Mga Kanunayng Ipangutana sa Programa alang sa Kabataan

Gihigugma sa Langitnong Amahan ang kabataan ug kabatan-onan sa Simbahan. Gusto kaayo Niya nga panalanginan sila og kalipay ug kalinaw samtang naningkamot sila sa pagsunod sa ebanghelyo.

Niadtong 2020, gilunsad sa Simbahan ang programa sa Kabataan ug Kabatan-onan aron matabangan ang nagtubo nga henerasyon nga mahimong mga disipulo ni Jesukristo sa tibuok kinabuhi. Gibase kini sa tulo ka tukoranan: pagkat-on sa ebanghelyo, pag-alagad ug mga kalihokan, ug personal nga paglambo. Base sa maong tukoranan, ang Ginoo midasig og mga pagpalambo sa programa, sugod sa Enero 2027, aron matabangan ang kabataan ug kabatan-onan karon nga magpadayon nga:

• MOTUO kang Jesukristo.

• MAHISAKOP ngadto ni Jesukristo ug sa Iyang Simbahan.

• MAHIMONG mas sama ni Jesukristo.

Giunsa pag-organisar ang programa, ug unsaon niini pagpanalangin sa kabataan?

Ang kabataan mas lawom nga motuo ni Jesukristo samtang sila:

• Magkat-on mahitungod sa usa ka baroganan sa ebanghelyo sa Manluluwas matag Dominggo sa pagpuasa, nga nagsunod sa sumbanan nga “Gibuhat kini ni Jesus, ug ako usab makahimo.”

• Magpadayon sa pagtuon sa Dali, Sunod Kanako uban sa ilang mga pamilya ug sa ilang mga klase sa Primary.

Ang kabataan mobati nga sila nahisakop ni Jesukristo ug sa Iyang Simbahan samtang sila:

• Mangandam ug mosulod sa usa ka relasyon sa pakigsaad uban sa Ginoo pinaagi sa bunyag, makompirma nga mga miyembro sa Simbahan, ug makadawat sa gasa sa Espiritu Santo.

• Moapil sa mga miting sa Simbahan ug motabang sa pagplano sa mga kalihokan sa Primary, lakip na ang tinuig nga kalihokan sa pagserbisyo.

Ang kabataan maningkamot nga mahimong mas sama ni Jesukristo samtang sila:

• Maghimo ug magtrabaho og usa ka tumong matag bulan nga may kalabotan sa leksiyon sa Dominggo sa puasa ug isulat kon unsa ang ilang nakat-onan (kabataan nga nag-edad og 8–11).

• Magkat-on mahitungod sa gahom sa Dios ug mangandam sa pagserbisyo sa templo.

Asa kita angay moadto alang sa giya?

Gamita kini nga mga pangunang kapanguhaan:

• Mga Panudlo alang sa mga Leksiyon sa Dominggo sa Puasa

• Giya sa Ginikanan ug Lider (gimantala sa Enero 2027 sa Higala nga magasin)

• Mga Tabang diha sa matag isyu sa Higala nga magasin

• Children.ChurchofJesusChrist.org

Sa unsang paagi nga ang mga ginikanan ug mga lider makatabang?

Ang Langitnong Amahan naghatag sa mga ginikanan sa pangunang tahas sa pagtabang sa ilang mga anak nga molambo isip mga disipulo ni Jesukristo. Mahimo kini sa mga ginikanan sa daghang mga paagi. Ang programa sa Kabataan ug Kabatan-onan naghatag og mga oportunidad alang sa mga ginikanan sa:

• Pagpakig-istorya sa ilang mga anak mahitungod sa ilang nakat-onan mahitungod sa Manluluwas ug sa Iyang ebanghelyo. Mahimo silang mopaambit og mga kasinatian, pagpamatuod, gugma, ug pagdasig.

• Pagtabang sa mga bata nga nag-edad og 8–11 samtang ang matag bata mainampoong mopili og binulan nga tumong sa pagsunod kang Jesukristo.

Ang mga magtutudlo sa Primary makatabang pinaagi sa:

• Pagtudlo sa mga leksiyon sa Dominggo sa puasa.

• Pag-awhag sa kabataan nga nag-edad og 8 pataas sa pagpakigsulti sa ilang mga ginikanan mahitungod sa ilang nakat-onan ug sa paghimo og binulan nga tumong sa pagsunod kang Jesukristo.

• Pagsuporta sa kabataan ug mga pamilya sa pagtakda og mga tumong kon gikinahanglan.

Ang kapangulohan sa Primary nagplano sa mosunod nga tinuig nga mga kalihokan:

• Usa ka kalihokan sa Pagsaulog sa Pagtubo alang sa kabataan nga nag-edad og 8 pataas. Niini nga kalihokan, ang kabataan, mga ginikanan, ug mga lider maglipay nga magkauban sa mga kasinatian sa kabataan sa pagsunod sa Manluluwas nianang tuiga.

• Miting sa Pagpangandam alang sa Bunyag ug Kompirmasyon alang sa kabataan nga mag- 8 anyos.

• Usa ka miting sa Pagpangandam alang sa Templo ug Pagkapari alang sa kabataan nga mag- 11 anyos.

Ang mga lider sa kalihokan sa Valiant makatabang pinaagi sa:

• Pagplano og makalingaw ug makapainteres nga mga kalihokan sa Valiant nga may kalabotan sa binulan nga hilisgotan sa Dominggo sa puasa kon angay.

• Pagdapit sa kabataan nga Valiant ang edad sa pagtabang sa pagplano ug pagpangulo sa mga kalihokan.

Unsa ang mausab sa Primary sa matag-Dominggo?

Matag Dominggo sa puasa, ang kabataan adunay espesyal nga leksiyon mahitungod sa usa ka baroganan sa ebanghelyo sa Manluluwas. Kini nga mga leksiyon makita sa kataposan sa Dali, Sunod Kanako—Alang sa Panimalay ug Simbahan ug sa Librarya sa Ebanghelyo.

Ang mga leksiyon sa Dominggo sa puasa naghatag og espirituhanong kahulogan alang sa bulan. Makapadasig kini og mahigugmaong mga panagsultihanay tali sa kabataan ug mga ginikanan, ug makadasig kini og mga tumong aron matabangan ang mga bata nga mas matinud-anon nga mosunod kang Jesukristo.

Magtakda pa ba gihapon og mga tumong ang kabataan?

Oo. Sugod sa tuig nga ang kabataan mag- 8 anyos, gidapit sila sa pagpili og usa ka yano nga tumong matag bulan base sa ilang nakat-onan sa leksiyon sa Dominggo sa puasa. Samtang naningkamot sila sa pagkab-ot sa ilang tumong, ang kabataan gidapit sa pagsulat mahitungod sa ilang mga kasinatian—unsay ilang nakat-onan mahitungod ni Jesukristo, kon giunsa Niya sila pagpanalangin ug pagtabang, ug kon giunsa nila pagkakaplag og kalipay sa pagsunod Kaniya.

Magamit ba sa mga bata ang kasamtangang Giya sa Kabataan?

Dili. Ang Giya sa Kabataan dili na gamiton human magsugod kini nga mga pag-update. Ang kabataan ug mga pamilya mahimong mopili sa pagsulat sa mga tumong sa usa ka journal o sa pagrekord niini sa laing yano nga paagi.

Unsaon pagkahibalo sa kabataan ug mga pamilya unsay buhaton matag bulan?

Matag bulan, ang kabataan motutok sa mga prinsipyo nga gitudlo sa ilang leksiyon sa Dominggo sa puasa, nga nagsunod sa sumbanan nga “Gibuhat kini ni Jesus, ug ako usab makahimo.” Kining yano nga sumbanan makatabang sa mga bata nga makita kon unsaon nila pagsunod si Jesukristo sa ilang inadlaw-adlaw nga kinabuhi. Ang Giya sa Ginikanan ug Lider naglista sa mga hilisgotan matag bulan. Dugang pa, ang Higala nga magasin maglakip sa makalingaw nga mga kalihokan nga may kalabotan sa binulan nga hilisgotan.

Makaapekto ba kini nga mga kausaban sa mga kalihokan sa Valiant?

Oo. Ang mga lider sa mga kalihokan sa Valiant giawhag sa pagtabang sa kabataan sa pagplano og makalingaw nga mga kalihokan nga mosuporta sa leksiyon sa Dominggo sa puasa karong bulana kon angay. Sa usa ka bag-ong tinuig nga kalihokan sa Pagsaulog sa Pagtubo, nga giplano sa kapangulohan sa Primary, ang mga ginikanan ug mga lider magsaulog uban sa kabataan samtang ilang giila kon giunsa pagtubo sa kabataan isip mga sumusunod sa Manluluwas sa tibuok tuig. Dugang pa, ang kabataang Valiant og edad giawhag sa pagtabang sa pagplano sa tinuig nga kalihokan sa serbisyo sa komunidad.

Makadawat pa ba gihapon og mga imblima [emblem] ang mga bata?

Oo. Ang mga imblima usa ka paagi sa pagtabang sa kabataan nga makaila ug makasaulog sa ilang mga kasinatian ug paglambo isip mga disipulo ni Jesukristo.

• Sa bulan nga ang kabataan gibunyagan o kon sila mag- 8 anyos, sila makadawat og:

  • Painting ni Jesukristo

  • Kopya sa Basahon ni Mormon

• Kon ang mga bata makamemorya o makakat-on sa kahulogan sa mga Artikulo sa Hugot nga Pagtuo, makadawat sila og singsing nga templo. Ilang ipakita ang ilang pagsabot uban sa usa ka ginikanan, magtutudlo, o sakop sa kapangulohan sa Primary.

Ang lokal nga mga lider mao ang responsable sa paghatag niining mga simbolo ngadto sa kabataan.

Unsaon sa mga pamilya pagtabang sa kabataan nga magpaabot niini nga mga pagbag-o?

Sa dili pa ang Enero 2027, ang mga ginikanan mahimong mangandam pinaagi sa:

• Pagpakig-istorya sa ilang mga anak mahitungod sa pagtakda og mga tumong ug kon sa unsang paagi kini makatabang kanila nga mas maduol kang Jesukristo.

• Pagtipig og kopya sa tsart sa pahina 4 sa Giya sa Ginikanan ug Lider.

Giawhag usab ang mga ginikanan ug mga lider sa pag-sign up alang sa usa ka libreng subskripsyon sa Higala nga magasin.