilí ki he fānaú ke nau hanganaki atu ki he ngaahi liliu ko ʻení?

Kimuʻa ʻi Sānuali 2027, ʻe lava ke teuteu ʻa e mātuʻá ʻaki ʻenau:

  • Talanoa mo ʻenau fānaú fekauʻaki mo hono fokotuʻu ha ngaahi taumuʻá mo e founga ʻoku tokoni ai ia ke nau ofi ange kia Sīsū Kalaisí.

  • Seivi ha tatau ʻo e saati ʻi he peesi 4 ʻo e Fakahinohino ki he Mātuʻá mo e Takí.

ʻOku poupouʻi foki ʻa e mātuʻá mo e kau takí ke nau lesisita ki ha tatau taʻetotongi ʻo e makasini Ko e Kaumeʻá.